मत्ती 8
8
यीशु का द्वारा एक कोड़ी तैं खूब करण
(मर 1:40-45; लूका 5:12-16)
1अर उपदेस देण का बाद यीशु वे पाड़ बटि मूड़ी उतरि गै, अर बड़ी भीड़ वेका पिछनै चलण लगि गै। 2अर इन ह्वे कि, एक कोड़ी मनखि वेका पास ऐ अर वेन यीशु तैं परणाम कैरिके बोलि, “प्रभु, अगर तुम चा त मितैं शुद्ध कैरी सकद्यां।” 3तब वेन अपणु हाथ लगै के वेकू बोलि, “हाँ, मि चान्दु छौं कि तू शुद्ध ह्वे जा।” तब वेको कोड़ चलि गै अर उ शुद्ध ह्वे गै। 4अर यीशु न वेकू बोलि, “पर सुण, येका बारा मा कै मा कुछ भि नि बोलि, मगर जा, अर अफ तैं पुरोहित मा दिखौ। अर अपणा शुद्ध होण का खातिर लोगु का समणि मूसा का दिया नियम-कानूनों का मुताबिक भेंट चड़ौ, ताकि वु लोग खुद ईं बात का गवा ह्वे जा, कि तू शुद्ध ह्वे गै।”
रोमी सुबेदार को बिस्वास
(लूका 7:1-10)
5एक दिन यीशु कफरनहूम नगर मा ऐ। अर एक रोमी सुबेदार वेका पास ऐके वे बटि बिन्ती कैरिके बोन्न लगि गै कि, 6“प्रभु, मेरु नौकर घौर मा लकवा रोग मा पोड़्यूं च, अर उ भौत दुखी च।” 7यीशु न वेकू बोलि, “मि ऐके वेतैं खूब कैर द्यूलु।” 8अर सुबेदार न बोलि, “प्रभु, मि इथगा लैख भि नि छौं, कि तुम मेरा घौर मा ऐ सैका, बस तुम एक शब्द ही बोलि द्या, त मेरु नौकर खूब ह्वे जालु। 9किलैकि मि भि अधिकारीयों का मूड़ी काम करण वळु मनखि छौं, अर मेरा मूड़ी भि सिपै छिन। अर जब मि एक कू जाणु कू बुल्दु, त उ जान्दु च अर जब दुसरा कू औणु कू बुल्दु, त उ औन्दु च। अर जब मि अपणा नौकर तैं कुछ करणु कू बुल्दु छौं, त उ वेतैं करदु च।”
10अर यों बातों तैं सुणी के यीशु हकदक रै गै। अर मुड़ि के अपणा पिछनै औण वळी भीड़ कू बोलि, “मि तुम बटि सच्चि बोन्नु छौं, कि इन्द्रयो बिस्वास मिन इस्राएल का लोगु मा भि नि देखि।” 11अर मि तुमतै या बात भि बतै देन्दु, कि एक दिन भौत सरा लोग #यशा 49:12; 59:19; भजन 107:3पूरब अर पच्छिम दिसा#8:11 इख मा यीशु को बोन्न को मतलब यू च कि चारो दिसा बटि लोग आला। बटि आला, अर स्वर्ग का राज मा अब्राहम, इसहाक अर याकूब का दगड़ा दावत मा बैठला। 12मगर जु लोग राज का असली हकदार छा ऊंतैं भैर अन्धेरा#8:12 इख मा यीशु को बोन्नु को मतलब यू च कि ऊंतैं नरकलोक मा डळै जालु। मा डळै जालु। अर उख त सिरफ रुंण अर दांतों तैं कड़गिटाण होलु।
13तब यीशु न वे सुबेदार कू बोलि, “जा, अर जन तेरु बिस्वास च, त्वेकू उन्नि हो।” अर वेकू नौकर वे बगत ही खूब ह्वे गै।
पतरस की सासु अर दुसरा लोगु तैं खूब करण
(मर 1:29-34; लूका 4:38-41)
14अर जब यीशु पतरस का घौर मा ऐ, त वेन वेकी सासु तैं जौर मा पोड़्यूं देखि। 15तब वेन वींको हाथ छ्वी अर वींको जौर उतरि गै, अर वा बिस्तर बटि उठी के ऊंकी सेवा-भगत करण लगि गै।
16अर जब रुमुक ह्वे, त लोग अफ दगड़ा मा भौत सा इन्द्रया लोगु तैं यीशु का पास लेके ऐनी, जौं पर खबेस लग्यां छा, अर वेन ऊं खबेसों तैं अपणा वचन का द्वारा निकाळि दिनी, अर सब बिमार लोगु तैं खूब कैरी दिनी। 17अर इन इलै ह्वे, ताकि उ वचन पूरु ह्वे जौ जु कि यशायाह रैबर्या न बोलि छौ। अर उ वचन इन च कि,
#
यशा 53:4
“वेन हमरि कमजोरियों तैं ले लिनी,
अर इख तक कि हमरि बिमारियों तैं भि अफ पर ले लिनी।”
