Lukas 7

Fela Yun Na Yebaei Bubaei Erane Kowole Yesus Onomi Ikeunge

(Mat. 8:5-13)

1Nebei ro miyae arilewolere nebei a weumikoke mo, Yesus na hibi Kapernaum yore ewole. 2Nebeinye fela yun mbai naei kena koungeke yebaei bubaei erane hereinyen-hereinyen kowole. 3Nebei fela yun Yesusle a borokene, Yahudi yun-junde ro keli name weumikoke Yesusle bokore enate, rinyainyehinde na yebaei bubaeise erane kolere onomi menneyendere. 4Ekate mo, Yesusre na kena maemae riwainye wainye, “Nda fela yun na yeisi raeiboi hului na yebaei bubaeise onomi yeungele, rabuhine ban 5maei ro miyaere kena buhae heyeumi nane merau maei ei mom-mom imae heuboke.”

6Yesus nebei yo bele nanembaisa alainyekoke ewate. Na imaere nobewounge bae, nebei fela yun na kahili ware ukeumi ekate Yesusre ungainyele, “Tuhan, maei rowa elele naei imaere eijae, rabuhine ban neyae yeise raeiboi ban nauware ereungene. 7Nebei aerene renaei yae Waei bere ei sele. Weyae are mo eleiko, nda yebaei bubaei erane koyele kiyae onomi rowende. 8Reyae maei fela yun hi na me kelee u keleene nekeyale nane merau raei keleena felayo hiwa rare boraise. Ro mbaise reyae ufende, ‘Eye!’ neyae ende; nane merau ro hire ufende, ‘Ndare mei!’ neyae mende. Nebei sului mbai raei yebaei bubaeise ufende, ‘Nda mokoibo!’, neyae mokombonde.”

9Nda a wanen boroukokene, Yesus fangkengke yae kowole. Euweke na moisa mate ro miyaere weumi, “Nda ro hele ken. Israel ro miyae nekate nolora nda role hila rabo wanen Reyae ehubayeikoi mo!” 10Ukeumi mekate yo naei imaere baeiboke ekate bae, nebei erane kole kiyae erainye aunguke onomibe rouke.

Yesus Hokolo Fa Mbai Waleungeboke

11Na heki ban mo, Yesus Nain yore eke. Na moisa orowate yo, nane merau ro miyae helen Yesus naei nanembaisa ewate. 12Meke Nain yo romau kaban nobeungeboke mo, ereumi ro miyae herebe no koloi einye kaeibokate nebei yo eisa maibaleke mate. Nda here miyaenale mbai (na molo nukengeboke) na kelu nembai sambai selebe hereke kaeibokate mate. Ro miyae helen sele hakainyekoke nda miyaenale rimeimeyelene mbainye mate. 13Yesus euweke nda miyaenalere erekeungene, Na kena beko hele hubawounge weunge, “Ninae erimeijae!”

14Yesus ebi fere bere yae eungakeleufike mo, nebei here no kaeibokate matene na me ikileuboke. Nebei nore kaeibokate mate yo nemene hebaiboke. Yesus a weunge, “Ae, hokolo fa, Reyae ware wawale ainyu!” 15Nebei fa aunguke, angken nuweuboke wa a elewole. Nebeisa Yesus nenakele mene kinyeungeboke.

16Nebeinya ro miyae fangkengke yae bowate, Allahre buma kolowainye. Nebei yo yae elate, “Yendo kayaalo kaban mbai aei nolone meuwakauboke, Allah Na ro miyaere hakommibonde naeise meke!”

17Yesusle a Yudea kani nemene ninae hureukoke nane merau na kelaeunga yo bele borowate.

Yohanes Bure Koumi Kiyae Ukeumi Ewate Yo

(Mat. 11:2-19)

18Yohanes na moisa orowate yo Yesus na me u mokowole a Yohanesre huwainyekoke. Yohanes nebei yo mekate nolora ro bee kaeneumikoke, 19ukeumile enete Yesusre nda a hineinyehinde, “Weyae na hele Allah are kolowounge kiyae niyae, meyae ro hibe rakemandere?”

