San Marcos 9

1Ga̱a ne̱ cataj uún soꞌ a:

―Ya̱ ya̱ cata̱j xnaꞌanj ꞌu̱nj rihaan soj cuano̱ se vaa xa̱ꞌ taꞌa̱j soj si̱j nicu̱nꞌ nihánj cuano̱, me se ga̱a ataa a̱ cavi̱ꞌ taꞌa̱j soj, ne̱ ya̱ queneꞌe̱n taꞌa̱j soj asa̱ꞌ guun cheꞌe̱ Yaꞌanj nucua̱j ndoꞌo uun chij soꞌ na̱nj ado̱nj ―taj Jesús a.

Chuguu̱n ndoꞌo man Jesús niꞌya̱j vaꞌnu̱j síí tucuꞌyón snana̱ soꞌ a

2Cachén vata̱nꞌ güii, ga̱a ne̱ nica̱j Jesús man Pedró do̱ꞌ, Jacobo do̱ꞌ, Juan do̱ꞌ, caꞌanj soꞌ raa̱ ꞌo̱ quij xca̱a̱n rej taj va̱j a̱ ꞌó yuvii̱ a. Ga̱a ne̱ ꞌo̱ cunuu ino̱ cunuda̱nj man Jesús niꞌya̱j nij soꞌ a. 3Ne̱ cunuu catzi̱i̱ ndoꞌo saga̱nꞌ soꞌ, ne̱ nda̱a raa̱n la maꞌa̱n saga̱nꞌ soꞌ niꞌya̱j nij soꞌ a. Ne̱ taj va̱j a̱ ꞌó síí ma̱n rihaan chumii̱ nihánj caꞌve̱e quiꞌya̱j catzi̱i̱ yatzíj nda̱a rá se vaa saga̱nꞌ Jesús a̱ maꞌ. 4Ne̱ dan me se naquiꞌyaa Elías ga̱ Moisés rihaan nij soꞌ, ne̱ caꞌmii ro̱j soꞌ ga̱ Jesús niꞌya̱j nij soꞌ a. 5Ga̱a ne̱ cataj Pedró rihaan Jesús a:

―Cuna̱j uxrá vaa mán núj nihánj ga̱ so̱ꞌ, maestro. Ne̱ quiꞌya̱j núj vaꞌnu̱j veꞌ yacataj ca̱yáán soj na̱nj á. ꞌO̱ veꞌ ca̱yáán so̱ꞌ, ne̱ ꞌó veꞌ ca̱yáán Moisés, ne̱ ꞌó veꞌ ca̱yáán Elías rugua̱nj ―taj Pedró a.

6ꞌO̱ se cuchuꞌviꞌ ndoꞌo vaꞌnu̱j nij soꞌ cheꞌé se vaa queneꞌen nij soꞌ, ne̱ cheꞌé dan ne queneꞌe̱n uxrá Pedró da̱j me cheꞌé caꞌmii soꞌ rihaan Jesús da̱nj a̱ maꞌ.

7Ga̱a ne̱ caꞌnaꞌ ꞌo̱ ngaa, ne̱ caráán ngaa man ta̱ranꞌ nij soꞌ a. Ga̱a ne̱ Yaꞌanj roꞌ, caꞌmii nana̱ cuno nij soꞌ rque ngaa yoꞌ, ne̱ cataj Yaꞌanj a:

―Síí nihánj me taꞌníj ado̱nj. ꞌE̱e̱ raj niꞌya̱j man soꞌ ado̱nj. Cuno̱ soj rihaan soꞌ na̱nj á ―taj Yaꞌanj cuno nij soꞌ a.

8Ga̱a ne̱ nu̱ꞌ niꞌya̱j nij soꞌ, ne̱ ma̱an o̱rúnꞌ Jesús nicu̱nꞌ ga̱ nij soꞌ, queneꞌen nij soꞌ na̱nj ado̱nj.

Ase vaa síí cuꞌna̱j Elías roꞌ, da̱nj vaa Juan Síí Cutaꞌ Ne man yuvii̱ a

9Ga̱a ne̱ ga̱a nanij nij soꞌ tacóó quij yoꞌ me se caꞌneꞌ Jesús suun rihaan nij soꞌ se vaa se̱ nataꞌ nij soꞌ rihaan a̱ doj yuvii̱ cheꞌé se vaa queneꞌen nij soꞌ a. Nda̱a quisíj caviꞌ soꞌ ne̱ cunuu iꞌna̱ꞌ uún soꞌ, ga̱a ne̱ caꞌve̱e nata̱ꞌ nij soꞌ se vaa queneꞌen nij soꞌ da̱j quiranꞌ soꞌ Si̱j Caꞌnéé Yaꞌanj Ni̱caj Yuꞌunj man Yuvii̱, taj Jesús a. 10Ne̱ ꞌo̱ nuû rá nij soꞌ nana̱ yoꞌ, ne̱ xnáꞌanj ndoꞌo nij soꞌ man tuviꞌ maꞌa̱n nij soꞌ me se me raj cata̱a se vaa cavi̱ꞌ soꞌ ne̱ cunu̱u iꞌna̱ꞌ uún soꞌ a. 11Ga̱a ne̱ xnáꞌanj nij soꞌ man Jesús a:

―Me cheꞌé taj nij síí naquiꞌyaj cu̱u stucua̱nj Moisés se vaa asino caꞌna̱ꞌ uún Elías síí nataꞌ snana̱ Yaꞌanj ga̱a naá ga̱ ―taj nij soꞌ a.

12Ga̱a ne̱ cataj Jesús rihaan nij soꞌ a:

―Ya̱ aꞌmii nij síí naquiꞌyaj cu̱u stucua̱nj Moisés, taj nij soꞌ se vaa asino caꞌna̱ꞌ Elías, ga̱a ne̱ naquiꞌya̱j sa̱ꞌ soꞌ nimán yuvii̱ yan caꞌna̱ꞌ Síí Caꞌne̱j Yaꞌanj a. Ne̱ me cheꞌé taj Danj Yaꞌanj se vaa Síí Caꞌnéé Yaꞌanj Ni̱caj Yuꞌunj man Yuvii̱ me se quira̱nꞌ ndoꞌo soꞌ sayuun ne̱ nachri̱ꞌ nij yuvii̱ ni̱ꞌyaj nij yuvii̱ man soꞌ, rá soj ga̱. 13Tza̱j ne̱ cata̱j xnaꞌanj ꞌu̱nj rihaan soj se vaa a̱j caꞌnaꞌ ya̱ Elías, tza̱j ne̱ quiꞌyaj ya̱ yuvii̱ nda̱a vaa me rá maꞌa̱n nij yuvii̱ man soꞌ nda̱a vaa taj Danj Yaꞌanj cheꞌé soꞌ na̱nj ado̱nj ―taj Jesús a.

Nahuun sa̱ꞌ ꞌo̱ xnii nu̱u̱ nana̱ chre̱e nimán, quiꞌyaj Jesús a

14Dan me se cuchiꞌ nij soꞌ rej nicu̱nꞌ ꞌó nij síí tucuꞌyón snana̱ Jesús, ne̱ queneꞌen nij soꞌ se vaa mán ri̱i̱ uxrá yuvii̱ rej nicu̱nꞌ nij soꞌ, ne̱ nicu̱nꞌ do̱j nij síí naquiꞌyaj cu̱u stucua̱nj Moisés, ne̱ caꞌmii cunuꞌ uxrá nij soꞌ ga̱ nij síí tucuꞌyón snana̱ Jesús yoꞌ a. 15Ne̱ nu̱ꞌ queneꞌen nij yuvii̱ man Jesús, ne̱ nu̱ꞌ caꞌanj ndoꞌo rá nij yuvii̱, ne̱ cunánj nij yuvii̱ nda̱a rej va̱j Jesús caꞌmi̱i̱ nij soꞌ ga̱ soꞌ a. 16Ga̱a ne̱ xnáꞌanj Jesús man nij yuvii̱ a:

―Me cheꞌé me caꞌmii cunuꞌ nij soj ga̱ nij síí tucuꞌyón snana̱j ga̱ ―taj soꞌ a.

