Luk 13
13
Tte ilom ɔbɔg ananga appe
1Muma ko okpe ngwo, anang ban pa aba nɨng muma aba ateg Jisɔs ɔbɔnga anang pa abɨn Galili pɛ Pailet ka anang obena abɛ aba afɔ. Aba afɔ bɛ sa aba na affɔn ɛzza ga ɔtsɔm kwa atɨm. 2Jisɔs ɔpɔn bɛ abɛ, “Abangama atan abɛ abɛma bɔ assi npyuwa kidam ayonga anang mboga pa aba abɨn Galili masɛ abɛ appe otse ngwo? 3Mma, abɛma sang. Nteg banga, odesɛ abanga na ilom ɔbɔg natta, abanga na appe otse ngwo. 4Sa, anang tsanttan kwɛ ɛnyɔng ga Silom#13:4 Silom ɔwang kwɔ ɔbang Jɛrusɛlɛm, muma wɔ kwɔ ɔtsɔm kwo ogorogor otto ɔffɔ anang. etto ɛfɔ bɛ, abɛma bɔ assi ipyuwa ayɔnga anang mboga pɛ Jɛrusɛlɛm? 5Mma, nteg banga adɛgɛ, odesɛ abanga na ilom ɔbɔg naatta, abanga na appe otse ngwo.”
Otse kwɔ ɔbang itsi tsɛ ɛna adwug nɛ ɛwɔma
6Jisɔs ɔtta bɛ otse ngwama: “Ɔnang wan okpon itsi tsa abɛ jer fig#13:6 Itsi tsa aba ajer fig, ku nnwɛr kwu Ubɨnɔkpaabyi ode ɔttɔg fɔ ɔnɔ ɔkɔga abɛ anang pi Izɨrɛl bɔ muma. Jer nnwɛr kwa Akpariponga 9:10 kɛ ɛdam tsɛ, Ubɨna oto ror adwug ma ki itsi nzo, idwug nusa. 7Oben ɔnang kwo ono ker ɛdam nzo abɛ, ‘Ker, ki itso ittan mama, nnɨnta nror adwug ki itsi nzama, idwug ntɨga nsa. Kpara tsɛ. Atsɛ ɛnɛ ɛkpa ɔwang ngwo kazaga.’
8“Ɔnang kwɛ no ker ɛdam nzo oben-ɛ abɛ, ‘Adere, tte tsɛ obɔg utso gwan, amma nɨntɨm mbawa itsi nzo, nkpa ɛsamma nke tsɛ. 9Odesɛ atsɛ ɛwɔm adwug utsowa, uzuwuzuw, ɛmanga ɛnanɛ ɛwɔma, aba kema akpara tsɛ azɛ.’ ”
Jisɔs Ogweng Ukwanɨng kɛ Ɛwɔngkwoga Gwu
10Kɛ ɛwɔngkwoga gwu zan, Jisɔs ono okpewa anang ga kɔ ɔdappa. 11Ukwanɨng wan unɨng muma kwɔ ɔkam ɔkpakpa pyuwa. Akwɛ kɛ ussa ɔmɛ ki itso tsanttan. Akwɛ kɛ omena, ɛma oyen nuka onem. 12Okpe kwɛ Jisɔs ose ukwanɨng nwo, ojer-ɛ, oben-ɛ abɛ, “Ukwanɨng, ka gwenga kɛ ɛmada tsɔ.” 13Jisɔs ɔtaga ɔbɔg ɔnan-ɛ, muma zizan onem ɛma oyen. Uttɨtso ɔttag Ubɨnɔkpaabyi. 14Otsonang kwɔ ɔdappa nwo ɔdwag-ɛ ukwurabɛ Jisɔs ogweng ɔnang kɛ ɛwɔngkwoga gwu. Oben anang mbo abɛ, “Ɔkam ngwu nsazɨn kɛ eshagwu ra abɛ na assi itɔm, kwu kɨngwu ndo abɛ assɔ agweng, ɔnangode kɛ ɛwɔngkwoga gwu.” 15Ɔvaar ɔpɔn-ɛ abɛ, “Abangama aranga nang, ɔnang unɨng ma kwɔ ɔnɛ ɛwaam tsɛ, sa eten tsɛ ɛnɛ ɛtɔga ekpo kɔnɔ ɔtsar kɔ ɔwang kwo otsog tsɛ kɛ ɛwɔngkwoga gwu fasɛ atɨma tsɛ ɛta egwo assi? 16Unwa kwanɨng kwe Ebraham kwɛ Sɛtan kɛ ɔdawa ki itso tsanttan nɔbana abɛ ntsar-ɛ kɛ Ɛwɔngkwoga gwu?” 17Sɔ ɔtɔng otse ngwo, nkpar nsi oyog-ikwan, anang mbaga aba alow ki ikkikkona idɨg rɛ kussa.
