Yivani, nâbo ubulumko bumemeza!
Nayo ingqiqo nantso izazisa.
Kaloku bumi ngasezindleleni phezu kweentaba;
ewe, nabu buthe bhunxe eziphambukeni zeendlela.
Nabo bungxang' emasangweni edolophu;
ewe, buyamemelela ekungeneni esixekweni:
“Hoyina, ndibhenela kuni, nina nonke luntu;
ndiyanibiza nani, nzala yakwantu.
Kambe nani, ziyatha, fundan' ingqiqo,
nani, nina zidenge, qalisan' ukuqonda.
Phulaphulani, kuba ndiza kutheth' izintw' ezibalaseleyo;
yivani, kuba ndiza kuyixel' imfanelo.
Kaloku ngomlomo wam ndiza kutheth' inyaniso,
kuba ke mna ndiyithiyil' inkohlakalo emilebeni yam.
Onke amazwi omlomo wam anyanisekile;
ubuqhophololo nobuxoki abukho kuwo.
Kumntu oqondayo onke acacile;
kwâbo baziyo onke alungile.
Nawe ke, yamkela ingqeqesho kunesiliva;
ndithi thatha ulwazi kuneyona golide.
Mna bulumko ndiyawagqitha namatye exabiso;
nakwiindidi zobutyebi mna andidlulwa nto.
“Mna bulumko ndihlala ndithe qwa;
ndixakath' ulwazi kunye nokulungelelanisa.
Ukumthobela *uNdikhoyo kukubuthiya ububi.
Yiloo nto ndikuchasileyo ukuzigwagwisa,
ikratshi, ukungabi nasimilo, kunye nentetho egwenxa.
Ndingusomacebo, ndingumthombo weembono ezichubekileyo;
ndinako ukuqonda, kanti nokomelela kokwam.
Ewe, oozikumkani balawula ngam,
neziphathamandla zilawula ngobulungisa nje ndim.
Bonke abasemagunyeni bancedwa ndim lo:
oomatshawe, noozikhulu, nabagwebi ngokwabo.
Kaloku ndiyabathanda abo bandithandayo,
futhi ndiyafumaneka kwabo bandifunayo.
Ndibathi jize ngesihomo nendyebo,
batsho babe nobutyebi obuzinzileyo nenkqubela.
Inzala engenxa yam ingaphezu kwayo negolide;
imveliso yam iyayibetha neyona siliva.
Ihambo yam bubulungisa bodwa;
iindlela zam zifanelekile.
Ubutyebi lilifa endibanikayo abo bandithandayo;
ndibathi jize ngoovimba abaphuphumayo.
“Ekuqalekeni kwendalo kaNdikhoyo mna ndandikho ndingowakhe;
ewe, ndandikho ingekabikho imisebenzi yakhe yamandulo.
Mna wandiqingqa kwasephakadeni,
kuqala ngqa, nehlabathi lingekabikho.
Ndavela engekabikho namanzi anzongo-nzongo,
tanci ingekaveli nemithombo ephuphuma amanzi.
Ndingowokuqala phambi kwazo neentaba;
neenduli zilibone emva kwam ilanga.
Ndabakho ungekabikho umhlaba neentili zawo;
ewe, kwakungekabikho nothuli olu ehlabathini!
Ndandikho ekumiselweni kwamazulu nguThixo,
xa wayetwabulula isibhakabhaka kumanzi anzongo-nzongo.
Xa wayesambathisa isibhakabhaka ngamafu ndandilapho,
nangokuya wayeseka imithombo yeelwandle ndandikho.
Ndandilapho xa wayemisa imida yolwandle,
xa wayesithi: ‘Latyuza, kodwa ungagqithi apha.’
Ekuzimiseni kwakhe iziseko zehlabathi ndandikho.
Ewe, ndayingcali yomsebenzi, ndiyintonga yakhe yasekhosi;
ndandizele yimincili iimini ngeemini,
ndivuya apho ecaleni kwakhe.
Ngenene ndandichulumacha kulo elimiweyo;
ndandiziva ndinemihlali phakathi koluntu.
“Ngoko ke, bonyana, ndiphulaphuleni,
kuba banoyolo abo bahamba ngeendlela zam.
Yamkeleni ingqeqesho, ukuze nibe zizilumko;
sanukuyityeshela, koko bambelelani kuyo.
Unenyhweba kambe umntu ondiphulaphulayo;
nditsho lowo uhlala enkundleni yam yonke imihla,
osoloko elindile emasangweni am phaya.
Ozuze mna ke ubufumene ubomi;
uxhamla ukwaneliseka kukaNdikhoyo.
Kambe ke yena ondiphosileyo uzenzakalisile;
kanti ke lowo undithiyileyo uthand' ukufa.”
I-App yeBhayibhile
I-App yeBhayibhile Yabantwana
