Евангелле паводле Яна Раздзел 15

Раздзел 15

1Я ёсць праўдзівая вінаградная лаза, а Айцец Мой – вінаградар.

2 # Мц. 13:12 Кожную галінку, якая ўва Мне не прыносіць плода, Ён адсякае, а кожную, што прыносіць плод, тую ачышчае, каб болей прыносіла плода.

3 # Эф. 5:26 Вы ўжо ачышчаны праз слова, якое Я гаварыў вам.

4 # Дзеі 2:42; Эф. 3:17; 1Ян. 2:28 Заставайцеся ўва Мне, і Я – у вас. Як галінка не можа прыносіць плод сама з сябе, калі не застанецца на вінаграднай лазе, так і вы, калі не застанецеся ўва Мне.

5 # 2Кар. 3:5; Гал. 5:22; Плп. 1:11 Я – вінаградная лаза, а вы – галіны. Хто застаецца ўва Мне, і Я – у ім, той прыносіць многа пладоў, бо без Мяне вы не можаце нічога зрабіць.

6 # Мц. 3:10 Калі хто не застанецца ўва Мне, будзе адкінуты прэч, як галінка, і ссохне, і збяруць іх, і кінуць у агонь, і яны згараць.

7 # Мк. 11:24 Калі застанецеся ўва Мне, і словы Мае ў вас застануцца, пра што захочаце, прасіце, і станецца вам.

8 # Мц. 5:16; Плп. 1:11; 1Пёт. 4:11 У гэтым уславіцца Айцец Мой, калі многа плода прынесяце ды станецеся Маімі вучнямі.

9Як Мяне ўзлюбіў Айцец, так і Я ўзлюбіў вас; заставайцеся ў Маёй любові.

10Калі зберажэце Мае прыказанні, застанецеся ў Маёй любові, як і Я збярог прыказанні Айца Майго і застаюся ў Яго любові.

11Гэта Я вам сказаў, каб радасць Мая была ў вас, ды каб радасць ваша была поўнай.

12 # Рым. 12:9; 1Тэс. 4:9; 1Ян. 3:11 Гэта вось Мае прыказанні, каб вы любілі адзін аднаго, як і Я ўзлюбіў вас;

13 # Рым. 5:6; Эф. 5:2 ніхто не мае большай любові за тую, калі хто аддае жыццё сваё за сваіх сяброў.

14 # Лк. 8:21 Вы – сябры Мае, калі рабіць будзеце ўсё, што Я загадваю вам.

15 # Як. 2:23; Эф. 1:9 Ужо Я вас не называю слугамі, бо слуга не ведае, што робіць гаспадар яго; а Я назваў вас сябрамі, бо ўсё, што ад Айца Майго пачуў, зрабіў вядомым вам.

16Не вы Мяне выбралі, але Я вас выбраў і паставіў вас, каб вы ішлі і прыносілі плод, ды каб ваш плод заставаўся, і каб Айцец даў вам, пра што толькі будзеце прасіць Яго ў імя Маё.

17 # Рым. 5:5; 2Ян. Гэта загадваю вам, каб вы любілі адзін аднаго.

18Калі вас свет ненавідзіць, ведайце, што і Мяне зненавідзеў раней за вас.

19 # Лк. 6:22 Каб вы былі са свету, свет любіў бы тое, што яго; але вы не са свету, бо Я вас выбраў са свету, таму вас свет ненавідзіць.

20 # Мк. 13:9; Лк. 21:12 Памятайце словы, якія Я вам сказаў: паслугач не большы за гаспадара свайго. Калі Мяне пераследавалі, дык і вас пераследаваць будуць; а калі вы Маё слова збераглі, дык і ваша берагчы будуць.

21 # Мц. 10:22 А гэта ўсё зробяць вам дзеля імя Майго, бо не ведаюць Таго, Хто Мяне паслаў.

22 # Рым. 1:20 Калі б Я не прыйшоў і не гаварыў ім, не мелі б граху, але цяпер не маюць апраўдання за свой грэх.

23 # 1Ян. 2:23 Хто Мяне ненавідзіць, ненавідзіць і Айца Майго.

24Калі б не рабіў спраў сярод іх, якіх не рабіў ніхто іншы, не мелі б граху; але ж цяпер і бачылі, і зненавідзелі Мяне і Айца Майго.

25 # Пс. 35:19; 69:5 Але, каб споўнілася слова, якое запісана ў іх законе: “Зненавідзелі Мяне без прычыны”.

26 # Лк. 24:49; 1Ян. 5:6; Гал. 4:6 А калі прыйдзе Суцяшальнік, Якога Я вам пашлю ад Айца, Дух праўды, Які ад Айца паходзіць, Ён пра Мяне сведчыць будзе;

27 # Лк. 1:2; Дзеі 1:8; 2Пёт. 1:16; 1Ян. 1:1 але і вы таксама сведчыце, бо вы ад пачатку са Мною.

موجودہ انتخاب:

Евангелле паводле Яна Раздзел 15: ББЧ

سرخی

شئیر

کاپی