Mien Bible (Thai Script) © Thailand Bible Society, 2007

ลู่ง เดา เหธา หม่าน หมวด ฮนั้ง น้าย นอ เหฒย เหฒียง เหฑ่ง อ๊ะ.
เถา ตะเธี้ยด ฮนอย ทิน-ฮู่ง โหฒว เหฒียง นิ่น โหฒว เญย กง. ตะเธี้ยด ฮนอย นิ่น ฯฒฯ ตี้ง กง ฮิด ขวน. ทิน-ฮู่ง เหธย ฟุ ตะเธี้ยด ฮนอย, ปุน วั้ว นอม ฮนอย เป๋น ธีง-เหฑ่ง ฮนอย, เหว่ย หฒุ นิ่น เหฒย ลู่ง เหฒย เดา เญย กง เหฒียง. นิ่น หย่า ตี้ง กง ฮิด ขวน.

เหฒย ลู่ง เหฒย เดา เญย เจ๊า-โหล่ว เซ ฮนั้ง น้าย.
เฒี้ยว ทิน-ฮู่ง เหฒย ลู่ง เหฒย เดา วั้ว หฒั่น, เดา ไม้ แก้ง ม่าย หาย หญู่ง เมี้ย เดี๋ยง. ไม้ แก้ง ม่าย หาย หญู่ง กะน้าย-ญิม กุ ญ่า ธ้วด, เหว่ย หฒุ เฒี้ยว ทิน-ฮู่ง ไม้ แก้ง ปุน บยู่ง เหฌี่ย เดา-เป้ย. หย่า ไม้ แก้ง ม่าย เมี่ยน ฯฒฯ ไม้ แก้ง ม่าย หาย เต้า โหฒว ลี่ง โหฒว เด่ย. ขูง ม่าย ววม เยียม เดา-เดี๊ย สาม ธ้วด ต้าย ปุน เดา ดอน ก๋อม เหฑ่ง ฮนั้ง. เฒี้ยว ทิน-ฮู่ง แอ๋ง เฒาะ เต๋ย เนีย-บูง นั้น ธ้วด เต้า เมี่ยน ต้าย หย่า ปย๊ม ม่าย แหม่ง เญย เฉีย เปียะ นิ่น เญย บะฒอง. นิ่น ฯฒฯ เป๋น ม่าย แหม่ง เญย เมี่ยน อ๊ะ.
เฒี้ยว ทิน-ฮู่ง ฯฒฯ เยียม ตง ปูง, เอ​เดน วั้ว, โหฒว นอม หฮวีง หย่า ปุน นิ่น เหฒย ต้าย วั้ว เต้า เมี่ยน เยียม หฮวีง กะญั์ว. เฒี้ยว ทิน-ฮู่ง หย่า ปุน หญู่งๆ เดี๋ยง เยียม เดา ธ้วด ต้าย เหฑว่ย เญย, คู่ หมั่ง ไห่, ม่าย เปี๊ยว คู้ เญย เหว่ย โหฒว หญั่น ฮบ. หฮวีง บุด๋ง ม่าย อี ฒู่ง เดี๋ยง. ม่าย ฒู่ง เฒี่ยง แหม่ง เปี๊ยว. ม่าย ฒู่ง แอ๊ะ, ปุน เมี่ยน ฮิ้ว ตุ๊ หลง ฮิ้ว ตุ๊ เธี้ยว เญย เปี๊ยว.
เอ​เดน เต่ย-ปูง ม่าย ติ้ว ด้าย เหลี่ยว เปียะ มี่ง ยู์ง วั้ว นอม หฮวีง. ธ้วด หฒิ เอ​เดน วั้ว ติ้ว ด้าย ฯฒฯ ปุน โหฒว เปยย หธา หมี่ อ๊ะ. ตะเยี้ยด หธา เห่ว ปี​โซน ด้าย, เหลี่ยว ก๋อม ฮา​วิ​ลา เต่ย-ปูง. เยียม หน่าย ม่าย เจียม. (วั้ว นอม เต่ย-ปูง เญย เจียม เฒียน ไห่. แอ๋ง ม่าย หญู่ง เดี๋ยง-ฒูง ดาง ไห่ เหธา หญู่ง จ๋าย ไห่ เญย หละเปย๊ย-ซิ เหฑว่ย เญย.) ตะเหญ่ย หธา เห่ว กี​โฮน ด้าย, เหลี่ยว ก๋อม เหฑ่ง คู้ด เต่ย-ปูง. ตะฟาม หธา เห่ว ไท​กิด ด้าย, เหลี่ยว กัน อัด​ซี​เลีย เต่ย-ปูง เญย ตง ปูง แหมง มี่ง. ตะเฝย หธา เห่ว ยู​เฟ​ติด ด้าย.
