Matiu 14
14
Eloti mukalavoi lexe Iesua ne anu Tioni e itema so kelele
1Ioxe, no voxo ne la tila no anu xamani e Eloti mulomusou a'alosou Iesua. 2La anu muvikalane'i tamitema so xaixai noxou lexe, “Itema ne anu Tioni e itema so kelelesi ane. Anu mutulu no anu soli laso maixene xavinu so u'oxonu sosovo so xavi ne.”
3Xo aloxo 'o. Tatei Eloti mutaula'ixe Elotiasi e vimou Pilipi semau. Mixolu xo xe ili'i la anu mupalusi'a ta'amiou so mitetelisou Tioni mo miloilokisou ka mikalavusunu. 4Mu'oxo axone xo Tioni muvikala lamana noxou lexe, “Nini neno'e sema ne la nexola'u lo noxou Mosinge ane.” 5Xe Eloti mumasaxau so ivau Tioni usoli ia mu'ume'a tamitema latala xo ane'i mukalusi opone'i lexe Tioni ne anu polopeti.
6Ioxe, voxo vile ili'i la muali'a se'i mine'e no anu lavilelu so isosovosou lavulo'o noxou. Mixolu mi'ani la Elotiasi ilie vuanga mine'e milei no taine'i sila Eloti mu'osasou leiie misevile. 7Laso anu muvavalima mo musakinu no anu vaikalaou lexe anu ulosie mi ma'ia ilingau noxou. 8La Elotiasi e vuanga ne nenie mipalo matanane laso mivikalanu Eloti lexe, “Eni amasaxau lexe nini namulaxu kisou Tioni e itema so kelele no anu lapelete ka nane'e nalosilo.”
9Xe kingi mulomu la oponu tu'umaxu ia anu muxavutala lexe, “Ai evavalima mo esakinu no anu vaikalaxeli. Mo loxo amulinu uasi la atavulenu maila no ie'i tamitema e noxi'a ta'ani'ani 'o.” Laso anu mupele masaxane vuanga. 10La mupalusou voiou vile so ulai no tasou lakalavusu mo uvikalane'i ta'amiou ne lexe ixotonu Tioni xolanu. 11Mixotonu xolanu ka mimulaxu kisou no lapelete mo milosie vuanga ne. Mukalu la ane milaixu noxie nenie. 12Xe no anu Tioni vasimolu la tatisaipeliou mino'u milaixu so mi'asixu. Mi'asixu mukalu la milai mia'alou Iesua.
Iesua mua'ane'i tamitema 5000
13Ioxe, Iesua mulomusou a'alosou soli noxou Tioni laso anu mutelo no pouti so ulai no apu vile ane tamitema ixolu no anu uasi. Ia tamitema tavu'alo milomu lexe anu mulai ne laso ane'i me'a no taotaoni milutu mimuamua'i milai so imulinu. 14Laso loxo Iesua so usua la mumaisi'a tamitema latala a mixolu mukalu. La anu tanuxa'a mo mupaipoune'i tapipiena noxi'a.
15Mixolu xo xe olo'olovoxo la tatisaipeli mine'e noxou Iesua ka mivikalanu lexe, “Ai, apu ano'o ne tuala vile so tamitema 'o ino'u xa'a la'ilali uasi. Mo aso a uai no laxa'ilu 'oe. Masi napalusi'a so ilailai no tuatuala no pa'upa'umolu xale lia 'o so iloto xa'a la'ilali.” 16Ia Iesua mukoline'i lexe, “Ilailai so ma'ia? Ngingi menge nga'itixa'a ani'ani.” 17La ane'i mivikalanu lexe, “Nexi la'ilali uai to 'o uasi. Pileti mo so ta'uvesi xe sinana soxu tameisi.” 18La anu mu”oxo lexe, “Io, ngano'u une'e noxilo 'osi.”
19Ioxe, Iesua muvikalane'i tamitema lexe ita'ota'olu no lia no laxalasi ne. Mukalu la muno'u pileti ta'uve ilou sinana soxu tamei ne. La anu mutala telo no loxotolo mo muvikala laixe noxou Mosinge so la'ilali ne. Mukalu la anu muse'ise'inu pileti ne mo mulosi'a tatisaipeliou so ivelunuxa'a tamitema latala. 20La mi'ani'ani xo mole mikalusou masaxa noxi'a avile. Xe mipitanu matomatovinu la umomomo no anu lakela 12. 21La noxi'a ane'i ane mi'ani'ani ne loxo ta'itisi'a tasema xe tamolomolo uasi, ta'itisi'a tamulu noxi'asi, la navasi'a mumomomo no anu 5000.
Iesua mumuamua'i no kupa loxo'u
22Ioxe, mukalu la Iesua mupalea mupalusi'a tatisaipeliou mo muvikala lexe, “Ngingi ngatelo no pouti mo nga'uli ngalai xalevile olele. Ia eni axolu sevile so apalupalusi'a tamitema latala 'o ilailaio. Ukalu laso amulingengi.” 23Anu mupalusi'a tamitema milailai mukalu la anusisi mutelai no la'olu so uvikala noxou Mosinge. La anusisi muxolu ne xo mo aso a mulu'elai.
24Xe noxi'a tatisaipeli e mixolu no anu pouti la milai nopaxa mo mixali no kupa lixinu mukalu. La xasi mutaotaonu pouti xe sivo mutanuxa'a xo molu no laxune'i mune'e. 25La mu'oxone'i axone xo mole anu so lamanae la Iesua mumuamua'i no kupa loxo'u mune'e muxali noxi'a. 26Ia tatisaipeli mimaisou la tane'i kalaua xe mi'oxo lexe itema vile ulenu, mole miiaukakasi. 27Ia alaxu vilesisi Iesua muvikalane'i lexe, “Ngaxolu pakia'inge xo eni a. Mamu so nga'ume.”
28La Pita mukolinu lexe, “Tatananexi, loxo nini la navikalaleli mo so eni amuamua'i no kupa loxo'u ane'e noxine.” 29La Iesua mu'oxo lexe, “A nane'esi.” Laso Pita mulu'e no pouti ka mumuamua'i no kupa loxo'u so ulai noxou Iesua. 30Mumuamua'i ia mumaisou sivo lexe mu'oki laso mu'ume mo musoko'u so umoutu sila mu'ava lexe, “Tatananexi, napamaulileli!” 31La alaxu vilesisi mukalanu avolu so mutila'u Pita mo muvikalanu lexe, “O lopala noxine isusu'a sesi. Oponeni musasalo xo ma'ia?” 32Mukalu sixe ilou mitelo no pouti sila sivo mutalosi. 33Xe ane'i ane nonano no pouti mi'iti'itinu ualasou mo mivikalanu lexe, “Manina misevile, nini Mosinge Olu ane.”
Iesua mupaipoune'i tamitema pipiena ne Xenesaleti
34Ioxe, milutu xo xe mixali xalevile no kupa la misua no xale lia noxi'a Taxenesaleti. 35Xe loxo tatemanu xale lia ne mitongonu Iesua mukalu laso mikalanu vaikala mulai no tuatuala no pa'upa'ume'a so lexe ine'ene'i tapipiena mukalusi noxou. 36Mine'ene'i mukalu la milinga noxou Iesua lexe ane'i ikasi se no telexu lasiotiou veveni. Xe ane'i ta'ei mukalusi ikasou axone la laixene'isi.
موجودہ انتخاب:
Matiu 14: ATA
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Copyright 1999 New Tribes Mission, Sanford, FL 32771-1487
