Luke 23
23
Jesus imua Pilate
(Mat 27.1-2,11-14; Mrk 15.1-5; Jhn 18.28-38)
1Kena nakama la hakoa umasiꞌe iluna nohakaꞌi Jesus noau aꞌe kama la ia Pilate. 2Nakama la enuku aꞌe Jesus penei, “Kama nei ehailavaꞌa keonohenua makou la. Kama nei epui makou isesui na{kakisi} makou i kekuꞌu i Rome. Ia kama nei ekakala soia maia o keMesaea, hekuꞌu.”
3Ko Pilate ivasili aꞌe Jesus, “Aꞌoe o kekuꞌu na{Jiu}?” Ko Jesus ime aꞌe, “Kena aꞌoe eme mai na.”
4Kena Pilate eme aꞌe namaakua hamakua la lakou ma keonohenua la, “Anau hakaꞌoko pela kama nei sehimea esala.”
5Ia nakama la emili kahi aꞌe, “Kama la eaoaꞌo nakama Judea hakoa; amaka i Galilee hanokae keꞌina nei, pela ihuli sia nahakaꞌoko nakama la nosaꞌino.”
Pilate ehaunalia Jesus nomaka Herod
6Keualoko Pilate ulono nakakala namaakua hamakua la, kena kama la evasili alakama ilaa imakino aia pela Jesus hekama i Galilee. 7Kena keualoko Pilate umakino pela Jesus ehamai keꞌina kela Herod elolosi la, Pilate ehaunalia Jesus nomaka Herod, maikinimea Herod enoho i Jerusalem.
8Keualoko Herod niꞌike Jesus, kama la uhihia haeꞌo. Herod ulono nakipukipu Jesus imua. Ia kena kama la ehakali saika loloa iꞌike Jesus ihuli aꞌe namahi aia. 9Herod eme aꞌe Jesus komaꞌi navasili, ia Jesus sehikakala eme aꞌe. 10Vahola, namaakua hamakua lakou ma nakama polopolo nakuaa la ekuu iveuveꞌu hasaꞌino aꞌe Jesus. 11Kena Herod lakou ma napulepule aia la ukakala hamemea kama la hoi. Nakama la eauꞌahu aꞌe Jesus keauꞌahu nakuꞌu, kena ihaunalia muli kama la ia Pilate. 12Imua, Pilate laua ma Herod enonoho haeꞌo. Ia keaho la, koꞌolua la uꞌamaka nosoa laoi.
Keonohenua ehai aꞌe Jesus
(Mat 27.15-26; Mrk 15.6-15; Jhn 18.39–19.16)
13Vahola, Pilate eanaa aꞌe namaakua hamakua ma nakama hamakua na{Jiu} la, ihaꞌuku ma keonohenua la hakoa, 14kena ime aꞌe nakama la, “Okou uhakaꞌi mai kama na. Kena okou eme mai pela kama na ehailavaꞌa keonohenua la. Ia anau elaulahu aꞌe kama na imua okou hakoa. Ia anau sehisala elave i namea okou kakala mai na. 15Herod sehisala elave hoi. Ia kena kama la ehaunalia muli mai kama na. Ila aꞌe. Kama na sehimesala epena, kena sekau pela anau amekaa kama na imake. 16Niaina, anau meme aꞌe napulepule la ilili kia kama na, kena uhakana kama na ihaele.” 17(Kulana keꞌai kePasova la, Pilate ehakana hekama i nakama iloko kelokapu la.)
18Ia keonohenua la hakoa ehaio aꞌe, “Kaohi kama na. Ia hakana Barabbas ihamai.” 19(Barabbas epono iloko kelokapu, maikinimea kama la eusuusu keonohenua la isehalono {kaumani} la, ia kama la ekaa kekama nomake hoi.)
20Pilate hihai ihakana Jesus ihaele, kena ikakala halaoi aꞌe keonohenua la. 21Ia nakama la ehaio kahi aꞌe ma, “Kii kama na. Kii kama na iluna {kolosi}.”
22Keualoko kanahakolu, ko Pilate ime aꞌe nakama la, “Aiea? Hesala pehe kama na epena? Anau sehisala elave ikaa kama na imake. Ia niaina, anau meme aꞌe napulepule la ilili kia kama na, kena uhakana kama na ihaele.”
23Ia nakama la ehaio kahi aꞌe Pilate ikii Jesus iluna {kolosi}. Nakama la uvavaa haeꞌo aꞌe, 24kena Pilate ukuu aꞌe isala keonohenua la. 25Kama la ehakana Barabbas ihaele. (Pilate nipono Barabbas iloko kelokapu la imua, maikinimea kama la eusu keonohenua ihakaukau, ia ikaa kama.) Ia Pilate eau aꞌe Jesus i keonohenua la ihai hea lakou ehakaꞌoko la.
Napulepule ukii Jesus iluna {kolosi}
(Mat 27.32-44; Mrk 15.21-32; Jhn 19.17-27)
26Keualoko napulepule la uhakaꞌi Jesus ikaha ma kemakaꞌina la, hekama Cyrene emale ma Simon ehaele aꞌe iloko kemakaꞌina Jerusalem. Kena nakama la ekaohi Simon kena ime aꞌe kama la iko {kolosi} Jesus la, noamo aku vamuli.