17Ga̱a ne̱ ꞌo̱ nij yuvii̱ cataj rihaan Jesús a:

―ꞌU̱nj me se nica̱j ꞌu̱nj taꞌníj caꞌnáꞌ ꞌu̱nj nano̱ꞌ ꞌu̱nj mán so̱ꞌ, maestro. Ne̱ taꞌníj me se yaꞌmi̱i soꞌ ꞌyaj nana̱ chre̱e nu̱u̱ nimán soꞌ, 18ne̱ me rej maꞌa̱n me rá nana̱ chre̱e ta̱ꞌaa yoꞌ man soꞌ, ne̱ caganꞌ yoꞌ man soꞌ rihaan yoꞌóó, ne̱ avii yatanꞌ tuꞌva soꞌ, ne̱ chá ru̱j soꞌ cúú yanꞌ soꞌ, ne̱ nuu chrúnj nu̱ꞌ soꞌ na̱nj ado̱nj. Ne̱ cataj ꞌu̱nj rihaan nij síí tucuꞌyón snana̱ so̱ꞌ se vaa quiri̱i̱ nij soꞌ nana̱ chre̱e nimán taꞌníj, tza̱j ne̱ ne caꞌve̱e quiꞌya̱j canaán nij soꞌ maꞌ ―taj snóꞌo yoꞌ a.

19Ga̱a ne̱ cataj Jesús rihaan nij yuvii̱ a:

―Dan me se síí ne amán rá me soj si̱j ma̱n rihaan chumii̱ nihánj cuano̱, ne̱ a̱ me daj cache̱j ga̱ soj, ne̱ a̱ me daj ga̱a̱ naj nimanj ni̱ꞌyaj ꞌu̱nj man soj ga̱. Ni̱caj soj man xnii caꞌna̱ꞌ soj rihanj cuaj á ―taj Jesús a.

20Ga̱a ne̱ nica̱j nij yuvii̱ man xnii caꞌnaꞌ nij yuvii̱ rihaan Jesús a. Ga̱a queneꞌen nana̱ chre̱e man Jesús, ne̱ nu̱ꞌ snúú xnii, ne̱ naxruꞌ xnii, quiꞌyaj nana̱ chre̱e yoꞌ, ne̱ natúj rmi̱i̱ xnii, ne̱ cavii yatanꞌ tuꞌva xnii a. 21Ga̱a ne̱ xnáꞌanj Jesús man rej xnii a:

―Me daj güii ranꞌ taꞌníí so̱ꞌ da̱nj ga̱ ―taj Jesús a.

Ga̱a ne̱ cataj rej xnii a:

―Da̱nj ranꞌ soꞌ asi̱j neꞌej me soꞌ, 22ne̱ queꞌe̱e̱ ndoꞌo caganꞌ nana̱ chre̱e man soꞌ rihaan yaꞌan do̱ꞌ, rihaan na do̱ꞌ, cheꞌé yan cavi̱ꞌ xnii, tza̱j ne̱ sese caꞌve̱e, ne̱ cunu̱u ꞌe̱e̱ rá so̱ꞌ manj ne̱ ra̱cuíj so̱ꞌ man núj rugua̱nj ―taj rej xnii yoꞌ rihaan Jesús a.

23Ga̱a ne̱ cataj Jesús rihaan soꞌ a:

―Taj cheꞌé gu̱un vi̱j rá so̱ꞌ maꞌ. ꞌO̱ se síí amán rá niꞌya̱j man Yaꞌanj roꞌ, caꞌve̱e quiꞌya̱j soꞌ cunuda̱nj na̱nj ado̱nj ―taj Jesús a.

