Pinongoorapan 14
14
Dii so Ikunium
1Dii so Ikunium, muinong-a nololagan nosiro nu laid nosiro so Antiukia ri. Mosuwo yo si Paulus om si Barnabas so waloi sosombooyangan nu lobuw Yaudi ri montuduk so nosiro, om osuang lobuw Yaudi om okon ko Yaudi nopoimaid so si Yisus. 2Nga iri lobuw Yaudi dai poimaid-i, mongindoso popuinsakit nu inawo nu lobuw okon ko Yaudi poimaid so si Yisus om minusisindoraai sono nosiro. 3Pagka soko iri, molako yo si Paulus om si Barnabas dii nu olaid-laid. Sumundur nosiro opogi montuduk suat so Tuhan Yisus, iri minonaak so nosiro nu kuasa momaal nu koiran-iran, ponondu'an nu bana ya tuturan nosiro suat so samod Niyo. 4Minupinig sono lobuw dii ri, ono yo sombaagi' minaid nu lobuw Yaudi dai poimaid so si Yisus, om wokon-i minaid so duo pinongoorapan-i.
5Muupokato yo sono lobuw Yaudi om wowaidon nosiro ri, nu lobuw okon ko Yaudi ri mononsara' om momilai nu duo koyuwan iiri nu watu. 6Norongou-o po iri nosiro, mulaiwo yo nosiro om miano yo so Listra om so Darbi, bandar so wonuo nu Likaunia, om so pilolongkop nu kampung dii 7paabar nu Abar Owarong.
Dii so Listra
8Dii so Listra kuwai ido kusoi kimai kiat koworos, dai kopanou. 9Mogom-ogom iyo mongkinongou nu totongaron ni Paulus. Ponsiou-siou ni Paulus nu tantu opoli'an lobuw iiri so' poimaid nu totongaron nu Tuhan. Indadi, bontongi yo sono ni Paulus lobuw kimai iiri, 10om mutongaro yo nu osangat nu, “Undii yo!” koo. Lobuw iiri nga minundii yo sono, om minanou-panou. 11Nosiou-o po nu lobuw suang-i gogoma'on ni Paulus, songgonsok-gonsok sono nosiro mutangar so tangar Likaunia nu, “Siowi muyu bo, nokountiba yo pinokokinoringan toko ri om sinumiliw nu lobuw,” koo. 12Ingorani yo sono nosiro si Barnabas so si Jius iri pinokokinoringan nosiro ri, om si Paulus iningoranan nosiro so si Irmis iri pinokokinoringan-a nosiro ri, so' si Paulus-o su minutangar. 13Lumogaa yo sono iri imam Jius, mongowit nu ongo sapi kusoi om wusak so pintu nu bandar-i, so' moingin iyo maid so lobuw suang-i mongoraa' so si Barnabas om si Paulus. Iri yo po waloi pinoianan nu tinindobuw nu pinokokinoringan Jius dii so dilabus nu bandar-i.
14Norongou-o po ni Paulus om ni Barnabas padu-padu nu lobuw suang iiri, pisi'-pisio yo nosiro pokakas nosiro ri nu dai kotaayun, maid nu mundak so isop nu lobuw suang-i, om lumuap nu, 15“Nokuro ka su momaal kou soko itu? Kai yo po lobuw-a, soko kou. Tomod mai yo po tuui nga monuturan nu Abar Owarong suat so si Yisus, su' mongolupo kou nu tinindobuw d'ado kosudaan-o, om poimaid kou sono nu Kinoringan miau, iri minomangun nu wonuo, langit, raat om kiawi' asuw nu wonuo tu.#Kin 20:11; Lgu 146:6 16Gulu ri, pinosimaidan nu Kinoringan kiawi' bansa mongowaid nu koinginan nosiro. 17Otolang sobana koworongan nu Kinoringan so gogoma'on Niyo. Tinaakan kou Niyo nu uran, om pinumpung iya nu intodon. Tinaakan kou nu okanon, om posanang nu inawo muyu no,” koo nosiro. 18Nga soko iri pona tinangar nu duo pinongoorapan ni Yisus, ogon-ogon dai nopogos nosiro lobuw suang-i mongoraa' so nosiro.
19Lumogaa yo sono tinu-tinu lobuw Yaudi, kiat so Antiukia so wonuo nu Pisidia, om kiat so Ikunium, mongimuun nu lobuw suang-i su' gumapi' so nosiro. Pilayo yo sono nosiro si Paulus nu watu om goyato yo polabus kiat so bandar-i. Ponontaman nosiro ong minatoi-o si Paulus, 20nga laid nu lobuw poimaid-i mundii-dii so pililiwut niyo ri, tumungago yo sono iyo mundii, om mululio yo so bandar-i. Susuab-i murongkato yo nosiro mian so Darbi.
Kiat so Darbi minululi' so Antiukia
21Nokologa' si Paulus om si Barnabas so Darbi, nopaabar sono nosiro nu Abar Owarong dii, om osuang lobuw nopoimaid so si Yisus. Nopupus iri, mululio yo nosiro so Listra, Ikunium om so Antiukia so wonuo nu Pisidia. 22Nopopiot nosiro nu koimaidan nu lobuw so si Yisus so bandar iiri. Mutongaro po nosiro nu, “Subai osuang oirosaan toko nu kosonsora'an om koirasa toko nai' nu koworongan so Pogkuosaan nu Kinoringan,” koo. 23Momilio yo sono si Paulus om si Barnabas nu wowaidon so ido soido puimpugan nu lobuw poimaid. Nokopogdu'a nosiro maid nu mupuasa, komoulii yo nosiro wowaidon pinili' nosiro iiri so Tuhan, ono yo Tuhan imaidon nosiro.
24Nokolongkop-o po si Paulus om si Barnabas so wonuo nu Pisidia, lumombuso yo nosiro so Pampilia. 25Nokotuturan-o po nosiro tinongaran nu Kinoringan so Porga, lumombuso yo nosiro so Atalia. 26Nopupus nosiro dii, lumoyago yo nosiro mululi' so Antiukia, iri inungkiaton nosiro ri. Dii yo so Antiukia su pinokomouli'an so nosiro so Kinoringan, tayon ong ipatan Niyo nosiro so pomponowan mongaabar nu Abar Owarong. Om kosiono noopod-o nosiro ono.
27Nokologa' yo po si Paulus om si Barnabas so Antiukia, popuimpugo yo nosiro lobuw poimaid-i, om tuturani yo nosiro onu yo po ginama' nu Tuhan, iri nipogama' so nosiro ri. Minonuturan-a nosiro nu tinaakan-o nu Kinoringan lobuw okon ko Yaudi nu kosiwatan poimaid so si Yisus. 28Olaid-laid-a nosiro minogol dii mido-ido so lobuw poimaid-i.
موجودہ انتخاب:
Pinongoorapan 14: TomPWPgLgPn
سرخی
شئیر
کاپی

کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2023 (Active), Wycliffe Bible Translators, Inc. All rights reserved.