20Hokolo bee ekete Yesusre weinye, “Yohanes bure koumi kiyae yae maere ukeume mekende Ware hinaisitere, Weyae Allah are kolowounge Kiyae niyae, niyae ban, meyae ro hibe rakemandere?”

21Nebei hee erane buloone kayeke ro miyae helen sele Yesus onomi iwoumi, alo yae hauwaimi yo na alo yoni-yonire hukeumiyeke, ijoko erei yo mokowoumi ijoko erewate. 22Nebei aerene Yohanes yae ukeumi ekete beere Yesus weumi, “Bebo, mayae ijokore erekeube angkaeise borokeube hului yae Yohanesre huwennekobe. Ro miyae ijoko kumba nekayeke yo mana ijoko erate, oro rebeisi-rebeisi rebaeyeke yo mana ele mele kate, u bauwau kayeke yo onomi yarowate, angkaei kokun nekayeke yo mana angkaei borate, herewate yo walaeiboke, a foi faeu foi keren ban nale ban yore bele ekehuwoumi. 23Ro miyae Rare hakoyaise aerene ehekaei hubanainyelebe Rare moi ebulei kiyae, onomi foka hubanainyende.”

24Yohanes yae ukeumi mekete ro bee ewote mo, Yesus huba raweuboke ro miyae helen hebatere Yohanesle ane weumi, 25“Rahere erembomberene mayae a kala-kalare eyewaube, nebeinya kena u wauwaufe koyate holona ro mbai naei u mekai o mbai alu yae ndire ndare kuseunge wanende erembombere? 26Rahere erembombere eyewaube, ro mbai malo maye-maye hireukokere erennebombere? Niyae ban! Ro miyae malo maye-mayere hirate yo bae nane merau nime kaungei nolone nekate yo ondofolo yoni-yoni naei imaena. Nebeise banna, rahere mayae eyewaube? Yenjo kayaayo mbaise erennebombere? Na hele. Reyae mare wamale, neyae Allahle yenjo kayaayo holore moi wokeumi. 27Nane merau naei naeise Allahle homofaene homo molaikoke. Neyae Raei burelen boi-boi rore yeuboke naeise Allah yae Rare ukeufe are Maleakhi moloukoke,

‘Nda niyae Raei burelen boi-boi ro.

Neyae Weyae mele nibi a mokoisaise nare bere holo yae ufende ende.’#7:27 Maleakhi 3:1

28Reyae nda a na helebe mare wamale, Miyae naei kou ei yahi eisa honowate yoni-yoni nolora Yohanes bure kowoumi kiyae na bumane hele. Nebeibe ro ban sele ro miyae Raei me kelee u keleene nekate holona yo Yohanesre moi wokainye.”

29Nebeinye arilewole ro miyae nemene pajakre arilate yo bele Yesus huwoumi are boraikokene, Allahle wali nibi are na ijen elaikoke. Yohanes nebei yore bu koumikoke. 30Nebeibe Farisi holona yo bele Musale walora wali heere foloukoke are isaeyaeiboke kelaeimi yo bele Allahlena mehinin kolowounge na wali holere molommibondere kena ban. Nebei yo Yohanes bure kommikondere ahi yae elewate.

31Yesus benen weumi, “Rahe rambun mae nda holona ro miyaere ahundebonde elerekonde? Naei u mekai naendae wanen mae elerekonde ban? 32Nebei yo fa-fa rambun nai hei-sei anuwaunge roiboyate naei hokolo uneyaufe kaenaimi wanen waimi,

‘Mai naeise meyae suling ranandebokebe,

nebeibe mayae bae okoi mo.

Meyae here rime wanenjekebe,

nebeibe mayae rime erimei mo.’

