Мф 11
11
11 ГЛАВА
2-19 Тынеш Пуртышо Иоаннын колтымо еҥже-влак. 20-24 Титакыштым шиждыме ола-влаклан ойго. 25-30 Мый декем толза да каныза.
1Латкок тунемшыжлан тыгай каҥашым пуымеке, Иисус тушечын каен да тиде кундемысе олалаште туныктен каласкалаш тӱҥалын.
2Христос мом ыштыме нерген колмеке, казаматыште шинчыше Иоанн Тудын деке кок тунемшыжым йодаш колтен: 3«Толшашлыкше Тый улат, але мыланна весым вучыман?» 4Иисус нунылан вашештен: «Кайыза, ужмыдам-колмыдам Иоаннлан каласкалыза: 5сокыр-влак ужыт, окшак-влак коштыт, проказе черан-влак эрнат, чокрак-влак колыт, колышо-влак ылыж кынелыт, йорло-влак#11:5 «Йорло-влак»: грек ойым «Йорло-влаклан» манынат умылаш лиеш. Тыгак – Лк 7:22. Поро Уверым каласкалат. 6Ондалалтын, кӧ Мый дечем ок кораҥ, тудо поро пиалан».
7Иоаннын тунемшыж-влак кайымеке, тудын нерген Иисус калыклан каласкалаш тӱҥалын: «Те ир мландыш мом ончаш лектында? Мардеж дене лӱҥгышӧ омыжым мо? 8Мом те ужаш миенда? Шергакан вургемым чийыше айдемым мо? Шергакан вургеман-влак кугыжа-влакын кӱполатыштышт улыт. 9Те мом ончаш лектында? Пророкым? Туге, тыланда ойлем, тудо пророк, но пророк деч кугурак. 10Возымо: ”Теве Тый дечет ончыч Мый Шкемын Суксем колтем. Тудо Тыйын ончылно корным ямдыла”. Тидым Иоанн нергенак каласыме.#11:10 Мал 3:1. 11Тыланда чынак ойлем: ӱдырамаш-влак деч шочшо коклаште Тынеш Пуртышо Иоанн деч кугурак еҥ уке, но Пылпомыш Кугыжаныште эн изижат тудын деч кугу. 12Тынеш Пуртышо Иоаннын калыклан каласкалаш тӱҥалме жап гыч тачысе кече мартеат Пылпомыш Кугыжаныш вий дене налалтеш,#11:12 «Вий дене налалтеш» – грек мут-влакым «Куат дене толеш» манынат кусараш лиеш. да вийым пыштыше-влак тудым налыт. 13Вет чыла пророк ден закон Иоанн марте ончык ужын ойленыт. 14Палынеда гын, тудо – толшаш Илия. 15Кӧн колышташ пылышыже уло, тек колеш.
16Но тиде тукымым кӧ дене таҥастарем? Тудо пазарыште шинчыше йоча-влак гай. Нуно йолташышт-влаклан кычкырат: 17”Ме тыланда шиялтыш дене шоктышна, а те ыжда кушто, ме тыланда ойган мурым мурышна, а те ыжда шорт”. 18Иоанн толын, ок коч, ок йӱ, а ойлат: ”Тудын кӧргыштыжӧ ия!” 19Айдеме Эрге толын, кочкеш, йӱэш, а ойлат: ”Ончалза, теве кочкаш да йӱаш йӧратыше Айдеме, йозак погышо ден языкан-влакын йолташышт”. Икшывыж-влакым ужын, Юмын уш-акылжым чынлан шотлат».
20Вара Иисус южо оласе калыкым языкым касарыктыде да Юмо деке савырныде илымыштлан шылталаш тӱҥалын, вет Тудын куатле пашаж-влак кокла гыч эн шукышт нине олалаште ончыктымо лийыныт. 21«Ойго тылат, Хоразин! Ойго тылат, Вифсаида! Могай куатле паша-влак тендан дене лийыныт, тугаяк паша-влак Тир ден Сидонышто лийыт ыле гын, нуно шукертак, чоштыра вургемым чиен, ӱмбакышт ломыжым шавен, языкыштым касарыктен, Юмо деке савырнат ыле. 22Тыланда ойлем: суд кечын Тир ден Сидонлан тендан деч куштылгырак лиеш. 23Тый, кавашке шумеш нӧлтымӧ Капернаум, тамыкыш сӱмыралме лият! Тыйын уремлаштет ончыктымо куатле паша-влак гай Содомышто лийыт ыле гын, тудо таче мартеат шога ыле. 24Тыланда ойлем: суд кечын Содом мландылан тый дечет куштылгырак лиеш».
25Тиде жапыште Иисус ойлен: «Ачай, пылпомышын да мландын Господьшо! Тый уш-акылан дечат, кугу ушан дечат шылтымым изи-влаклан почынат, сандене Тыйым чапландарем. 26Туге, Ачай, тыгай лийын Тыйын поро эрыкет.#11:26 Эрык – воля, желание. 27Ачам чыла Мыйын кидышкем пуэн. Эргым Ача деч моло нигӧ ок пале, Ачамат Эрге да кӧлан Эрге палдарынеже, нунын деч моло нигӧ ок пале.
28Орлыкышто илыше да нелым ужшо-шамыч, чылан Мый декем толза, Мый тендам тынысландарем. 29Мыйын нумалтышем шке ӱмбакыда налза да Мый дечем тунемза, вет Мый ӱҥышӧ да пушкыдо кумылан улам. Тунам чонланда тынысым муыда. 30Вет Мыйын нумалтышем нумалаш поро, Мыйын туныктымем#11:30 «Туныктымем»: грекла ’нумалтышем’. куштылго».
موجودہ انتخاب:
Мф 11: УС
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Библийым кусарыше институт, Хельсинки 2007
