Mat 14

Herodes aki beye Yohanes kuni yo Ɔkpɛkpɛɛ

1Ní lipoe lɛ klɔ mɛ ɛ, Herodes gi eze ɔʋaŋa ní Galilea ɛ, enu Yesu unu. 2Lɛ Herodes asi yɛ baka ba si, “Yɛ onu Yohanes kuni yo Ɔkpɛkpɛɛ gi edzì ligbã nɛ, lɛ loso kigaglaɛ kiliɛ ní yɛ awla xe ɛɛbitɛ enugutseboe a la te e.”

3Kpɛ ɔtɔ ɛ, Herodes aki si bevu Yohanes, lɛ bɛkpɛ yɛ bibɔ ʋɛ xe bɛkɔ yɛ kpɛ ní ligba lɛ ɛ. Abitɛ lɛ nite kɔkpɛ Herodia gi eze yeneminyime Filipo yedze loso o. 4Lɛ ese linu si Yohanes kuni yo Ɔkpɛkpɛɛ asi Herodes si, “Linu ogú ni Aya ɔsã nɔ onu si gbani Herodia!” 5Lɛ Herodes apɛ si yiye Yohanes, pɔ azeese Yudanɛ ma gi bɛzi yɛ si onu Aya yɛ oboedoplɛ ɛ.

6Agi Herodes azɛɛŋa yɛ lipɔwe le e, Herodia yɛ obidzɛ eyo livu ne ní banima pɔ́ aŋu na mɛ, gi liku Herodes aŋu. 7Lɛ aka aplɛ akí ɔdisami nɔ si, “Maka kitamu si maakiwɔ kidɔ kakaaɛ liɛ gi wɔaʋi i!”

8Ní yene kupɛpɛ onu i, eʋi si “Mani mɛ niya abla Yohanes kuni yo Ɔkpɛkpɛɛ yɛ litukpo le ní kitɛɛ mɛ!”

9Liboe le liwa axwɛ ní Okusi ye aʋa, pɔ̀ kɔkpɛ yɛ kitamu yɛ gi aka aplɛ ní bababa ba petee aŋu na mɛ loso e, aki ɔsã si babitɛ ní ɔdzɛʋi yɛ kupɛpɛɔ aʋa. 10Lɛ aki si bɛzɛtsa Yohanes yɛ litukpo le ní ligba lɛ ɛ. 11Bɛmani litukpo le ní kitɛ mɛ xe bɛkɔ lɛ ɛki ɔdisami nɔ ɛ, lɛ akɔ lɛ atsini yene e. 12Yohanes yɛ badɔkpasi ba bɛba efeke okpo ye, lɛ bezeevive ye e; lɛ kede e, bɛzɛɛsi Yesu liboe le.

Yesu agani banɔ akpe tietsu ni bidɔŋaŋa

13Agi Yesu enu Yohanes liboe le e, asɛ ni klɔ ní katapokpa mɛ, lɛ atrɛ ní ɔkutɔ gi ebu lidze dzaa yɛ tete e. Banima benu si asɛ lɛ bɛsɛ ní ba ima nɛ mɛ ɛ, bɛga ikli lɛ lɛ bɛzɛtsani yɛ. 14Yesu edo ní katapokpaa mɛ, lɛ gi amɔ linɔkpi le e, asigaga ɛga yɛ ni ba lɛ ayɔni banama gi ba isu mɛ igɔ ɛ.

15Gi ɔlagɔ lɔ ɛna ɛ, yɛ badɔkpasi ba bɛba yɛ klɔ lɛ bɛsi yɛ si, “Kelea keeblo, lɛ niya fɛ ebu lidze. Ki banima basɛ tɔ bazeedzi kiŋaŋa ní kumami yɔ mɛ kí ba isu ya.”

16Yesu ebu le onu si, “Líma si basɛ, mlɔ tutɔ mlaki ba kiditɔ tɔ baŋa!”

17Lɛ bɛsi Yesu si, “Aklã tetsu ni akpa taʋa ko alɛ blɔ awla.”

