ÀfaꞋa 3
3
Bɔ bəâ wòt kǒ tàa ŋɔ̧̀ɔ̧̀mà la
1È li ngu ane àli ako, Pità bɔ̂ Jɔ̌n e me ghǎ a èbem lob nɨ̧ Mbɔ̧ɔ̧mà a Jèlusalèm ane nyèm tetat, è wû àfɨꞋa Bèjuê àa ngɨ̀ bɔ ghà ntsàꞋtè a Mbɔ̧ɔ̧mà la. 2Bɔ ghà tê bɔ̀ wua ètsələèꞋ nɨ̧ wu bɔ̀ le wua ntɔ̂ ane ndaŋe we ntsɔ̧̀ la, bɔ ye wòt kǒ tàa ŋɔ̧̀ɔ̧̀mà ebuꞋu te àfɨꞋa bɔ li mbi atò la. Bɔ li ngua ŋèꞋa atò àli àgème ngà ntsia a ètsəêkaã lob nɨ̧ Mbɔ̧ɔ̧mà a Jèlusalèm, mbɨ̀Ꞌɨ̀ taa me lo̧ èkab abua bòt nga etsàꞋte a Mbɔ̧ɔ̧mà a èbem lob nɨ̧ Mbɔ̧ɔ̧mà yu la. 3AfɨꞋa mbê ngaa è ye a Pità bɔ̂ Jɔ̌n ngà enyi a lob və la, tà shù̧ù̧te awɔb nê bɔ̀ ŋa àghɨ abua zi. 4Pità bɔ̂ Jɔ̌n e tsitè àghɨ ayɔb ane tò. Pità bɔ̂ shu abua tò nê, “Me lɨ̀ŋkè awa.” 5Ale, tà tsìte àghɨ azi ane yɔb me chɨ̀Ꞌɨ nê bɔ̀ɔ ŋa àghɨ abua zi.
6Ka Pità shu abua tò nê, “E mbàkà bɔ èkab, ka maa ŋa wê àghɨa mâ bɔ la. Ane èlen Yesò Klistò wòt Nazàlet, mâ shu abua yê nê, lɔ̀Ꞌɔ a si me ghȩ̀ȩ̀ne.” 7Tà shu ale, mbɔ̂ ntsàà àbu azi mbà̧aã àbualu̧ atò, ndɔ̀kè atò tà lɔꞋɔ a si. KwàꞋ àfɨꞋa mbɔŋ, èka tò e bê nkwèèlê fɔ̀ɔ̀lè nê mbɔ̀ɔ̀latsə. 8Tà kȩ ndɔ̀Ꞌ ntɨ̧ àtatsi, mbùꞋ me ghȩ̀ȩ̀ne. Bɔ̂ tò ba e gha a èbem lob nɨ̧ Mbɔ̧ɔ̧mà a Jèlusalèm, tà me ghȩ̀ȩ̀ne nkȩta nguꞋta a Mbɔ̧ɔ̧mà. 9Bòt bàgème abot e ye atò ndɨ tà tsiꞋa ngȩ̀ȩ̀nà nguꞋta Mbɔ̧ɔ̧mà la. 10Mbɨ̀Ꞌɨ̀ bɔ lȩê me ye è wu tòà wu tà lè wua ntsèkâ a ndaŋe ètsələèꞋ ntsɔ̧̀ lob nɨ̧ Mbɔ̧ɔ̧mà ndò̧a mèkab abua bòt la, a tsè àwɔb tè bɔ bùꞋ me màkè àghɨa a ghɨ̂ ka tà pem la.
Èngǎ̧ Pità a èbem lob nɨ̧ Mbɔ̧ɔ̧mà
11Mbê wu bɔ bə atò la ghɨ̀ ale, mbà̧aã a Pità bɔ̂ Jɔ̌n ntɨ̧̂. Ànəa ngaa a bê ntsè a waa waa, tè bɔ tsiꞋi me lùùla nga adzìꞋ yu a mbì lob nɨ̧ Mbɔ̧ɔ̧mà a Jèlusalèm bɔ̀ɔ ntɔ nê ètsələèꞋ Fɔ̧̀ Sàlemun la, eye ànəa ngaa. 12AfɨꞋa Pità ye bòt bu ndùùlà nkɨ̀Ꞌâ la, tà shu abua yɔb nê, “Bòt Izəèlȩ̀, ànəê yaa a ghɨ̀ na ka ntsè àwɨ̧ anè à? Ghǎ ghɨ̂ ka bɨ tsitè àghɨ ayɨ̧ ane ya nyaŋ anè à? Bɨ tanda nê mbê waa ghȩ̀ȩ̀nè ane mètàŋ ma, kò wu ndɨ wu bàa nkùŋà a Mbɔ̧ɔ̧mà nyaŋ la à? ÀwɔꞋ, a ntsě ale. 13Mbɔ̧ɔ̧mà wu bètǎt nyaꞋ ba Abàlàghâm bɔ̂ Asàk, nè Jàkɔ̂b e li ngua ntsàꞋtà la, è nyɨꞋtè awa ndɨ Waã vi Yesò li nchɨɨme nguê la. Ka bɨ li ŋǎ atò abua bòt bɔ̀ɔ mbà̧aã àlaꞋ ayɨ̧ la nê bɔ̀ buŋa. Bɨ li ndzì mènəè àtsəa Yesò a mbì Pȩlèt fɔ̀ɔ̀le afɨꞋa tà tu̧ nê bɔ̀ ka mbùŋè a Yesò la. 14Tà li ŋǎ èntɨ̧ɨ̧ vi wuê ndaꞋa abua Mbɔ̧ɔ̧mà, mè ntɨ̧ɨ̧ ndɨŋndɨ̀ŋ a mbì tò, ka bɨ tsi atò ayɔɔ tè ntsìꞋi shù̧ù̧te a Pȩlèt nê tà yàa wuê wòt tà wu lɨ̧̂ la sàŋ, mbɔ̂ ŋǎ a Yesò bɔ bùŋè. 15Eyaa wu ndɨ bɨ li ngɨ̀ ka mbùŋè wòt wu tàa ŋǎ bɔbȩ ngule mèmpème kàlìà la. Ka Mbɔ̧ɔ̧mà li njù̧ù̧me atò tè bàambɔŋ e ye mè nkoê. 16Wu mètàŋ èlen Yesò ka e ghɨ̂ èka mbê waa e lɔ̀Ꞌtè la. Mbê waa bɨ ye atò a si ŋàa mè nko atò ntsɔ̧̀ la, è pem nkàà èntɨ̧ɨ̧ tò tà zi ane Yesò la, mbɨ̀Ꞌɨ̀ bɨ̀ambɔŋ bɨ ye la.
