Khuurakikha 7
7
Khuusalaasala khwe kameetsi
1Lwanyuma ndi Umukasya waalomela Nowa ari, “Iwe atweela ni be muungo mwoowo mwoosi, ni mwiinjile mwikhoŋolo, lwekhuuba ise naashiboone ndi iwe wenyene niye uuli umukwalaafu mu moni tsase mu muboolo kuno. 2N'uyile mu likhoŋolo bisolo bye khuuraambisa nga tsisaayilo musaafu, ne nga bibili bibili, shiseetsa ni shikhasi shasho, ne bibiramile uli ni khukhwiinjilayo na bibili byonyene, shiseetsa ni shikhasi shasho. 3Uyile ni binywiinywi bya buli saambo musaafu, bibili bibili, shiseetsa ni shikhasi. Shino uli ni khuushikhola nio bino nabyo biilooseele khuusaalana bibalaahe khu shibala. 4Nga abirirewo biifukhu musaafu khukhwaama shaleelo, indi khuutsya khureera ifula khu shibala, ikhaakhupe khuumala biifukhu kamakhumi kane, ni biilo kamakhumi kane nako. Isho shikhaakile bibiindu biilamu byoosi byeesi nabuumba bifwe biweelewo ilala.”
5Aryo Nowa waakhola byoosi nga Umukasya n'amulakila khuukhola.
6Nowa aaba nga waayolesa kimiiko bitoondo bisesaba (600), khu mbuka isi kameetsi kaasalasalila khu shibala. 7#Mat 24.38-39; Luk 17.27Aryo Nowa, n'umukhasi weewe, ni basooleli beewe, atweela ni bakhasi baabwe, boosi benjila mu likhoŋolo, khuunyala khuuwona kameetsi kakaasalasala. 8Ni bisolo bikwalaafu ni neebyo bibikhali bikwalaafu, bibili bibili, shiseetsa ni shikhasi, ni binywiinywi nabyo biryo, atweela na buli shilamu shoosi shishalaamila aasi. 9Bino byoosi, bibili bibili, shiseetsa ni shikhasi shasho atweela byenjila mwikhoŋolo, nga Wele n'alakila Nowa. 10Lwanyuma lwe biifukhu musaafu khuuwakho, kameetsi kaarakikha khuusalaasala khu shibala.
11 #
2 Pet 3.6
Mu mwiiko isi Nowa oolesela kimiiko bitoondo bisesaba (600), khu shifukhu she likhumi na musaafu, she mu mweesi kwe khaabili, tsisebele tse kameetsi tsoosi tse aasi wa naleme tsaarubukha, ni kimiluwu kye mwikulu kye kukhaka. 12Iryo ifula yaarakikha khuuroonya khu shibala, khuumala biifukhu kamakhumi kane ni biilo nabyo kamakhumi kane.
13Khu shifukhu khweene ukhwo, Nowa, n'umukhasi weewe, ni basooleli beewe Shemu, Hamu, ni Yafesi, atweela ni bakhasi baabwe, benjila mu likhoŋolo. 14Baryo benjilamwo ni tsisolo tse mwirome tsa buli saambo, ni bibyaayo bya buli saambo, ni neebyo bibyalaamila khwiloba aasi biboofu ni bikyeekhe, nabyo nga bya buli saambo, ni binywiinywi bya buli saambo, atweela ni biilamu bibiindi bibiilikho tsindaaha. 15Biilamu byoosi byeetsa bibili bibili, shiseetsa ni shikhasi, musaambo tsabyo, byaatsya ni Nowa mwikhoŋolo 16nga Wele n'alakila. Lwanyuma Umukasya weekalilawo Nowa kumulyaango.
17Karyo kameetsi keloosela khuusalasala khu shibala shoosi, khuumala biifukhu kamakhumi kane (40). Nga kameetsi ni keloosela khukhwiitsula, kaasuta likhoŋolo, kaalinyusa angaaki, lyaakyelakyela. 18Kameetsi keloosela khukhwiitsulila ilala, kaamila shibala, ni likhoŋolo lyeloosela busa khuukyelakyela khu ngaaki. 19Kameetsi kaasalasalila ilala, shibala shoosi shaamilikha, ni tsinjiinji tsindeeyi tsoosi tsitsaba aasi e likulu natso tsaamilikhila ilala. 20Kameetsi kaaniina khu ngaaki, kaamila tsinjiinji tsitsifuurayo buuleeyi, kaatsibira khukhwoolesa aambi tsimita musaafu mu ngaaki. 21Nashiryo buli shiindu shoosi shiilamu shishaba khu shibala shaahela, nga mulimo binywiinywi, bibyaayo, tsisolo tse mwirome, ni bibuumbe bibiindi bibikyeendela khu shibala, atweela na buli muundu yeesi. 22Buli shiindu shoosi shishaba khu shibala, nga shilimwo kumuukha kwe buulamu shaafwa. 23Musaambo iyo, Wele waahesa buli shiindu shoosi shishaba khu shibala, babaandu atweela ni bisolo byeene, bibyaba nga bikyeendela khu shibala, ni binywiinywi byeene byoosi. Babaaramawo, yaba Nowa yenyene, ni babaandu ni biilamu bibiindi bibyaba ni naye mwikhoŋolo.
24Karyo kameetsi kaarama nga kaabiimbilila shibala khuumala biifukhu shitoondo shitweela ni kamakhumi karaano (150).
Currently Selected:
Khuurakikha 7: LCE
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
Lumasaaba Catholic Bible © The Bible Society of Uganda, 2017.