18Yesu asi ba si, “Kɔlɔ ɛ, mlakɔ la amani mɛ ní ya.” 19Lɛ Yesu asi banima si beze ní siwa sɛ aʋa; lɛ kede e, akɔ aklã tetsu la ni akpa taʋa la, lɛ efeke yɛ aŋu na xe edi lifunu ne, lɛ edo Aya ɖase e. Lɛ kede e, ayaʋi aklã na mɛ lɛ akɔ la aki yɛ badɔkpasi ba ɛ, lɛ yɛ badɔkpasi ba bɛkɔ la ɛki banima ɛ. 20Ɔnɔ kakaa atà gi eke e. Lɛ yɛ badɔkpasi ba bɛhali bigɔgɔ ʋɛ gi biyi kusɔʋi liɔfɔ ni tuʋa a. 21Banama gi bɛŋa bidɔ mɛ ɛ bɛna benyime akpe tietsu, badzɛ ba ni bebi ba bákla ba akpɛ lɛ mɛ ɛ.

Yesu aga Limu ne aʋa

22Yesu aki si yɛ badɔkpasi ba beku katapokpaa kpɛ ɔtɔ tɔ bazaatrɛ ní kuni yo kapɛ ʋla, atɔ yɛ pɔ ɛ yikpɛ banima kude. 23Agi aya banima pɔ ɛ, emu atrɛ ní ketokpa katɔ aʋa yɛ tètè lɛ azɛɛxwa Aya ɛ. Gi ɔlagɔ lɔ ɛna ɛ, Yesu tètè ko eze niklɔ; 24lɛ ní lipoe lɔ klɔ mɛ ɛ, katapokpaa kalɛ ní limu ne aʋa ke, lɛ kuni yo kwizɛwa abla la ni katapokpaa gi liwɔ lɛ lizeefu i tsani ka ɛ.

25Olezatɔ nɔ ní inyɔ tita ni inyɔ tiglo kusi i, Yesu azɛɛga ní kuni yo aʋa gi atrába ní yɛ badɔkpasi ba klɔ ɛ. 26Agi bɛmɔ yɛ gi ɛɛga ní kuni yo aʋa ɛ, lifu ne liku ba, lɛ bedo si okpo bɛmɔ, lɛ bɛkpɛ ozí lo ni lifu me.

27Lɛ Yesu edo asi ba kyɔŋ si, “Mlevu ɔna! Mɛ liɛ ya! Mlakí se lifu.”

28Lɛ Petro apani si, “Ɔkaɛ, xe gi wɔɖi i, kɔlɔ ki tɔ miga kuni yo aʋa tɔ miba wɔ klɔ.”

29Yesu asi yɛ si, “Ba!” Lɛ Petro edo ní katapokpaa mɛ lɛ ekpese kuni yo aʋa kuga trɛ ní Yesu klɔ ɛ. 30Pɔ̀ gi amɔ liwɔ gagla lɛ ɛ, ese lifu ne ko lɛ ekpese kuwɔli uku ní kuni yo me. Lɛ Petro akpɛ ozi lo si, “Zɛ kímɛ Ɔkaɛ!”

31Kyɔŋ klɔ ko e Yesu anina yɛ ɔwla lɔ lɛ evu Petro e xe apani si, “Wɔ kuziŋa kuli sisami koŋ! Ege lɛ loso wɔ kpɛ eɖikeke la?”

32Ba tiaʋa bemu iku katapokpaa mɛ ko lɛ liwɔ lɛ limɔni kufu i. 33Lɛ yɛ badɔkpasi ba ní katapokpaa mɛ bekutu ye lɛ bedo si, “Sugba wɔ wonu Aya yebínyimee!”

Yesu ayɔ ni banyanya ba ní Genesaret

34Agi bɛtsa limu ne e, bɛba eku Genesaret. 35Lɛ gi niklɔ banɛ ma bɛmɔ Yesu i gyesi i, bɛ kpɛ ole tsisi kusio klɔ petee. Lɛ banima bemani banama gi bɛzɛ nya ɛ dɔni imaɛ nɛ klɔ gi iklani ba mɛ mani Yesu i. 36Lɛ bedu litukpo kesea ɛki yɛ si ɔki kude tɔ banama gi bɛnya ɛ, bagbɔni yɛ liwu le ɔgyurɔ lɔ ko; lɛ banama petee gi bɛgbɔni liwu le e, bɛyɔ ɔ.

موجودہ انتخاب:

Mat 14: avn

سرخی

شئیر

کاپی