ᒉᓂᓯᔅ 21
21
ᐋᐃᓯᒃ ᑮᓂᑖᐎᑭᒡ
1ᑳᑎᐯᒋᑫᒡ ᑌᐺ ᐅᑮ ᔕᐌᓂᒫᓐ ᓭᕒᐊᐗᓐ Sarah, ᐁᑮ ᐃᔑᒋᑫᒡ ᑳᑮ ᐃᔑ ᐊᔓᑕᒪᐙᒡ᙮ 2#Heb 11.11. ᑌᐺ ᑕᔥ ᓭᕒᐊ ᑮᑭᑭᔥᑲᐙᐗᓱ, ᐁᑮ ᓂᑖᐎᑭᐋᒡ ᑫᐅᑯᓯᓯᓂᒡ ᐁᐸᕒᐊᐋᒪᓐ Abraham ᐋᓇᐐᓐ ᐁᑮ ᑭᒋ ᐊᔭᐋᐎᓂᒡ᙮ ᐊᐊ ᑕᔥ ᑸᐎᓭᔅ ᒪᔮ ᑮᓂᑖᐎᑭ ᐊᐲ ᑭᔐᒪᓂᑑᓐ ᑳᑮ ᐃᑭᑐᓂᒡ᙮ 3ᐁᐸᕒᐊᐋᒻ ᑕᔥ ᐋᐃᓯᒃ Isaac ᐅᑮ ᐃᔑᓂᑳᓈᓐ ᐃᓂ ᐅᑯᓯᓴᓐ ᑳᑮ ᓂᑖᐎᑭᑕᒫᑯᒡ ᐐᐗᓐ ᓭᕒᐊᐗᓐ᙮ 4#Gen 17.12; Act 7.8. ᒦᑕᔥ ᑳᐃᔑ ᑭᑭᓇᐙᑕᔕᑫᔣᒡ ᐃᓂ ᐅᑯᓯᓴᓐ ᐋᐃᓯᑰᓐ ᐊᐲ ᑳᓂᔣᓱᑯᓇᑭᓯᓂᒡ 8, ᐁᑮ ᐃᔑᒋᑫᒡ ᑭᔐᒪᓂᑑᓐ ᑳᑮᐃᑯᒡ᙮ 5ᐁᐸᕒᐊᐋᒻ ᑕᔥ ᓂᑯᑣᒃ ᑮᑕᓱ ᐱᐴᓉ ᐊᐲ ᐋᐃᓯᑰᓐ ᑮᓂᑖᐎᑭᓂᒡ᙮ 6ᓭᕒᐊ ᑕᔥ ᑮᐃᑭᑐ, ᑭᔐᒪᓂᑑ ᓴ ᓂᑮ ᐲᑕᒫᒃ ᑫᐅᒋ ᒥᓉᑕᒧᐗᒃ, ᑫᐅᒋ ᐹᐱᐗᒃ ᑲᔦ᙮ ᑲᑭᓇ ᓴ ᐊᐎᔭ ᑫᓅᑕᕽ ᑳᑮ ᐃᔑᓭᐗᒃ ᓂᑲ ᐐᒋ ᐹᐲᒥᒃ᙮ 7ᒦᑕᔥ ᑲᔦ ᑳᐊᓂ ᐃᑭᑐᒡ, ᑳᓂᑲ ᐊᐌᑴᓐ ᑫᑮᐃᓈᑯᐸᓀᓐ ᐁᐸᕒᐊᐋᒪᓐ, ᓭᕒᐊ ᒋᓅᓂᐋᒡ ᐊᐱᓅᒌᔕᐞ᙮ ᔖᑰᒡ ᐃᑕᔥ ᑌᐺ ᓂᑕᔮᐎᒫᓐ ᑫᐅᑯᓯᓯᒡ ᐋᓇᐐᓐ ᐁᐊᑭᐌᓰᐎᒡ, ᑮᐃᑭᑐ᙮
8ᐊᐊ ᑕᔥ ᑸᐎᓭᔅ ᑮᐊᓂ ᒫᒌᑭ, ᑲᔦ ᐁᑮ ᐴᓂ ᓅᓂᒡ, ᒦᔥ ᐃᐃ ᐊᐲ ᐁᐸᕒᐊᐋᒻ ᑳᑮ ᑭᒋ ᐐᑾᑫᒡ᙮
ᐁᑳᕒ, ᐃᔥᒣᔭᓬ ᑲᔦ ᓂᑯᒋ ᑮᐃᔑᓂᔕᐅᑣ