24Nu̱ꞌ caꞌmii Jesús da̱nj, ne̱ nu̱ꞌ caguáj rej xnii, cataj soꞌ a:

―Amán rá ꞌu̱nj niꞌya̱j ꞌu̱nj Yaꞌanj á. Ra̱cuíj so̱ꞌ manj cuchuma̱n doj raj, rugua̱nj ―taj soꞌ rihaan Jesús a.

25Dan me se queneꞌen Jesús se vaa cunánj ndoꞌo yuvii̱ caꞌna̱ꞌ nij yuvii̱ rej nicu̱nꞌ soꞌ, ne̱ cheꞌé dan nucua̱j caꞌmii Jesús rihaan nana̱ chre̱e yoꞌ a:

―Rihaan so̱ꞌ na̱na̱ chre̱e quiꞌyaj yaꞌmi̱i ne̱ quiꞌyaj soꞌo̱ man xnii nihánj aꞌmij, ne̱ aꞌnéꞌ ꞌu̱nj suun rihaan so̱ꞌ se vaa cu̱riha̱nj so̱ꞌ cuaj nimán soꞌ cuano̱, ne̱ daj chiha̱a̱ míj se̱ catúj uún so̱ꞌ nimán soꞌ a̱ maꞌ ―taj Jesús a.

26Ga̱a ne̱ caguáj nana̱ chre̱e, ne̱ guun snu̱j ndoꞌo xnii naxruꞌ xnii, quiꞌyaj nana̱ chre̱e, ne̱ dan me se curiha̱nj nana̱ chre̱e nimán xnii yoꞌ a. Ga̱a ne̱ ase vaa síí caviꞌ roꞌ, da̱nj vaa xnii, naj xnii rihaan yoꞌóó, ne̱ queꞌe̱e̱ ndoꞌo yuvii̱ cataj se vaa ya̱ ya̱ caviꞌ soꞌ a. 27Tza̱j ne̱ taꞌaa Jesús raꞌa xnii, ne̱ naxca̱j Jesús man xnii, ne̱ naxaga̱a̱ soꞌ a.

28Dan me se corá doj catúj Jesús rá veꞌ, ne̱ ina̱nj maꞌa̱n nij síí tucuꞌyón snana̱ soꞌ roꞌ, ma̱n rá veꞌ ga̱ soꞌ, ga̱a ne̱ xnáꞌanj nij soꞌ man soꞌ a:

―Me cheꞌé ne gu̱un nucua̱j núj quiri̱i̱ núj man nana̱ chre̱e yoꞌ nimán xnii ga̱ ―taj nij soꞌ a.

29Ga̱a ne̱ cataj Jesús rihaan nij soꞌ a:

―Xa̱ꞌ nana̱ chre̱e vaa da̱nj roꞌ, se̱ caꞌvee quiꞌya̱j níꞌ cu̱riha̱nj nij yoꞌ nimán yuvii̱ sese ne achíín niꞌya̱j ndoꞌo níꞌ rihaan Yaꞌanj maꞌ ―taj Jesús a.

Cataj xnaꞌanj uún Jesús se vaa cavi̱ꞌ soꞌ ne̱ cunu̱u iꞌna̱ꞌ uún soꞌ a

30Ga̱a ne̱ cavii Jesús ga̱ nij síí tucuꞌyón snana̱ soꞌ rej yoꞌ, ne̱ cachén nij soꞌ estadó Galilea, ne̱ ne caꞌve̱j rá Jesús xca̱j nij yuvii̱ cuentá me rej va̱j soꞌ a. 31ꞌO̱ se tihaa̱n soꞌ man nij síí tucuꞌyón snana̱ soꞌ a:

―Dan me se ꞌu̱nj Si̱j Caꞌnéé Yaꞌanj Ni̱caj Yuꞌunj man Yuvii̱ me se vaa güii nago̱ꞌ nii mán ꞌu̱nj rihaan yuvii̱, ne̱ ticavi̱ꞌ nij yuvii̱ manj, ga̱a ne̱ cache̱n vaꞌnu̱j güii, tza̱j ne̱ cunu̱u iꞌna̱ꞌ uún ꞌu̱nj na̱nj ado̱nj ―taj Jesús a.

