ማ̈ቶ̈ሳ 19

ኣሲ ፌ ማጫ̇ ኬሳ̇ንዳብ ኮሺ̈ራ?

ማ̈ርቆ̈ሳ 10፡1-12

1ዬሱ̈ሲ ዪኖ̇ ሶ̈ሊ ዉርሲ̇ኖፖ̇ ዓኒ ጋሊላፖ̇ ዲንዳሪ ዮ̈ርዳ̈ኖሳ ዋ̈ምፖ̇ ጌዳ ፊ̈ን ዎን ዪሁዳ ጋዳ̇ ሉኪ̇ዴ። 2ዎይሊን ዎርዦ ኢ ዎሂን ዬ̇ዴ፤ ኢያር ማኖ ኣሳን ኢና ፋዴ።

3ፔቲ̇ ፔቲ̇ ፋራሳ̈ዋን ኢያ ፋታ̇ናንዳ̇ብ ኮያር ኢ̈ክ ዬ̈ሪ “ሂጋ̇ ጋልዳ ኣሲ ፌ ማጪ̇ን ፌ̈ና ኮዪሲኖ̈ዲፌ̈ኒ ኢዛ ኣባክ ኢ̈ሲ̇ኖ ባዛብ ዎይ ኬሶ̇ ጌይራ?” ጋ̈ሪ ኦይጪ̇ዴ።

4ዬሱ̈ሳር ኢንታ̇ኮ “ጾ̈ሲ̇ ቲ̈ን ኢንታ̇ ኮቺ̇̈ርዶሪ ‘ኣቲናኬ ማጫ̇ክ ማ̈ሲ ኮቺ̇ዴ’ ጌይኖን ዪንቲ̇ ናባ̇̈ባካ̇ያ? 5ማ ‘ዪ̈ኮታ̇ቦ ኣሲ ፌ ባ̈ባኬ ፌ ኢንዲክ ኣሻ̇ሪ ፌ ማጪ̇ምባር ዎልኣ ፔታ̇ን ማ̈ቃ̇ር ዶኢ̈ሬ’ 6ኢንቲ̇ ዓኒፖ̇ ጌዳ ዎልኣ ፔቲ̇ ኣስፌ̈ንዶኬ ናምኢ ኣስፌ̈ን ማ̈ቂ̇ባ̈ሴ። ዪዚ ጾ̈ሲ̇ ዎልኣ ፔታ̇ን ማሂኖን ኣሲ ኢንታ̇ ፋጋፖ̇ ጋ̈ቤ” ጌይዴ።

7ፋራሳ̈ዋን ኢ̈ኮ “ዓት ዪ̈ዶኮ፥ ሙ̈ሶ ‘ኣሲ ፌ ማጪ̇̇̇̇ን ኬሲ̇ኖን ኤርሲዝ ዎርቃ̇ታ ኢዝቦ ኢማ̇ሪ ኬሶ̇’ ኣባብ ጌዬ?” ጌይዴ።

8ኢያር ኢንታ̇ኮ “ሙ̈ሶ ዪንታ̇ክ ዪኖ̇ ጌይኖ̈ዲ ዪንታ̇ ቡ̈ዲን ዛቢስ ማ̈ቂ̇ኖ ኮታ̇ብዶኬ ዪ̈ዲ ቲ̈ናፖ̇ ዎ ባዝ ጊዳካ̇ዬ። 9ቴ ዪንታ̇ክ ጋ̈ዚንዳ ኣሲ ኢ ማጪ̇ን ኦሎላ ጋዳ̇ር ቤንታ̇ካ̇ይዶን ኢዞ ኬሳ̇ሪ ሜላ ማጫ̇ ኤኬ̇ጌይን ና̈ሳ ዪ̈ዲ ኦሎላ ጋዲ̇ኔ። [ፌ ኣስና ጋልዳ̇ፖ̇ ኬስኪ̇ኖ ማጪ̇ን ኤኪ̇ኖ ኣሳር ዪና̇ ኢዝፌ̈ን ኦሎላ ጋዲ̇ኔ]” ጌይዴ።

