Markás 7
7
Delay gandagi
(Mattá 15:1–20)
1Cha Urshalimá átkagén Parisi o Sharyatay lahtén zánóger Issáay kerrá mocch butant. 2Distesh ke Issáay lahtén morid gón sellén, bezán gón nashoshtagén dastán warák waragá ent. 3Bale Parisi o sajjahén Yahudi, tánke wati pet o piroki rasmay redá dast mashódant, waráka nawarant. 4Wahdé cha bázárá káyant, tán shosht o shód makanant, heccha nawarant o dega bázén hamé dhawlén dód o rasmesh hast chó ke tán pyálah o ápdán o lóhigán mashódant, kármarzesha nakanant.
5Nun Parisi o Sharyatay zánógerán cha Issáyá jost kort: “Tai morid chéá pet o piroki rasmá namannant o gón sell o nápákén dastán waráka warant?” 6Issáyá gwasht: “Oo doru o dopóstén mardomán! Eshayá nabiá shomay bárawá sharr nebeshtag:
É mardom dapá maná ezzata dayant,
bale delesh cha man sakk dur ent.
7 É moptá maná parastesha kanant o
mardománi ráh o rahbandáni tálimá anchosha dayant
ke gwashay Hodáay hokm ant. # 7:7 Eshayá Nabiay Ketáb 29:13
8Shomá Hodáay hokm yalah dátag o mardománi rasm zortag.”
9Randá gwashti: “Shomá pa wati rasmáni dáragá Hodáay hokmáni yalah dayagay sharrén ráhé dar gétkag. 10Mussáyá gwashtag: Wati pet o mátá ezzat beday. Harkasá ke wati pet yá mát nálat kort, áiay sezá mark ent.#7:10 Darraw 20:12; 21:17. 11Bale shomá sója dayét ke agan yakké wati pet yá mátá begwashit: ‘Pahell kan, á komakk ke man báyad ent tará bedátén, á man Hodáay ráhá korbán kortag,’ 12gorhá shomá áiá cha pet o mátay komakk kanagá manah o makana kanét. 13Shomá wati rasmán barjáha dárét o é paymá Hodáay habará halás o nákára kanét. Dega ham bázén hamé dhawlén kára kanét.”
14Issáyá mocch butagén mardom padá wati kerrá tawár kortant, gwashti: “Shomá drost mani habarán gósh bedárét o sarpad bebét. 15Chizzé ke mardomay lápá rawt áiá sell o nápáka nakant, bale chizzé ke cha áiay delá dara kayt, áiá nápáka kant. 16Harkasá pa eshkonagá gósh per, beshkont.”#7:16 Lahtén daznebeshtá, band 16 nést.
17Wahdé mardomi yalah dátant o lógá átk, moridán gwasht: “Márá é mesálay maksadá sarpad kan.” 18Issáyá gwasht: “Shomá haminkadar násarpad ét? Nazánét ke hecch warákay warag mardomá sell o nápáka nakant? 19Chéá ke warák delá narawt, lápá rawt o cha rótán dara kayt.” Gón é habará áiá gisshént ke sajjahén waragi chizz helár o pák ant. 20Áiá wati habar démá bort o gwasht: “Á chizz ke mardomá sell o nápáka kant, cha áiay del o daruná dara kayt, 21chó ke badén pegr o hayál, bénangi, dozzi, hón o kósh, zená, 22lálech#7:22 Lálech, bezán tamáh, hers. o tamáh, badwáhi, makkári, waylánki,#7:22 Waylánki, bezán badkári, kahbagi. hasadd, kopr, takabbor o béagli. 23É sajjahén badi, cha mardomay del o daruná dara káyant o mardomá nápáka kanant.”
Darkawmén janénéay imán
(Mattá 15:21–28)
24Issá cha ódá dar átk o Suray#7:24 Sur yakk shahré. damagá shot. Ódá lógéá shot o nalótheti ke kasé áiay áyagá sahig bebit, bale é háli chér dát nakort. 25Janéné ke áiay jenekkoká jenné per at, wahdé Issáay áyagay háli eshkot, hamá damáná átk o áiay pádán kapt. 26É janén Yunánié at o Suriahay damag Pinikiahá pédá butagat. Áiá cha Issáyá dazbandi kort ke mani jenekkay jenná kassh. 27Issáyá gwasht: “Awalá báyad ent chokk warag bwarant o sér bekanant, chéá ke chokkáni naganay pach gerag o kochekkáni démá dawr dayag sharr naent.” 28Janéná gwasht: “Ji haw, Hodáwand! Bale parzónagay#7:28 Parzónag, bezán soprah, kopár. kerray kochekk ham chokkáni naganáni chondhána warant.” 29Issáyá gwasht: “Taw sharrén passawé dát, beraw, tai jenekkay jenn dar átkag.” 30Wahdé janén lógá per tarret, disti ke jenekk tahtay sará waptag o jenná yalah dátag.
Karr o lellén mardéay drahbakshi
31Issá, cha Suray damagá per tarret, Sayduni gwázént o Jalilay Mazangwarm o Dekápulisay damagá átk o raset. 32Mardomán karrén mardé ke áiá sharriay sará gapp jat ham nakort, Issáay kerrá áwort o dazbandiesh kort ke taw wati dastá eshiay sará per mosh. 33Issáyá á mard cha mardománi mocchiá yakk kerré bort o lankoki áiay góshán mán kortant. Randá wati dasti tokk jat#7:33 Tokk janag, bezán toh janag. o áiay zobáná peri mosht. 34Ásmánay némagá cháreti, áh o ginsárté#7:34 Ginsárt, bezán gissárt. kasshet o gwashti: “Effatah!” (Bezán “pach bay!”) 35Hamá damáná, marday gósh pach butant, zobáni ham pach but o pa sharri habar kanagá lagget. 36Issáyá, mardom kaddhan kortant ke gón kassá é bárawá hecch magwashét, bale haminchok ke áiá pa habar nakanagá kaddhan kort, mardomán haminkadar géshter habar tálán kort. 37Mardom sakk hayrán o habakkah atant o gón yakdomiá gwashtesh: “Chónén sharrén kára kant. Karráni góshán pacha kant o gongán zobána bakshit.”
Currently Selected:
Markás 7: HPKB
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© 2015-2022, Wycliffe Bible Translators, Inc. and the Balochi Bible Translation Team. All rights reserved.