27Vahola, keonohenua elahi ekaukali vamuli Jesus. Ia nahine la ekanikani lakou aloha lo. 28Ia Jesus ehakiꞌe nome aꞌe nahine la, “Okou nahine Jerusalem, okou isekani aloha mai anau. Emeia okou ikani aloha soꞌokou ma nakamaliꞌi okou la hoi. 29Okou mehalono lihu haeꞌo. Kena vahola, okou mehakaꞌoko pela nahine haaloha ekau kehihia. Niaina nahine epoꞌa la, ma nahine sehikamaliꞌi la, ia ma nahine sesapai nakamaliꞌi la, okou mehakaꞌoko pela nahine la hakoa ekau kehihia lo. 30Vahola keonohenua la meime aꞌe namouna la, ‘Sina iluna makou,’ kena meme aꞌe nakuku la, ‘Uhi iluna makou.’ 31Poi nakama ekonu kahi la mehalono lihu, kena nakama haisala la meihalono lihu haeꞌo.”
32Saika la, napulepule la ehakaꞌi koꞌolua nakama ekahao sala, nokaa koꞌolua la nomake hoi. 33Nakama la ukae keꞌina emale ma “Naivi Napohoulu.” Kena napulepule la ukii Jesus iluna {kolosi} aia, kena ikii koꞌolua nakama saꞌino la iluna na{kolosi} laua la hoi; kama i kevahi laua, kena kelaa kama i kevahi selaua. 34Ko Jesus ime aꞌe, “Kamana. Haialoha aꞌe nakama la. Nakama la semakino hea lakou epena la.”
Kena napulepule la ekahao huhu kehaku, imakino lakou oai kekama meiko naauꞌahu aia la. 35Ia keonohenua la ekuu nomaka. Vahola, nakama hamakua la ekakala hamemea aꞌe Jesus ma, “Poi Keakua ekini kama la ikonaꞌi makou. Kena kama la elavaa kekonaꞌi soia, ehau poi aia ekonaꞌi alakama.”
36Kena napulepule la ekakala hamemea aꞌe Jesus hoi, kena iau aꞌe ke{uaen} emala ma iunu kama la. 37Ko nakama la ime aꞌe, “Poi aꞌoe kekuꞌu na{Jiu}, konaꞌi soꞌoe.”
38Nakakala nei ekakaa iluna panahoa emau iluna {kolosi} la, KENEI KEKUꞌU NA{JIU}.
39Hekama kela koꞌolua nakama saꞌino la ehai aꞌe Jesus, “Aꞌoe o keMesaea. Seai la? Kena konaꞌi soꞌoe ia ma maua hoi.”
40Ia kela kama ume aꞌe, “Aꞌoe semakaꞌu Keakua? Aꞌoe ehalono lihu poi kama nei hoi. 41Kaua ekau kehalono lihu, maikinimea kaua ehaisala. Ia kama nei sehimea esala.” 42Kena iko kama la ime aꞌe, “Jesus, manaku mai anau, keualoko aꞌoe mehamakua iloko kenoholana aꞌoe la.”
43Kena iko Jesus ime aꞌe kama la, “Anau eme aku kehamaoni. Keaho nei oia, aꞌoe menoho manau iloko keꞌina kaualeꞌa la.”
Jesus umake
(Mat 27.45-56; Mrk 15.33-41; Jhn 19.28-30)
44Keualoko kelaa lakea, keꞌina la upouli kakano, hanokae kekolu keiahi. 45Maikinimea kelaa la seꞌini. Vahola, pamalo ekookoo iloko hale kapu la umasae i lakonu. 46Kena Jesus uanaa hamaloa, “Kamana, anau eau aku kauanana ilolosi aꞌoe.” Kena kama la umake.
47Kama hamakua napulepule la eꞌike Jesus umake. Kena kama la ehamaha i Keakua, kena ime aꞌe, “Hamaoni. Kama nei ekonu kahi.”
48Keonohenua kela ehaꞌuku aꞌe noꞌike kemake Jesus la ukaꞌa ikaha, ualoha haeꞌo. 49Nakama kela Jesus emakino laoi la ekuu hamao noꞌike kemake aia. Ia nahine kela ekakaꞌa ma Jesus i Galilee ekuu ilaa hoi.
Joseph uko kinokama Jesus
(Mat 27.57-61; Mrk 15.42-47; Jhn 19.38-42)
50-51Kela hekama emale ma Joseph ehamai kemakaꞌina Arimathea iloko Judea. Kama la hekama ekonu kaualeꞌa, kena inoho kali Keakua ihamai nohamakua kenoholana aia la. Joseph hekama iloko keukulana nakama hamakua na{Jiu} la. Ia kama la sehapaa ma lakou nokaia Jesus.
52Joseph uhaele aꞌe ia Pilate noainoa aꞌe kinokama Jesus. 53Kena iko Joseph ikuli kinokama kama la nomini pamalo vahonei. Kena kama la ehamoe kinokama Jesus iloko kelua haku kela nihaa i kevahi kuku la. Kelua haku la sehikama emoe imua. 54Ia vahola ukae keiahi keaho lima. Kena keonohenua la ekanakana keꞌamaka keaho kapu.
55Nahine kela ekakaꞌa ma Jesus i Galilee la ukaukali vamuli Joseph, kena uꞌike Joseph ehamoe kinokama Jesus iloko kelua haku la. 56Kena iko nahine la ivaꞌai i hale nokanakana nalo manoni ma nalo hala. Ia keaho kapu la, nahine la uhamalolo, ikaukali nakuaa Moses.
موجودہ انتخاب:
Luke 23: ojv
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 1999, Wycliffe Bible Translators, Inc. All rights reserved.
