मरकुस 3
3
वतसि होत्ता कयदोन येसु बेस कियमळ
(मत्तयाल 12:9-14; लूकाल 6:6-11)
1येसु मर्रा उंदि मल्का दर्मसास्त्रम कराहना लोते होत्तोर. अगा वरोर कय वत्सोत्ता मनकल मत्तोर. 2नोमकेम रोजुने येसु ओन बेस कियानय्ते ओन तप्पुने पीकोम इंचि इच्चुर लोकुल्क हूळसेक मत्तुर. 3“अंटोरा मुन्ने वासि नित्ता,” इंचि येसु, कय वत्सोत्तोन इत्तोर. 4पजा, “नियम परकारम, नोमकेम रोजुने बेस कियमळ मंचिदा, कराब कियमळ मंचिदा? हिलाकोंटे पिसागोटते मंचिदा, हव्कते मंचिदा?” इंचि पूसकीतोर. गानि ओर चुपचाप मत्तुर. 5ओर्क बोर्के जीवा नोय्यो इंचि कन्कुंचि येसुंक दुक्कम वासि, ओर अंटोरहेके होंगुने हूळतोर. पजा, “नीवा कय मुन्नेळ्क हहा,” इंचि आ कय वत्सोत्तोन इत्तोर. ओर कय मुन्नेळ्क हाहतस्के ओना कय बेस आता. 6पजा परिसिल्क अगटाल पलाते पेय्सि, हेरोद राजाना लोकुल्कुंक होंचि कलियतुर. कलियसि येसुन बल्हा हव्कना? इंचि येसुना विरोदमते वळ्क्कुत्तुर.
वेल्लेटुर लोकुल्क येसुना पज्जो वांतुर
7-8येसु ओना सिस्युल्कुन पीसि अगटाल पेय्सि समुद्रमहेके होत्तोर. येसु कियाना इचंत्रमता कबाह्क केंजसि गालिल एरिया, यहुदिया एरिया, येरुसलेम सहर, इदुमिया एरिया, सूर, सिदोन इनना सहरकुनाल, योर्दन बेरेटा हब्बेटाल, आनि पकापीसि मत्ता नाहकुनाल वेल्लेटुर लोकुल्क ओनगा वातुर. 9-10बिमार मत्तोर्कुन वेल्लेटोर्कुन येसु बेस कीतोर. अदुनहाटीं बिमार लोकुल्क येसुन इट्टानाहाटीं वरोंक-वरोर दोब्सेके वासेक मत्तुर. ओरपोर्रो अर्राकोंटा लक्कु मंदना इंचि, “उंदि सिन्ना डोंगा नाहाटीं तयार कीम्टु,” इंचि येसु ओना सिस्युल्कुंक वेहतोर. 11देय्याल्क पीसि मत्ता लोकुल्क येसुन बस्के अय्ते हूळुंदुरो अस्के, “निमे पेनदा मर्रिन!” इंचि वरगेयसि ओना मुन्ने हिळु अर्रुंदुर. 12गानि येसु मात्रम, “नावा बारेमते बोर्के बतले वेहमट,” इंचि आ देय्याल्कुंक गट्टिगा हुकुम हीतोर.
येसु पन्नेंड मंदितुन सिस्युल्क इंचि निलाहमळ
(मत्तयाल 10:1-4; लूकाल 6:12-16)
13पजा येसु गुट्टापोर्रो होत्तोर. आ मंदिताल येसु बोर्कुनय्ते कोरतोर, ओर्कुन ओनगा केयकुत्तोर. 14-15ओर ओनतोनि मनालय, पेनदा बेसता कबुर वेहनाहाटीं लोहालय इंचि पन्नेंड मंदितुन पेरतोर. पेरसि ओर्कु प्रेरितुल्क इंचि पोरोल दोसतोर. ओर्क देय्याल्क गेदमना अदिकारम हीसि निलाहतोर. 16ओरा पोरोलीं इल्हा मंतां: सिमोन, ईनकु येसु पत्रु इंचि पोरोल दोसतोर, 17जब्दिना मर्क याकोब आनि ओना तम्मुर योहान. ईर इव्वुर्कुन बोनेर्गेस इंचि येसु पोरोल दोसतोर, इत्ते गर्जना कियानोर इंचि अर्तम. 18अंदरियल, पिलिपु, बरतलमय, मत्तयाल, तोमल, अल्पिना मर्रि याकोब, तद्दि, सिमोन कनानि, 19आनि येसुन दोकाते पीसि हियानोर इस्कारियोत नाटेना यहुदल.
