MATIUS 6
6
top Nimi Eiyiboka Gigiwesinok Aboka Un Yuba
1 #
Mat. 23:5
”Ugunda keeboka pe seiniwanalum, nimi yok nim eibsunukaʾ aboka, ugunja perob unaʾ era, nimi hnoum ak ununggom, mem. Ugunda anaso unulumun dara, ugunja neyung imik heikek ululanya bedya dara, ugunuk lunuwoka deknaʾ eleganggunusil. 2Anasa wera, ugunda bonaʾ garan nim ek unuruwaʾ eleganemun dara, sene bol nenelemak nang edya, yok nim gigiweisinok senewoka, benggong leboka bonaʾ laga boklomak sok, ugumba anaso ununggom, mem. Nimi sene bol nenelemak nang era, senenggom pik gwandanyaʾ ak sam gom, Yahudi nim edya yuba don ek ab laga unulumakaʾ dara, yok nim edya eiyiboka pelemak senewoka gigiweisinok aboka unulumak. Wera sikenek gigilesak dara, wera deknaʾ ara alan seleb dolomakaʾ anyek, ugunuk dib lebsin. 3Bok ugunuk dara, ugunda nimi bonaʾ garan nim ek bonaʾ unuruwaʾ arawanalum dara, nimi yok nim eibsijek senewoka hyak geleleng aboka boknelum. 4Ugunja ban unuwanalumaʾ ara, yok nim era eibnenggunusak bok, alda Imik Neyung adya ok hnonok eibnamla. Dara, ugunja geleleng aboka doknowoka unulumunaʾ anyek eillilisilnya bera, ugunjaʾ neyung imik heikek ululanya bedyaʾ anyaʾ, ugumba deknaʾ eleganasil,” hyok.
Heng Uboka MolonaĘľ Amba Lebok Yuba
(Luk. 11:2-4)
5 #
Luk. 18:10-14
”Ugunda heng uboka molowanamun dara, sene bol nenelemak nang eneso uro molonggom. Sikda nimi yok nim edya perob seneweisinokaʾ aboka deknaʾ gasaʾ ak gom, Yahudi nim edya yuba don e pik sekoka moloro yabalamak. Dara ban unulumakaʾ adya, wera sikda deknaʾ seleb dolomakaʾ anyek, ugunuk dib lebsin. 6Bok, ugunda heng uboka molowanamun dara, e lomok wekoka pika seregoka ugunjaʾ neyung be laga unggululanya bek molowanalum. Dara, ugunja neyung bedya ugunja doknowoka unuwanalumaʾ eibnesilnya bedya, alda ugunuk perobaʾ eleganesil.” 7”Ugunda heng uboka molowanamun dara, Imik Neyung ak elgom ulumak nim edya waranaʾ mololdibilloklemak sok, ugumba ununggom, mem. Ban unulumak nim edya dara, waranaʾ mololomab dara, Imik Neyung adya kebnesilaʾ anyaʾ aboka unulumak. 8Ugunda anam molowanggumna salek enyek, ugunja dobsibya senelelumaʾ ara, Imik Neyung ara anam danyek ella ulusilaʾ anasa, sikja mololemak sok ugumba ununggom, mem. 9Anasa molowanamun dara, ban nenyek leboka molowanalum:
Nunja neyung imik heikek ululamnya o, anja si nera munaĘľ gobdo geisa ululul.
10Anda nunjaĘľ dubnya ululam. Anadya wera sokok an wenelemnesilim. Anja senelelamaĘľ ara, imik heikek sam gigiwoka unulamla sok, sokok anaba unululul.
11Nunja sumen denemabnya nek sunuwoka, or doboka elegeisilom.
12Yok nim eb malya ubdangamna nim eb memeldalamab sok, anda anaso uboka nunja malya unaĘľ eneba doboka bobogeisilom.
13Nunda nauba sunulusil ak sam bo yangganggunesilim bok, alda hyak meilinya bek ab blebnesilem. Anda hyak senenggom migib dubnya uboka, anja si nera sobaʾ imik ulmorulumnamla. Amin.”
14 #
Mrk. 11:25-26
”Ugunda malya ubdangamun nim eb memeldalamnalum dara, wera ugunja neyung imik heikek ululanya beneba ugunja meknenaʾ doboka boloklomnesil. 15Bok ugunda malya ubdangamun nim eb memeldanggulumnalum dara, ugunja neyung imik heikek ululanya beneba ugunja meknenaʾ doboka boloknenggulumnesil,” hyok.
Imik Neyung Amba Gwaneng Loboka Giblemak Yuba
16”Ugunda Imik Neyung amba gwanenga lobnelum dara, hogunga boluma yobuka sene bol nenelemak nang ulumak sok unaʾ ara mem. Sikda hogunga yok uboka giblamna dara, yok nim edya sikda Imik Neyung amba gwaneng lomak aboka ella danokaʾ aboka unulumak. Dara, wera sikda alan seleb deknaʾ dolomak an, anera dib lebsin. 17Bok ugunda Imik Neyung amba gwanenga loboka molowanalum dara, hogunga mek elegoka, hong ngiknaʾ mek ngikdanalum. 18Anadya yok nim edya dara, sikda Imik Neyung amba gwanenga lomak senewanggunusak bok, alda ugunja neyung laga eilinggulumaknya bedya ok hnonok ella ubnamla. Anya unu doboka unulumnelumaʾ anyek, ugunja neyung be eillilesilnya bedya, alja deknaʾ ugunuk eleganesil,” hyok.
