मत्ती 20
20
ल़ेहमीया़गी पे
1येशूगी सुङगेनॱराङ फेप नाङसीन, “स्यिहङगामकी क्याहल्सीनी स्यिहङ ताहक्पु च्यी़ ल़ेहमु यिहम्बा। ङाटु नाहम-सेमुराङ ओ़ह ताहक्पु राहङगी कुहन्डुम स्यिहङला ल़ेह पेहकेन्गी ल़ेहमीया़ छोल्ज्ये म़ेदी थेन्दी काहल्सीन। 2ओहले ‘ङ्यिहमागी ले़गा ङुल-टाङ कोहर्मु च्यी़ तेर्के’ म़ेदी खोगी ल़ेहमीया़ला राहङगी कुहन्डुम स्यिहङला ताङ चाहङसीन। 3छ्युजी कुहजेला येहपाराङ छोङ-ठोमला डोएँमु खोगी लाहला मिहया़ला ल़ेह म़ेहबा पेहती स्यिती काम्बुला लाहङदी तेहक्यो थोङसीन। 4ओहले खोगी खुङया़ला मासीन, ‘ख्याया़ॱआङ ङाहगी कुहन्डुम स्यिहङला ल़ेह पेहच्येला सोङ, ङाह ख्याया़ला ज्योर कोहएँगी ले़गा तेर्के।’ 5खुङया़ ल़ेहला काहल्सीन। ओ़ह तिङले खोगी छ्युजी च्यिङ्यी़ दाङ छ्युजी सुमला फारॱआङ ओ़ह ल़ेहमुराङ पेहती लेहमेन मिहया़ॱलाङ ल़ेहला च्य़ूसीन। 6येहपाराङ छ्युजी ङाजेला फार डोएँमुॱआङ खोगी लाहला मिहया़ला ल़ेह म़ेहबा पेहती ओ़ह ल़ेहमुराङ छोङ-ठोमला लाहङदी तेहक्यो थोङसीन। खोगी खुङया़ला टी़हसीन, ‘ख्याया़ देला च्यिबे ङ्यिहमा काहङ ल़ेह म़ेहबा पेहती लाहङदी तेहक्यो?’ 7खुङया़गी खोला मासीन, ‘के ङ्यिहला सुज्यीगीॱआङ ल़ेहला मा़हच्यु।’ ओहले खोगी मासीन, ‘ओ़ह ल़ेहमु यिहन्सीमाना ख्याया़ॱआङ ङाहगी कुहन्डुम स्यिहङला ल़ेह पेहच्येला सोङ’।”
8 “नाहम स़े फान्ज्यो कुहन्डुमगी स्यिहङ ताहक्पुगी राहङगी ल़ेह पेहकेनया़गी गोबाला मासीन, ‘ल़ेहमीया़ला क़े क्याहप्ती खुङया़गी ल़ेह पेहक्योगी ले़गा तेर। ले़गा तेर्केमु थाम्ज्यी म़ेदी तिङले ओहङगेनया़ यिहन्ज्यु गो़ छ़ूदी तिङले च्यी़राङ थाम्ज्यी म़ेदी तोहङले ओहङगेया़ला तेर।’ #
लेवी १९:१३; व्य २४:१५ 9ओहले ल़ेहमी गोबागी छ्युजी ङाला ल़ेह छ़ूगेया़ला तोहङले क़े क्याहप्ती थाम्ज्यीला ङुल-टाङ कोहर्मु रे़ह-रे़ह तेर्सीन। 10ओ़ह ती़हजीला थाम्ज्यी म़ेदी तोहङले ल़ेहला स्य़ूक्योया़गीदी ले़गा माहङबुराङ ज्योर्टो म़ेदी साम्लु ताङदे येहकें, यिहॱनाङ खुङया़गीॱआङ ङुल-टाङ कोहर्मु रे़ह-रे़ह च्यी़राङ ज्योर्सीन। 11ओ़ह सोङबे खुङया़गी राहङ-राहङगी ले़गा लेहन्सीन ओहले स्यिहङ ताहक्पु साला काहल्दी क़े तेन्सीन। 12खुङया़गी मासीन, ‘ज़ी़-नाङदोङ, दि तिङला ओहङगे मिहया़गीनी छ्युजी च्यी़दीॱराङ ल़ेह पेहसीन, ङ्यिहगीनी ङ्यिहमा काहङ ङ्यिहमा छान्दीला ल़ेह पेहसीन। यिहॱनाङ राहङगीनी खुङया़ॱलाङ ङ्यिहला चेराङ ले़गा नाङसीन।’ 13यिहॱनाङ ताहक्पुगी खुङया़ नाहङला मेहन्दा च्यी़ला मासीन, ‘ते़ रो़ह, ङाहगी ख्येला स्योप क्याहप्ती म़ेह। ख्येगीनी ङुल-टाङ कोहर्मु च्यी़ला ङ्यिहमा काहङॱराङ ल़ेह पेहच्येला डी़गे म़ेदी माक्यो येहकें मिहम्बा ले? 14ख्ये राहङगी ज्योर कोहएँगी टाङगा लेहन्दे खाङबाला सोङ। ङाह दि तिङला ओहङगेया़ॱलाङ ख्येला चेराङ ले़गा तेर्के। 15च्यि ङाहला राहङगी टाङगा राहङगी तेर्च्ये सेम क्य़ेक्योया़ला तेर्च्येला ओङ म़ेहबा ले? ङाहगी तेरक्यो थोङदी ख्ये च्यिबे ठादो पेहकें ले’?”