33Rabuhine ban Yohanes meke bae raman bele bu bele nendon ban aneinye, mayae elaube, ‘Alo yae aungeboke!’ 34Nebeisa Reyae, Allahle bokora mekale ro miyae uware yeubokale Kiyae, raman bele bu bele nendon mae analene, ro miyae elate, ‘Ndi ro erenne, raman mali bu mali ro, pajakre u bulu-bulu buleyate yo bele ro miyae beko nebande mokoyate holona yo bele kahili awaikoke.’ 35Allahle isaei hebaen bele ro miyae me foi u foi mokoyatene, erenate ro miyae yae naei foi naeise elenate.”

Yesus Simonbe Imaene

36Farisi holona ro mbai na ro Simon Yesusre riyeungehike meke ramande enei anengkondere. Naei imaene ekete raman anewote. 37Nebei yone maengke mbai na wali beko yae maemae koungekoke. Nebei ya Yesus Farisi holona ro Simonbe bokone ekete raman anewote borokene, minyak kembo fololo bele mongkon kaei-kaei yayatebe rouke Yesusle bokore eke. 38Eke Yesus na moinye noro kelaeunge hebeunguke rimene rimewole. Na ijoko ibo balewate Yesusle oro ranne. Nebeinye na umaa yae rouke hobewounge kalangkondere. Nebeisa yoi yae huneungeke nane minyak kembo fololo belebe Yesus na orone heungeke.

39Farisi holona ro Simon Yesusre ramande riyeungehike meke kiyae nebei wanen ereubokene na kena eisa elele, “Nda ro ramanne anende kiyae na hele Allahle yendo kayaalona, nda maengke na wali beko ma nemene isaeyembonde.”

40Nebeisa mo Yesus yae Simonde weunge, “Simon, Reyae a mbaise ware ufetere.”

Simon mae weunge, “Guru, nendon weise.”

41Yesus nda ahuba ahuneuboke weunge, “Ro bee, ro mbaise ekete roi riyeinyehike (nebeisa mo benen aheneikonde). Ro hi yae kalia ya 500 mokoukoube na hului yae riyeungehike, ro hi yae wa ya 50 mokoukoube na hului yae riyeungehike. 42Hokolo bee aheikoi suluinye, nebei roi ikeumi ro ninae hobeukoke karo yae eleukoke. Nda ro bee nolora nde yae nebei ro roise riyeinyehike kiyaere kena buhae hele kowounge?”

43Simon mae weunge, “Reyae bene nekeufe roi kabande rouke kiyae yae.”

Yesus yae weunge, “Na helebe waei a eleukokae.”

44Yesus nebei maengkere ereungekoke mo, benen beufoke Simonde weunge, “Nda maengke eranae. Waei imaere Reyae mekalebe, nebeibe orore kuyeufekonde naei bu weyae omokoisai ((nda naei mokoyate era hena)). Nda maengke na ijoko ibo yae rorore kuyeyoufe benen rouke na umaa yae hobeufekoke. 45Weyae rare yoi bulu ehuneisi mo, nda maengke eranae Reyae na meweufikalera Raei oro ninae yoi bulu yae huneyoufe ((ro melaeyeiboi wanen)). 46Weyae Rare minyak fololo bele yae Raei yunda ehobeikoi mo, nebeibe nda maengke bu fololo bele yae Raei oro hobeufekoke. 47Nebeinye na beko bako helen sele faeinyeumikoke, rabuhine ban naei kena buhae kaban heufekoke. Ro miyae na beko ebi ken faeinyeungekoke, nebei ro miyae kena buhae ebi ken hemmiyende.”

48Nebeisa Yesus nebei maengkere euweke weunge, “Waei beko bako nemene faeinyeikokete.”

49Ro miyae hiwa yo nangkele raman mbainye anayoke yo naeise naeise a hin-sin mae hinate, “Nda ro maenin meke ro miyae naei beko bele mekeufaeinyeumi!”

50Nebeibe Yesus nebei maengkere weunge, “Rei mai yae ninae eye, Rare hila rabo halewaraene wa wali hole moloubokete!”

موجودہ انتخاب:

Lukas 7: setDBL

سرخی

شئیر

کاپی