32Tza̱j ne̱ ne queneꞌe̱n nij soꞌ me taj nana̱ caꞌmii Jesús, ne̱ chuꞌviꞌ nij soꞌ xna̱ꞌanj nij soꞌ man Jesús me taj nana̱ yoꞌ a.

Cataj Jesús me síí gu̱un chij doj asa̱ꞌ guun chij Yaꞌanj a

33Ga̱a ne̱ catúj Jesús ga̱ nij síí tucuꞌyón snana̱ soꞌ chumanꞌ Capernaum a. Dan me se ga̱a mán nij soꞌ rá veꞌ, ne̱ xnáꞌanj Jesús man nij síí tucuꞌyón snana̱ soꞌ a:

―Me se cheꞌe̱ me caꞌmii canó tuviꞌ nij soj ga̱a va̱j níꞌ chrej ga̱ ―taj Jesús a.

34Ga̱a ne̱ cunuu dínj tuꞌva nij soꞌ a. ꞌO̱ se ga̱a va̱j nij soꞌ chrej, ne̱ caꞌmii canó tuviꞌ nij soꞌ ga̱ maꞌa̱n tuviꞌ nij soꞌ me síí gu̱un chij doj vaa güii a. 35Ga̱a ne̱ caꞌanj quita̱j Jesús chruun xlá, ne̱ canacúún soꞌ man chuvi̱j nij soꞌ se vaa caꞌna̱ꞌ nij soꞌ rihaan soꞌ, ga̱a ne̱ cataj soꞌ rihaan nij soꞌ a:

―Me maꞌa̱n ꞌo̱ síí me rá gu̱un chij doj, ne̱ soꞌ me síí gu̱un síí noco̱ꞌ, ne̱ nda̱a gu̱un soꞌ mozó rihaan cunuda̱nj tuviꞌ soꞌ ado̱nj ―taj Jesús a.

36Ga̱a ne̱ nica̱j Jesús man ꞌo̱ xnii leꞌe̱j, ne̱ cachrón soꞌ man xnii leꞌe̱j yoꞌ tanu̱u̱ nij síí tucuꞌyón snana̱ soꞌ, ne̱ naꞌya̱a̱n soꞌ man xnii, ne̱ cataj soꞌ rihaan nij síí tucuꞌyón snana̱ soꞌ a:

37―Me maꞌa̱n ꞌo̱ síí aráj cochro̱j ne̱ aꞌmii sa̱ꞌ soꞌ ga̱ ꞌo̱ xnii leꞌe̱j nihánj cheꞌé se‑chu̱vií ꞌu̱nj, ne̱ adi̱ꞌ ma̱ꞌanj me aráj cochro̱j soꞌ ne̱ aꞌmii sa̱ꞌ soꞌ ga̱ vaa na̱nj ado̱nj. Dan me se síí aꞌmii sa̱ꞌ ga̱ ꞌu̱nj me se né o̱rúnꞌ ꞌu̱nj me aꞌmii sa̱ꞌ soꞌ ga̱ maꞌ. Ma̱an Yaꞌanj ya̱ síí caꞌnéé mán ꞌu̱nj rihaan chumii̱ nihánj me aráj cochro̱j ya̱ soꞌ ne̱ aꞌmii sa̱ꞌ ya̱ soꞌ ga̱ vaa na̱nj ado̱nj ―taj Jesús a.

