Mutendeko 14
14
Abramu wakuthaska Loti
1Mu mazuŵa ghara, Amurafele karonga wa ku Babuloni, Ariyoki karonga wa ku Elasara, Kedorilaomere karonga wa ku Elamu, na Tidala karonga wa ku Goyimu, 2ŵakarwa nkhondo na ŵakaronga aŵa: Bera karonga wa ku Sodomu, Birisha karonga wa ku Gomora, Shinabu karonga wa ku Adima, Shemebere karonga wa ku Zeboyimu, ndiposo na karonga wa ku Bela (ndiko kuti Zowara). 3Ŵakaronga wose aŵa ghakakumana pamoza mu Dambo la Sidimu (ndiko kuti Nyanja ya Muchere). 4Aŵa ŵakamuteŵetera karonga wa Kedorilaomere virimika 12, kweni mu chirimika cha 13 ŵakamugarukira. 5Mu chirimika cha 14 Kedorilaomere pamoza na ŵakaronga awo ŵakaŵa nayo ŵakiza na kuŵatonda ŵaRefayimu ku Ashiteroti Karinayimu, ŵaZuzimu ku Hamu, ŵaEmimu ku Shave Kiriyatayimu, 6na ŵaHoro mu mapiri gha Edomu, mpaka ku Eli Parani mu mphaka mwa mapopa. 7Ndipo ŵakawerera na kwiza ku Eni Mishipati (ndiko kuti Kadeshi), ndipo ŵakatonda charu chose cha ŵaAmaleki, na ŵaAmori wuwo, awo ŵakakharanga mu Hazazoni Tamara.
8Sono karonga wa ku Sodomu, karonga wa ku Gomora, karonga wa ku Adima, karonga wa ku Zeboyimu, na karonga wa ku Bela (ndiko kuti Zowara) ŵakawuka ndipo ŵakaya karwera pamoza nkhondo mu Dambo la Sidimu. 9Ntheura ŵakarwa na Kedorilaomere karonga wa ku Elamu, Tidala karonga wa ku Goyimu, Amurafele karonga wa ku Babuloni, na Ariyoki karonga wa ku Elasara. Ŵakaronga ŵanayi ŵakarwa na ŵakaronga ŵankhonde. 10Dambo la Sidimu likazura na vizorozoro vya ulambwe wakunata. Para ŵakaronga ŵa ku Sodomu na ku Gomora ŵakachimbiranga, ŵanji ŵakawa mwenemumo ndipo awo ŵakaponapo ŵakachimbilira ku phiri. 11Ntheura ŵakaronga ŵarwani ŵanayi ŵara ŵakatora vyuma vyose vya mu Sodomu na Gomora, na vyakurya vyawo vyose, ndipo ŵakaruta. 12Ndipo ŵakatoraso Loti, mwana wa munung'una wa Abramu, pamoza na vyuma vyakhe, pakuti iyo wakharanga mu Sodomu, ndipo ŵakaruta.
13Kweni munthu munyakhe uyo wakapona wakaya kamuphalira Abramu muHebere yura, mweneuyo wakakharanga pafupi na makuni ghakuru gha musoro gheneagho ghakaŵa gha Mamure muAmori, munung'una wa Eshikolo na Anere. Aŵa ŵakaŵa ŵakukoreranako na Abramu pa nkhondo. 14Para Abramu wakapulika kuti mubali wakhe wakoreka umikori, wakarongozga ŵateŵeti ŵakhe awo ŵakamanya kurwa nkhondo, ŵeneawo ŵakababikira mu nyumba yakhe na yakhe. Wose pamoza ŵakaŵa 318, ndipo iwo ŵakaŵarondezga ŵarwani ŵara mpaka ku Dani. 15Na usiku, wakaŵagaŵa ŵateŵeti ŵakhe, ndipo iyo na ŵateŵeti ŵakhe ŵakaŵazinga ŵarwani. Ŵakaŵatonda na kuŵarondezga, mpaka ŵakaya kafika nawo ku Hoba, ku mpoto kwa Damaseko. 16Ŵakaya kapokaso vyuma vyose. Ŵakiza nayo Loti mubali wakhe pamoza na vyuma vyakhe ndiposo na ŵanakazi na ŵanthu ŵanyakhe.
Melekizedeki wakumutumbika Abramu
17Abramu wakati wawerako uko wakaya katonda Kedorilaomere pamoza na ŵakaronga awo ŵakaŵa nayo, karonga wa ku Sodomu wakaruta kuya kakumana nayo ku Dambo la Shave (ndiko kuti Dambo la Karonga). 18Ndipo Melekizedeki, karonga wa ku Salemu, wakiza na vingwa na vinyo. Iyo wakaŵa musofi wa Chiuta Chikurukuru.#Heb 7.1-10 19Ndipo wakatumbika Abramu wakati,
“Chiuta Chikurukuru, Mlengi wa kuchanya na pasi,
wakutumbike iwe Abramu!
20Wachindikike Chiuta Chikurukuru,
uyo wapereka ŵarwani ŵako mu woko lako.”
Penepapo Abramu wakamupa Melekizedeki chakhumi cha vyose ivyo wakaŵa navyo.
21Karonga wa ku Sodomu wakati kwa Abramu, “Undipe ŵanthu, kweni iwe utore vyuma.”
22Abramu wakati kwa karonga wa ku Sodomu, “Ndarapa kwa Fumu, Chiuta Chikurukuru, Mlengi wa kuchanya na pasi, 23kuti ine nditi nditorengeko chara nanga nkha uzi panji nthambo za skapato, nesi kanthu kinu kanyakhe, mzire muyowoye kuti, ‘Abramu ndamusambazgiska ndine.’ 24Nditi nditoreko kanthu chara, kweni cheneicho ŵanyamata ŵarya, ndiposo na phande la ŵanthu ŵeneawo ŵakaruta nane. Anere, Eshikolo, na Mamure ndiwo ŵatore phande lawo.”
موجودہ انتخاب:
Mutendeko 14: Tumbuka
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Bible Society of Malawi