Марк 1
1
Ягья пайгъамбардин чирвал
(МатӀай 3:1-12; ЛукӀа 3:1-18; Ягь. 1:19-28)
1 Аллагьдин Хва Иса Месигьдикай Шад Хабардин эвел ихьтинди я. 2Яшай пайгъамбарди Вичин ктабда «Килиг, Валай вилик За Зи чархачи ракъурзава, ада Ви вилик Вун къведай рехъ гьазурда»#Малахи 3:1.. 3«Кьурумда гьарайзавайдан ван чкӀида: „Реббидиз рехъ гьазура, Адан рехъ дуьзди ая“»#Яшай 40:3. кхьенвайвал, 4инсанрив цик акахьун къачуз тадай Ягья кьурумда пайда хьана. Ада, куьн Аллагьдин рекьел ша, и кар кьиле тухунин лишан яз, цик акахьун къачу ва гьа чӀавуз Аллагьди гъил къахчуда лугьуз, вязер-несигьатар гузвай. 5Вири Ягьудатдай ва Ярусалимдай адан патав инсанар къвезвай, чпин гунагьар хиве кьазвай ва адан кап алаз Ярдан вацӀа цик акахьун къачузвай. 6Ягьядал деведин сун пекер алай, юкьвани тумаждин гьяркьуь чӀул авай. Ада незвайди цицӀерни чӀуру чӀижерин вирт тир. 7Вичин вязера ада лугьузвай:
– Зи гуьгъуьнлай къвезвайди залай къудрат авайди я. Зун Адан кӀвачин къапарин чӀулар ахъайизни лайих туш. 8За квев цик акахьун къачуз туна, Ада, лагьайтӀа, квев Пак Руьгьдик акахьун къачуз тада.
Исади цик акахьун къачун ва ам кьурумда темягь авун
(МатӀай 3:13–4:11; ЛукӀа 3:21-22; 4:1-13; Ягь. 1:32-34)
9Са юкъуз Исади, Галилейда авай Назарет шегьердай атана, Ягьядин гъил алаз Ярдан вацӀа цик акахьун къачуна. 10Иса цяй экъечӀдайла, Адаз цавар ахъа хьана ва лифрен шикилда аваз цаварилай Вичин винел эвичӀзавай Руьгь акуна. 11Цаварилай рахадай ван атана:
– Вун Зи РикӀ алай Хва я, Зи шадвал Валди я.
12Идалай кьулухъ гьасятда Руьгьди Иса кьурумдиз тухвана. 13Ана Ам яхцӀур юкъуз ничхиррин арада, Вич рекьяй акъудиз кӀанзавай иблисдин хурук хьана. Адаз малаикри къуллугъ ийизвай.
Исади къуллугъ авунин эвел
(МатӀай 4:12-23; ЛукӀа 4:14-15; 5:1-11; Ягь. 1:35-42)
14Ягья къазаматда турдалай кьулухъ, Иса Галилейдиз Аллагьди ракъурдай Шад Хабардикай муштулухар гуз фена.
15– Аллагьди пачагьвал ийидай вахт атана мукьвал хьанва! – лагьана Ада. – Ша Аллагьдин рекьел элячӀ, Шад Хабардин чӀалахъ хьухь!
16Садра Галилейдин вирин къерехдай физвайла, Исадиз гъетягъар тир Симунни адан стха Эндирей акуна. Абуру вириз чил вегьизвай.
17– Зи гуьгъуьнаваз ша, – лагьана Исади. – За квекай инсанар кьадай гъетягъар ийида.
18Чпин чилерни туна, стхаяр Адан гуьгъуьнаваз фена.
19Са тӀимил кьван мад рехъди фейила, Исадиз Зебедеян рухваяр тир Якьубни Ягья акуна. Абуру, луьткведа ацукьна, чилер туькӀуьр хъийизвай. 20Гьасятда Исади Вичихъ галаз гьабурузни ша лагьана. Чпин буба Зебедейни адан гъилик кӀвалахзавайбур луьткведа туна, Якьубни Ягья Адан гуьгъуьнаваз фена.