เฒี้ยว ทิน-ฮู่ง ฯฒฯ ปุน นิ่น เหฒย ต้าย วั้ว ล่าน เมี่ยน เยียม เอ​เดน หฮวีง, ปุน นิ่น เฝียว หย่า โก๋ว เจี๊ยน. เฒี้ยว หัด นิ่น, “เยียม น้าย หฮวีง กะญั์ว, หาย ฒู่ง เปี๊ยว หย่า หญั่น ตุ๊ เญย. มป่า ปุน เมี่ยน ฮิ้ว ตุ๊ หลง ฮิ้ว ตุ๊ เธี้ยว วั้ว ฒู่ง, ธิน-หม่าน ไม้ ตู๋ง หญั่น. สี ก๊อง เม่ย หญั่น นอ, ต้ง วั้ว ฮนอย เม่ย หฒะเก้ง อ๋อย หฒุ ไต่ อ๊ะ.”
เฒี้ยว ทิน-ฮู่ง แอ๋ง ก๊อง, “ดุ ล่าน เมี่ยน กั้น เยียม ฮนั้ง เซ ไม้ หอบ. เยีย แอ๋ง อ๋อย เหฒย เต้า ต้าย ผุย นิ่น, เหธา นิ่น โหฒว ต่อย เถง นิ่น.”
เฒี้ยว ทิน-ฮู่ง ฯฒฯ เฒาะ เต๋ย เนีย ต้าย นั้น หญู่งๆ เยียม เดา เญย แซง-คู้ เฮยี่ย ฒ่อย เหธา หญู่งๆ เยียม ด๊าม-ลู่ง เญย เหนาะ, ฯฒฯ ต้อ ต้าย ปุน วั้ว ล่าน เมี่ยน หมั่ง ก๋า, หาย หญู่ง หอบ หฒุ ธ้วด หาย หญู่ง บั๋ว. วั้ว ล่าน เมี่ยน เถง น้าย เต๋ย ม่าย แหม่ง เญย กะน้าย ธ้วด บั๋ว เห่ว หาย หญู่ง, วั้ว หญู่ง กะน้าย ฯฒฯ ตุ๊ บั๋ว เห่ว วั้ว หญู่ง อ๊ะ. น้าย ล่าน เมี่ยน เถง ธ้วด ฑ่อย หญู่งๆ แซง-คู้ เญย บั๋ว เหธา เยียม ด๊าม-ลู่ง เญย เหนาะ เหธา เหยียด ฒู้ง เยียม หล่ม เญย เฮยี่ย ฒ่อย เญย บั๋ว, หธ่อ ปวัด ไม้ ม่าย เหยียด เต้า ผุย นิ่น, เหธา นิ่น โหฒว ต่อย เถง นิ่น.
เฒี้ยว ทิน-ฮู่ง ฯฒฯ ปุน วั้ว เต้า เมี่ยน เปว๋ย มฌ่อม โด เญย. มฌ่อม มี่ง วั้ว หฒั่น, นิ่น เฒาะ ติ้ว วั้ว ล่าน เมี่ยน เญย หละแสง บู๊ง แอ๋ง ปุน อ๊อ เฒี่ยง ดิบ หมี่ อ๊ะ. เฒี้ยว ทิน-ฮู่ง หล่ง เยียม มจั่ง ตอน เฒาะ ธ้วด วั้ว ติ้ว หละแสง บู๊ง โหฒว เป๋น เต้า มเซียะ ตอน, แอ๋ง ต้อ ต้าย เถา มจั่ง ตอน วั้ว.
วั้ว เต้า มจั่ง ตอน ฯฒฯ ก๊อง,
“ต้ง น้าย อ๊ะ. บู๊ง หย่า เยีย เญย บู๊ง เป๋น ต้าย.
อ๊อ หย่า เยีย เญย อ๊อ เป๋น ต้าย.
อ๋อย หฒุ เถง นิ่น ธ้วด บั๋ว เห่ว มเซียะ ตอน,
เหว่ย หฒุ นิ่น เยียม มจั่ง ตอน ธ้วด ต้าย.”
เหว่ย น้าย มจั่ง ตอน ตอง จา, เล่ย นิ่น เญย เตี๋ย หม่า, เหธา เจี๊ยน นิ่น เญย เอ๊า กั๊บ ต้าย. นิ่น บัว ฯฒฯ เป๋น เหยียด เต้า หมี่ อ๊ะ. น้าย เต้า มจั่ง ตอน เหธา นิ่น เญย เอ๊า แล่ง แก๊ง เญย เยียม มป่า ล่าน ไม้ ไญ้ ล่าน.

Phulaphula i ทิน เต่ย โต้ว 2