16ओहले येशूगी दि स्याहल था़ च्येती सुङ नाङसीन, “दि ल़ेहमु पेहतीराङ तिङला येहकेनया़ तोहङला ओहङज्ये येह ओहले तोहङला येहकेनया़ तिङला लिहच्ये येह।”#मत्ती १९:३०; मर्क १०:३१; लूक १३:३०
टोहङदी सोम्बो लो़हगेन्दी तेहन्दाला लुङदेन
(मर्क १०:३२-३४; लूक १८:३१-३४)
17यरूशलेमला फार फेप्नाङगेमु येशूगी राहङगी स्याहप्च्यी च्यिङ्यी़ला ग्या़ च्यी़ला क़े क्याहप नाङदी सुङ नाङसीन, 18“त़ेदोङ, ओहराङ यरूशलेमला डोॱराङ येहबा। ओ़हला मिहगी स़ेबुला पूजाहारी छ्यिम्बु दाङ छ्य़े-ठिमकी लोबेनया़गी लाहक्पाला चि क्याहप्च्ये येह। खुङया़गी खोला स्यिवागी ङ्य़ेहबा काल्ज्ये येह। 19ओहले लेहमेन क्यिहपागी मिहया़गी लाहक्पाला चि क्याहप्च्ये येह। खुङया़गी खोला स्ये़हन्डील पेहच्ये येह, ताक्स्यु क्याहप्च्ये येह ओहले क्याहङस्यीङला च्याङदी सेच्ये येह। यिहॱनाङ ङ्यिहमा सुमला खो येहपाराङ स्यिक्योलेगी सोम्बो लो़हज्ये येह।”
जब्दियाकी पिहमीगी फुल्ग्योकी स्युहवा
(मर्क १०:३५-४५; लूक २२:२४-२७)
20ओ़ह तिङले जब्दियागी पुह पिन ङ्यी़ राहङगी आमा ङ्याम्बु येशूसाला काहल्सीन। खुङ ङ्यी़गी आमागी येशूगी स्याहपला खेप्चु क्याहप्ती स्युहसीन, “ङाहला निङज्यी जे नाङदोङ।” 21येशूगी मोहला टी़ह नाङसीन, “म़ेदोङ ले, ङाहगी ख्येला च्यि पेह कोहएँ?” मोहगी, “राहङगी क्याहल्बु जे नाङगेमु ङाहगी दि पुह पिन ङ्यी़ राहङगी योबा दाङ योमा ङो़ले तेह ङ्युहङज्यु” म़ेदी स्युहसीन। 22येशूगी खुङया़ला सुङ नाङसीन, “ख्याया़गी च्यि लाङगेॱराङ येहबा, ओ़ह ख्याया़ला क्यी़हराङ म़ेह। ङाहगी थुङज्ये पेहक्योगी तुहक्पुगी फार्कोले च्यि ख्याया़गीॱआङ थुङ ख़ूएँ?” खुङया़गी ख़ूएँ लाह म़ेदी ल़ेहन क्याहप्सीन। 23ओहले येशूगी सुङ नाङसीन, “यिहम्बा, ङाहगी थुङगेन्गी तुहक्पुगी फार्कोले ख्याया़गीॱआङ थुङज्ये येह। यिहॱनाङ ङाहगी योबा दाङ योमा ङो़ले तेह च्युएँगी ओङ ङाहगी लाहक्पाला म़ेह। दि ग्या़नी ङाहगी याहपगी का़हन्दीगी तेहन्दाला ठाबे ज़ो नाङग्यो यिहम्बा, खोलाराङ नाङज्ये येह।”
