Genesi 9
9
Ãcõrẽba Noé ume bed̶ea b̶ʌd̶a
1Maʌ̃be Ãcõrẽba Noéa, dji warrarãa bid̶a nãwã bia jarasia:
–Warra zocãrã yõnadua. Naʌ̃ ẽjũãra jũma birad̶adua. 2Jũma animarã naʌ̃ ẽjũãne b̶eaba bãrãra wayad̶ia. Ĩbanara, animarã druabemara, pusad̶ebema sid̶a jũma bãrã jʌwaed̶a b̶ead̶ia.
3Mʌ̃a naẽna chiruada, nejõ sid̶a cod̶amãrẽã diasia.#9:3. Genesi 1:29. Ara maʌ̃ quĩrãca id̶i mʌ̃a jũma animarã b̶ea sid̶a diabʌrʌa cod̶amãrẽã. 4Baribʌrʌ animarã oara cocara panʌa, oad̶eba jũmarãda zocai duanʌ bẽrã. 5Ẽberãba wa animarãba ẽberãda beaibʌrʌ, mʌ̃a cawa oya. 6Mʌ̃a ẽberãra ara mʌ̃dji quĩrãca osia. Maʌ̃ carea bariduada mĩã beaibʌrʌ, bãrã bororãba maʌ̃ ẽberãra beabid̶ida panʌa.
7Mʌ̃a bãrãa jaraya: warra zocãrã yõnadua. Naʌ̃ ẽjũãra jũma birad̶adua.–
8Maʌ̃ awara Ãcõrẽba Noéa, dji warrarãa bid̶a nãwã jarasia:
9-10–Ũrĩnadua, mʌ̃a bed̶eada b̶ʌya bãrã ume, bãrãneba yõbʌdarã ume bid̶a, jũma animarã bãrã ume jãba dromaneba ẽdrʌped̶ad̶a ume bid̶a. Animarã daupẽbada, mẽãbema, ĩbana, jũma naʌ̃ ẽjũãne b̶ea animarã ume mʌ̃a bed̶eada b̶ʌya. 11Mʌ̃a bed̶ea b̶ʌbʌrʌra naʌ̃gʌa: naʌ̃ ẽjũãne zocai b̶eara waa dopapaba jõbiẽ́a. Waa naʌ̃ ẽjũãra ũ wãẽ́a naʌ̃ ẽjũãne b̶ea quininamãrẽã. Mʌ̃a bed̶ea b̶ʌd̶ara wãrãda mãwã b̶aya.–
12-13Maʌ̃ awara Ãcõrẽba jarasia:
–Mʌ̃a bãrã ume, bãrãneba yõbʌdarã ume, animarã ume bid̶a bed̶ea b̶ʌd̶ara jõca baya. Maʌ̃ carea mʌ̃a sẽyãda jʌ̃rãrãne jira b̶ʌbʌrʌa cawad̶amãrẽã mʌ̃a naʌ̃ ẽjũãne b̶ea ume bed̶ea b̶ʌd̶ara wãrãda mãwã b̶aida. Maʌ̃ sẽyãra eumaa. 14Mʌ̃a jʌ̃rãrã zebibʌrʌd̶e mʌ̃ eumara odjabari baya. 15Maʌ̃gʌd̶eba mʌ̃a quĩrãneba b̶aya mʌ̃a bãrã ume animarã ume bid̶a bed̶ea b̶ʌd̶ara. Waa dopapara wãbiẽ́a naʌ̃ ẽjũãne b̶ea quinibi carea. 16Euma jʌ̃rãrãne jira b̶ʌ unubʌrʌd̶e mʌ̃a quĩrãneba b̶aya jũma naʌ̃ ẽjũãne zocai b̶ea ume bed̶ea b̶ʌd̶ara. Maʌ̃ra jõca baya. 17Wãrãda eumaba quĩrãnebabi b̶aya mʌ̃a jũma naʌ̃ ẽjũãne zocai b̶ea ume bed̶ea b̶ʌd̶ara.–
Ãcõrẽba Noéa mãwã jarasia.
Noé warrarãba oped̶ad̶a
18Noé warrarã jãba dromaneba ẽdrʌped̶ad̶ara Seʌ̃, Caʌ̃, idjab̶a Jape basía. Caʌ̃ra Canaaʌ̃ zeza basía. 19Noé warrarãra ũbea panasid̶aa, baribʌrʌ ãdjid̶eba yõped̶ad̶arãba naʌ̃ ẽjũãra wayacusa birasid̶aa.
20Maʌ̃be Noéba peada oped̶a uvada úsia. 21Ewari ab̶a Noéba uva b̶a aseada do b̶asia. Maʌ̃ba idjira beu b̶esia. Maʌ̃ bẽrã idji dejãne ãcad̶a tab̶asia. 22Mãwã tab̶ʌd̶e dji warra Caʌ̃da ed̶a zesia. Caʌ̃ra Canaaʌ̃ zeza basía. Maʌ̃ne Caʌ̃ba idji zeza ãcad̶a tab̶ʌda unuped̶a idji djabarã dajadaare panʌ́a jarad̶e wãsia. 23Maʌ̃ carea Seʌ̃ba Jape bid̶a borob̶ada ab̶a edasid̶aa. Maʌ̃ borob̶ara ãdji equiad̶e b̶ʌd̶aped̶a ãdaunaa wãsid̶aa ãdji zezamaa. Maʌ̃be araa acʌd̶aẽ́ ãdji zezara ãnẽb̶ari b̶ʌsid̶aa. Mãwã ãdji zeza cacuara ununaẽ́ basía.
24Noé quĩrã bad̶acarea cawasia idji warra tẽãbema Caʌ̃ba od̶ara. 25Maʌ̃ carea jarasia:
Caʌ̃ warra Canaaʌ̃ra mʌ̃a biẽ́ jara b̶ʌya. Canaaʌ̃ra idji zeza djabarã nezoca ed̶aara b̶ʌda b̶aya.
26Mãwã jarad̶acarea Noéba idji warrarã Seʌ̃ra Jape sid̶a nãwã bia jara b̶ʌsia:
Mʌ̃ Ãcõrẽba Seʌ̃ra bia b̶ʌya. Canaaʌ̃ra Seʌ̃ nezoca baya.
27Japera Ãcõrẽba dji dromada b̶ʌya. Idji djaba Seʌ̃ ume necai b̶aya. Canaaʌ̃ra idji nezoca baya.
28Dopapa wãnacarea Noéra 350 poa b̶asia. 29Mãwã 950 poa b̶asid̶e jaid̶asia.
موجودہ انتخاب:
Genesi 9: emp
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2011, Wycliffe Bible Translators, Inc. All rights reserved.