Mat 17

Yesu yɛ kiŋwiŋwiɛ mɛ kikyí

1Ewe teglo kede e, Yesu agbani Petro ni beneminyime tiaʋa ba Yakobo ani Yohanes evu, lɛ bemu lito gyɔgyɔ ɛtɔ ɛ; nite si ba tete bebu lidze ní niklɔ. 2Agi bezeedi ye e, bɛmɔ si yɛ kiŋwiŋwiɛ mɛ kikyí, yɛ aŋu na mɛ ɛzekle ŋwisi liwo le kinɛ ɛ, lɛ yɛ bidɔkpɛkpɛ ʋɛ kyɛ ɛ, bixwa pititi gi bizeŋle e. 3Kyɔŋ ko e, lɛ badɔkpasi tiata ba bɛmɔ Mose ni Eliya gi bɛzɛpani ní Yesu i. 4Lɛ Petro ebu le edo asi Yesu si, “Ɔkaɛ, lipɛ koŋ si kwiba ní ya! Xe wɔpɛ ɛ, kwiawa akatsa tata ní niya; tile ki wɔ, tile kí Mose ani tile kí Eliya.”

5Óbu onugu ní lɛ mɛ xe aplɛ klekle atɔ ewe ba a. Ko lɛ ole ɔtɔ eyi dɔni aplɛ la mɛ si, “Ɔniliɛ ya onu mɛ ɔtutɔ mobinyime gi malɔ ɛ, gi eku mɛ liŋu u; mlata yɛ kutu!”

6Agi badɔkpasi ba benu ole lo e, lifu ne liku ba ɛsanɔ nite si bɛkɔ ba aŋu na mɛ ewe kesea. 7Lɛ Yesu aba ba klɔ; lɛ agbɔni ba a; xe asi ba si i, “Mlayɔ! Mlakíse lifu u!” 8Lɛ gi bɛyɔ ɔ xe bedi klanɔ ɛ, bámɔ ɔnɔnɔ sani Yesu ko.

9Agi bɛzeeple lito le e, Yesu akpɛ ɔsã aki ba si, “Kububasɛ kuliɔ gi mlɛmɔ ɛ, mlɔ mɛ tɔtɔ ɔkifeke onugu ní kɔ aʋa a kɔzɛna ni lipoe lɛ klɔ gi Ɔnɔɛ Yebi ye aayɔ dɔni bekpo ʋa mɛ ɛ.”

10Lɛ badɔkpasi ba beʋi Yesu si, “Ege lɛ loso Ɔsã nɔ badɔbasɛ ba bɛpani si linu si Eliya yɛ aatu kuba na a?”

11Yesu ebu le onu si, “Eliya yɛ aatu kuba, kɔ akpɛ kidɔ kakaa likpɔ aplɛ ɛ. 12Pɔ̀ mɛɛsi mlɔ si; Eliya aba kooko pɔ̀ lɛ banima bámɔ yɛ egyesi, lɛ bebu i tu ye ní ba kupɛpɛɔ onu i. Nite ke biawa Ɔnɔɛ Yebi ye fɛ nyɔnyɔɛ. 13Niklɔ badɔkpasi ba benu lɛ ese si Yohanes kuni yo ɔkpɛkpɛɛ yɛ su azɛɛpani.

Yesu ayɔ ni ɔyasɔʋi ɔtɔ mɛ gi Ɔfuɛfuɛ zimizi eze e

14Agi Yesu nì yɛ badɔkpasi ba bedziba ɛtsani linɔkpi le e, onyime ɔtɔ aba Yesu klɔ, lɛ adɔ yɛ aklamasi na aʋa ni yɛ ketu ya a, 15lɛ apani si, “Ɔkaɛ, di mobinyimee asigaga! Kukpakpanya kuli ní yɛ su u, gi izeegleʋe eku kifu nì kuni me e, nite si izɛɛmɔ ɔzia glegle. 16Lɛ loso magbani yɛ amani wɔ badɔkpasi ba, pɔ̀ bátani yɛ kuyɔnɔ nɔ ɔ.”

