Matthew 2
2
Nakama makonu hamaha Jesus
1Kulana Herod nikuꞌu, Jesus ehanau mai i kemakaꞌina Bethlehem iloko Judea. Vahola, nakama makonu#2.1 i keanaꞌe eholau nokae Jerusalem, 2kena ivasili aꞌe nakama kemakaꞌina la, “Kehe kamaliꞌi ehanau iho imea mo kuꞌu okou na{Jiu}? Makou ailoa pela kama la uhanau iho, maikinimea makou eꞌike hekuu aia i keanaꞌe. Ia kena makou eo mai nohamalu i aia”.
3Keualoko kekuꞌu Herod nilono pela kelaa kuꞌu uhanau, kama la ukipuaina. Ia kena nakama hakoa iloko kemakaꞌina Jerusalem ukipuaina hoi. 4Kena iko Herod ianaa namaakua hamakua, ia ma nakama epolopolo nakuaa la, kena ivasili aꞌe nakama la, “KeMesaea meihanau ihee?”
5Nakama la eme aꞌe, “Makou emakino pela kama la meihanau iho iloko kemakaꞌina Bethlehem i Judea, maikinimea kekama hakae nakakala Keakua la ekakaa ma,
6‘Bethlehem meihananiu iluna namakaꞌina hakoa i Judea,
maikinimea hekama hananiu meihanau iho iloko kemakaꞌina la.
Kama la meilolosi nakama Keakua iloko Israel.’ ”
7Herod eꞌave kakala aia la i nakama makonu la io aꞌe noꞌuku maia, imakino aia keualoko hee nakama la niꞌike kehekuu la esopo aꞌe. 8Kena iko Herod ihaunalia nakama la i Bethlehem, kena ime aꞌe, “Okou eo ilaꞌila hamakonu kamaliꞌi na. Keualoko okou elave, uo mai nome mai anau. Kena anau mehaele aku nohamalu kamaliꞌi na hoi.”
9-10Nakama la elono nakakala kekuꞌu la, kena io. Vahola, nakama la uꞌike hekuu kela lakou niꞌike i keanaꞌe la hoi, ia kena ihihia lo. Kena nakama la uhaele kaukali kehekuu la nokae keꞌina kamaliꞌi la emoe. 11Nakama la uo i hale noꞌike kamaliꞌi la enoho ma kina aia la, Mary. Saika la, nakama la esulu ilalo nohamalu kamaliꞌi la. Kena iau aꞌe nahoꞌi lakou la; pahaku mea, keꞌohu manoni, ia kelo manoni.#2.11
12Keakua ehamakaꞌu aꞌe nakama la iloko kemiki pela nakama la isevaꞌai muli Herod la.#2.12 Kena iko nakama la ivaꞌai muli henua lakou la i kelaa ala.
Namakua Jesus eko kama la io i Egypt
13Nakama makonu la ukaꞌa ikaha. Kena kepo la Keakua ehaunalia ke{enselo} nohaele iho nokakala aꞌe Joseph i kemiki aia, “Kuu iluna! Ko kamaliꞌi na ma kina aia la uo i Egypt. Herod meihaunalia napulepule aia la nosee kamaliꞌi na ikaa imake. Okou enoho inaa, ikae keualoko anau eme aku okou ivaꞌai mai imuli.”
14Ia kena Joseph umasiꞌe iluna, noko kamaliꞌi la ma kina aia la nokaꞌa i Egypt. 15Ia Joseph enoho i Egypt nokae keualoko Herod nimake. Namenei ehuli mai kehamaoni nakakala kela Keakua nime aꞌe nakama hakae nakakala aia, “Anau eanaa aꞌe kaukama ihamai ikaha ma Egypt.”
16Kulana Herod eailoa pela nakama makonu la ehailavaꞌa i aia, kama la uloko haeꞌo. Kena iko kama la ime aꞌe napulepule aia la, “Kaꞌa nosee nakamaliꞌi kanaka iloko Bethlehem ia ma namakaꞌina kapili aꞌe Bethlehem. Kaa imake nakamaliꞌi kanaka kela esekae sahekau kela kemakua lakou. Ala nikamaliꞌi kela nihanau iho keualoko nakama makonu la nime mai pela kekuꞌu na{Jiu} uhanau iho.”
17Kena nakakala Keakua nime aꞌe Jeremiah uhamaoni,
18“Nakama i Ramah elono kekani.
Kehaaloha nahua saꞌa.
Rachel ukani kani nakamaliꞌi aia,
Ia sehihai kelaa kama ihapoꞌi aia,
Maikinimea nakamaliꞌi la hakoa umake.”
Joseph, Mary ia ma Jesus uo Nazareth
19Saika Joseph, Mary, ia ma Jesus ninoho Egypt, kekuꞌu Herod umake. Kena Joseph emoe nomiki pela ke{enselo} Keakua uhaele iho nokakala aꞌe i aia ma, 20“Kuu iluna! Ko haikina na, okou uo Israel. Nakama hihai ikaa kamaliꞌi na, nakama la umake.” 21Kena Joseph uko kamaliꞌi la ma kina kamaliꞌi la io Israel.
22Kulana Joseph nilono pela Archelaus, kama Herod, ukuꞌu iloko Judea, Joseph umakaꞌu kevaꞌai muli. Kena Joseph emoe nomiki pela ke{enselo} Keakua ekakala hamakaꞌu aꞌe i aia ihaele i Galilee. 23Kena iko kama la ihaele nonoho kemakaꞌina emale ma Nazareth, iloko Galilee. Kena hea Keakua eme aꞌe nakama hakae nakakala aia ehamaoni, “Keonohenua mekapa kama la ma ‘hekama Nazareth.’ ”
موجودہ انتخاب:
Matthew 2: ojv
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 1999, Wycliffe Bible Translators, Inc. All rights reserved.