येसु आनि बेल्जाबुल इनना देय्याल्कुना मुक्यल
(मत्तयाल 12:22-32; लूकाल 11:14-23)
20पजा येसु उंदि लोन होत्तोर. अगागुडा इच्चोर वेल्ले मंदि जमा आतुर गदा, येसु, ओना सिस्युल्कुंक गाटो तिनालयगुडा वेला दोर्काहिल्ले. 21येसु पिसा-पिसा कीसंतोर इंचि लोकुल्कुनहेंदाल ओना लोतोर केंजसि ओन लोन तायालय होत्तुर. 22येरुसलेमताल वाता दर्मसास्त्रम कराहना गुरुल्कु, येसु देय्याल्कुन गेदुमसेके इंचि, “ईना लोप्पो ‘बेलजेबुल’ इनना देय्याल्कुना मुक्यल होळियसि मंता, दाना बलमते ओर देय्याल्क तेंडांतोर,” इंचि इत्तुर.
23अदुनहाटीं येसु ओर्कुन दग्गेरा केय्सि ओर्कु वेसुडिते वेहातोर. “देय्यम दाना देय्याल्कुन बल्हा तेंडा परांता? 24ओक्कला, उंदि राज्येमते मनानोरा लोप्पो वरोनद-वरोंक अर्राकोंटे अद राज्येम निल्ला परांतना? बस्केने निल्ला पर्रो. 25अल्हेने उंदि लोता लोप्पो वरोनद-वरोंक अर्राकोंटे अद लोन गट्टिगा मन्नो. 26अदुनहाटीं देय्यम दाना दंटाता देय्याल्कुना विरोदमते नितते, अवुना राज्येम बल्हा नित्तंता? नित्तापर्रो, गानि नासडेम आंता. 27बोरे आयिर! वरोर ताकतवर मनकना लोते होळियसि ओना सामानतुन दोंगा कियना इत्ते, मोदाला आ ताकतवर मनकन दोहचि वाटतेन दोंगा किया परांतोर. 28नना मीक निजम वेहांतन, मनकालोरा अन्नि पापाल्कुन, ओर कीता अपमानमतुन पेन मापि किय्यार. 29गानि पवित्र आत्माता अपमानम कीते, ओर बोरे आयिर, ओन्क बस्केने मापि हिल्ले. असोंटा तप्पु कीता लोकुल्क बस्केळ्क पापमता दोसेमतेन मनंतुर,” इंचि वेहतोर. 30अल्हा बारि वेहतोर इत्ते, “ओनालोप्पो देय्यम मंता,” इंचि दर्मसास्त्रम कराहना गुरुल्क ओन इत्तुर.
येसुना यावल आनि तम्मुह्क
(मत्तयाल 12:46-50; लूकाल 8:19-21)
31पजा येसुना यावल, ओना तम्मुह्क ओर मत्ता लोतगा वातुर. ओर लोता पलाते नित्तिसि येसुन केयट इंचि लोहतुर. 32लोकुल्क येसुना सुट्टु उद्दिसि मत्तुर. अस्के, “नीवा यावल, नीवा तम्मुह्क, हेलाह्क पलाते एदुर हूळसेक मंतुर,” इंचि ओर वेहतुर. 33अय्ते, “बद नावा यावल, बोर ना तम्मुह्क?” इंचि येसु ओर्कुन इत्तोर. 34अस्के ओना सुट्टु उद्दिसि मत्तोरहेके हूळसेक, “ईरे नावा यावल, ईरे ना तम्मुह्क आंदुर. 35बोर अय्ते पेनदा इच्चा परकारम ताकंतुरो ओरे नावा तम्मुर, हेलड आनि यावनलेसीं दग्गेटोर आंदुर,” इंचि वेहतोर.
موجودہ انتخاب:
मरकुस 3: ESG
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© Wycliffe Bible Translators, Inc. All rights reserved.
