John 4
4
Jesus ia ma kehine haSamaria
1NaFarasi la elono pela Jesus eaoaꞌo komaꞌi nakama ikaukali aia, kena ihaauꞌau kapu nakama la. Ia nakama kaukali Jesus la ekomaꞌi, elaꞌa iluna ma nakama kela ekakaꞌa ma John Baptist la. 2Ia Jesus soia sehaauꞌau kapu nakama la. Ia kela nakama kaukali aia la avale ehaauꞌau kapu nakama la. 3Ia kena Jesus ukiaꞌi Judea, ihaele muli i Galilee.
4Ia keala Jesus ehaele la emoe valoko Samaria. 5Kela hea kama la ehaele nokae kemakaꞌina iloko Samaria emale ma Sychar. Kemakaꞌina la ekuu kapili aꞌe keleꞌele kela Jacob niau aꞌe ma Joseph, kekama aia la. 6Ia kevai kela Jacob niꞌeli la ilaa hoi. Nakino Jesus ukahi, maikinimea aia ehamai keꞌina emao. Ia kena saika kela lakea, kama la enoho kevahi kevai Jacob la nohamalolo.
7Ia keualoko la, kela hehine Samaria ehaele aꞌe noasu navai. Kena Jesus ume aꞌe kehine la, “Ko mai hevai iunu.” 8Ia nakama kaukali Jesus la unakaꞌa avale iloko kemakaꞌina la nosui naꞌai.
9Kehine la ume aꞌe, “Anau masalo pela aꞌoe me mai manau iau aku hevai iunu aꞌoe. Mai aꞌoe he{Jiu}, ia anau hehine haSamaria.” (Na{Jiu} la ehanaꞌino nakama Samaria.)
10Kena Jesus ume aꞌe, “Aꞌoe seailoa kehoꞌi Keakua. Ia semakino oai kekama eainoa aku kevai iunu. Ia poi aꞌoe emakino kama la, kena aꞌoe ame ainoa aꞌe i aia, kena kama la meiau aku aꞌoe kevai keola kela eola kahi.”
11Kena kehine la ume aꞌe, “Alohai, aꞌoe sehipuu. Ia kevai nei enoko haeꞌo. Aꞌoe meiko kevai na ihee? 12Aꞌoe sehamakua iluna Jacob kipuna makou la. Haleaina kama la ma namanu aia la eunu kevai nei, kena iau mai kevai nei ma makou hoi.”
13Ia Jesus eme aꞌe kehine la, “Niaina nakama eunu kevai nei, nakama na mehiunu muli oia. 14Ia oai meiunu kevai kela anau meiau aꞌe la meselavaa kehiunu hoi. Kevai la meosooso kahi iloko kama la. Ia kena meiau aꞌe kama la keola naualoko hamau.”
15Kena kehine la ume aꞌe, “Kealiꞌi. Au mai kevai na. Pela anau mesehiunu. Ia pela anau isehamai kahi noasu navai.”
16Kena Jesus eme aꞌe kehine la, “Haele noanaa aku keꞌavana aꞌoe la. Olua uo mai.”
17Ia kehine la ume aꞌe, “Anau seisi keꞌavana anau.”
Kena Jesus eme aꞌe kehine la, “Aꞌoe ekakala hamaoni pela aꞌoe seisi keꞌavana. 18Aꞌoe eꞌavana elima nakanaka imua. Ia kanaka kela enoho maꞌoe vahonei la sehiꞌavana aꞌoe. Kakala aꞌoe la ehamaoni.”
19Ko kehine la ime aꞌe, “Kealiꞌi. Anau emakino pela aꞌoe ehakae nakakala Keakua. 20Nakipuna makou la ehamalumalu Keakua iluna kemouna nei. Ia okou na{Jiu} ekakala pela nakama hakoa ekau kehamalumalu Keakua iloko Jerusalem oia.”
21Ia Jesus eme aꞌe, “Hakina nakakala anau nei. Imuli, okou mesehamalumalu Kamana iluna kemouna nei, ia seai iloko Jerusalem hoi. 22Okou nakama Samaria ehamalumalu namea okou semakino. Ia makou na{Jiu} emakino hea makou ehamalumalu la. Maikinimea kekama mekonaꞌi naonohenua mehanau iho iloko na{Jiu}. 23Ia vahonei, naonohenua la eꞌamaka nohamalumalu hamaoni Kamana i namahi Keanana Kapu. Kamana ehihai kipukipu kehamalumalu nei. 24Keakua heanana. Ia nakama kela ehamalumalu Keakua ekau kehamalumalu hamaoni kama la i namahi Keanana Kapu.”
25Kehine la ume aꞌe, “Anau ailoa pela keMesaea mehamai, kanamale Christ. Kena kama la meihaꞌali mai makou namea hakoa.”
26Kena Jesus ume aꞌe, “{Kenei anau}, kama kela ekakala aku aꞌoe.”
27Keualoko la, nakama kaukali Jesus la uvaꞌai aꞌe, nokili Jesus oikakala laua ma kehine la. Kena nakama la umasalo haeꞌo pela kama la ekakala ma kehine Samaria la. Ia sehikama eme aꞌe Jesus pela, “Hea aꞌoe hihai?” ma, “Okea aꞌoe ekakala ma kehine na?”
