Genesi 6
6
Ẽberãrãba cadjiruada ẽpẽ panana
1Naʌ̃ ẽjũãne ẽberãrã yõsid̶ad̶e caurãda unucuasid̶aa. 2Maʌ̃be Ãcõrẽ warrarãba maʌ̃ awẽrãrãra quĩrãwãrẽã unusid̶aa.#6:2. Ʌ̃cʌrʌmaarã maʌ̃ Ãcõrẽ warrarãra bajãnebema nezocarãa. Dewaramaarã Sed̶eba yõped̶ad̶arãda mãwã panʌa. Maʌ̃ bẽrã ãdjirãba awuabʌdada edasid̶aa.
3-4Edaped̶ad̶acarea warrarãda yõsid̶aa. Maʌ̃ warrarãra naʌ̃ ẽjũãne drasoa waib̶ʌa warisid̶aa. Ãdjirãra trʌ̃ b̶ʌga b̶easia maʌ̃ drõãenabema ewarid̶e, nocoarebema ewarid̶e bid̶a. Ãdjirã carea Ãcõrẽba jarasia: “Mʌ̃a ẽberãrãa ʌ̃yãba diasia zocai pananamãrẽã baribʌrʌ djara bẽrã beud̶ia. Poa ciento veintebe b̶ead̶ia.”#6:3-4. Mʌ̃a ẽberãrãa ʌ̃yãba diasia zocai pananamãrẽã baribʌrʌ djara bẽrã beud̶ia. Ʌ̃cʌrʌmaarã maʌ̃ bed̶eaba nãwã jara b̶ʌa: “Mʌ̃ Jaurera ewariza ẽberãrã ume djõ b̶aẽ́a ãdjirãra djara bẽrã.”
5Ãcõrẽba unusia ẽberãrãba jũma naʌ̃ ẽjũãne cadjiruada jũmawãyã o panʌda. Unusia ãdjia ab̶abe cadjirua od̶idrʌ ewariza crĩcha panʌda. 6Maʌ̃ne Ãcõrẽra sopua b̶esia naʌ̃ ẽjũãne ẽberãrã od̶a carea. Idjimaarã biara b̶acasia ãdjira od̶aẽ́bara. 7Nãwã crĩchasia: “Mʌ̃a ẽberãrãda, animarãda, animarã ãdji jãne wãbadada, ĩbana sid̶a jũma jõbiya. Mʌ̃a ãdjira od̶aẽ́bara biara b̶acasia.”
8Baribʌrʌ Ãcõrẽba Noéda bia unusia.
Ãcõrẽba Noéa jãba droma baurude quĩrãca b̶ʌ obid̶a
9Nama Noéd̶ebemada nẽbʌrʌ b̶ʌa.
Noéra ẽberã jipa b̶asia. Ãcõrẽ ume jipa nĩbabadjia. Idji ewarid̶ebemarã tãẽna ab̶abe idjidrʌ jarad̶i neẽ́ b̶asia. 10Noéba warrarãda ũbea unusia: Seʌ̃, Caʌ̃, idjab̶a Jape.
11Maʌ̃ne naʌ̃ ẽjũãne b̶eara Ãcõrẽ quĩrãpita biẽ́ duanesid̶aa baridua cadjiruara jũmawãyã o b̶ea bẽrã. 12Ãcõrẽba naʌ̃ ẽjũã acʌbʌrʌd̶e wãrãda jũma biẽ́ b̶ʌda unusia jũma ẽberãrãba ne jũmane cadjirua o b̶ea bẽrã. 13Maʌ̃ carea Ãcõrẽba Noéa jarasia:
–Mʌ̃a naʌ̃ ẽjũãne zocai b̶eara jũma jõbiya jũmawãyã cadjiruada o b̶ea bẽrã. Idjab̶a naʌ̃ ẽjũã sid̶a jũma ãrĩya. 14-16Maʌ̃ carea bʌa jãba dromada bacuru biad̶ebemada odua.#6:14-16. Bacuru bia. Hebreo bed̶ead̶e “gofer” b̶ʌ́ b̶ʌa. Baribʌrʌ hebreo bed̶ea cawa b̶eaba maʌ̃ gofer bacurura adua panʌa. Oped̶a cãdorronaba soadua ed̶aare, dajadaare bid̶a. Maʌ̃ jãbara naʌ̃ waib̶ʌad̶e odua: dji drasoada setenta y cinco braza, dji jed̶eada doce braza, idjab̶a dji ʌ̃tʌada siete braza. Jãba dromara cʌd̶apõ ũbea odua. Cʌd̶apõza zocãrã tʌajucuadua. Maʌ̃be cʌd̶apõ ʌ̃taarebemane dajadaa acʌbadada odua. Dji ʌ̃tʌara bicaca ab̶a b̶aida b̶ʌa dji ãquid̶ad̶eba ed̶aa. Idjab̶a ed̶a wãbadada jãba droma orrod̶e odua.
17Pãrãnacarea mʌ̃a dopapada zebiya naʌ̃ ẽjũãra jũma ũ wãmãrẽã. Mãwã jũma zocai b̶eara mʌ̃a jõbiya. Animarã b̶eara, ẽberãrã sid̶a jũma quininia. 18Baribʌrʌ mʌ̃ra bʌ ume bed̶ea b̶ʌya bãrã ẽdrʌ edai carea. Bʌda, bʌ warrarãda, bʌ quimada, bʌ ãĩgurã sid̶a jãba dromane b̶adod̶ia. 19Idjab̶a jũma animarãda umé uméa, dji umaquĩrãda dji wẽrãda jãba dromane ed̶a wãbid̶ia bʌ quĩrãca zocai b̶ead̶amãrẽã. 20Ĩbanada, dewara animarãda, animarã ãdji jãne wãbada sid̶a umé uméa bʌmaa zed̶ia bʌa ãdjirã zocai wagamãrẽã. 21Idjab̶a cod̶i careabemada jʌrʌ peped̶a wagadua bãrãba maʌ̃ animarã bid̶a co panani carea.–
22Ãcõrẽba jarad̶a quĩrãca Noéba jũma osia.
موجودہ انتخاب:
Genesi 6: emp
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2011, Wycliffe Bible Translators, Inc. All rights reserved.