Pi zi tiki 8
8
1Midini Alaw a kɵa gaini Nowa, gaini wazagai n'ezini puɗu puɗu n'aha gaini na buza n'a na war hulum n'abai gaini paŋ lai. A hinasi smer a vuvuwa midini afti, yem a tika pini a waya azumai. 2Mini yem n'azumai par pini afti a dogo, mini yem n'amai par a dogo lai, faŋ zi ɵi a ɗiya zaw lai. 3Yem a yima edi midini afti par agwi agwi, haa mefeŋ miya gaini doogo doogo ɵim yem a vada edi midini afti par, 4war mefeŋ n'ag'aŋ doogo pi muguzak na wiini tile n'ag'aŋ muguzak, hulum n'abai a hiŋila amai midini huwuŋ Ararat. 5Yem a hina aŋ yima edi ɵa haa sini tile n'ag'aŋ doogo. War mefeŋ n'avut na wiini tile n'ag'aŋ doogo merfeŋni huwaŋai a cosi amai.
6Asakalni mefeŋ doogo doogo puɗu par, Nowa a mala fenetre n'a zaŋ arni hulum n'abai ɗa edi. 7A ɵina zeleke aŋ talasi hlai ɗa, a ɗufla a wayasi, a ɗufla a wayasi azi viya haa afti a huula amai. 8Asakal par a ɵina dere ɓa a talasi yem haw na ɓa a waya azumai ya ɗa. 9Amma dere te nava hlai na te tika eziɗi woni kai, te wayasi sini war hulum buri yem a na midini afti paŋ, a wa tini anene miɗi a wiyitisi amlai war hulum n'abai ɗa. 10A baiya haa mefeŋ muguzak, a ɵina dere edi midini afti pra. 11Haa koskoi ta ɗa dere a wayasi gaini tini luwuŋ Olive na hirnaŋ mini kaai, nɵa Nowa a sɗa ɓa yem a yima edi midini afti par ya. 12A baiya haa mefeŋ zamai muguzak, a ɵina dere pra, amma a wayasi sini kir kai.
13Amma war buza na miya ɵaara gaini ktai, war mefeŋ n'avut na wiini tile n'avut, yem a hina afti a hula amai.
Nowa a yima miɗini hulum edi, nɵa a tala midini afti paŋ a na huleŋ.
14War mefeŋ caaɓa pi muguzak na wiini tile n'ag'aŋ sulu afti a hula paŋ. 15Alaw a miɗini wiini Nowa: 16Niyasi edi war hulum par, tuku gaiɗi muniku, gaiɗi aliku gaiɗi falakaiɗi aliku lai. 17Wazagai n'ezini puɗu puɗu n'a na amlai gaiku paŋ, wala zi ɗufli, farai, wazagai n'agogoi n'a hidila midini afti paŋ, ku mulaŋsi anene, kapai a ɵara edi midini afti paŋ, a wa ali viya, a sisiɗa midini afti lai. 18Nɵa Nowa, a niyasi anene gaiɗi alini, munini gaiɗi falakaiɗi alini paŋ lai. 19Wazagai n'ezini puɗu puɗu, wala n'a hidila midini afti paŋ, wazagai zi ɗufli paŋ, wala paŋ a niyasi edi gaini pinzibani pinzibani.
20Nowa a rga gûwiŋ zi yi ɓaka wiini EPIƊ-ƊAI, a yima arbani wazagai n'ezini puɗu puɗu na hilu gaini wazagai zi ɗufli na hilu lai, a za ɓaka zi yi gaini wiini EPIƊ-ƊAI miɗini gûwiŋ zi yi ɓaka. 21EPIƊ-ƊAI a yima ɓaka zi lûgûzi na pɗem, n'a ɵiɗiti agulni azumai ɗa, a hiina a muɗa: Aga mu tusa afti buriɗi ɗai kir kai, buri ɓa haa war pi zi tiki par agul te hoga ɗif sai war meefeŋ sek. Nɵa aga mu vada wazagai na karni edi maini na mu zaŋ na ɵa kir kai.
22Na ɓa dawai sek, na ɓa afti a na ɗa,
sûûɗi gaini hiɗini seyem,
smer gaini hlai z'afu,
fat gaiɗi musai
girvudi gaiɗi duvuk
aga a vada duk kai zaŋ.
Currently Selected:
Pi zi tiki 8: MUSGUM
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964