9ᓭᕒᐊ Sarah ᑕᔥ ᐅᑮ ᐙᐸᒫᓐ ᐃᓂ ᑸᐎᓭᓴᓐ ᐃᔥᒣᔭᓬᐗᓐ Ishmael ᐁᒥᑭᒌᐋᓂᒡ ᐅᑯᓯᓴᓐ ᐋᐃᓯᑰᓐ Isaac᙮ ᐃᔥᒣᔭᓬᐗᓐ ᐄᑐᒃ ᑮᐅᒫᒫᐗᓐ ᐄᒋᐲᐎᑴᓐ ᐁᑳᕒᐆᓐ Hagar, ᐁᐸᕒᐊᐋᒥᕽ Abraham ᑳᑮ ᐅᑎᓈᓂᒡ᙮ 10#Gal 4.29,30. ᒦᔥ ᐅᐅ ᑳᐃᓈᒡ ᐁᐸᕒᐊᐋᒪᓐ, ᑕᑲ ᐃᑯᒋ ᐃᔑᓂᔕᐅ ᐗᐊ ᐯᒦᑖᑫᒡ ᐃᑴ, ᐃᓂ ᑲᔦ ᐅᑯᓯᓴᓐ᙮ ᐗᐊ ᓴ ᐯᒦᑖᑫᒡ ᐃᑴ ᐅᑯᓯᓴᓐ ᑳᐐᓐ ᐐᑳ ᓂᓇᑕᐌᓂᒥᒫᓰᓐ ᒋᐐᑑᑳᓱᓂᒡ ᑭᐌᓅᑎᓯᐎᓂᕽ ᐋᐃᓯᒃ ᑫᓂ ᑌᐱᓇᕽ, ᐅᑮᐃᓈᓐ᙮ 11ᐁᐸᕒᐊᐋᒻ ᑕᔥ ᑳᐐᓐ ᐋᐱᒋ ᐅᐅ ᐅᑮ ᒥᓍᐸᑕᓰᓐ ᐋᓃᔥ ᐃᔥᒣᔭᓬᐗᓐ ᑲᔦ ᑮᐅᑯᓯᓯ᙮ 12#Rom 9.7; Heb 11.18. ᑭᔐᒪᓂᑑᓐ ᑕᔥ ᐁᐸᕒᐊᐋᒻ ᐅᑮᐃᑰᓐ, ᑫᑯ ᐅᒋ ᒥᑯᔥᑳᑌᑕᑫᓐ ᐊᐊ ᐅᒋ ᑸᐎᓭᔅ, ᐊᐊ ᑲᔦ ᑭᐸᒦᑖᑲᓂᑴᒻ᙮ ᐃᔑᒋᑫᐤ ᓭᕒᐊ ᐋᓃᓐ ᐃᑯ ᐁᓂᒃ᙮ ᐋᐃᓯᑯᕽ ᐅᔕ ᑕᐅᒌᐗᒃ ᑭᐲᐌᓰᒪᒃ ᑳᑮ ᐊᔓᑕᒪᐎᓈᓐ᙮ 13ᐊᐊ ᑕᔥ ᑲᔦ ᑭᐸᒦᑖᑲᓂᑴᒻ ᐅᑯᓯᓴᓐ ᓂᑲ ᐃᔑᐃᒫᓐ ᒋᐊᓂ ᐹᑏᓄᓂᒡ ᐅᐲᐌᓰᒪᐞ, ᐋᓃᔥ ᑮᓐ ᐊᐊ ᑭᑯᓯᔅ, ᐅᑮᐃᑰᓐ᙮
14ᐐᐸ ᑕᔥ ᑭᑭᔐᑉ ᐁᐸᕒᐊᐋᒻ ᐅᑮ ᒦᓈᓐ ᐁᑳᕒᐆᓐ ᒦᒋᒻ, ᐸᔥᑴᑭᓄ ᓂᐲᐗᔥ ᐁᒨᔥᑭᓀᐲᓂᒃ ᑲᔦ᙮ ᒦᔥ ᑳᐃᔑ ᐱᒋᐗᓀᐋᒡ ᐁᑮ ᒫᒋᓂᔕᐙᒡ ᐃᓂ ᑲᔦ ᐅᑯᓯᓯᓂ᙮ ᒦᑕᔥ ᑳᐃᔑ ᒫᒑᓂᒡ ᐁᑮ ᐸᐹᒥ ᐊᔮᓂᒡ ᐱᑾᑕᑲᒥᒃ ᐲᐊᕒᔒᐸ Beersheba ᑳᐃᒋᑳᑌᓂᒃ᙮ 15ᐊᐲ ᑕᔥ ᑳᒑᑭᓭᓂᒃ ᓂᐱ ᐃᐃᒫ ᐸᔥᑴᑭᓄ ᓂᐲᐗᔑᕽ, ᐁᑳᕒ ᔐᑯᐸᑳᕽ ᐅᑮ ᐃᔑ ᓇᑲᓈᓐ ᐃᓂ ᐅᔥᑭᓃᑮᓴᓐ᙮ 16ᒦᑕᔥ ᑳᐃᔑ ᓇᑲᓈᒡ ᐁᑮ ᐊᐎ ᓇᒪᑕᐱᒡ ᐯᔓ ᑳᑮ ᐃᓇᐁᕽ ᒥᓂᒃ ᐁᐱᒧᒋᑫᕽ᙮ ᐅᐅ ᑕᔥ ᑮᐃᑭᑐ, ᑳᐐᓐ ᓂᑖ ᑲᔥᑭᑑᓰᓐ ᒋᑲᓇᐙᐸᒪᒃ ᓂᑯᓯᔅ ᒋᓂᐳᒡ᙮ ᐁᓇᒪᑕᐱᒡ ᑕᔥ ᐯᔓ, ᒦ ᐃ ᑳᐃᔑ ᒫᒌ ᒪᐎᒡ᙮
17ᑭᔐᒪᓂᑑᓐ ᑕᔥ ᐅᑮ ᓅᑕᐙᓂ ᐅᔥᑭᓃᑮᓴᓐ ᐁᒪᐎᓂᒡ᙮ ᑭᔐᒪᓂᑑᓐ ᐅᑌᒐᓬᐃᒥᓂ ᑕᔥ ᑭᒋ ᑮᔑᑯᕽ ᐁᑳᕒ ᐅᑮ ᐅᒋ ᑲᓅᓂᑰᓐ ᐁᑮᐃᑯᒡ, ᐁᑳᕒ ᐋᓃᓐ ᐁᔑᐌᐱᓯᔭᓐ? ᑫᑯ ᑯᑖᒋᑫᓐ, ᑳᑎᐯᒋᑫᒡ ᐅᔕ ᐅᓅᑕᐙᓐ ᐁᒪᐎᓂᒡ ᐃᓂ ᐅᔥᑭᓃᑮᓴᓐ᙮ 18ᐗᓂᔥᑳᓐ, ᐅᑖᐱᓐ ᐊᐊ ᐅᔥᑭᓃᑮᔅ, ᓴᑭᓂᑫᓐ, ᓂᑲ ᐃᔑᐋ ᓴ ᒋᓂ ᑭᒋ ᐃᓀᑖᑯᓯᒡ ᒋᐊᓂ ᐹᑏᓄᓂᒡ ᐅᐲᐌᓰᒪᐞ, ᐅᑮᐃᑰᓐ᙮ 19ᑭᔐᒪᓂᑑᓐ ᐅᑮ ᐃᔑᐃᑰᓐ ᒋᐙᐸᑕᕽ ᐅᑕᐃᐹᓐ᙮ ᒦᑕᔥ ᑳᐃᔑ ᒨᔥᑭᓀᐸᑑᒡ ᐸᔥᑴᑭᓄ ᓂᐲᐗᔥ ᐁᑮ ᒥᓇᐋᒡ ᐃᓂ ᐅᔥᑭᓃᑮᓴᓐ᙮ 20ᑭᔐᒪᓂᑑᓐ ᑕᔥ ᐯᔓ ᐅᑮ ᐐᒌᐎᑰᓐ ᐊᐊ ᐅᔥᑭᓃᑮᔅ ᐁᐅᐱᑭᒡ᙮ ᐱᑾᑕᑲᒥᒃ ᑕᔥ ᑮᐊᔨᑖ, ᐱᒧᒋᑫᐎᓂᓂ ᑕᔥ ᑮᑎᓄᐎ᙮ 21ᒣᒀ ᑕᔥ ᐱᑾᑕᑲᒥᒃ ᐯᕒᐊᓐ Paran ᑳᐃᒋᑳᑌᓂᒃ ᐁᐊᔮᒡ, ᐅᒫᒫᓐ ᐄᒋᐸᑮᕽ Egypt ᐅᑮ ᐅᑎᓈᓂ ᑫᐐᐎᒡ᙮