Otse kwɛ ɛmama tsa mɔstad ɔttara ɔttɔg fɨnu uburubur
18Jisɔs ɔbɔw abɛ, “Ɛvaar tsu Ubɨnɔkpaabyi ede masɛ bɔgɔttɔg? Bɔgɔttɔg vɔ fɛ ma antɨma ayoma? 19Ede masɛ ɛmama sa Mɔstad#13:19 Itsi mama nwa tsɛ ɛkara-ɔkara. sɔ ɔnang okpon kɛ ɛdam tsɛ, emen, atsɛ ɛbar, ɛwag itsi tsi ididen. Ɔnɔn ukwu, ekwe eyog nkpara ka abɔnga.”
20Okoro oben abɛ, “Bɔgɔttɔg vɔ fɛ mɨntaga Ɛvaar tsu Ubɨnɔkpaabyi nyoma? 21Ede masɛ ɔttɔg fɛ aba na ke ku brɛd awɛ ubur, kwu ukwanɨng oke ka abuma tar ɛnwa ibɨng tar ntsang nwo ibɨng ubur.”
Ɛtɔmma tsɛ Ɔfagɔfag
22Jisɔs osenga ma ki ifon ri ikikar ɔttara ki ifon ri ididen ono okpewa anang sɛ no pfona Jɛrusɛlɛm. 23Ɔnang wan ɔbɔw-ɛ, “Ɔvaar, anang va bɔ abɛ ma annanga?” Jisɔs ɔpɔn-ɛ abɛ, 24“Abanga assi ɛffa tsi idede abɛ abanga anwa ke ezze tsɛ ɛtɔmma sɛ ɛfagɔfag ukwurabɛ anang pa sawɔsaw na yɔr abɛ aba anwa, abɛ makke. 25Okpe kwe Oyen ɔtsɔm nu ubɨn ɔkpag ɔtsɔm, abangama na be gi iyan ana akpɔg attara atsɨn, ‘Ɔvaar, gwong mana ɛkpaga.’
“Ɛma no ɔpɔn abɛ, ‘Banga kɨnsong ɔttara kɔ ɔwang kwa abanga abɨn akwu.’
26“Abangama na aben abɛ, ‘Abba antsi anttara angwo ɔmabɛ, ɔttara ɔma na kpew mana kɛ ɛwama tsa mana.’
27“Ɛma no oben abɛ, ‘Ɔwang kwa abanga abɨn akwu kɨnsong. Abanga bɨna mama abangama anang pyuwa.’
28“Muma, abanga na gam mmang attara agag ara okpe kwa abanga ma se Ebraham, Azik ɔttara Jekɔb, ɔttara ka ategnkkawa pu Ubɨnɔkpaabyi ga Ɛvaar tsu Ubɨnɔkpaabyi, aba ammanga akuw abangama awar ki iyan. 29Anang na bɨn ko okpewa dudon, ɔtsɔga dudon, ɛrang-ɛrang ɔttara ki iseg-iseg abɛ akwa anɨnga ke elowa tsɛ Ɛvaar tsu Ubɨnɔkpaabyi. 30Ker, ɔkam anang ban mama pa ade akponginnam pa abɛ ma ade atseden, anang pa ade atseden ma ade akponginnam.”
Jisɔs ɔgama irem rɛ Jɛrusɛlɛm
31Ma ko okpe ngwo, Afarisi ban akwa aben Jisɔs abɛ, “Bɨna mama, Hɛrɔd ono oben abɛ ɔfɔ-ɔ.”
32Jisɔs ɔpɔna abɛ, “Ata ateg okenyang nwo abɛ, ‘Amma mu nkuw akpakpa pyuwa nttara ngweng anang tsemma ɔttara ki ishɨn, igwetsow nkkera ɔtɔm pfam.’ 33Udɨg gwan, mu npfona tsemma, ishɨn ɔttara ki igwetsow ukwurabe otegɛkkawa kwu Ubɨnɔkpaabyi kode kwɔ ɔnamo oppe ga Jɛrusɛlɛm.
34“O Jɛrusɛlɛm, Jɛrusɛlɛm, abanga bɔ na afɔ ategnkkawa pu Ubɨnɔkpaabyi attara atɔw anang pa aba atɔm atsen banga nta. Kɨ nden rɨ nsawɔsaw, kɨ nrora mbɛ ntaga anang pa abanga ntsog ɔwang gwan otse kwi inɔn ini ibuw uva pɛ abubang, abanga natsera. 35Ker, ɔtsɔm kwa abanga abɛ ka akwɛ afɨma. Nteg banga, abanga adag kam masɛ tar abanga aben abɛ, ‘Ɛllɛ ede tsɔ ɔnang kwu ukwu ke etse tsɔ Ɔvaar.’ ”
موجودہ انتخاب:
Luk 13: mfn
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
©️2022 Luke Initiative for Scripture Translation
