CAWA'TA TUNITA 8
8
Sulura vi niyn vatawa
1Lawna humam gum kay Nuwa hiɗi muuriyan kaf hiɗi farayn kaf ma ka kulo kuɗum hay lumna, Lawna hin simeɗ ma ŋolla biw gaa kay nagata, ki kayn nala niyn tun caw hot gaa'a. 2Zul ŋol ma niyn may goy hayam pana hiɗi ɗugul ma dukalawna vunam duka, niy ma dukalawna min sulur loɗi. 3Niyn tun caw hot gaa ŋali ŋali, tun caw hot goy bugolomu, ta-ta buur li kis hiɗi diram dok-vasl kayni, niyn hoti gaa'a. 4Hay buurta doogo yam siɗiyata vi til ma siɗiyana, lumda vi Nuwa gaɓ kay hiɗiyt Ararat. 5Niyn ka hot gaa'a ta-ta hay til ma doogona. Hay buurta jewta vi til ma doogon kayni, yam hiɗiyn tun caw day kulo'o.
6Bugol buur dok-fiɗi lo, Nuwa mal baŋa ma nam kaam kir lumna goyo. 7Nam gi gaw-gawn#8:7 Gaw-gawna sum segen yum ala jarakŋa. goyo, gaw-gawn kalay goyo, nam tuɗa hota, tuɗa hota, ta-ta niyn so goy kay nagata. 8Bugolda nam gi gukka, kay na' ma tuɗ ɗuw niyna, la nam hini kiɗay kay nagat kilasige. 9May gukka fi liyn ma na' cuk se' gaa hayamɗi, na' hoti kulo talam hay lumda, kay yam nagat ay ɗubi kay niyn tuwa pet. Nam meɗ ɓalam goyo, va'ay kalaf talam hay lumna. 10Bugol kayni nam cub buur siɗiya lo, nam hot gi gukka ay goy lo. 11May gukka hoti talam hay vulatita, ɗuwa, na' ka hiɗi hum gu-olive ma ŋulomna hay vuna'a. Hay na'ta Nuwa tun caw wi ala niyn hotawa gaa'a yo. 12Nam cub buur mara siɗiya lo, nam gi gukka goyo. May na' hotay talam hay lumda loɗi. 13Hay busata kis-karkiya ka' kepta vi Nuwa, hay buurta jewta vi til ma jewna, niyn ma kay nagatna soy goyo. Nuwa yaw yam-lumna goyo. Nam ɗuw yam-nagat na kayni, na' goy soya. 14Hay buurta dok-ma' yam siɗiyata vi til ma ma'n kayni, yam-nagat soowa goy noŋ kiɗi'.
15Wulini Lawna di tam Nuwa: 16Kalaŋay goy hay lumna, naŋ hiɗi cata vaŋu, hiɗi gurona vaŋu hiɗi boyna vi gurona vaŋ lay. 17Cukaŋ muuriyan ay goy kuɗaŋ kaf, sle ma irin kaf ma ka hiɗi naŋu hay lumna, layayna hiɗi farayna hiɗi slen ma harmat gaa kay nagat kafe, kay nam mer goy gaa kay nagata, kay nam biya ŋolo, kay nam dus gaa kay nagat haca-haca', hoba' ya'a. 18Nuwa kalay goy hay lumna hiɗi gurona valamu, cata valamu hiɗi boyna vi gurona valam kaw. 19Sle ma hay lumna kaf cukay goyo; muuriyan kaf, sle ma harmatn kaf, layayn kaf, slen ma sukka hayamna gaa kay nagat kaf kalay goy kuɗ jafam pet.
20Nuwa in giwin-ma-ɗifinna tam Ma-Vatɗina, nam yaw kuɗ farayn ma peldetna, kuɗ layayn ma peldetna kaf kaw, nam ŋalam ɗifin mi Ma-Vatɗina kulo kay giwin-ma-ɗifin namna. 21Ma-Vatɗina his his ma fayna, nam ka di hayam kalaf ala: nagat wulin kayni nan min beɗa' goyo kuɗ san loɗi, kay san kayni, varta vi dikam joo'o hay goorta valam pa, sle ma irin kaf nan min vatam goyo ki nan li kayni nala loɗi. 22Hay li ma nagat ka tuwa, jaf ma cukŋa hiɗi feɗna, sleɗna hiɗi zalla, menda hiɗi cayda, henjeta hiɗi falayta noŋ kaf as vatɗi.
موجودہ انتخاب:
CAWA'TA TUNITA 8: Massana
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
BIBALDA TA PELDETTA © L'Alliance Biblique du Cameroun, 2001