10ኢ ታማ̈ራንር ኢ̈ኮ “ኣስኒኬ ማቺ̇ክ ባዚ ዪ̈ፌን ማ̈ቂ̇̈ርኮ̇ ማጫ ኤካካ̇ይ ዶኢዛ ኮሼ̇” ጌይዴ።

11ዬሱ̈ሲ ኢንታ̇ኮ “ማጫ̇ ኤካካ̇ይ ዶኣምፔ̈ን ጾ̈ሲ̇ ኢንታ̇ ዳንዳኢሲኖ ኣሳንዶኬ ዪ̈ዲ ዎይ ኣሳቦ ማ̈ቂ̇ባ̈ሴ። 12ፔቲ̇ ፔቲ̇ ኣሳን ሲ̈ላ̇ ማ̈ቃ̇ር ዬሊንቲ̇ኖኮታ̇ቦ ማጫ̇ ኤኪ̇ባ̈ሶን ዎ፤ ኣሲ ኢንታ̇ ጉዚን ማጫ̇ ኤኪ̇ባ̈ሶን ዎ፤ ማ ጾ̈ሳ̇̇ ካ̈ቲቲን ጊሻ̇ቦ ጋ̈ሪ ፌ̈ና ሲ̈ላ̇ፌ̈ን ማሂኖን ዎ፤ ዪኖ̇ ዳንዳኢዝ ኣሲ ዳንዳኦጋ̈ቤ” ጌይዴ።

ዬሱ̈ሲ ኣቂሊ ናኣን ኣንጂዴ

ማ̈ርቆ̈ሳ 10፡13-16፤ ሉቃ̈ሳ 18፡15-17

13ኢናፖ̇ ኢ ፌ ኩሺን ኢንታ̇ ጋልዳ̇ ጋዳ̇ር ዎ̈ሳ̇ምፔ̈ኒ ኣሳን ኣቂሊ ናኣን ዬሱ̈ሳክ ኤኪ̇ ዬይዴ። ዎቲናካር ኢ ታማ̈ራን ናኣን ኤኪ̇ ዬይኖ ኣሳን ቆዲ̇ዴ። 14ዬሱ̈ሳር ኢንታ̇ኮ “ጾ̈ሳ̇̇ ካ̈ቲቲ ዓንፌ̈ኖንይ ማ̈ቂ̇ኖኮታ̇ቦ ኣቂሊ ናኣን ዓይ ታ̈ክ ዬዮጋ̈ቤ ካያፒ̇ቴ” ጌይዴ። 15ፌ ኩሺን ኢንታ̇ ጋልዳ ጋዳ̇ሪ ኣንጂኖፖ̇ ዓኒ ቤስ̇ ኢናፖ̇ ዲንዳ̇ር ሉኪ̇ዴ።

ና̈ሳ ዱራ ኦይጪ̇ኖ ኦይች

ማ̈ርቆ̈ሳ 10፡17-30፤ ሉቃ̈ሳ 18፡18-30

16ፔቲ̇ ጋላስ ፔቲ̇ ኣሲ ዬሱ̈ሳክ ዬ̈ሪ “ኣስታማ̈ራ̈ዶ! ሜናብ ሼምፓባር ዶኢ̇ ኤካ̇ንዳቦ ታ̈ኒ ኣብዝ ኮሽ ባዝ ኦ̈ንዳብ ኮሺ̈ራ?” ጋ̈ር ኦይጪ̇ዴ።

17ዬሱ̈ሳር ኢ̈ኮ “ኮሽ ባዚ ኣብዝኮ ኔ ታ̈ና ኣ ኦይጫ̇̈ራ? ኮሻ̇̈ዲ ፔቲ̇ ጾ̈ሳ̇̇ ሙታ̇፤ ኔ̈ኒ ሜናብ ሼምፓባር ዶኢ̇ ዲጛንዳብ ኮያዶኮ ጾ̈ሳ̇̇ ኪ̈ታን ና̈ጋቤ” ጌይዴ። 18ና̈ሳ̈ዳር ኢ̈ኮ “ኪ̈ታን ዎ̈ን ና̈ጋኖ?” ጋ̈ር ኦይጪን ዬሱ̈ሳር ኢ̈ኮ “ኣስ ዎፔ፣ ኦሎላ ጋዳፔ፣ ዉ̈ቃፔ፣ ዎርዳ ማርኪታፔ፣ 19ኔ ባ̈ባኬ ኔ ኢንዲ̇ክ ቦንቻ̇ቤ፣ ኔ ኔ̈ና ካዚንዲፌ̈ኒ ሜላን ካቤ ዪዝ ጌይዝ ኪታ̇ን” ጋ̈ር ማሂዴ።

