GÉNESIS 13
13
Abramwan Lotwan t'aqanakusqanku
1Abrammi Egiptomanta lloqsirqan Neguev kinrayman, warmintin, lliw kaqninkunantin, hinallataq Lotpas paywan kuska. 2Abramtaq karqan uywayoq, qolqeyoq, qoriyoq, qhapaqllaña. 3Hinaspan asta-astarikuspa Neguev ch'inneq kinrayninta Betelkama kutimpurqan, Betelwan Haiwan tupaypi ñawpaq karpan karqan chayneqkama, 4ñawpaqta altarta perqasqanman, hinaspan chaypi Abramqa Señor Diosmanta mañakurqan.
5Hinallataq Abramwan puriq Lotpas karqan ovejayoq, cabrayoq, wakayoq, karpakunayoq ima. 6Hallp'ataq paykunapaq mana ayparqanchu kuska tiyanankupaq askha uywayoq kasqanrayku, chaymi huk cheqasllapi kuska tiyayta mana atirqankuchu. 7Ch'aqwallarqankutaqmi Abrampa michiqninkuna Lotpa michiqninkunawan. (Chay tiempopin chayneqpi tiyarqan Canaán runakuna Fares runakunapas).
8Chaymi Abramqa Lot-ta nirqan:
—Ama ch'aqwasunchu ñoqawan qanwan, amallataq michiqninchiskunapas ch'aqwachunchu, wawqentinmi kanchis riki. 9Kay llapan hallp'aqa munayniykipin kashan akllarikunaykipaq. Valekuykin t'aqarikuwanaykipaq. Lloq'eman qan rinki chayqa, ñoqa pañaman risaq, qantaqchus pañaman rinki chayqa, ñoqa lloq'eman risaq, nispa.
10Hinaqtinmi Lotqa qhawarirqan, hinaspan rikurqan Jordán pampantinta, llapallan qarpayniyoq Zoarkama kasqanta, Señor Diospa huertanta hina, Egipto hallp'ata hina. (Chay hinan karqan manaraq Señor Diosqa Sodomata Gomorrata thunishaqtin). 11Chaymi Lotqa paypaq akllakurqan Jordán pampata llapanta, hinaspataq inti lloqsimuy kinrayman astakurqan, chaymi t'aqarinakapurqanku. 12Abrammi tiyarqan Canaán hallp'api, Lot-taq tiyarqan pampa llaqtakuna qayllapi, karpankunata asta-astarispa Sodomaman chayanankama. 13Sodoma runakunan ichaqa millay karqanku, Señor Dios contra sinchi huchasapakuna.
14Lotpa t'aqarikapusqan qhepatataq, Señor Diosqa Abramta nirqan:
—Maypichus kashasqaykimanta allintapuni qhawariy wichayta, urayta, inti lloqsimuyta, inti haykuytawan. 15Lliw hallp'a rikusqaykitan wiñaypaq qosqayki, hinallataq mirayniykimanpas. 16Ñut'u hallp'ata hinan mirayniykita askhayachisaq, pipas ñut'u hallp'ata yupayta atinqa chayqa, mirayniykipas yupasqallataq kanqa. 17Hatariy, puriy hallp'aq sayayninta kinraynintapas, qanmanmi chayta qosqayki, nispa.
18Abramtaq karpanta astaspa rirqan, hinaspan Hebrón qaylla Mamrepi terebinto sach'akuna qayllapi tiyakurqan. Chaypin Señor Diospaq altarta perqarqan.
Currently Selected:
GÉNESIS 13: QC88
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
Biblia en Quechua de Cuzco © Sociedades Bíblicas Unidas, 1988.