San Marcos 16

Cunuu iꞌna̱ꞌ uún Jesús a

1Ne̱ tiꞌnuu güii naránj rá nij yuvii̱ israelitá me se quiránj Mariá Magdalena do̱ꞌ, Mariá nii Jacobo do̱ꞌ, Salomé do̱ꞌ, se gunꞌ da̱j, cheꞌé rej caꞌa̱nj caxri̱i̱ nij noꞌ se gunꞌ da̱j cúú man Jesús a. 2Ga̱a ne̱ cotungó rej naꞌya̱a̱n me se caꞌanj vaꞌnu̱j nij chana̱ rej cachinꞌ nii man Jesús, ne̱ a̱j quisíj güii ga̱a va̱j nij noꞌ, 3ne̱ cataj nij chana̱ rihaan tuviꞌ nij chana̱ a:

―Me síí naxu̱u̱n yaníj yuvej aráán tuꞌva yuꞌuj ga̱a ne̱ catu̱u̱ níꞌ ga̱ ―taj nij noꞌ a.

4Ga̱a ne̱ niꞌya̱j nij chana̱, ne̱ queneꞌen nij noꞌ se vaa a̱j nicu̱nꞌ yaníj yuvej, ne̱ dan me se yuvej xi̱j ndoꞌo me yoꞌ a. 5Ga̱a ne̱ catúj nij noꞌ rque yuꞌuj, ga̱a ne̱ queneꞌen nij noꞌ se vaa ya̱nj ꞌo̱ síí ya̱a̱n rej nuva̱ꞌ nij noꞌ, ne̱ nuû soꞌ yatzíj xca̱a̱n catzi̱i̱, ne̱ cuchuꞌviꞌ ndoꞌo nij noꞌ a.

6Ga̱a ne̱ cataj síí ya̱a̱n rihaan nij chana̱ a:

―Taj cheꞌé cuchuꞌvi̱ꞌ nij soj maꞌ. Nihánj me nanoꞌ nij soj man Jesús síí cavii chumanꞌ Nazaret síí cachrón nii rihaan rcutze̱ a. A̱j cunuu iꞌna̱ꞌ uún soꞌ na̱nj ado̱nj. Ne̱ ni̱ꞌyaj soj rej cuchruj nii man soꞌ, ne̱ xca̱j soj cuentá se vaa nuviꞌ soꞌ naj nihánj a̱ mado̱nj. 7Tana̱nj cavi̱i̱ soj cata̱j soj rihaan nij síí tucuꞌyón snana̱ soꞌ do̱ꞌ, nda̱a rihaan Pedró do̱ꞌ, cata̱j soj a: “Táá ya̱a̱n Jesús rihaan soj ꞌanj soꞌ estadó Galilea, ne̱ yoꞌ me rej queneꞌe̱n nij soj man soꞌ nda̱a vaa cataj maꞌa̱n soꞌ rihaan soj á”, cata̱j nij soj á ―taj síí ya̱a̱n rihaan nij noꞌ a.

8Ga̱a ne̱ curiha̱nj nij chana̱ rque yuꞌuj, ne̱ cunánj nij noꞌ, caꞌanj nij noꞌ a. ꞌO̱ se caráyaꞌa̱nj nij noꞌ, ne̱ nda̱a riꞌíj man nij noꞌ a. Ne̱ ne caꞌve̱e caꞌmi̱i̱ nij noꞌ a̱ doj nana̱ rihaan a̱ ꞌó yuvii̱, cheꞌé se cuchuꞌviꞌ ndoꞌo nij noꞌ a.

Queneꞌen Mariá Magdalena man Jesús a

9Dan me se cunuu iꞌna̱ꞌ uún Jesús rej naꞌya̱a̱n cotungó, ga̱a ne̱ curuviꞌ soꞌ asino ya̱a̱n rihaan Mariá Magdalena, ne̱ noꞌ me chana̱ quirii soꞌ chi̱j nana̱ chre̱e nimán asi̱j rque̱ doj a. 10-11Dan me se caꞌanj noꞌ rej ma̱n nij síí chéé ga̱ Jesús, ne̱ dan me se nanó ndoꞌo rá nij soꞌ, ne̱ taꞌvee nij soꞌ a. Ne̱ dan me se cataj xnaꞌanj noꞌ rihaan nij soꞌ se vaa vaa iꞌna̱ꞌ Jesús ne̱ queneꞌen noꞌ man Jesús, taj noꞌ, tza̱j ne̱ ne cuchuma̱n rá nij soꞌ a̱ maꞌ.