ᐁᐸᕒᐊᐋᒻ, ᐊᐱᒣᓬᐁᑰᓐ ᑮᐊᔓᑕᒫᑎᐙᒡ
22 # Gen 26.26. ᐁᐊᓂ ᐊᔨᔑᓭᓂᒃ ᑕᔥ ᐊᐱᒣᓬᐁᑰᓐ Abimelech ᐅᑮ ᐱ ᓈᓯᑳᑰᓐ ᐁᐸᕒᐊᐋᒻ Abraham ᐁᑮ ᐱ ᐐᒌᐙᓂᒡ ᑳᑎᐯᓂᒫᓂᒡ ᐅᔑᒫᑲᓂᔒᒪᐞ ᐹᐃᑯᓬ Phicol ᐁᐃᔑᓂᑳᓱᓂᒡ ᐁᑮᐃᑯᒡ, ᑭᔐᒪᓂᑑ ᑭᐐᒌᐎᒃ ᑲᑭᓇ ᑫᑰᓐ ᑳᐃᔑᒋᑫᔭᓐ᙮ 23ᐊᐱᒧᓐ ᑕᔥ ᓅᑯᒻ ᐅᐅᒫ ᐁᓈᓴᒦᒡ ᑭᔐᒪᓂᑑ ᒋᑮ ᐗᔦᔑᒥᓯᐗᓐ, ᓂᓃᒑᓂᓴᒃ ᑲᔦ ᐃᑭ ᓂᐲᐌᓰᒪᒃ᙮ ᐙᐸᑕᐃᔑᓐ ᐃᑕᔥ, ᓈᑯᑑᓐ ᑲᔦ ᐅᐅᒫ ᐊᑮᕽ ᓅᑯᒻ ᑳᔑ ᐲᐎᑌᐌᑖᑯᓯᔭᓐ ᒋᒥᓄᑑᑕᐎᔭᓐ ᑖᐱᔥᑰ ᑳᔑ ᒥᓄᑑᑕᐎᓈᓐ, ᐅᑮᐃᑰᓐ᙮
24ᐁᐸᕒᐊᐋᒻ ᑕᔥ ᐅᑮᐃᓈᓐ, ᒦ ᐃᐌ ᐁᔑ ᐊᐱᒧᔮᓐ᙮
25ᐁᐸᕒᐊᐋᒻ ᐅᑮ ᐅᒋ ᑭᒋ ᑲᑲᓅᓈᓐ ᐊᐱᒣᓬᐁᑰᓐ ᐃᐃ ᐅᑕᐃᐹᓐ ᑳᑮ ᒪᑲᑗᓂᒡ ᐅᑕᓄᑮᐋᑲᓂᓂ᙮ 26ᐅᐅ ᑕᔥ ᐊᐱᒣᓬᐁᑰᓐ ᐅᑮᐃᑰᓐ, ᑳᐐᓐ ᓂᑭᑫᓂᒫᓰ ᐊᐌᓀᓐ ᐅᐅ ᑳᐃᔑᒋᑫᑴᓐ! ᑳᐐᓐ ᑭᑮ ᐐᑕᒪᐎᓰ, ᒦᑕᔥ ᐃᐃ ᐸᔦᔥ ᓅᑯᒻ ᑳᑮᔑᑲᒃ ᐅᐅ ᐁᓅᑕᒫᓐ, ᐅᑮᐃᑰᓐ᙮ 27ᐁᐸᕒᐊᐋᒻ ᑕᔥ ᐅᑮ ᐲᓈᐞ ᒫᓇᒑᓂᔕᐞ, ᐱᔑᑭᐗᐞ ᑲᔦ ᐁᑮ ᒦᓈᒡ ᐊᐱᒣᓬᐁᑰᓐ᙮ ᒦᑕᔥ ᐃᐃ ᐃᑭ ᓃᔑᓐ ᐃᓂᓂᐗᒃ ᑳᑮ ᐊᔓᑕᒫᑎᐙᒡ᙮ 28ᐸᑳᓐ ᑕᔥ ᓃᔣᓱ 7 ᓅᔐ ᒫᓇᒑᓂᔐᓴᐞ ᐅᑮ ᐅᔑ ᐸᑭᑎᓈᐞ᙮ 29ᐊᐱᒣᓬᐁᑰᓐ ᑕᔥ ᐅᑮᐃᑰᓐ, ᐋᓃᓐ ᑕᔥ ᐁᓍᓇᑣ ᐃᑭ ᓃᔣᓱ 7 ᓅᔐ ᒫᓇᒑᓂᔐᓴᒃ ᐸᑳᓐ ᑳᐸᑭᑎᓇᑣ ᒋᓂᔑᑫ ᐊᔮᐙᒡ, ᐅᑮᐃᑰᓐ᙮
