Mateo 9

Ginpamayad ni Jesus ro Isaeang ka Paralitiko

(Mar 2:1-12; Luc 5:17-26)

1Ngani nagsakay sanday Jesus sa andang baroto ag nagbalik sa ana mismo nga banwa.#9:1 Ro ginatumod kara hay ro banwa it Capernaum nga ginateniran ni Jesus kon owa imaw nagapanaw. 2Pag-abot idto, may mga tawo nga nag-abot nga may ginaeayungan nga paralitiko. Pagkakita ni Jesus nga nagatuo sanda kana nga mapamayad nana ro paralitiko, ginhambae nana ra, “To, ayaw mahawag, ginpatawad eon ro imong mga saea.”

3May idto nga mga maestro it Kasuguan. Pagkabati nanda sa ginhambae ni Jesus, sinanda sa andang isip, “Ginainsulto't-a nana ro Dyos! Matsa Dyos 't-a imaw nga gapatawad it saea!”

4Pero sayod ni Jesus ro andang ginapaino-ino, ngani naghambae imaw kanda, “Ham-an it nagapaino-ino kamo it maeain? 5Ano ro mas maeumo ihambae? ‘Ginpatawad eon ro imong mga saea’ ukon ‘Bangon ag magtikang’?#9:5 Mas maeumo eang nga ihambae sa paralitiko nga ginpatawad eon ro anang mga saea ay owa it makasayod kon ginpatawad eon matuod o owa. Pero mas malisod ihambae sa paralitiko nga tindog ay kon indi imaw makatindog hay makasayod ro mga tawo nga owa it gahom ro gahambae karon. 6Pero pamatud-an ko kinyo nga ako nga Unga it Tawo hay may otoridad nga magpatawad it mga saea iya sa kalibutan.” Ginhambae rayon nana ro paralitiko, “Bangon, hakwata ro imong eugban ag umuli.” 7Nagbangon dayon imaw ag umuli. 8Pagkakita kato ku kaabo nga mga tawo hay hinadlukan sanda, ag gindayaw nanda ro Dyos tungod nagtao imaw it makaruyon nga otoridad ag gahom sa tawo.

Gintawag ni Jesus Si Mateo agod mangin Sumueunod Nana

(Mar 2:13-17; Luc 5:27-32)

9Pagkatapos, nagpanaw si Jesus. Tag nagatikang imaw, hakita nana ro *manogsukot it buhis nga si Mateo ro ngaean nga nagapungko sa anang opisina nga ginabayaran it buhis. Ginhambae imaw ni Jesus, “Mali eon ay obrahon ko ikaw nga akon nga sumueunod.” Nagtindog dayon si Mateo ag nagsunod kay Jesus agod mangin ana nga sumueunod.

10Ku ulihi, nagkaon si Jesus sa baeay ni Mateo. Abo nga *manogsukot it buhis ag iba pa nga mga ginabilang it tawo nga makasasaea nga nagkaon kaibahan nanday Jesus ag ku anang mga sumueunod. 11Pagkatapos kara hay ginbuslahan ku mga Pariseo ro mga sumueunod ni Jesus ay naugot-ugot sanda. “Ham-an it nagasaeo sa mga *manogsukot it buhis ag sa iba pa nga mga makasasaea ro inyong maestro?” hambae nanda.

12Habatian rato ni Jesus ag ginsabat nana sanda, “Ro mga mayad ro andang eawas hay owa gakinahangean it doktor kundi ro mga masakiton eang. 13Owa ako nag-adto riya agod pahinuesueon ro mga nagaeaom nga matarong eon sanda, kundi rondato nga haom mag-ako nga sanda hay mga makasasaea. Ngani estudyuhi ninyo it mayad kon ano ro tama nga kahueugan ku ginhambae it Dyos nga, ‘Mas mahaega kakon ro inyong pagkaeuoy sa inyong isigkatawo kaysa sa inyong paghaead it sapat agod tumanon eang ro Kasuguan.’ ”#9:13 Hos 6:6.

Indi Puyding Ibahon ro Daan nga Ginaturo ku mga Pariseo ag ro ay Jesus nga Bag-ong Ginaturo

(Mar 2:18-22; Luc 5:33-39)

14Ku ulihi, nag-adto kay Jesus ro mga sumueunod ni Juan nga Manogbawtismo ag nagpangutana, “Permi kaming gapuasa ag pati man ro mga Pariseo. Hay ham-an it owa't-a gapuasa ro imo nga mga sumueunod?” 15Ginsabat sanda ni Jesus, “Aeang-aeang ma't-a nga magkinasubo ag magpuasa sa ponsyon ro mga amigo it nobyo kon kaibahan pa nanda imaw. Pero maabot ro oras nga bue-on kanda ro nobyo ag rikaron eon dayon sanda gapuasa dahil sa andang kasubo.

16“Owa it gaeupon it bag-o nga tela nga owa pa nakakueo sa gisi it daan nga eambong, ay kon magkueo ro eupon ngato hay mas gabahoe pa ro gisi it daan ngato nga eambong. 17Ag owa man it gabutang it bag-o nga bino sa daan nga panit nga sueudlan it bino, ay kon magisi ra hay parehong kanugon ro bino ag ro sueudlan. Dapat nga bag-o man ro panit nga sueudlan kon bag-o ro bino agod indi masamad ro sueudlan ag indi mauea ro bino.”#9:17 Kon bag-o pa ro bino hay nagasupok ra. Ro daan nga panit nga sueudlan it bino hay indi eon kaunat ag kon sige ro pagsupok it bino, mabusdik gid ro sueudlan. Pero ro bag-o't-a nga sueudlan hay gaunat ag indi mabusdik. Ro buot hambaeon kara ni Jesus hay kinahangean ro bukas nga paino-ino agod maeubtan ro anang mga bag-o nga ginaturo.

