Luglaa 8
8
A nii sui tuna wia
1Annii maa tuna, ka Kɔraawiizi faa waa Noowa ni a sela wia suuhwɛ a muugberzeŋ biini. Denii u gil peu bɛl ta kpegzi ni, a nii ra hiihzi. 2A muuni ni a vile ni bulli la ge n pogzee la bir tɔɔgi. Baamazi ge maa yaari, a dooŋ chaahzi. 3Hɔpizaa kalfa ni tokkoanɛɛ ni fi n wa helle, a nii faa jaa tuu. 4Baaguzi aniidaanɛɛhiŋ hɔpizaa fidaaniidaanɛɛ n wa helle, a muugberzeŋ faa jaa wa chi Ararat bizenaa nyuu. 5A nii haa ra tuu guŋŋ a bina baaguzi fihiŋ lugli hɔpizii wa hel, bizenaa aŋhina ge jaa nyiizi.
6Aŋ kaa wa di hɔpizaa tokkoanɛɛ, Noowa pilli a muugberzeŋ tokoro, 7di lizi dugli ha ú ga daani a bɔr na. Un liiwɛɛ, u ga du a nii nyuu di zaah ra bar guŋŋ a nii maa wa hiihzi, waa kaa sɛɛ bir ba Noowa be a muugberzeŋ biini. 8Denii u kaa lizi komma, ú ge ga binni na di a nii hiihzɔɔ tuŋ gɛɛ. 9A komma n liwɛɛ, di a nii haa kannɔ, waa wette u na bɔr gba togni. Waabuu bir ba Noowa be, u tɛr u nonii di lawuu du a muugberzeŋ biini. 10Aŋ kaa wa di hɔpizaa aniidaanɛɛ, Noowa kaa lizi komma la, ú kaa ga daani na. 11Uŋ laŋŋɛ annii waa be, di ga bir ba duana ni, daa bɛl banna yir ɔlivizi paŋhoolɛɛrɛ du u nua, u kpa ba. Noowa n wa nau, u jaa zum lugɔ a nii tuuwoo. 12Aŋ kaa wa di yawa nua, u kaa lizi a komma ú kaa ga binni na. Un laŋŋɛ waa kaa bir ba.
13Too, Noowa n wa di binni kalfaanumbɛl ni kpaŋ, lugli baagu hɔpizi kpaŋ hɔl, u pilli a muugbera dominua ka binni na, di a hɛri haa du mattimatti. 14Baaguzi anɛɛhiŋ hɔpizaa tokko ni aniidaanɛɛ hɔl, a hɛri jaa hil.
15Denii Kɔraawiizi ŋɔ Noowa be, 16“Í ni i haaŋ ani i biibaala ni ba haana jaa lii. 17Lizi kunnyinee la maa n du i be la. Lizi a sela ni a zumbizi ni kuntuuzaa ta, á wer lul di wazi su a hɛri maa.”
18Noowa ni u haaŋ ni ba biibaala ni ba haana lii a muugberzeŋ biini. 19A sela ni a zumbizi ni kuntuuzaa maa ni a dizi ge hiŋzi dɔŋa lii.
20Denii Noowa paagi bia hɔŋzi dɔŋa ni, di kuari mbusu lizibɔr tɛɛ Kɔraawiizi, di lauri sela la ni zumbizi la n waa doŋŋe la aŋhina kpu, di fuuh lizi mbusu di tɛu. 21Kɔraawiizi n wa nuu a sɔɔh, u baaŋ sɔɔni, u ŋɔ, “Màá ka see hɛri naa nua maa, di chɔgi kunnyinee bɛl maa, haali newea n dɔɔ wichɔgaa werge, di lii ba bichalli saŋa maa gba.
22A hɛri n niŋ du de saŋa maa naa wia,
kuna duui ni a kumaa,
yuu ni lumaŋa,
waari ni weŋ, ani
hɔpizaa ni hamuŋa,
daŋ ɔɔ du de saŋa maa.”
Currently Selected:
Luglaa 8: vag
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© 2017, Copyright Ghana Institute of Linguistics, Literacy and Bible Translation in co-operation with Wycliffe Bible Translators, Inc.