28Kena kehine la ukiaꞌi kelo vai kea aia la, novaꞌai muli kemakaꞌina aia la, kena ikakala aꞌe nakama la ma, 29“Omai nomaka. Kama la ekakala konu mai nia anau epena. Anau hakaꞌoko ma kela keMesaea.” 30Kena nakama la ukiaꞌi kemakaꞌina la, kena io nomaka Jesus.
31Keualoko la, nakama kaukali Jesus la ume aꞌe, “Rabai, ko nimea maꞌoe noꞌai!”
32Ia Jesus ume aꞌe, “Anau eisi naꞌai meiꞌai, ia okou semakino.”
33Kena nakama kaukali Jesus la ukakala solakou, “Oai kekama eau aꞌe naꞌai kama nei noꞌai?”
34Ko Jesus ime aꞌe, “Naꞌai anau eme penei. Anau epena hea kekama kela ehaunalia mai anau la ehihai anau ipena iokia. 35Okou sekau kekakala ma, ‘Kakou ikali imuli ehaa namalama, kena uhaꞌuku naꞌai.’ Anau eme aku okou kehamaoni. Ila aꞌe nalaꞌau la ekomaꞌi nahua ukau keꞌai.*f2* 36Nakama kela ehaꞌuku nahua la uoki keko nasui lakou. Vahonei nakama la ehaꞌuku naꞌai kela eola naualoko hamau. Ia kena kekama ekoli la, ia ma kekama eko naꞌai la ehihia hakoa. 37Nakakala hulihuli nei ehamaoni, ‘Kelaa kama ekoli, ia kelaa kama eko naꞌai.’ 38Niaina okou sesasaꞌa, anau ehaunalia okou iko naꞌai. Alakama esasaꞌa, kena okou esuꞌui ma lakou noko naꞌai la.”
39Komaꞌi nakama haSamaria la ehakina ia Jesus, maikinimea kehine la ekakala aꞌe lakou penei, “Kama la eme mai anau namea hakoa anau epena la.” 40Ia kena nakama la uo noainoa aꞌe Jesus inoho lakou. Kena Jesus unoho ilaa siaoa naaho.
41Keonohenua la ehalono nakakala Jesus, kena komaꞌi nakama ehakina i aia.
42Nakama la eme aꞌe kehine la, “Makou elono nakakala aꞌoe imua la, kena ihakina. Ia vahonei makou uhakina hamaoni, maikinimea makou somakou ulono nakakala kama la. Makou ailoa pela kenei kekama mekonaꞌi nakama kemaalama nei hakoa iola.”
Jesus ekonaꞌi kamaliꞌi kama hamakua nomaakala muli
43Jesus enoho i kemakaꞌina la siaoa naaho, kena ihaele i Galilee. 44Jesus soia eme aꞌe pela naonohenua ame sehamaha kekama lakou kela ehakae nakakala Keakua. 45Ia keualoko Jesus nikae i Galilee, nakama ilaa eko halaoi kama la. Maikinimea nakama la naꞌike avale namahi kela Jesus nihuli aꞌe keualoko lakou enoho Jerusalem noꞌai keꞌai kePasova. 46Kena Jesus uvaꞌai i kemakaꞌina Cana iloko Galilee. Kela kemakaꞌina kama la nihuli kevai kea nome mo {uaen}.
Kela hepalekuꞌu enoho i Capernaum. Kamaliꞌi aia elavea haeꞌo, 47ukapili imake. Kanaka la elono pela Jesus uhaele ikaha ma Judea, nonoho i Galilee, kena ihaele noainoa aꞌe Jesus ma laua io i Capernaum nokonaꞌi kamaliꞌi aia la. 48Jesus eme aꞌe kama la, “Poi okou seꞌike nahaꞌaku, ia ma namea kaualeꞌa, kena okou mesehakina.”
49Ia palekuꞌu la ume aꞌe, “Kealiꞌi. Hamai. Aoki kamaliꞌi anau la umake.”
50Ko Jesus ime aꞌe, “Haele aku. Kamaliꞌi aꞌoe na eola oia.”
Palekuꞌu la ehakina nakakala Jesus, kena ihaele. 51Kama la uvaꞌai muli nokili nakama heheaꞌu aia la i kemakeala. Kena nakama la ume aꞌe, “Kamaliꞌi aꞌoe la umaakala muli.” 52Kena iko kamana kamaliꞌi la ivasili aꞌe, “Kamaliꞌi na emaakala vahohee?” Nakama heheaꞌu kama la ume aꞌe, “Kinoꞌo kamaliꞌi aꞌoe la ekaualeꞌa mai imuli kela lakea.”
53Kena kanaka la umanaku nakakala kela Jesus nime aꞌe imuli kela lakea pela, “Kamaliꞌi aꞌoe na eola oia.” Ia kena, kama la ma nahaleaina aia la hakoa uhakina ia Jesus.
54Jesus ehuli aꞌe haꞌaku hasiaoa nei keualoko aia nikiaꞌi Judea nohaele i Galilee.
موجودہ انتخاب:
John 4: ojv
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 1999, Wycliffe Bible Translators, Inc. All rights reserved.