Imik Heikek BonaĘľ Beillilesil Yuba
(Luk. 12:33-34)
19 #
Yak. 5:2-3
”Sokok an nim adya hokaʾ doboka, mura gluboka gereremaʾ delemlaʾ ak an, perob bonaʾ nauba ugun dam nang amba beilinggom, mem. 20Alda imik heik anyek, nim adya hokaʾ dol yangganaʾ loboka, mura glubnaʾ loboka, gereremaʾ mekaʾ denggulumlaʾ ak sam anyek, perob bonaʾ bolowoka beillilelulum. 21Ugunja bonaʾ ulumlaʾ ak ara, ugunja ganya eneba anyagan malamla,” hyok.
22”Ugunja heng era, ugunja nong emba wesaʾ dibaʾ ulumla. Ugunja heng enyek geisa perob dara, wera ugunja nonga nidyaʾ ara, dilinaʾ ok yebel loblamla. 23Bok ugunja heng era malya dangalamla dara, ugunja nonga nidyaʾ anaba gunaʾ sene-monu al loblamla. Anasa wera, ugunuk an ulusil wesaʾ enyek gunaʾ dangalasil dara, wera hyak senenggom gunaʾ ek sene-monu al loblamla!” hyok.
Imik Neyung Ab BonaĘľ Ab Yuba
(Luk. 16:13, 12:22-31)
24”Hnonnya bek ara nauba wanaʾ uboka yoknya bek ara lek senewanamsoʾ anasa, goma hnonnya bek ara malya senewoka, yoknya bek ara pe bojam ubnamsoʾ anasa, nimi ben hnon alda nimi penya nang emba aboka neikewenyek wa webnenggunumso. Anasonya neikik, ugunda Imik Neyung amba wa we, onoʾ bonaʾ amba wa we, ubnenggunusom.”
25”Anasa wera ugunuk banyek lebsin, Ugun nong unaʾ emba dara, ugunda ganya daldom-daldom anaʾ ara mem. Nera ugunda ongowanasomaʾ amba gom, ugun denesomaʾ amba leboka ganya daldom-daldom anggom, mem. Nimi nong unaʾ ara mek so bok, denaʾ ak dara, nauba perob so de? Goma, ongon akleng enyek perob so bok, nong anyek dara, malya so de? 26Ugunda im pik uru yabalamak wining enyek pe kendululum. Sikda wa weboka menggulumak, gwanenga yongonggulumak, denaʾ ulumlaʾ ara neikaʾ ak e soboka beilinggulumak. Wera ban ununggulumakaʾ anyek babya, ugunja neyung be imik heikek ululanya bedya sikenek denaʾ elegoka bo ulusil! Wining era or domdigum so bok, ugun nong ara perobaʾ nong ak unggululum de? 27Ugun gangganek nimi ben hnon, ganya seininaʾ mandebnaʾ adya, alda pe goʾ nauba ubwenewanamso de?”
28”Ugunda hekasa boksom amba ganya eboka daldom-daldom alalum do? Ugunda beiyek sam moulumla perob sigil esaʾ enyek pe kendululum. Sigil esaʾ ara, alda hnon wa weboka, aklenga winggulumlaʾ ak ulumla, 29#1Raj. 10:4-7; 2Taw. 9:3-6bok Salomo bera yokaʾ-yokaʾ dubnya ulumokaʾ anaba, perob sigil esaʾ anaso ulumla hyak perob so boksom bokaʾ era hnon ongonggulumok! 30Beiyek sam seklamlaʾ nidyaʾ ara, sumen pe uruganaʾ ara, ampum dan dara, busaʾ dinilimak. Bok anyek babya Imik Neyung adya beiyek seklamlaʾ ak perob hogunga kemenaʾ meewoka beillilamla dara, ugunuk dara, wera ongiyiwanggunusil de? Bok ugunuk dara, dib senenaʾ ara mek ok. 31Nunda hek denaʾ denemab do? Goma, Nunda hek meka denemab do? Goma, Nunda hekaʾ ak ongowanamab do? aboka ganya daldom-daldom aboka wenyanggom, mem. 32Ban unuruwaʾ nidyaʾ ara, nak yaso senewoka dulumak nim era, yok-yok mok soko nim Imik Neyung ak elgom ulumak nim edya danyek, hnonok unulumak. Ugunjaʾ neyung be imik heikek ululanya bedya dara, ugunja nidyaʾ doboka deisibya senelelumaʾ nidyaʾ ara, alda ella ulumla. 33Imik Neyung adya ugun nong ok anyek wenewoka usinaʾ ab, alja perob senelamlaʾ ab, nonoganob senen ulululum. Dara, yokaʾ-yokaʾ nidyaʾ ara ugunuk makoka eleganesil. 34Anasa wera, ampum amba dara, ganya daldom-daldom anaʾ ara yok ubnelabok anasa, ugunda ampum amba ganya daldom-daldom anggom, mem. Sumen ok malya nauba dangalalanya nera yok anasa, onoʾ ampum amba ganya hnon daldom-daldom anggulumnesibya,” hyok.
Currently Selected:
MATIUS 6: LAINLC
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena