Madiu 8
8
Yesu tolopelo 'ebweu 'igie bobo'anena
(Maki 1:40-45; Luke 5:12-16)
1'Enega 'oyega 'imwa'utama ga boda sinabwana simuliyena. 2Ta 'ebweu 'ediyega ma 'ana lepelo 'imai Yesu 'enaya ga 'i'aetulasa, ta 'ieonena, 'igwae, “'Inapwana, 'eguma 'imu nuwanuwa nadigega, kapekapeyana be 'ugie bobo'anegu?” 3'Enega Yesu nimanega tai bwalana 'igitoona, ta 'igwae, “O, bobo'ana! 'Uda 'esasa.” Ga tai nina 'ana lepelo 'igumwala manini, ga 'i'esasena. 4#1 Loi 14:1-4; Mk 7:36'Enega Yesu 'ieonena, “'Utatauya ta geya'abo 'ebweu yaita wate 'enaya 'usimasimanegu, ta esi palupaluna 'utatauya totaliya 'enaya be 'i'itayo be 'enega 'utaliya Yaubada 'enaya to'ase nadigega 'ada loina Mosese 'enega, be 'enega tomota simwalatoniyo 'aene ni'atu 'u'esasemu.”
Tolosaiya 'adi toanugana 'ina 'ali'ei 'ana giebobo'ana
(Luke 7:1-10; Yoni 4:43-54)
5'Enega Yesu 'imai 'asa Kapaneumi 'ena, ta tolosaiyao taudi me Loma 'adi toanugana 'ebweu 'imai ga 'isida Yesu 'enaya, 6'igwae, “'Inapwana, 'igu 'ali'ei 'ebweu 'ile'oasa ga anuwaya ma ina 'elouya sinabwana 'i'eno'eno, ta nigeya sawesawenaya be 'iloniu.”
7'Enega Yesu 'igwae, “'Iabe yawawa be yagiebobo'ane.”
8Ta tai nina Yesu 'ina ona 'ie'isena, 'igwae, “'Inapwana, nigeya 'ilobwelobweneyo be 'igu anuwaya 'ululugu, ta esi 'uda onamo be 'enega 'igu 'ali'ei 'ida bobo'ana. 9Manuna 'abo'agu loina yamwalamwalatoni, ta 'agu toloinao 'idi ona 'ana toematamatana, ta wate 'igu tolosaiyao yaloiloinedi, ta 'abo 'ebweu 'enaya yagwae, ‘'Utauya,’ 'itatauya tuga; ta 'abo 'ebweu wate 'ena yagwae, ‘'Umai,’ wate 'imama; ta 'abo 'igu topaisewa 'ebweu yaeona be yagwae, ‘Gete 'uguinuwe,’ 'ida guinuwa tuga.”
10 #
Md 15:28
'Ina simana gete 'enega Yesu 'igwausowala sinabwana, 'enega 'iasakowasi ga boda nidi simulimuliye 'ieonedi, 'igwae, “Ona'ai'aila, nigeya 'ebweu yaita yalobaloba me Isileli 'emiyega 'ina emisa tai gete nadigega, 11#Lu 13:28-29ta yasimana 'emiya 'aene yau wawasae ma'etamo sena yaalata be bomatu 'ediyega sidelima be Ebelaamo be Aisake be Yekobe ma'ediyao si'e'ai egogona Yaubada 'ina 'ebeloina solanaya, 12#Md 25:30ta esiya 'omi 'aene Yaubada natunao 'iula apwesemi guguyoi solanaya be nada wadedoi be waesala'i'ita 'elouya 'enega.”
13'Enega Yesu tolosaiya 'adi toanugana nina 'ieonena, “Bobo'ana, 'uila. 'Imu 'ali'ei 'iabe 'ibobo'ana, nadigega 'imu emisa.” Tuta gote 'enaya tole'oasa nina 'ina waiwai 'ilobena.
Tomota yaudi Yesu 'igie bobo'anedi
(Maki 1:29-34; Luke 4:38-41)
14'Enega Yesu Pita 'ina anuwaya 'ilugu, ga Pita lawana 'i'itena 'ile'oasa, bwalana 'iyaiyai, 15'enega 'inao ga nimanaya 'i'abi, ta 'ina le'oasa 'isaligogo, ga 'itoolo ga 'e'ai 'igibubuna Yesu manuna.
16'Enega boi'unuya toni'asao 'aina tomota sime'edi, taudi yaluyaluwa bi'i 'ediya simiyami, 'enega Yesu yaluyaluwa nidi 'ina onega 'iula apwesedi ta wate tole'oasao maibo'adi 'igiebobo'anedi.
17 #
Ais 53:4
Yage getedi ni'atu siapwesa ga 'enega palopita Aisea 'ina gimisimana 'iapwesa, nadigega Buki Tabu 'ena 'isimana, 'igwae,
“Tauna 'ida 'elouya ta 'ada le'oasao 'ana to'ewayaula.”