17“Mbɨ̀Ꞌɨ̀ àa ale la à bɔnyɨ bɔ̧, mâ ko nê àghɨa bɨ bɔɔjuŋ bɨ̧ e li ngɨ ane Yesò la, bɨ li ngɨ̀ kà koê. 18È li ngu tê afɨꞋa mbì, Mbɔ̧ɔ̧mà ghɨ̀ bèndàꞋàtɔŋ bi bàgème be tsɔ̀tè ndɨ Fɔ̧̀ wu tà li ndzɔꞋ etsàà la, nàa li ye ngoꞋ la. A li mbê mè ntè wuê mbɨ̀Ꞌɨ̀ tà li shuê la. 19È wu ale, bɨ̀ waꞋa mènəè kàbɔ̀ŋ mɨ̧, nkuŋe a Mbɔ̧ɔ̧mà mbɨ̀Ꞌɨ̀ taa waꞋa a kàbɔ̀ŋ wɨ̧, 20mbɨ̀Ꞌɨ̀ Tǎt wa Mbɔ̧ɔ̧mà naa tu̧u̧ a Yesò wu tà wu Fɔ̧̀ tà li ndzɔꞋ etsàa abua yɨ̧ la, taa kɨꞋɨ e ghɨ̌ mèntɨ̧ɨ̧ mɨ̧ naa yète. 21Tà bɔ̂ ndɨ tàa tseke ègwet tè Mbɔ̧ɔ̧mà naa gheble èghɨ ègème aa tsiꞋi be fi mbɨ̀Ꞌɨ̀ tà li ngɨ̀ ngule bèndàꞋàtɔŋ tò be làꞋ, tê àfɨꞋa mbì la. 22Musì tà wu wòt kǒ ane yɔb la li shu nê, ‘Mbɔ̧ɔ̧mà Lefɨ̀Ꞌ wɨ̧ nàa li etsàa ndàꞋàtɔŋ ko abua yɨ̧, wuê mbɨ̀Ꞌɨ̀ tà li ntsàà am la. Ŋut naa li dzəâ ayɔɔ yɨ̧. Bɨ bɔ̂ ndɨ bɨ̀a yute ànəê àgème tà shu awɨ̧ la. 23Wòt bakà yute ànəa ndàꞋàtɔŋ wu è shu la, ko Mbɔ̧ɔ̧mà naa li e tsǐ atò ayɔɔ bòt bi etsàa taa ghǎ enyɔ.’
24“TsiꞋ è shu awɨ̧ nê, Mbɔ̧ɔ̧mà li ngɨ̀ bèndàꞋàtɔŋ bi bàgème, fɔɔle nè Samùèl nè èbe be li nkɨ̀Ꞌɨ̂ akwen tò la, bɔ shu mènəè nàa ghɨ̌ ane èli bàa la. 25Mbɔ̧ɔ̧mà li ngɨ̀ bèndàꞋàtɔŋ bi e kàꞋà mènəè abua yɨ̧. Tà li ngɨ̀ mènkàꞋa kèkweelè bɔ̂ bètǎt nyaꞋ bɨ̧ nkàà àwɨ̧. Tà li shu abua Abàlàghâm nê, ‘Maa li tsě ane bòt àndà̧ yê elɔ̀ɔ̀le bòt sitsǎꞋ bàgème.’ 26È wu ale, bɨ̀ ko nê, bɨ wu bòt mbì Mbɔ̧ɔ̧mà li ndȩ̀ Waã vi ntsaa abua yɨ̧ la. Tà li ntsaa atò nê tà ghɨa bɨ̀ sà mènəè kàbɔ̀ŋ mɨ̧ mbɨ̀Ꞌɨ̀ yea lɔ̀ɔ̀lè àwɨ̧.”
Currently Selected:
ÀfaꞋa 3: mnf
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© 2006, Cameroon Association for Bible Translation and Literacy