ЧӀуру жин хкудун
(ЛукӀа 4:31-37)
21Абур атана Кефернагьум шегьердиз акъатна. Киш юкъуз Иса синагугдиз фена ва инсанриз чирвилер гана. 22Вири Адан несигьатрал гьейран хьанвай, вучиз лагьайтӀа Исади тавратдарри хьиз ваъ, гьукум гвайда хьиз Вичин чирвилер инсанрив агакьарзавай.
23И чӀавуз ана чӀуру жин квай са кас авай.
24– Ваз чавай вуч кӀанзава, Назаретви Иса? – гьарайна ада. – Вун чи эхир ийиз атанвайди яни? Вун вуж кас ятӀа заз чизва. Вун Аллагьдин Пакди я!
25– Лал хьухь! ЭкъечӀ адай! – эмир гана Исади жинжиз.
26А кас зурзурна, чӀуру жин гьарай галаз адай акъатна. 27Вири мягьтел хьана.
– Им вуч лагьай чӀал я? – сада садавай хабар кьаз хьана абуру. – Ибур чаз ван тахьай гафар я! Адахъ гьатта чӀуру жинерризни кваз эмирдай къуват ава, жинерарни Адаз табий жезва.
28Гьа чӀавалай Адакай вири Галилейда ва патарив гвай чкайра ван-сес чкӀана.
Гзафбур сагъар хъувун
(МатӀай 8:14-16; ЛукӀа 4:38-41)
29Синагугдай экъечӀна, Иса Якьубни Ягья галаз Симунанни Эндиреян кӀвализ фена. 30Симунан яран диде ифин кваз къатканвай, абуру Исадиз адан гьалдикай ихтилатна. 31Папан патав атана, Исади гъил кьуна ам къарагъарна. Адан ифин алатна. Паб абурун кьилел-кӀвачел элкъвез эгечӀна.
32Нянихъ рагъ акӀизвайла, Исадин патав азарри кьунвайбурни жинерар квайбур гъиз хьана. 33Шегьердавай кьванбур вири Ам авай кӀвалин ракӀарихъ кӀватӀ хьана. 34Адани жуьреба-жуьре азарар квай гзафбур сагъар хъувуна, гзафбурукай жинерар хкудна. Ада Вич вуж ятӀа чизвайдакай рахун жинерриз къадагъа авуна.
Галилейда чирвилер гун
(ЛукӀа 4:42-44)
35Экуьнахъ фадамаз, рагъ экъечӀдалди къарагъна, Иса, дуьаяр авун патал, касни авачир чкадиз фена. 36Симун ва адан юлдашар Исадин гуьгъуьна гьатна. 37Ам жагъайла, абуру лагьана:
– Вири Вахъ къекъвезва.
38– Ша чун мукьув гвай хуьреризни шегьерриз фин, – лагьана Исади. – За гьанра Шад Хабардикай муштулухар гуда, Зун атунни гьа кар патал авунвайди я.
39Гьа икӀ, Ада, вири Галилейда къекъвез, синагугра Шад Хабардикай муштулухар гузвай ва жинерар хкудзавай.
Жузам азар квайди сагъар хъувун
(МатӀай 8:1-4; ЛукӀа 5:12-16)
40Садра Исадин патав жузам азарди кьунвай са кас атана ва метӀер чилиз яна, минетар ийиз лагьана:
– Ваз кӀан хьайитӀа, Вавай зун сагъар хъийиз жеда!
41Исадиз адан язух атана, адак гъил кяна, лагьана:
– КӀанзава заз. Сагъ хъхьухь!
42Гьасятда жузам хкатна, ам михьи хъхьана. 43А кас гьанал рахкурдалди вилик Исади адаз кӀевелай тагькимна:
44– Килиг гьа, гьич садазни чуькьмир, амма, хахамдин патав фена, жув гьадаз къалура. Вуна азар хкатунин сагълугъдай Мусадин Къанундив кьадай къурбандни це. Гьа идалди вун сагъ хъхьанвайди чир хьурай.
45А инсанди, анай хъфена, виридаз хьайи-хьайивал ихтилатиз хьана. Гьавиляй, Исадивай ачухдаказ шегьерриз хъфиз жезвачир. Ам шегьердин къерехда касни авачир чкайра акъваззавайтӀани, Адан патав виринрай инсанар къвезвай.
Currently Selected:
Марк 1: ЛезПК
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© Институт перевода Библии, 2010-2024