Ginpamayad ni Jesus ro Isaeang ka Bayi nga Ginadugo ag Ginbanhaw ro Isaeang ka Unga nga Bayi

(Mar 5:21-43; Luc 8:40-56)

18Samtang nagaistorya pa si Jesus kanda, may nag-abot nga sangka manogdumaea sa ratong lugar.#9:18 Mar 5:22 ag Luc 8:41. Naghapa imaw sa atubang ni Jesus ag naghambae, “Bag-o eang namatay ro akong unga nga bayi. Kon mahimo hay sumunod ka sa amon ag imong itungtung ro imong alima kana agod mabuhi imaw it uman.” 19Ngani tumindog si Jesus ag sumunod kana pati man ro anang mga sumueunod.

20Tag nagapanaw sanda, may sangka bayi nga dose anyos eon nga ginadinugo nga nagpaeapit sa may likod ni Jesus, ag anang gintabing ro gayad ku ana nga eambong. 21Ginhimo nana rato ay sa anang paino-ino, “Kon hitabing ko eang ro anang eambong hay magamayad gid ako.” 22Umatubang dayon si Jesus ag hakita nana ro bayi. Ginhambae imaw ni Jesus, “Nang, ayaw mahawag. Nagmayad ka tungod nagsalig ka kakon.” Ag insigida hay nagmayad ro bayi.

23Tapos, nagpadayon sanday Jesus sa andang pagpamanawon ag pag-abot nanda sa baeay ku manogdumaea ngato, haabutan nanda idto ro mga manogtukar it plawta sa namatyan ag ro abo nga mga tawo nga nagatinangis ag naganginuynguy. 24Ginhambae sanda ni Jesus, “Guwa abi kamo. Owa namatay ro unga ngara kundi gakatueog man lang imaw.” Anda't-a nga ginhinibaygan si Jesus nga may daea nga pag-intrimis. 25Kat hapaguwa eon ro mga tawo, nagsueod si Jesus sa kwarto ku unga. Anang ginbuytan ro alima ku unga ag ana ra nga ginbuhi it uman. 26Nakaabot dayon ro balita parti sa gin-obra ngara ni Jesus sa tanan nga kabanwahan sa rato nga lugar.

May Ginpamayad si Jesus nga Daywang Ka Bulag

27Pagkatapos, nagpanaw si Jesus ag samtang nagatikang imaw, may daywang ka bulag nga nagsunod kana ag nagsininggit, “Apo ni Haring David, kaeuy-i man kami.” 28Pag-abot ni Jesus sa baeay nga anang ginaadtunan hay sumaylo imaw idto. Sumaylo man ratong daywang ka bulag. Ginpangutana dayon sanda ni Jesus, “Gapati kamo nga mapamayad ko kamo?”

“Huo, Ginuo,” sabat nanda.

29Ginbuytan dayon ni Jesus ro andang mga mata ag ginhambae sanda, “Matabo ro inyong ginapaabot dahil nagapati kamo nga mahimo ko ron.” 30Nakakita dayon sanda. Ginbilinan gid dayon sanda ni Jesus, hambae nana, “Ayaw gid ra ninyo pagsugiran bisan kanyo.” 31Pero pagpanaw nanda hay anda nga ginsinugid ro gin-obra ni Jesus kanda sa tanan nga kabanwahan sa rato nga lugar.

Ginpahambae ni Jesus ro Isaeang ka Tawo nga Ginpabuyon it Demonyo

32Tag nagapanaw eon ratong daywang ka tawo, may nag-abot man nga mga tawo. Gindaea nanda kay Jesus ro isaeang ka tawo nga nangin buyon ay ginsudlan it demonyo. 33Ginsuboe ni Jesus ro demonyo ngato ag nakahambae eon dayon kat ratong tawo. Hangawa gid ro kaabo nga mga tawo nga nakabati ku natabo ag sinanda, “Aba! Owa pa gid 't-a it makaraya nga natabo sa bilog nga nasyon naton it Israel!” 34Pero hambae ku mga Pariseo, “Ro anang gahom sa pagsuboe it mga demonyo hay halin kay Satanas nga pinuno it mga demonyo.”

Naeuoy si Jesus sa mga Tawo

35Pagkatapos hay naglinibot si Jesus sa mga kabanwahan, ag kabaryuhan ag nagturo sa mga sinagoga. Ana nga ginwinali sa mga tawo ro Mayad nga Balita parti sa paghari it Dyos sa tagipusuon it anang mga sinakpan, ag anang ginpamayad ro tanang klasi it baeatian ag masakit ku mga tawo. 36Pagkakita nana sa kaabo nga mga tawo, naeuoy gid imaw kanda ay ginapalisdan ag ginadaog-daog sanda, pareho it mga karnero nga owa it manogbantay. 37Ngani naghambae imaw sa anang mga sumueunod, “Kaabo-abo nga mga tawo sa rayang kalibutan ro haom eon nga magtuo kakon, ag pareho sanda it aeanyon nga haom eon nga anihon ugaling hay pilang bato eang ro haom mag-ani. 38Ngani pangamuyo kamo sa Ginuong Dyos nga tag-ana it gianyon nga padaehan nana it mga manog-ani ro anang gianyon.”

موجودہ انتخاب:

Mateo 9: akl

سرخی

شئیر

کاپی