ɛMacu 3
3
ɛYohana ne Yaak ne iBatisima gha kɛ Ryɔng ɛYɛso yegha ɛNkiinɛ
(ɛMar 1.1-8; ɛLuk 3.1-18; ɛYoh 1.19-28)
1Nten nɛ de nggyɛ wo ɛYohana ne Yaak ne iBatisima gha kaa ne yɛɛs ɛ shɛɛ ndɔ ɛhay iYahudiya gha ɛ ji sanga ibol ɛTaanggbey de, 2ɛ bo, “San ɛn ɛbɔk daa ɛli ne igbɔm ɛTaanggbey da yek cɛcɛk.” 3ɛYohana gha ɛbhɛ ɛ so ɛnyi gha ne ɛnɛbi ɛShaa gha kaa boote daa ne ito ɛbhɛ de ɛ yɔngɔ,
“iZɔlɔs ɛnyi i yeres ndɔ ɛhay ihywɛ bo,
‘ryɔng ɛn ɛDaray ye ɛnkiinɛ ɛbhɛ,
te ɛn nkpiinɛ ɛbhɛ da cik.’ ”#3.3 Ta yɛɛn: ɛSh 40.3.
4Kaa ne ryɔng itsura ɛYohana da ne itsotso ne ilangkumɛ, ne ɛ ji robhos se ɛgagha ne ihuhu ɛta. iRe ɛbhɛ de kaa ne so itse gbik ne itsong iven. 5Ninyi na kaa ne les ne iYɛrushɛlɛm, ne iYahudiya, gbik nɛ nilɔ na nɛ nibhɛ so cɛcɛk ne ihyel ne iWurudun no nibhɛ phɛɛs ɛlɔ ɛYohana gha. 6Nibhɛ ne i tɔng ɛfɔt nibhɛ wo, ɛYohana gha ne yaak nibhɛ ne ibatisima de ndɔ ne iHywel ne iWurudun no.
7niFarisawa na nɛ niSadukyawa gbom kaa ne ma phɛ te bhɛ yɛk nibhɛ ne ibatisima de, ne sɛ ɛYohana gha kɛ yaang nibhɛ wo, ne yaak nibhɛ, “Nyinɛn no ne ɛ so ɛn te izɔ igywebhe de, ɛhay ɛbhɛ kɛ ku shii tɔng nyini te ɛ tel ɛn njenjek ɛTaanggbey de ne ihywɛ yaaso woo?” 8Mɔn ɛn nikɔn na nɛ nibhɛ yaa tɔɔrek wu ɛ kɛ san ɛn ɛbɔk ka. 9Sɔng ɛ hal ɛn ɛgyɛy ya wu ɛBaraying nga ɛbhɛ so ɛkyɛɛ mon na nang. Nzi ne tɔng nyini, ɛTaanggbey ya Sɛɛ yɛɛ ne hyere ikpɛɛ yɛdaa ifɛ teye ninɔn ɛBaraying nga. 10iTsɛm be ku so ne icwin ne ihon da, ɛhiha ɛhon na ne ɛ kɛ sang yɛk ikpam iywɛnɛng, yaa ne tɛmɛ ɛbhɛ i cwaak ndɔ ne igboo.
11Nzi yaak nyini ne ibatisima de ne inɛn te i tɔɔrek wu ɛ kɛ san ɛn ɛbɔk ka. Ɛdɛ ɛnyi gha ne yaaso, ɛtsim nge ne ɛ phyin me, sɔng nggɛ ma yung hɔn nzɛɛ boos ɛbhɛ ikpikpangat ɛbhɛ nang. Ɛbhɛ ɛ sɛ ne ji yaak nyini ne ibatisima idee ne iKabyik ɛTaanggbey ne igboo. 12Ɛ bok igbii ɛbhɛ ne ɛ sɛ bɛm ne ire ɛbhɛ de ɛ tul ntsɔk kɛ ɛbhɛ sit ne igban, ɛ ji kpuru ishoo yɛ ɛbhɛ sit ndɔ ne igboo ne ifɛ san kuuy.
Kɛ Yɛk ɛYɛso yegha ne iBatisima
(ɛMar 1.9-11; ɛLuk 3.21-22)
13Nten nɛdee nggyɛ wo, ɛYɛso gha ne le ne iGalili ɛ phɛ ne ihywel ne iWurudun no te ɛYohana gha ma bhɛ yɛk ɛbhɛ ne ibatisima de. 14ɛYohana gha ne sim te aa mbaray, ne ɛ yaak ɛYɛso yegha, “Nzo me wo nzɛɛ yaak kɛ te ɛ yɛk me ne ibatisima de, ikyee phɛ kɛ ne te ɛ yɛɛs ɛlɔ ngeghaa?”
15ɛYɛso gha ne kyii nɛ ɛ yɔngɔ, “Te iphɛ ne te ɛlɛy ɛlyilyɛghaa wo te ne shwaak nikɔn na nɛ nibhɛ ku so cik ko ɛli ne ɛTaanggbey ya sim mo.” ɛYohana gha ne ji sim ɛ yɛk ɛYɛso yegha ne ibatisima de.
16Ne sɛ kɛ shii yɛk ɛYɛso yegha ne ibatisima, ɛ kɛ wuru ne ndɔ inɛn da, nɛ nten nɛ irywa wo ne phaal le, ne ɛ ji yaang iKabyik ɛTaanggbey de kɛ tɔm daa ɛbhɛ te ihywihywaa. 17iZɔlɔs ne le dak ne irywa wo ihywɛ yɔngɔ, “ɛNgɔn nge gha wo ne nzi sim; n bok irway ihwala ne ɛbhɛ gbom.”
موجودہ انتخاب:
ɛMacu 3: etxNT
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© Wycliffe Bible Translators, Inc. and
© the Nigeria Bible Translation Trust 2018
in cooperation with
iTen Language and Bible Translation Project