यीशु का चेला होण को मतलब
(लूका 9:57-62)
18एक दिन इन ह्वे कि यीशु न अपणा चौतरफि एक बड़ी भीड़ देखि, त वेन चेलों तैं आज्ञा दिनी, “चला, झील का पल्या छाला चलद्यां।” 19तब एक शास्त्री न यीशु का पास ऐके बोलि, “गुरुजी, जख-जख तुम जैल्या उख-उख मि तुमरा पिछनै-पिछनै औलु।” 20यीशु न वेकू बोलि, “स्याळों का उड़्यार अर पंछियों का घोल होनदिन, पर मनखि का पुत्र का पास इन्दरि कुई जगा नि च जख उ रुकी के आराम कैरो।” 21तब बिस्वास करण वळा लोगु मा बटि एक मनखि न यीशु कू बोलि, “प्रभु पैलि मितैं इन इजाजत द्या, ताकि मि अपणा घौर जैके पैलि अपणा बुबा की सेवा कैरुं अर जब उ मोरि जाला, तब मि ऐके तुमरो चेला बणि जौलु।” 22पर यीशु न वे मनखि कू बोलि, “जु आत्मिक रुप से मुरयां#8:22 जु लोग परमेस्वर की आज्ञा को पालन नि करदिन, ऊ लोग मुरयां लोगु का जन च। छिन, ऊंतैं अपणा मुरदो तैं दफनौण दे, पर तू मेरा पिछनै अऽ।”
यीशु का द्वारा आंधी तैं शान्त करण
(मर 4:35-41; लूका 8:22-25)
23अर यीशु एक नाव मा बैठि गै अर वेका चेला भि वेका दगड़ा मा छा, तब वु उख बटि अगनै गैनी। 24अर वे ही बगत झील मा एक इथगा बड़ु तूफान ऐ, कि नाव झील की लैर की वजै से डुबण लगि गै, पर यीशु सिणु छौ। 25तब चेला वेका पास ऐनी अर वेतैं झकोली के बोलि, “हे प्रभु, हमतै बचौ किलैकि हम मुरण वळा छां।” 26तब यीशु न बोलि, “हे कम बिस्वास करण वळो, तुम डऽरणा किलै छाँ?” तब वेन उठी के तूफान अर लैरों तैं झिड़की, अर सब कुछ शान्त ह्वे गै। 27अर वु हकदक ह्वेके बोन्न लगि गैनी कि “यू कन्द्रयो मनखि च जु कि तूफान अर झील भि येकी बातों तैं मणदिन?”
खबेस लग्यां मनखियों तैं छुटकारु देण
(मर 5:1-20; लूका 8:26-39)
28गदरेनियों मुलक मा दुई मनखि छा जौं पर खबेस लग्यां छा, अर यू कबरिस्तान मा रौन्दा छा। अर यू इथगा खतरनाक छा कि कुई भि वे बाटा बटि जै ही नि सकदु छौ। अर इन ह्वे, कि जब यीशु अर वेका चेला ये मुलक मा पौंछिनी, त यू दुईया का दुई कबरिस्तान बटि निकळि के वेका पास ऐनी। 29तब ऊंन चिल्लै के बोलि, “हे परमेस्वर का पुत्र, तुम हम बटि क्या चाणा छाँ? क्या तुम चुण्यां बगत से पैलि ही हमतै दुख देण कू ऐ ग्यां?” 30अर उख कुछ दूर सुंगरों को एक झुण्ड चरणु छौ। 31अर खबेसों न यीशु बटि बिन्ती कैरी, “अगर जु तुम हमतै भैर निकळणा ही छाँ, त हमतै सुंगरों का झुण्ड मा भेजि द्या।” 32अर वेन ऊंकू बोलि, “जा,” अर वु खबेस निकळि के सुंगरों मा बैठि गैनी। अर सुंगरों को वु झुण्ड तुरन्त भ्योळ जनै भागी अर उखुन्द लमडी के झील मा पोड़ीनी अर सब सुंगर डुबी के मोरि गैनी। 33अर यू सब देखि के सुंगरों तैं चराण वळा उख बटि भगिनी, अर ऊंन नगरों मा जैके सब बातों का बारा मा, अर खबेस लग्यूं ऊं दुई लोगु का बारा मा नगर का लोगु तैं सब बात बतै दिनी। 34तब नगर का सब लोग जु कुछ ह्वे छौ वेतैं दिखण का बाना नगर बटि निकळि के यीशु तैं मिलणु खुणि ऐनी। अर वेतैं देखि के वेसे बिन्ती कैरी, कि हमरि सीमा से भैर चलि जा।
موجودہ انتخاب:
मत्ती 8: GBM
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© (Active) Wycliffe Bible Translators, Inc. All rights reserved.
