EFETIKILO 6
6
1Eci omanu va fetika oku lua kilu lieve kuenje kokuavo kua citiwa omãla vakãi, 2oco omãla va Suku valume va mõla omãla vomanu vakãi okuti va posoka, kuenje va nola oku kuela ava va sola ca velapo. 3Yehova yu wa linga hati, Espiritu liange ka li ka kale ño-o hũ vomunu, momo eye ukuetimba; oloneke viaye puãi vi tẽla ocita canyamo kakui avali kanyamo. 4Koloneke viaco kua kaile ovindululu kilu lieve, lokovaso yaco haico, eci omãla va Suku valume va litokeka lomãla vomanu vakãi kuenje va cita lavo omãla. Ovo haivo olonoi vina viosiahũlu kuenda haivo ovalume va kemãla.
5Yehova yu wa mola okuti uvi womanu wa lova kilu lieve, lovisimĩlo viosi vi simaiwa vovitima viavo via viha ño oloneke viosi. 6Oco Yehova Suku wa livela omo a lulika omunu kilu lieve; co vala vutima. 7Kuenje Yehova wa popia hati, Ndi nyõla omanu nda sovola oco va tunde kilu lieve; lomunu locinyama lapuka lolonjila viovusenge, cosi nda ci nyõla momo nda livela omo nda ci sovola. 8Noha puãi wa sanga ohenda ku Yehova.
9Alo o-o apata a Noha. Eye Noha ukuesunga, haeye wa pua evelo koloneke viaye. Noha wa endaenda la Suku. 10Kuenje Noha wa cita omãla vatatu valume, Semi, Hama la Yafete.
11Oluali lua vĩha ku Suku, hailuo lue Yuka letombo. 12Suku yu wa vanja voluali kuenje wa limbuka okuti mua vĩha momo oviendalomuenyo viosi via vĩhisa onjila yavio yokilu lieve. 13Suku wa popia la Noha, hati, Nda likapela muẽle oku nyõla oviendalomuenyo; momo oluali lue yuka letombo liavio; ocili ndi vi nyolela kumue loluali. 14Litungila ocimbaluku lovinendele; vokati kocimbalaku tepamo otuhondo; ci laña vokati lokoñoño lekokoto. 15O ci tunga ndomo; usõvi wocimbaluku ovita vitatu kovikeya, upati waco akui atãlo kovikeya, oku lepa kuaco kuovilu akui atatu kovikeya. 16Kapa onjanela vocimbaluku, yi litepe locimbimbi eci ca soka lukeya. Kapa epito vonele yocimbaluku; ci tunga lolosapalo vitatu. 17Momo ame ndokisa kilu lieve etande liovava; nyõla oviendalomuenyo viosi vi kasi lefuimo liomuenyo vemẽhi lilu; cosi ci kasi kilu lieve ci fa. 18Puãi ñolisila kokuove ocisila cange, oco wiñila vocimbaluku, ove lomãla vove valume, lukãi wove, lakãi vomãla vove. 19Oco koviendalomuenyo viosi wiñisa vocimbaluku vivali vivali oku popela ovimuenyo viavo kumue love, ndokuti ulume lomange. 20Kolonjila ndapata avio, kovinyama viovimbo ndapata avio, kovipuka viosi vioposi ndapata avio, vivali vivali kolombuto viosi viñile love, oku popela ovimuenyo viavio. 21Pongiyavo ovilia viosi va vi lialia, loku vi soleka hã ha vi lingi ovilia viove kuenda viavio. 22Haico Noha a linga; cosi co sapuila Suku oco a linga.
موجودہ انتخاب:
EFETIKILO 6: EMB63
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Umbundu Bible © United Bible Societies, 1963.