CHABANGCHAM 2
2
1Sichiujiu ting-kadih pakhiangna damloi mide. 2#Tad 20.11. #Heb 4.4,10.Pachinniabo tingmik gase Tingwang niu kamrabo hina kamloi lujiu mathak mide. 3Paniu chinniabo tingmik situ thoikhaijiu nkiubo tingmik leng kamtam khaide, palamra paniu sibo tingmik gase pagu gandam hina loilujiu mathak mide. 4Haichiujiu ting-kadih haitu damkhaide.
Eden gu Kareng
Sichiujiu Rapiu#2.4: RAPIU: Haise Hebrew mai lad gara YAHWEH chiubo-e. Tingwang niu ting-kadih haitu damboga, 5kadihpiriga chapiubuan wadi lungmak bamniu-e, khatdi alin tara wadi bammak niu-e, palamra paniu pijiu tingriu khai makge, khatdi kadih ga tatien tenra maidi lungmak niu-e. 6Chiudi tadui siniu kadih hanglamsu pinpadjiu rampumgen situ pitim khaijiu bamniu-e.
7 #
1 Co 15.45. Rapiu Tingwang niu kadih gasu taniang khoilujiu chamainatu palun damsude; chiujiu paniuki gase paniu karingbo siu mudkhai bijiu karingbo mai thiu mide.
8Sigasu Rapiu Tingwang niu Tingbang lam, Eden ga kareng khat kamkhai lujiu, paniu damlubo chamaina situ siga pibam khaide. 9#Mad 2.7; 22.2,14.Paniu ngao wibo singbang jat hina damlujiu pasy pimasi khaide. Kareng n-gang gase ringting pikhaibo singbang khat, khatdi ningting kawi kasa sibo#2.9: kawi kasa sibo: maksai wahina sibo chiubo-e. singbang khaide.
10Eden lungga kareng situ tadui kajin khaira singgiu khat piluang khai-e, Eden lenlam sise singgiu madai thiujiu luongra padle. 11Karaibo singgiu siniu Pishon giu-e, haisiniu Havilah kadihtu luong magui bamme. 12(Masanbo kachia khatdi kakungbo parim wibo wasa, khatdi paman kungbo tudung siga dao-e). 13Niabo singgiu siniu Gihon giu-e; Haise Kush#2.13: Kush: (Mesopotamia,) maksai Sudan ku-e. kadihtu luong magui bamme. 14Pasumbo singgiu siniu Tigris giu-e, haise Assyria gu tingbanglam luong bamme, khatdi pamadaibo singgiu siniu Euphrate giuki-e.
15Sichiujiu Rapiu Tingwang niu chamaina situ tatien tenjiu khatdi khuanjiu lungra Eden kareng lunggase khai mide. 16Paniu pakhuga din-e, “Kareng lungga bambo singbang rasy hina nang tiubo sui-e. 17Chiudi ningting kawi kasa sibo, singbang sira tiubo suimakge. Nangniu sibo rasy tiugapbo nai nang shai rabo-e.
18Sichiujiu Rapiu Tingwang niu din-e, “Npiumai hai paronna lungbose wimakge. Patu nkha khaira leng Iniu kabuibo kah khat damkhaine”. 19Sichiujiu paniu kadih gasu taniang khoilujiu chakhao hina khatdi thingna hina damkhaide, sibosai paniu chamaina siniu pazan mathak khaira puiwang khai bide. Sichiujiu paliu mathiu zanse mathak khaide. 20Sijengniu thingna hina khatdi chakhao hina zanse chamaina siniu mathak khaide; chiudi paliu ruangga khatniudi paka leng kabuibo daomakge.
21Sigasu Rapiu Tingwang niu npiumai situ pi jipting khaide, sichiujiu paniu jibamboga, paniu chamaina tupekra khat lupad lujiu patiase khoi mathuk khai lanmide. 22Paniu sibo tupekra gasu npuimai khat damlujiu pakhuga patu maluang wang khai bide.
23Siga chamaina siniu din-e,
“Kanamboga, haiga ajat khat bamme,
charahse arahga su-e, khatdi tatiase atia gasu-e.
pazanse “Npuimai” chiujiu kurabo-e,
palamra pahai npiumai khugasu padbo-e.”
24 #
Mt 19.5; Mk 10.7,8; 1 Co 6.16; Eph 5.31. Sijengniu npiumai siniu papui nai papiutu phutlujiu panaotu lung aruang rabo-e, sichiujiu panaise khat thiumi rabo-e.
25Maipui nai maipiuse panai pumruang bamniu-e, chiudi panaise mangambo thiumak bamniu-e.
Currently Selected:
CHABANGCHAM 2: LIANBSI
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
Liangmai Naga (Re-Edited) - Masanbo Bible
Copyright © 2014 by The Bible Society of India
Used by permission. All rights reserved worldwide.