Curuviꞌ Jesús rihaan vi̱j nij síí tucuꞌyón snana̱ soꞌ ga̱a va̱j ro̱j soꞌ rej tacaan a

12Cachén do̱j, ga̱a ne̱ chéé vi̱j nij síí tucuꞌyón snana̱ Jesús rej tacaan, ne̱ curuviꞌ Jesús rihaan ro̱j soꞌ, tza̱j ne̱ ino̱ doj vaa soꞌ, ruviꞌ soꞌ, niꞌya̱j ro̱j soꞌ a. 13Ga̱a ne̱ cavii ro̱j soꞌ uún, nataꞌ ro̱j soꞌ rihaan ꞌó nij síí cuneꞌ soꞌ caꞌa̱nj nata̱ꞌ snana̱ Jesús, tza̱j ne̱ a̱ nij soꞌ ne cuchuma̱n rá snana̱ ro̱j soꞌ a̱ maꞌ.

Curuviꞌ Jesús rihaan xa̱a̱n nij síí cuneꞌ soꞌ caꞌanj nata̱ꞌ snana̱ soꞌ a

14Cachén do̱j, ga̱a ne̱ yáán xa̱a̱n nij síí tucuꞌyón snana̱ Jesús rihaan mesá, ne̱ curuviꞌ maꞌa̱n Jesús rihaan nij soꞌ, ne̱ caxríj yuva̱a̱ soꞌ man nij soꞌ se vaa guun nichra̱j rá nij soꞌ ne̱ ne cuchuma̱n rá nij soꞌ snana̱ nij síí queneꞌen se vaa a̱j cunuu iꞌna̱ꞌ uún soꞌ a. 15Ga̱a ne̱ cataj Jesús rihaan nij soꞌ a:

―Caꞌa̱nj nij soj rihaan nu̱ꞌ cachra̱ꞌ chumii̱, ne̱ caꞌmi̱i̱ natáj soj nana̱ sa̱ꞌ cheꞌé ꞌu̱nj rihaan cunuda̱nj nij yuvii̱ a. 16Ne̱ me maꞌa̱n ꞌo̱ síí cuchuma̱n rá snana̱ soj ne̱ cata̱ꞌ ne, ne̱ soꞌ me síí nani̱i̱ rihaan sayuun ne̱ cavi̱i̱ sa̱ꞌ quiꞌya̱j Yaꞌanj, tza̱j ne̱ síí naꞌvej rá cuchuma̱n rá snana̱ soj me se quiꞌya̱j Yaꞌanj sayuun man soꞌ cheꞌé cacunꞌ tumé soꞌ ado̱nj. 17Ne̱ nihánj me suun sa̱ꞌ noco̱o quiꞌya̱j nij síí amán ya̱ rá niꞌya̱j manj a. Dan me se cheꞌé se‑chu̱vií ꞌu̱nj quiri̱i̱ nij soꞌ nana̱ chre̱e nimán yuvii̱, ne̱ caꞌmi̱i̱ nij soꞌ xnaꞌánj naca̱ xnaꞌánj ne neꞌen maꞌa̱n nij soꞌ a. 18Ne̱ maꞌa̱n raꞌa nij soꞌ ta̱ꞌaa nij soꞌ xcuáá yuva̱a̱, ne̱ caꞌve̱e se coꞌo̱ nij soꞌ se xna̱j, tza̱j ne̱ a̱ doj se̱ quiranꞌ nij soꞌ chiꞌii̱ maꞌ. Ne̱ cuta̱ꞌ raꞌa nij soꞌ xráá síí ranꞌ, ne̱ nahu̱un sa̱ꞌ nij síí ranꞌ yoꞌ a ―taj Jesús rihaan xa̱a̱n nij síí tucuꞌyón snana̱ soꞌ a.

Cavii Jesús xta̱ꞌ a

19Dan me se quisíj caꞌmii Jesús Si̱j ꞌNi̱j Raꞌa man níꞌ nana̱ dan rihaan nij síí tucuꞌyón snana̱ soꞌ, ga̱a ne̱ cavii soꞌ xta̱ꞌ, ga̱a ne̱ cayáán soꞌ rej nuva̱ꞌ Yaꞌanj a. 20Ga̱a ne̱ nij síí tucuꞌyón snana̱ soꞌ me se caꞌanj caꞌmi̱i̱ natáj nij soꞌ snana̱ soꞌ nu̱ꞌ nij chumanꞌ, ne̱ racuíj Síí ꞌNi̱j Raꞌa man níꞌ man nij soꞌ, ne̱ dan me se cheꞌé suun sa̱ꞌ noco̱o quiꞌyaj nij soꞌ me se xraan doj canocoꞌ nij yuvii̱ snana̱ Jesús a.

موجودہ انتخاب:

San Marcos 16: trc

سرخی

شئیر

کاپی