Tomota 'aene Yesu simuliye ga nigeya
(Luke 9:57-62)
18Tuta gote 'enaya Yesu ni'atu pwalu sinabwana 'i'itedi simiya sakowasiyena, 'enega 'ina tononoyao 'iloinedi be 'aene wagega sida abala mali senaya. 19'Enega 'ebweu loina 'ana toe'ita 'imai ga Yesu 'ieonena, 'igwae, “Toe'ita, nuwanuwagu be yamuliyeyo. To sena 'ena 'utautauya 'abo'agu yada muliyeyo.” 20#2 Ko 8:9Ta Yesu tai nina 'ieonena, 'igwae, “Kedewa mitawa ma idi gaula, ta wate manuwa ma idi newa, ta 'abo'agu Tomota Natuna#8:20 Tomota Natuna: Yesu tauna 'ieesena The Son of Man, 'ana mwalatoi tomota tuga. Yesu taunamo 'ieesena Tomota Natuna, ta 'ina e'itao 'itao 'ediyega tomota simwalatonina 'aene tauna To'etoseylana Keliso. nigeya 'igu 'ebe 'enomo.”
21'Enega 'ebweu wate tomuliya 'imai ga Yesu 'ieonena, 'igwae, “'Inapwana, 'uda tagwalegu be nugana yaila be tamagu yayamwa 'ina mwawasa manuna, be yada sa'u'ali'aliye, ta muliyega yamuliyeyo.” 22Ta Yesu 'igwae, “Tuwa! Nada tamayo, ta esi 'umuliyegu, ta taudi tomwawasa 'idi tomwawasao sida sa'u 'ali'aliyedi.”
Yesu wediliya 'igie siwalowina
(Maki 4:35-41; Luke 8:22-25)
23'Enega Yesu ma ina tononoyao sigelu wagaya, 24ga tuta nina siabaabala mali esenaya ta Yesu waga 'awa'awainaya 'i'eno mwataya, ta muliyega wediliya sinabwana 'itowama ga lisu 'isiwasiwa taonama wagaya ga selabenaya be sidadamana. 25'Enega Yesu silowanowanona ga sigwae, “'Inapwana, 'u'etoseyeda 'abona nai tadadamana.”
26 #
Md 14:31; Sam 89:9 Ta 'ieonedi, “To'ase manuna wamatauta? Mwa'adega nigeya 'imi emisamo, aga?” 'Enega 'itoolo ga yagila be lisu 'iba'edi, 'igwae, “Walosa'u!”, ga bwagabwaga maibo'ana 'isiwalowa.
27'Enega tomotai nidi sinuwa owana ga sigwae, “To tai sana gete, ga yagila be lisu 'enana siematamatanena?”
Yesu yaluyaluwa bi'i 'iula apwesedi.
(Maki 5:1-20; Luke 8:26-39)
28'Enega ni'atu siabala ga silugu me Gadala 'idi senaya, ga tai 'eluwa yaluyaluwa bi'i sigie kabaleyaediya, ga 'ali'ali duluina 'enega siapwesama. Ta 'idi bubuna gadilulu 'enega nigeya sawesawenaya be 'ebweu yaita 'idi sena nina 'enega 'itatauya. 29#Lu 4:34, 41; Kol 2:15Siteluwa nidi Yesu si'itena ga simagana, sigwae, “Ee! 'Oyo Yaubada Natuna, to'ase 'utootoo be 'aene 'uguinuwe 'emaya? 'Aene gete tuga 'umai sabi gie'elouyaema ta muliyega be bwa'omatana?”
30Ta selabediya bawe yaudi siduwaduwala, ta 'adi to'ita'i'itao si'ita'i'isidi. 31'Enega yaluyaluwa bi'i nidi Yesu 'ena sisida, sigwae, “'Abo 'uula apwesema, kapekapeyana be bawe nidi gotedi 'ediya 'uda etunema?”
32'Enega 'ieonedi, “Waapwesa.” Ga tai nidi 'eluwa 'ediyega yaluyaluwa bi'i nidi silosuya apwesedi ga sitauya manini ga bawe 'ediya silugu, ga 'enega bawe nidi maibo'adi sipili bulibuliyasu ga babagega sibe'u ta olaya sidamana.
33'Enega bawe 'adi to'ita'i'itao nidi 'idi matauta manuna sidena ga sitauya 'idi 'asaya, ga yage nidi si'itedi maibo'ana sisimanedi toni'asao 'ediya, to'ase nadigega toekabaleya 'ediya 'iapwesa. 34'Enega toni'asao maibo'adi siapwesama Yesu sabi 'itana, ga tuta nina silobena sie'idi'idiyena be 'aene 'idi sena 'ida pilisine.
موجودہ انتخاب:
Madiu 8: dob
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2013, Wycliffe Bible Translators, Inc. All rights reserved.
