Matiu 5
5
Iesua mupala'anixu xoluxolu ane laixe
1Ioxe, Iesua mumaisi'a tamitema latala milasi mine'ene'e laso anu mutelai no la'olu vile mo mutalupexa. Mutalupexa mukalu la tatisaipeli mine'ene'e noxou.
2La mulanu vaikala so pelototo noxi'a aloxo 'o, 3“Laixe noxi'a ane'i ane ilavu lexe no anu xoluxoluxu ulene'i la ane'i ta'oloxolasi. Xo voxo so Mosinge molu u'uli laxune'i tamitemaou no tualasou la ane'i ixolu nonano ne. 4Laixe noxi'a ane'i ane itatama vaimomo 'o xo ili'i la ixalisou mamatola ane. 5Laixe noxi'a ane'i ane me'a ilu'ene'i xo Mosinge muvavalima lexe anu upilixinu lialia mukalusi noxi'a. 6Laixe noxi'a ane'i ane opone'i ututuluou ilixo mulapusi aloxo itema usolixu la'ilali ilou lexa. Xo opone'i ututuluou ilixo malemalenga axone la uxali u'isalili no anu masaxa noxi'a ne. 7Laixe noxi'a ane'i ane opone'i lelemesou so susu noxi'a tamenexi'a xo ane'i ixalisou iaiama ane. 8Laixe noxi'a ane'i ane opone'i malemalenga xo ane'i imaisou Mosinge ane. 9Laixe noxi'a tamitema ane xavine'i so ikalusou oto mo tu'umaxu xo ane'i itavulenu uala lexe Mosinge ta'olu. 10Laixe noxi'a ane'i ane imulinu ilixo mulapusi ka itavulenu tu'umaxusou no avo'a tamitema. Xo voxo so Mosinge molu u'uli laxune'i tamitemaou no tualasou la ane'i a nonano ne kalumo. 11Laixe noxinge loxo ngatavulenu navunavusou ualasilo. Loxo tamitema ipupuiengi mo ilosinge tu'umaxu mo ikalavoisinge no anu vaikala masua iouiou. 12Loxo i'oxo noxinge axone la nga'osa'osasi xo ngaxalisou lapesou lailaixe no tualasou Mosinge. Mo ngalavu lexe tatei noxi'a tapolopeti ane mi'uli noxinge la tamitema milosi'a tu'umaxu iou vilesisi axone.”
Latilovo so au xe lalamo
13Xe Iesua muvikala aloxo 'ola, “Ngingi loxo ausou lialia. Ia loxo au tu'axu ukalu la vote'i so taxalisou tu'axula axova? E uasi, anu xaixai no anula uasi. Anu usu'a vitanisi ka tamitema imuamua'isousi.
14Mo ngingi loxo lalamo so lialia. Xe ngaxavutalanu, loxo taoni vile uxolu teitexi no la'olu kisou la anu upala'asi, utalume to uasi. 15Mo aloxo 'ola. Loxo itema ulexexu lalamo la anu usu'asou no anu ti'a uasi. Anu umulaxu no tanixu lalamo u'isalili so tatemanu tani mukalusi ie'i lamana no anu. 16La anu axonesi, lamanangenge utalosou ie'i tamitema mo so imaisou ilixo laixe noxinge. Imaisou laso ane'i i'itinu ualasou Maminge ane uxolu no tualasou lailaixe.
Iesua mupela'axu lo noxou Mosinge
17Xe musolonu aloxo 'ola, “Mamu so ngaxavutala lexe eni ene'e so amamulonu lo xe vaikalai'a tapolopeti. Ene'e so axililiou uasi, ene'e so amomoxu. 18Xo avikalangengi manina aloxo 'o. Vaimomo 'o ulai avile uxali no anu kaluxusou loxotolo ilou lialia 'o la vaikala sevile utuxu no anu lo tasiauxu vitanisi uasisi. Anu uxolu axonesi xo mo nene'axu mimi mukalusi uxali. 19Laso loxo itema vile ulomuanu lo pa'usou ane tamitema i'oxo lexe mi vitanisi mo ulapune'i se'i so ilomuanu kalumo, la itema anene uxolu mi vitanisi no voxo loxo Mosinge molu u'uli laxune'i tamitemaou. Ia itema ane umulinu lo mo ulapune'i tamitema so imulinu kalumo, la no voxo so Mosinge molu u'uli laxune'i tamitemaou no tualasou, itema ne uxalisou uala tatila. 20Xo tamitema so lavulavu no anu lo oli'a Tapalisi i'oxo lexe ane'i tamitema talapusi. Ia avikalangengi aloxo 'o. Loxo ngingi ngaxali talapu manina so uua'ulixa'a avile uasi, la umomomo uasi manina so nga'una ngaxolu no voxo so Mosinge molu u'uli laxune'i tamitemaou no tualasou.
