Matius 7
7
Koengkohano bhitaha
7:1-5
Luk 6:37-38, 41-42
1“Koise bhitahaki manusia bhaimu, keana nobhitahakiko Lahataꞌala. 2Kapaꞌamo kabhotusi nefondawumu ne manusia bhaimu somo dua kabhotusino Lahataꞌala ne wutomu. Pedamo dua aitu tubho nepakemu ne bhaindo somo dua tubhono Lahataꞌala ne wutomu. 3Noafa bhahaa wohaꞌao kanenano habha weo matano bhahitiemu, gahaꞌaitumo kakebhano sau weo matamu miina mandeꞌaanea? 4Peda ae dua pugauꞌao ne bhahitiemu, ‘Naetaa amaliangko kanenano habha weo matamu itu’, gahaꞌaitumo weo matamu bhe kakebhano sauno. 5Hintu mehaaꞌulano! Alimo kadeki kakebhano sau weo matamu itu, so nentaleaꞌao umondo maka mali kanenano habha weo matano bhahitiemu.”
Bara mongkilo bhe moꞌaliꞌano
7:6
6“Bara mongkilo koise waꞌane daꞌu, bhahaa nosuli nokokapeko. Muntiamu koise ohoane wewi, bhahaa nopokafindaꞌiane.”
Kamesalo
7:7-11
Luk 11:9-13
7“Tamesalomo tetewei damaꞌangko, taꞌondofimo tetewei poꞌawaane; tamekatengkimo fointo tetewei dalumengkaangkoe. 8Kapaꞌamo sasuka mesalono naetahima, sasuka meꞌondofino naepoꞌawaꞌao bhe sasuka mekatengkino fointo dalumengkaane. 9Nandoo bhahaa ne olotamiu itu, ane anano nesalo roti tanowaꞌane kontu? 10Tawa ane nesalo kenta tanowaꞌane ule? 11Sanginomo hintimiu mie modai pandemoomu waꞌaoꞌomu metaaꞌano ne anamiu, bhemo toha Amamiu te surugaa! Anoa namaꞌao metaaꞌano ne mie mesalono.”
Kaangkaꞌa sakotuꞌuno
7:12-14
Luk 13:24
12“Bhahi-bhahiꞌae kapoindalomu so nehabundo mie bhaimu ne hintu, habue dua ne mie bhaimu. Ingka kosasawiꞌae kafoinaꞌuno Kitabino Musa bhe Kitabindo ana-anabii noꞌonumo ne ini.
13Pesuaꞌomu ne fointo mosekeꞌano, kapaꞌamo neꞌewa fointo bhe nolalesa kaangkaꞌa humopeꞌano we narakaa, pakade dobhahi mie mangkaiꞌe. 14Tamaka noseke fointo bhe nomahasai mpuu kaangkaꞌa humopeꞌano ne dadi suhue dhamani, pakade miina dabhahia mie mangkaiꞌe.”
Kafoinaꞌu umala
7:15-23
15“Posiꞌondoomu ne mie mpahaana-anabiino. Andoa damai daesahangka ne dhumba momaluno lalo, gahaꞌaitu andoa itu daꞌu ngkahoku fohumaano. 16Andoa ini mandeꞌaandaomu ne podiundo. Bhahaa nandoo meꞌutano bhakeno angguru nomaiꞌao ne daha-daha? Tawa bhakeno wohaꞌa nomaiꞌao ne laiwongka? 17Pedamo naꞌa sau metaa nokobhakeꞌao metaaꞌano, sau tapa metaaꞌano nokobhakeꞌao modaiꞌano. 18Sau metaa pae bhe kapoolia nakobhakeꞌao modaiꞌano, pedamo dua sau tapa metaaꞌano pae bhe kapoolia nakobhakeꞌao metaaꞌano. 19Kotika sau tapa metaaꞌano bhake, tetewei datumuꞌoe maka daꞌumohoe weo efi. 20Pedamo dua mie mabhino wutono anabii, andoa maitu mandeꞌaandaomu ne podiundo.
21Suano kotika mie kumangkonano neaku, ‘Ompu! Ompu!’ so mesuano surugaa, tamaka mie mangkafino kapoindalono Amaku te surugaa. 22Nahumato Oleono Kiama dabhahi so mugauno ne Idi, ‘Ompu! Ompu! Ingka insaodi ini takosuaha peda seemie anabii tapake neamu, taefolimba seetani tapake neamu, pakade nobhahi taehabu kadhadhia timenteꞌaono tapake dua neamu.’ 23Ne naꞌamo dua amohatoda mentalea-mentalea, ‘Ingka miina sepaliꞌa amandeꞌaangkoomua! Gampiomu ne wiseku ini, hintimiu humabu modaino.’ ”
Dohodua mefelambuno: seemie nopande, seemie nobhohe
7:24-27
Luk 6:47-49
24“Laꞌae metingkeno pugauku ini maka noangkafie, nopototo bhe seemie mandeno moeheno lambuno te wawono dempa. 25Pada nofoehee nomaimo use, domawamo oe noangkafie bhe kawea moꞌosa nokitufao lambu aitu. Tamaka lambuno miina naosansaa, mbaꞌinomo nofoehee te wawono dempa.
26Laꞌae metingkeno pugauku ini tamaka miina namangkafie, nopototo bhe seemie bhohe moeheno lambuno te wawono bhone. 27Pada nofoehee nomaimo use, domawamo oe noangkafie bhe kawea moꞌosa nokitufao lambu aitu. Gahaꞌa lambuno nosansa. Kadaha maka kadaino.”
Ponamisindo metingkeno
7:28-29
28Nopalusi Yesus nofofoinaꞌu peda maitu, mie bhahi tadomente dofetingke kafoinaꞌuno naꞌa. 29Kapaꞌamo Yesus nofoinaꞌuda peda seemie kokuasano, nopoꞌala bhe pande-pande Kitabindo.
موجودہ انتخاب:
Matius 7: mnbSD
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2022, Wycliffe Bible Translators, Inc. All rights reserved.