Cataj xnaꞌanj Jesús se vaa me maꞌa̱n síí ne táá riꞌyunj man soꞌ me tuviꞌ soꞌ a

38Cataj Juan rihaan Jesús a:

―Queneꞌen núj man ꞌo̱ síí ataꞌ tuꞌva se‑chu̱vií so̱ꞌ, ne̱ uriha̱nj nana̱ chre̱e nimán nij yuvii̱, ꞌyaj soꞌ, na̱nj maestro. Tza̱j ne̱ caráán núj chrej caꞌmi̱i̱ soꞌ ne̱ se̱ quiꞌyaj soꞌ da̱nj, cheꞌé se né si̱j chéé ga̱ níꞌ me soꞌ, taj núj, na̱nj maestro ―taj Juan rihaan Jesús a.

39Ga̱a ne̱ cataj Jesús a:

―Caꞌne̱ꞌ rá soj quiꞌya̱j maꞌa̱n soꞌ da̱nj na̱nj á. ꞌO̱ se taj a̱ ꞌó síí ataꞌ tuꞌva se‑chu̱vií ꞌu̱nj ne̱ quiꞌyaj soꞌ suun sa̱ꞌ noco̱o, ne̱ síj, ga̱a ne̱ ca̱nica̱j soꞌ ne̱ caꞌmi̱i̱ chre̱e soꞌ cheꞌé ꞌu̱nj maꞌ. 40ꞌO̱ se xa̱ꞌ síí ne táá riꞌyunj man níꞌ, tza̱j ne̱ tuviꞌ níꞌ me soꞌ ado̱nj. 41ꞌO̱ se a̱ me maꞌa̱n ꞌo̱ síí rqué do̱j na coꞌo̱ nij soj cheꞌé se noco̱ꞌ soꞌ manj Si̱j Caꞌnéé Yaꞌanj Ti̱nanii man Yuvii̱ rihaan Sayuun, ne̱ ya̱ ya̱ cata̱j xnaꞌanj ꞌu̱nj rihaan soj se vaa daj chiha̱a̱ míj se̱ navij se sa̱ꞌ rque̱ Yaꞌanj rihaan síí rqué do̱j na yoꞌ coꞌo soj maꞌ.

Cataj Jesús da̱j quira̱nꞌ síí quiꞌyaj chiꞌi̱i̱ nimán ꞌo̱ síí leꞌe̱j amán rá niꞌya̱j man Jesús a

42’Dan me se me maꞌa̱n ꞌo̱ síí quiꞌya̱j chiꞌi̱i̱ nimán ꞌo̱ síí leꞌe̱j amán rá niꞌya̱j manj, ne̱ caꞌve̱e a̱ doj cavi̱i̱ sa̱ꞌ síí quiꞌyaj da̱nj sese toco̱ꞌ nii ꞌo̱ yuvej xi̱j váj ꞌnúú trigó gaán chihá soꞌ ne̱ ta̱güéj nii man soꞌ rque na yaꞌa̱nj na̱nj ado̱nj.

43’Dan me se sese raꞌá so̱ꞌ me rá quiꞌya̱j cacunꞌ, ne̱ táá a̱ se caꞌne̱ꞌ so̱ꞌ man yoꞌ na̱nj ado̱nj. Taj se ꞌyaj se taj va̱j raꞌá so̱ꞌ, tza̱j ne̱ caꞌve̱e ca̱yáán so̱ꞌ ga̱ Yaꞌanj ga̱a na̱nj á. Tza̱j ne̱ sese quita̱j raꞌá so̱ꞌ ne̱ quiꞌya̱j yoꞌ cacunꞌ, ne̱ caꞌa̱nj so̱ꞌ rihaan yaꞌan, quiꞌya̱j yoꞌ, ne̱ dan me se yaꞌan yoꞌ me se daj chiha̱a̱ míj se̱ quinaꞌáj yaꞌan yoꞌ nuvi̱i niga̱nꞌ a̱ maꞌ. 44Ne̱ nij síí ma̱n rihaan yaꞌan yoꞌ me se se̱ caꞌvee cavi̱ꞌ xlúú chá man nij soꞌ, ne̱ daj chiha̱a̱ míj se̱ quinaꞌáj yaꞌan rej cu̱nuû nij soꞌ caca̱a̱ nij soꞌ a̱ maan ado̱nj.