Talovonixu vaikala noxou ena'ei so ukotinenge
21La Iesua muvikala aloxo 'ola, “Ngingi ngelomusou voto noxi'a tatiatila tatei lexe, 'Mamu so ngave'a tamitema isoli. Xo loxo itema uvau menexu usoli la anu ukoti ane.' 22Ia eni avikalangengi aloxo 'o. Loxo itema la'iaxuou vimou la anu utulu no lakoti mo so susu noxou upala'a. Xe itema loxo usa'isa'isou vimou la utulu no anu lakoti ane mutiatila manina. Xe itema loxo uvikalanu menexu vile lexe, 'Nini longulongu to!' la itema ne susu noxou anene masua umomomo so upalusou no navu so mamulomo. 23Laso loxo nane'enu mi vile no tanixu navu so lexe noxou Mosinge. Nane'enu ka naxavutalanu tu'umaxu vile ane uxolu no taingengi ngilou vivine la na'oxo aloxo 'o. 24Napilixinu mi e nene'enu ne no pa'umolu tanixu navu io nini nalai noxou vivine so ngalovonixu mi e uxolu no taingengi ne. Mukalu laso nalivu nalai no tanixu navu so napilixinu mi e nene'enu ulai noxou Mosinge.
25Mo aloxo 'o. Loxo itema vile so ukotixene la napalea so nasolixu tu'umaxu mo opongengi vilesisila. Xo loxo 'o io ulapuneni natulu no laxunu tiasi la masi tiasi upilixineni no avo'a tapolisi ka ikalavusunenisi. 26Avikalaneni manina lexe loxo axone la nini naxolu nakalavusu xo mo nalotonu lamoli umomomo u'isalili loxo misosovosousi ane.”
Iesua muvikala lamana so itema u'oxonu ilixo nuni'u
27La Iesua muvikala aloxo 'ola, “Ngingi ngelomusou voto so tatei lexe, 'Ngingi ane ngatautaula'i la mamu so ngaxola'u taula'i no anu ilixo nuni'u.' 28Ia avikalangengi aloxo 'o. Loxo itema vile umaisie sema vile mo oponu umuline so u'isuxe la anu mu'oxonu ilixo nuni'u noxie no anu oponui ane.
29Xe loxo ieni tema ulapuneni no anu susu la naluvunu usu'a. Xo loxo vasimene pa'usou usu'a axone la anu ialuxu sevile. Ia loxo anu ulapuneni no anu susu ka nasu'a avile no navu so mamulo la natavulenu tu'umaxusou lapilai uasisi. 30Mo loxo avone tema ulapuneni no anu susu la naxotonu uxexe. Xo loxo vasimene pa'usou usu'a axone la anu ialuxu sevile. Ia loxo ulapuneni no anu susu ka nasu'a avile no navu so mamulo la natavulenu tu'umaxusou lapilai uasisi.”
Iesua muvikalasou ilixo so taula'i uxoto
31La Iesua musolonu lexe, “Voto vile tatei aloxo 'o. 'Loxo itema vile ukusaie semau la anu ulosie lapepa so taula'i uxoto ne.' 32Ia avikalangengi aloxo 'o. Loxo itema semau ixola'u taula'i no anu ilixo nuni'u uasi ia anu ukusaiesi la anu upalusie no anu ilixo nuni'u ane. Xo loxo ane itaula'ixu itema vilela la anu taula'i maninasou uasi, ixolu noxou vitanisi. Xe itema utaula'ixe sema ane mulue mukusaie tei la anu utaula'ixe manina uasi, anu uxolu noxie vitanisi ane.