24दि स्याहल थे़दी लेहमेन स्याहप्च्यी च्युगी खुङ पिन ङ्यी़ ङ्याम्बु स्यिहताङ पेहसीन। 25ओहले येशूगी खुङ थाम्ज्यीलाराङ ग्या़ च्यी़ला क़े क्याहप नाङदी सुङ नाङसीन, “ख्याया़ला क्यी़हराङ येह, जाम्बुलीङगी क्याहल्बुया़गी राहङगी मिहया़ थो़ला राहङगी सेमकी ने़जेबा ओङ छ्य़ेएँ ओहले मिह छ्यिम्बुगी लेहमेनया़ थो़ला ओङ छ्य़ेएँ।#लूक २२:२५,२६ 26यिहॱनाङ ख्याया़गी पाहरक्यीला दि ल़ेहमु ओहङज्ये म़ेह, यिहॱनाङ का़हन्दीगी ख्याया़गी पाहरक्यीला छ्यिम्बु डोज्ये सेम पेहकें खोगी ख्याया़ला स्याहप्तो स्युह कोहएँ। #मत्ती २३:११; मर्क ९:३५; लूक २२:२६ 27का़हन्दी ख्याया़ नाहङला थाम्ज्यी म़ेदी तोहङला ओहङज्ये सेम पेहकें, खो ख्याया़गी योक्पु ओहङ कोहएँ। 28ओ़ह ल़ेहमुराङ मिहगी स़ेबुॱआङ लेहमेनलेगी स्याहप्तो ज्योर्च्येला मिहम्बा, यिहॱनाङ लेहमेनला स्याहप्तो स्य़ूहज्येला ओहले मिह माहङबुलाराङ थार्पा नाङज्ये दाङ राहङगी कुसोॱराङ नाङज्येला फेप नाङसीन।”
येशूगी मी़ मेहथोङगे मेहन्दा ङ्यी़ला टा़ह च्य़ू नाङग्यो
(मर्क १०:४६-५२; लूक १८:३५-४३)
29येशू दाङ स्याहप्च्यीया़ यरीहो क्याहसाले फेप्नाङगेमु मिह मिह-माहङ येशूला ताहदा क्याहप्ती काहल्सीन। 30लाहमगी सुहरला मी़ मेहथोङगेन मिह ङ्यी़ तेहती येहकें। येशू ओ़ह लाहमले जेती फेप नाङग्यो क्यी़ह ज्योर्ते खुङया़गी क़े तेन्दी मासीन, “ओ़ दाऊदकी स़ेबु, ओ़ चो़वो ङ्यिहला निङज्यी जे नाङदोङ!” 31मिहया़गी खुङ ङ्यी़ला “खाजुम तेह” म़ेदी क़े तेन्सीन। यिहॱनाङ खुङ ङ्यी़गी तोहरोङ क़े तेन्दी मासीन, “ओ़ दाऊदगी स़ेबु, ओ़ चो़वो, ङ्यिहला निङज्यी जे नाङदोङ!” 32येशू फेप्कें फेप्केमुराङ थेमे ज़्य़ू नाङसीन ओहले खुङया़ला क़े क्याहप नाङदी टी़ह नाङसीन, “ख्या ङ्यी़गी तेहन्दाला ङाहगी च्यि पेह कोहकें ले?” 33“चो़वो, ङ्यिहगी मी़ थोङ ख़ूज्यु!” म़ेदी स्युहसीन। 34येशूगी थु निङज्यीगी काहङदी ओहङसीन ओहले येशूगी खुङ ङ्यी़गी मी़ला दे़ नाङसीन। ओ़ह ती़हजीलाराङ खुङ ङ्यी़गी मी़ थोङ ख़ूएँ काहल्सीन ओहले येशूला ताहदा क्याहप्ती काहल्सीन।
موجودہ انتخاب:
मत्ती 20: HYLM
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2023 (Active), Wycliffe Bible Translators, Inc. All rights reserved.
