Mateo 1
1
1Ja Jesucristo arjaꞌ riy rumam can ja rojer rey David in chakajaꞌ riy rumam can ja rAbraham. Jawaꞌ ja xtintzꞌibaj riꞌ jawaꞌ quebiꞌ ja ratiꞌt rmamaꞌ ja Jesucristo.
2Ja rAbraham, tatixel rxin Isaac. Ja rIsaac, tatixel rxin Jacob. Ja Jacob, tatixel rxin Judá e rachbil ja rchꞌalal. 3Ja Judá, tatixel quixin caꞌiꞌ achiꞌiꞌ quibinaꞌan Fares in Zara, in ja queteꞌ, Tamar rubiꞌ. Ja Fares, tatixel rxin Esrom. Ja Esrom, tatixel rxin Aram. 4Ja Aram, tatixel rxin Aminadab. Ja Aminadab, tatixel rxin Naasón. Ja Naasón, tatixel rxin Salmón. 5Ja Salmón, tatixel rxin Booz, in ja ruteꞌ ja Booz, Rahab rubiꞌ. Ja Booz, tatixel rxin Obed, in ja ruteꞌ Obed, Rut rubiꞌ. Ja Obed, tatixel rxin Isaí. 6Ja Isaí, tatixel rxin ja rojer rey David.
Ja David, tatixel rxin Salomón, in ja ruteꞌ ja Salomón jariꞌ ixok ja rxjayil Urías nabey. 7Ja Salomón, tatixel rxin Roboam. Ja Roboam, tatixel rxin Abías. Ja Abías, tatixel rxin Asa. 8Ja Asa, tatixel rxin Josafat. Ja Josafat, tatixel rxin Joram. Ja Joram, tatixel rxin Uzías. 9Ja Uzías tatixel rxin Jotam. Ja Jotam, tatixel rxin Acaz. Ja Acaz, tatixel rxin Ezequías. 10Ja Ezequías, tatixel rxin Manasés. Ja Manasés, tatixel rxin Amón. Ja Amón, tatixel rxin Josías. 11Ja Josías, tatixel rxin Jeconías e rachbil ja rchꞌalal, tokoriꞌ xeꞌoc preso ja raj Israel, xecꞌamarel chipan ja nación Babilonia.
12Ja cꞌa Jeconías, tatixel rxin Salatiel. Ja Salatiel, tatixel rxin Zorobabel. 13Ja Zorobabel, tatixel rxin Abiud. Ja Abiud, tatixel rxin Eliaquim. Ja Eliaquim, tatixel rxin Azor. 14Ja Azor, tatixel rxin Sadoc. Ja Sadoc, tatixel rxin Aquim. Ja Aquim, tatixel rxin Eliud. 15Ja Eliud, tatixel rxin Eleazar. Ja Eleazar, tatixel rxin Matán. Ja Matán, tatixel rxin Jacob. 16Ja Jacob, tatixel rxin José. Ja José, arjaꞌ rchajil María in jariꞌ María ruteꞌ ja Jesús ja Cristo nokcheꞌ tre.
17Jawaꞌ quebiꞌ ja ratiꞌt rmamaꞌ ja Jesucristo in tok namajto cajlaxic ruqꞌuin ja rAbraham in narqꞌuisaꞌ ruqꞌuin ja rey David e catorce canojel. In tok namajto chic cajlaxic ruqꞌuin David in narqꞌuisaꞌ chipan ja tiempo ja xecꞌamarel wiꞌ ja raj Israel pa Babilonia e catorce chakajaꞌ. In tok namajto chic cajlaxic chipan ariꞌ tiempo in narqꞌuisaꞌ ruqꞌuin ja Cristo e catorce chakajaꞌ.
* * * * * * * * * *
18Ja Jesucristo tok xalaxi quewaꞌ rbanic riꞌ. Ja María ja ruteꞌ arjaꞌ ryaꞌon chic ruchiꞌ tre ja José chi ncꞌuleꞌ ruqꞌuin. Pro ja tok majaꞌn tiquecꞌam quiꞌ chaka jalal tok xotakixi chi yawaꞌ chic ja María chi nqꞌuejeꞌ jun ti ral. Pro rmal ja rEspíritu Santo samaji chewiꞌ tok queriꞌ xuban. 19Ja cꞌa José ja xajalal majaꞌn toc rchajil arjaꞌ utzlaj achi chewiꞌ tok xpokonaj xuyaꞌ ta ruqꞌuix ja María. Rmalcꞌariꞌ tok xuchꞌob chi pan ekal nuyoj ja cꞌulbic. 20Pro kas cꞌa queriꞌ rmajon rchꞌobic ja tok chaka jalal winakar jun ángel rxin ja kajaw Dios pa rwaram in xbij tre: —José ja rat riy rumam can ja rojer rey David, ma taxbej ta awiꞌ, tacꞌamaꞌ ja María como ja tacꞌal ja cꞌo pa gracia, Espíritu Santo samajin rxin. 21Ja María arjaꞌ nqꞌuejeꞌ na jun ti ral talaꞌ in ja rubiꞌ xtabij tre, Jesús xcatcheꞌ tre. Como ja biꞌaj Jesús tibij tzij Toꞌonel queriꞌ cꞌa ja rubiꞌ xtabij tre como arjaꞌ ntoꞌowi ja rtinamit chipan ja quil quemac, neꞌe ja ángel tre ja José. 22Nojel ja cꞌa xintzꞌibaj kaj riꞌ ma chaka ta bantaji, rumac chi triꞌ bantaj wiꞌ cumplir ja rbin can ja kajaw Dios ja tzꞌibtal can rmal ja profeta quewariꞌ: 23—Bien tecꞌwaxaj ja wariꞌ, cꞌo jun kꞌapoj xtan nyawaj na in rmalariꞌ tok nqꞌuejeꞌe jun ti ral talaꞌ. Jariꞌ talaꞌ Emanuel xtibinaꞌax tre. Queriꞌ ja tzꞌibtal can. Emanuel tibij tzij Dios cꞌo kuqꞌuin.
24Ja cꞌa tok cꞌasoji ja José queriꞌ xuban ja caniꞌ bix tre rmal ja ángel rxin ja kajaw Dios, cꞌuleꞌ ruqꞌuin ja María. 25Pro ja tre tiempo tok majaꞌn talaxi ja ti ral ja María ja nabey winak ni majun nak ta queban. Ja cꞌa José tok xuyaꞌ rubiꞌ ja tacꞌal, Jesús xbinaꞌaj tre.
موجودہ انتخاب:
Mateo 1: tzjW
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2010, Wycliffe Bible Translators, Inc. All rights reserved.