45’Ne̱ sese tacóó so̱ꞌ me rá quiꞌya̱j cacunꞌ, ne̱ táá a̱ se caꞌne̱ꞌ so̱ꞌ man yoꞌ na̱nj ado̱nj. Taj se ꞌyaj se taj va̱j tacóó so̱ꞌ, tza̱j ne̱ caꞌve̱e ca̱yáán so̱ꞌ ga̱ Yaꞌanj na̱nj á. Tza̱j ne̱ sese quita̱j tacóó so̱ꞌ ne̱ quiꞌya̱j yoꞌ cacunꞌ, ne̱ caꞌa̱nj so̱ꞌ rihaan yaꞌan, quiꞌya̱j yoꞌ na̱nj á. 46Ne̱ nij síí ma̱n rihaan yaꞌan yoꞌ me se se̱ caꞌvee cavi̱ꞌ xlúú chá man nij soꞌ, ne̱ daj chiha̱a̱ míj se̱ quinaꞌáj yaꞌan rej cu̱nuû nij soꞌ caca̱a̱ nij soꞌ a̱ maan ado̱nj.

47’Veé da̱nj uún sese me rá rlij rihaan so̱ꞌ quiꞌya̱j yoꞌ cacunꞌ, ne̱ táá a̱ se quiri̱i̱ so̱ꞌ man yoꞌ, ne̱ síí rihaan canuu̱ ga̱a̱ so̱ꞌ, tza̱j ne̱ caꞌve̱e catu̱u̱ so̱ꞌ rej gu̱un chij Yaꞌanj ado̱nj. Tza̱j ne̱ sese cu̱nuû rlij rihaan so̱ꞌ ne̱ quiꞌya̱j yoꞌ cacunꞌ, ne̱ caꞌa̱nj so̱ꞌ rihaan yaꞌan, quiꞌya̱j yoꞌ na̱nj á. 48Ne̱ nij síí ma̱n rihaan yaꞌan yoꞌ me se se̱ caꞌvee cavi̱ꞌ xlúú chá man nij soꞌ, ne̱ daj chiha̱a̱ míj se̱ quinaꞌáj yaꞌan rej cuma̱n nij soꞌ caca̱a̱ nij soꞌ a̱ maan ado̱nj.

49’ꞌO̱ se vaa sayuun quira̱nꞌ cunuda̱nj nij rasu̱u̱n ma̱n rihaan chumii̱ nihánj, quiꞌya̱j Yaꞌanj, ne̱ dan me se ase vaa nuu sa̱ꞌ nee̱ ꞌyaj yaan roꞌ, da̱nj ga̱a̱ cunu̱u sa̱ꞌ nij síí ma̱n rihaan chumii̱ nihánj, quiꞌya̱j yaꞌan ado̱nj.

50’Ne̱ ase vaa yaan ga̱ nee̱ roꞌ, da̱nj vaa nij soj si̱j tucuꞌyón snana̱j ga̱ chumii̱ nihánj, ne̱ vaa se uun ndoꞌo yaan ado̱nj. Dan me se sese ne ꞌne̱ꞌ chá yaan yoꞌ, ga̱a ne̱ taj se qui̱ꞌyáꞌ cunu̱u sa̱ꞌ yaan ga̱a a̱ maꞌ. Cheꞌé dan, ase vaa yaan ꞌne̱ꞌ sa̱ꞌ roꞌ, da̱nj ga̱a̱ soj, ne̱ dínj ca̱yáán soj ga̱ tuviꞌ soj, ne̱ caꞌve̱e cunu̱u sa̱ꞌ chumii̱ nihánj quiꞌya̱j soj na̱nj ado̱nj ―taj Jesús rihaan nij síí tucuꞌyón snana̱ soꞌ a.

موجودہ انتخاب:

San Marcos 9: trc

سرخی

شئیر

کاپی