Luc 14
14
Sesu beluse gibedu wisi gukole
1Wisi gukole, Sesu kurombu ne givunde gi Farisi gweguye gu ndagu andi. Batu babevane bekegengilange di aguvage. 2Gu gari ndagu yine, gube mutu wubelange ngubi, nyuru tsyotsu tsi kurandegenange, wube meteli ve wusu andi. 3Sesu negwivule bivunde bi migage ne Farisi re «Migage mi Moyise myagandisi gubeluse mutu wisi gukole?» 4Tumbe bebuse mwagule. Vane Sesu negumutsabige dikake, negumubeluse, negwambile re «Wubenzegwende gumbu gi agu.» 5Vane, Sesu negubambile re «Ve gari enu pasi re mutu malabe mwane andi, nesi pagese andi ya pudumuge gu gidune, asagwende gweyidobule mbangu mbangu, nesi nane wisi gukole?» 6Tumbe beserungule mwagule.
Sale mbure nzime.
7Sesu negulabe batu beserombu gu mumengu, bekasali ka bipu bi rege bi bundumbe. Negubeverile kugu yi guvage re 8«Pasi re warombu gu mumengu dyonge, wuyasale gipu gi bundumbe mbare ve gurugile mutu wusemurombe mandi aguruge ne mutu wudigobe wakukibi. 9La amagusekwambile re “Musisili gipu gi agu.” Vane wugwende ne gisoni gwetsagene ve gipu gi nzime. 10Pasi re warombu gu mumengu dyonge, tsagene gu gipu gi nzime. Varugili mutu wusenurombe lamakubonge gunzime amakubege guwusu, vewagwendi vewusu la wukene mugangu ne bundumbe bwotsu. 11Munongumosi, kepagere mutu wakwekunangusi Nyambi gamusunzi, wakwekusunzi Nyambi gamunangusi.»
Sesu gavegi ndongi yi gurombe bigayi
12Sesu negwambile mutu wusemurombe guseguye re «Pasi warombi batu gu gilambu gi mumengu, wuyarombe mbatsi tsi agu, nesi bane be nguye tsi agu, nesi biburu bi agu, nesi bikiti bi ve mbeke agu. Pasi wavage nane, yawu gwandi begukurombe wisi nzusu gukugabusile diwusebevage. 13Tumbe pasi re wavegi mulambu mumengu, rombe bigayi, batu bene byere, membogelotu, batu bene pafu. 14Pasi re wavage nane, wugube ne mugangu mbare besagurungule kugabusile. Tumbe Nyambi gukugabusile byoni wisi wu batu bevage meboti begurambugile gu dufu.»
Kugu yi mulambu neni
15Batu berombu gu gilambu negulu nane, wumosi negwambile Sesu re «Diboti gu wotsu wuguye gilambu ne Nyambi gu bulongu bu andi.» 16Sesu negumwagule ne kugu re «Gube mutu wulambe mulambu neni, arombe mbili batu. 17Digwere di guye negukike, arume mudyanzitsi andi gwegwambile berombu re “Ruganu gilambu gyakike.” 18Tumbe yawu botsu babe munu mosi, wurege ayambile mubingitsi wurumu re “Yambile fumu: Nzesumbe gyambe, nyarondi gwekyene, nyamulembigi nzaguruge.” 19Wumosi gwandi negwambile re “Nyarugili negusumbe digumi di pagese, nikyalabi neve tsyadyanzili, nyakulembigi nzaguruge nyesi.” 20Wumosi gwandi negwambile re “Nyagonge, redibandu nzagurugile.” 21Mudyanzitsi wurumu negusegwambile fumu misamu. Fumu tibile batu be yandiserombe kabu. Negwambile mubingitsi andi re “Yende mbangu gu dikase, ne munzile, mbegili gunu bigayi, batu bene byere, batu bene pafu, membogelotu.” 22Gigumbi ne guvyoge, mudyanzitsi negusegwambile fumu re “Nzevage diwusenyambile, batu baruge, tumbe guki mbili bipu bisandi ne batu.” 23Fumu negukunde gwambile mudyanzitsi re “Yende mu nzile yagwendi gu mipindi, mu migogu mi mirumbe, bambili re besingi gwingene gu ndagu gilambu, nonge ndagu ami yikubase. 24Nyanwabili Gusagube mutu wusebuse mbile ami wuguye mulambu ami.”»
Wotsu warondi binge Sesu, asindili meguge
25Sesu ayendange gu muvevilu, negulabe re mbili batu bamubingi. Negugeluge gu yawu, negubambile re 26«Wotsu warondi mbinge, pasi asatondi vyagenu ne taye andi, ne nguye andi, ne mugatsi andi, ne bane bandi, bane be nguye tsi andi, ketu tsi andi, nesi monyu andi, asagube mubingitsi ami.» 27Wotsu wusekike gusindile meguge kwange ne gudufu, negumbinge asagube mubingitsi ami. 28Pasi re vegari enu, mutu garondi runge ndagu ndiki, agarepikile, akuyabe durangu du doli tsi nandi gere dubenzemane runge ndagu yine. 29Pasi re amapakile gidyanzu gi gubuke mevulu me mekutu kwange ne gudigunge, asamanisile gurunge ndagu yine, batu begumusyeve. 30Begwambile re «Gengisanu mutu wune asepakile gidyanzu gi gurunge ndagu ndiki, tumbe asayimanisile.» 31Pasi re kanangu garondi gwende gu ngube, ne digumi ditoseni di gori tsi andi, gwedimbene ne kanangu yi bulongu bunzusu, agurepikile, ne guyabe gere gori tsi nandi tsi benzerungule dimbene ne kanangu yarugi ne megumi mebeyi me toseni me gori. 32Pasi re agapikili re asagurungule, neve kanangu yine yiki tage, agarumi gilumbi gwegwivule neve beguvagile, nonge ve tsatsegube ngube vegari awu. 33«Munongu mosi, kepagere mutu vegari enu wusagusise byotsu binandi, asabenzegube mubingitsi ami.»
Kebu yi sandi ne musumbu.
34«Kebu givave giboti, tumbe, pasi re yisegandi ne ndume, gu sandi givave gi gukunde yigabuse. 35Yisegandi ne musumbu, mbare nesi yise kuku ve dibandu dibivaru, yisabenzekunde bibendise dikengi yigubumu ke gubumu. Yulu anu dikengi dyambu di nyanwambili, dibandekeni anu mu mirime.»
موجودہ انتخاب:
Luc 14: SWJ
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