17Lɛ Yesu azɛ liboe le si, “mlɔ omono kizeze me kyrikyri bebi ba ya, kitɛ xe kuʋaziŋa kúma ni mlɔ awla na a? Lɛ kɔzɛna ni lipoe woli i onu maaze ni mlɔ su du u? Lɛ kɔna ni lipoe woli onu mazɛɛzi mlɔ eboe la na? Mlagbani onyimemi ye amani mɛ ní ya!” 18Lɛ Yesu akpɛ ɔsã aki Ɔfuɛfuɛ zimizi no lɛ edo ní onyimemi ye me kyɔŋ ko lɛ onyimemi ye ayɔ ní lipoe lɛ klɔ aʋa ɛ.

19Lɛ kede gi Yesu ni yɛ badɔkpasi ba bebu lidze e, beʋi ye si, “Ege lɛ loso blɔ kɔ ɔ kútani Ɔfuɛfuɛ zimizi no kukpikpini dono na a?”

20Lɛ Yesu ebu lɛ mɛ aki ba si, “Liba lɛ mɛ nite lɛ ese linu si mlɔ kuziŋaa, kúsrɛ ɛ. Sugba mɛɛsi mlɔ si, atɛsi mlɔ kuziŋaa kwikeme ŋwisi odum ye libi le kinɛ ɛ, mlaatani litoe lɛ ya kusɛ si, ‘Kpaʋi tɔ zɛdɔ ni kɔlɔ! ‘gi liaba lɛ mɛ ɛ; nite si kididɔ kítrasani mlɔ kubitɛ ɛ. 21Ɔfuɛfuɛ zimizi lɔ ya elu i, gani Aya kuxwaxwa ni onugu nyanya mɛ ko mlatani lɔ kukpikpini dono o. Kidɔ dzedze kakaa elu kítratanɔ ɔ.”#17:21 Keboekpemi alia ya ɛ káma ni keplekpa kakaa mɛ

Yesu apani ní yɛ kutseo su dzɛ ɛ

22Agi badɔkpasi ba pɔ́ bɛkpɛ likpɔ ní Galilea ɛ, Yesu asi ba si, “Bíha Ɔnɔɛ Yebi ye kukpɛ awla ki banima 23niteme si biaye ye; pɔ̀ ní liwe tanɛ we le aʋa ɛ, Aya aayɔ ni yɛ gi aadzi ligbã a.”

Liki si badɔkpasi ba pɔ́ beze ní asigaga mɛ ɛ.

Yesu atsa kusumu yo ligba lɛ kagyɔa

24Agi Yesu ni yɛ badɔkpasi ba bɛba Kapernaum i, Yerusalem lisɔligba lɛ babɔgyɔ ba beʋi Petro si, “Dani mlɔ ɔdɔbasɛɛ izɛtsa Yerusalem lisɔligba lɛ kagyɔa na a? 25Lɛ Petro ebu le onu si, “Ee, izɛtsa a.”

Lɛ gi Petro atrɛ ní kepea mɛ ɛ, Yesu etu ye kuʋi si, “Petro, kitɛ wogyo liboe le odi i? Nyaŋwɛ izɛtsa kagyɔ ɔki kelea ya mɛ bekusi ba na a? Kesea mɛ bebi ba loo bababa ba na a?

26Lɛ Petro ebu le onu si, “Bababa bá bizɛtsa bibɔɛ ʋɛ klɔ ɔ.” Lɛ Yesu atrɛ lɛ aʋa si, “Lipɛ! Kɔ libasɛ si líma si kesea mɛ bebi ba batsa kibɔ ɔ. 27Pɔ̀ tɔ kukíta ɔnɔnɔ ese e, trɛ ní limu ne kutu yɔ, tɔ kpɛ wɔ dadiwa ɛ. Likpaa tɔpu inɛ gi wɔabu i, yaka lɛ onugu lo me. Wɔamɔ kibɔ gi kiana ki mɛ ni wɔ lisumugba lɛ kagyɔa ɛ. Kɔ kɛ zɛɛtsa mɛ ní wɔ onu.”

موجودہ انتخاب:

Mat 17: avn

سرخی

شئیر

کاپی