20ና̈ሳ̈ዳር ኢ̈ኮ “ዪን ኪ̈ታንኮ ታ ና̈ጋ ሙታ̇ ዎ፣ ዪንፖ̇ ሜላ ታ ጋልዳ ኣቲ̇ኖ ዎኖ̇?” ጌይዴ።

21ዬሱ̈ሳር ኢ̈ኮ “ኔ ጋልዳ ማዛ ባዮ̇ ኣስ ማ̈ቃ̇ንዳ̇ብ ኮያዶኮ ሉካ̇ራ ኔ̈ብ ዎ ባዝ ዎይ ዎጛራ ሚ̈ሺ̇ን ዎርባያብ ኢማ̇ቤ። ኔ̈ኒ ኣፋ ጾ̈ሳ̇̇ ቲ̈ን ቆሊን ዲጛ̈ሬ፤ ዪዚ ዪኒ̇ፖ ዓኒ ዬ̈ራ ቴ ዎሂን ዬ̇ቤ” ጌይዴ።

22ና̈ሳ ናኢቲዲ ዎይሊን ቆሊን ኢ̈ብ ዎኮታ̇ቦ ዪኖ̇ ሲስካ̇ሪ ሙዲዲሙታ̇ ሉኪ̇ዴ።

23ኢናፖ̇ ዬሱ̈ሲ ፌ ታማ̈ራንኮ “ቴ ዪንታ̇ክ ኪን ጋ̈ሬ፥ ዱር ኣሲ ጾ̈ሳ̇̇ ካ̈ቲቲን ጋርታ̇ ጌላንዳቦ ዎይሊን ዋ̈ዪ̈ሬ። 24ማ ቴ ዪንታ̇ክ ጋ̈ዚንዳ፥ ዱር ኣሲ ጾ̈ሳ̇̇ ካ̈ቲቲን ጋርታ̇ ጌላዚምፖ̇ ጊማሊ ናርፓ̇ ፉላባር ኣ̈̇ዚን ዋዪባሴ” ጌይዴ።

25ኢ ታማራን ዪኖ̇ ሲስኪ̇ ዎይሊን ጋራ̇ሚንታ̇ሪ ኢ̈ኮ “ዓት ዪ̈ዶኮ ኦ̈ኖ ጾ̈ሳ̇̇ ካ̈ቲቲን ጋርታ̇ ጌላንዳብ ዳንዳኢዛ̈ዲ?” ጌይዴ።

26ዬሱ̈ሲ ኢንታ̇ ቢሪንቲ̇ ቤቃ̇ሪ “ዪ̈ፌ̈ኖ ባዛ̈ዲ ኣሳብ ዳንዳኢንቲ̇ባ̈ሴ፤ ጾ̈ሳ̇̇̈ቦ ዎይ ባዚ ዳንዳኢንቲ̇̈ሬ” ጌይዴ።

27ዪና̇ ኢዝባራ ጴ̈ጥሮ̈ሲ ኢ̈ኮ “ዓ̈ዲሼ ኑ ዎይ ባዝ ኣሻ̇ሪ ኔ ዎሂን ዬ̇̈ሬ፤ ዓት ኑ ዲጛዚን ኣብዝዶኔ?” ጌይዴ።

28ዬሱ̈ሳር ኢንታ̇ኮ “ቴ ዪንታ̇ክ ኪን ጋ̈ሬ፥ ቢርት ዬ̈ዝ ኦራ ኣላሚን ጋልዳ ታ ኣሳ ናኣ̈ዲ ቴ ቦንቻ̇ ዙ̈ፋና ጋልዳ ዶኣዚምባራ ዪንታ̇ር ታ̈ና ኣማ̇ኒ ቴ ዎሂን ዬሙታ̇ ዎ ኣሳን ታጶ ናምኢ ዙፋ̈ና ጋልዳ ዶኣሪ ታጶ̇ ናምኢ ኢስሬ̈ላ ዜርን ጋልዳ ፊርዲ̈ሬ። 29ቴ ጊሻ̇ቦ ጋ̈ሪ ፌ ኣ̈ሊንዶ፣ ፌ ኢሺንታ̇ን፣ ፌ ሚሺንታን፣፥ ፌ ባ̈ባ̈ዳ፣ ፌ ኢንዲ̇ንዶ፣ ፌ ናኣን ዎይ ፌ ዎት ጋዲንዶ ኣሺ̇ዝ ኣሲ ዎይ ፌ ኣሺ̇ኖ ባዛን ዪን ጼ̈ታ ኩሽ ዲጚ̈ሬ፤ ማ ሜናብ ሼምፓባር ዶኢ̈ሬ። 30ማ̈ቂ̇ናካሬ ዓት ቲ̈ን ዎ ኣሳን ዎይሊንን ጋስ ማ̈ቂ̇ሬ፤ ጋስ ዎን ዎይሊንን ቲ̈ን ማ̈ቂ̇̈ሬ” ጌይዴ።

موجودہ انتخاب:

ማ̈ቶ̈ሳ 19: ኦጫ̈ቃማ

سرخی

شئیر

کاپی