Mupela'a lexe mamu so talemolu Mosinge ualasou so tasakinu vaikala
33Xe voto vile noxi'a tatiatila tatei aloxo 'ola, 'Mamu so ngakalavoi no anu vavalima ane nga'oxonu noxou Tatananenge. Loxo ngavavalima noxou la ngaxalixu nene'axusi.' 34Ia eni avikalangengi aloxo 'o. Ngasakinu vaikalamengi lexe manina teitexi mamu. Ngalemolu tualasou Mosinge axone so ngasakinu vavalima noxinge uasi xo anene tanixu sia kingi noxou Mosinge. 35Mo ngalemolu lialia so ngasakinu vaikala uasi xo lialia ne anu tanixu Mosinge tava'u. Mo ngalemolu Ielusalemo so usakinu vaikalamengi uasi xo anu so taoni noxou Kingi Tatila. 36Mo mamu so ngalemolu kisinge so u'oxonu pakia'u vaikalamengi. Xo axova, ngingi menge ngamomomo so ngaxiunu kisinge laxusou uxali sisilisou o ulivu uxali su'inula? Uasi to! 37Laso ane, vaikalamengi utalo no anu ani o uasi. Anesi. Xo loxo ngasikinu no anu vaikala se'ila la anu molu noxou mosou sususi ane.
Pelototo lexe tasusunoxu itema so takolinu susu noxou mamu
38Xe Iesua muvikala aloxo 'ola, “Ngingi ngelomusou voto tatei lexe, 'Loxo itema vile umasuanu menexu iou la ngakolinu axonesi. Xe loxo itema vile uxola'u menexu anaxu ilanu la ngakolinu axonesi.' 39Ia eni avikalangengi aloxo 'o. Nakolinu susu noxou itema ane ususunixine uasi. Na'oxo aloxo 'o. Loxo usavaline la naxiu xalevile so usavalou kalumo. 40Xe loxo itema vile umasaxau ukotixene so uno'u lasiotimeni la nalosou lasingilisi so sivo kalumo. 41Mo loxo itema usouneni so natavulenu mimiou umomomo no anu kilomita vile la nini natavulenu umomomo no anu tamei. 42Loxo itema vile ulingau mi ma'ia noxine la nalosousi. O loxo itema une'e uxalixu tina'u noxine la naxililiou uasi.”
Pelototo lexe tasexelaxa'a tauluamenge
43La musolonu aloxo 'ola, “Ngingi ngelomusou voto tatei lexe, 'Ngingi ngasexelaxa'a tamenexinge no pa'upa'umenge ia loxo tauluamengi la ngamatapiane'isi.' 44Ia eni avikalangengi aloxo 'o. Ngasexelaxa'a tauluamengi xe ane'i ane ilosinge tu'umaxu la ngalingau su'ulisi'a noxou Mosinge. 45Xo ngingi ne ngaxolu ta'olu Maminge e uxolu no tualasou lailaixe. Anu ulavusou u'oxonu aso noxou uieisi'a tamitema tamasua xe tamitema talaixe. Mo anu ulavusou u'oxonu la'iua usilisi'a tamitema talapusi xe tamitema so ili'ilixo ukilikalu. 46Xo loxo ngasexelaxa'a tamitema ane isexelangengesi la ngaxalisou lakolisou axovao? Ai, ane'i tamitema so itaxusou taxisi ilavusou i'oxo axone to kalumo. 47Mo loxo ngavikala aso noxi'a tavivingesi la anene ilixo laixe noxi'a se'i axova? Xo ane'i tamitema so isivoxo i'oxo axone to kalumo.
48Laso ane, telexu aloxo 'o. Ngingi ngaxolu talapu no anu ngiou ngiou mukalusi a loxo xoluxoluxu Maminge e uxoxolu no tualasou lailaixe.
موجودہ انتخاب:
Matiu 5: ATA
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Copyright 1999 New Tribes Mission, Sanford, FL 32771-1487