30ᐁᐸᕒᐊᐋᒻ ᑕᔥ ᐅᐅ ᐅᑮᐃᓈᓐ, ᐅᑖᐱᓐ ᐅᑯ ᓃᔣᓱ 7 ᓅᔐ ᒫᓇᒑᓂᔐᓴᒃ ᑳᒦᓂᓈᓐ, ᒦᑕᔥ ᑮᓐ ᐁᐃᑭᑐᔭᓐ ᓃᓐ ᐁᑮ ᐙᓂᑳᑕᒫᓐ ᐅᐅ ᐅᑕᐃᐹᓐ, ᐅᑮᐃᓈᓐ᙮ 31ᐲᐊᕒᔒᐸ Beersheba#21.31 ᐲᐊᕒᔒᐸ Beersheba: ᐃᐃᐌ ᐲᐊᕒᔒᐸ ᑳᐃᒋᑳᑌᒃ ᐊᔓᑕᒫᑎᐎ ᐅᑕᐃᐹᓐ, ᒦ ᐃᐌ ᐁᓂᑖᑾᓂᓂᒃ ᑳᐃᔑᑮᔗᐙᒡ᙮ ᑕᔥ ᐅᑮ ᐃᔑᓂᑳᑖᓐ ᐃᐃᒫ, ᐋᓃᔥ ᒦ ᐃᒫ ᒥᒋᓃᔥ ᑳᑮ ᐃᔑ ᐊᐱᒧᐙᒡ᙮
32ᑳᐃᔥᒀ ᐊᔓᑕᒫᑎᐙᒡ ᐃᑕᔥ ᐃᐃᒫ ᐲᐊᕒᔒᐸ Beersheba; ᐊᐱᒣᓬᐁᑰᓐ, ᐃᓂ ᑲᔦ ᐹᐃᑯᓬᐗᓐ ᑳᑎᐯᓂᒫᓂᒡ ᐅᔑᒫᑲᓂᔒᒥᓂ ᑮᐊᓂ ᒫᒑᐗᐞ ᐁᑮ ᐃᔑ ᑮᐌᓂᒡ ᐱᓬᐃᔅᑎᔭᐗᑮᕽ Philistine᙮ 33ᐁᐸᕒᐊᐋᒻ ᑕᔥ ᐅᑮ ᑭᑎᑳᓈᓐ ᒥᑎᑰᓐ ᑖᒪᕒᐃᔅᒃ tamarisk ᐁᔑᓂᑳᓱᓂᒡ ᐃᐃᒫ ᐲᐊᕒᔒᐸ ᐁᒋᑳᑌᓂᒃ᙮ ᒦᑕᔥ ᐃᐃᒫ ᑳᐃᔑ ᐊᓇᒥᐁᑕᐙᒡ ᑳᑎᐯᒋᑫᓂᒡ, ᑳᓀᐱᒋ ᑭᔐᒪᓂᑑᐎᓂᒡ᙮ 34ᐁᐸᕒᐊᐋᒻ ᑕᔥ ᑭᓉᔥ ᑮᐊᔮ ᐃᐃᒫ ᐱᓬᐃᔅᑎᔭᐗᑮᕽ᙮
Currently Selected:
ᒉᓂᓯᔅ 21: OJBS
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
Ojibwe Shorter Bible (Syllabic Script) © 2008 Canadian Bible Society