Chivkeeb 4
4
Ka-ees Hab Anpees
1Adaas nrug Evas kws yog nwg quaspuj pw, tes Evas txawm xeebtub. Evas yug tau ib tug tub hab nwg has tas “Vim tug TSWV paab kuv, kuv txhaj tau ib tug tub.” Yogle ntawd, nwg txhaj tis tug tub ntawd npe hu ua Ka-ees.#4:1: Ka-ees: Lub npe nuav has muaj ntsiv thooj le lulug Henplais kws has tas “tau lawm.” 2Tomqaab ntawd nwg rov yug tau ib tug tub hu ua Anpees.
Anpees yog ib tug tub tu tsaj, tabsis Ka-ees yog ib tug tub ua qoobloo. 3Muaj ib nub Ka-ees nqaa tej qoobloo kws nwg sau tau lug coj tuaj fij rua tug TSWV. 4Anpees los kuj muab nwg tej mivnyuas yaaj kws yog thawjtug coj tuaj tua, hab nwg xaiv tej nqaj kws zoo tshaajplawg coj tuaj fij rua Vaajtswv. Tug TSWV txaussab heev rua Anpees hab nwg tej khoom fij, #Henpl 11:4 5tabsis Nwg tsi txaussab rua Ka-ees hab nwg tej khoom fij. Yogle ntawd, Ka-ees txhaj chim hab ua ntsejmuag npautawg vog.
6Tes tug TSWV has rua Ka-ees has tas, “Vim lecaag koj txhaj chim? Vim lecaag koj txhaj ua ntsejmuag npautawg vog le ko? 7Yog koj ua qhov zoo, Kuv yeej yuav txais koj tej khoom fij xwb;#4:7: Kuv yeej yuav txais koj tej khoom fij xwb; lossis koj yeej yuav luagntxhi xwb. tabsis vim koj ua qhov phem, txuj kev txhum txhaj zuv rawv ntawm koj qhovrooj yuav tum koj. Txuj kev txhum xaav ua tug kaav koj, tabsis koj yuavtsum kovyeej nwg.”
8Tomqaab ntawd Ka-ees has rua nwg tug kwv Anpees has tas, “Ca wb moog rua nraag teb.”#4:8: Tej cov ntawv qub-qub thaus u sau has tas Wb tawm moog yos uasi nraag teb; phoo lug Henplais tsi muaj cov lug nuav. Thaus obtug moog txug nraag teb lawm, Ka-ees txawm muab nwg tug kwv mos ntho hab muab tua tuag lawm. #Math 23:35; Lukas 11:51; 1Yauh 3:12
9Tug TSWV nug Ka-ees has tas, “Koj tug kwv Anpees moog dlua twg lawm?”
Nwg teb tas, “Kuv tsi paub. Kuv yog tug kws tsomkwm kuv tug kwv nua lov?”
10Tes tug TSWV has tas, “Vim lecaag koj txhaj ua phem le nuav? Koj tug kwv cov ntshaav kws ndlwg rua huv aav tau quaj hu tuaj txug Kuv, zoo yaam le ib lub suab kws thov kev pauj chim. #Henpl 12:24 11Zagnua koj raug foom phem lawm, koj yuav khwv tsi tau noj lug ntawm thaaj aav nuav ntxiv lawm. Vim thaaj aav nuav tau rua ncauj nqog koj tug kwv cov ntshaav kws koj tau muab nwg tua lawm. 12Txawm yog koj yuav cog qoobloo los tej aav ntawd yuav ua rua tej qoobloo hlub tsi taug. Koj yuav ua tuabneeg tsi muaj vaaj tsi muaj tsev, yuav ua lajlees moog thoob qaabntuj.”
13Ka-ees has rua tug TSWV has tas, “Lub txim nuav nyaav tshaaj qhov kuv yuav ris taug lawm. 14Koj ntab kuv tawm ntawm thaaj aav nuav hab tawm ntawm Koj lub xubndlag moog. Kuv yuav ua tuabneeg tsi muaj vaaj tsi muaj tsev, yuav ua lajlees moog thoob qaabntuj, hab leejtwg ntsib kuv los yuav tua kuv povtseg.”
15Tabsis tug TSWV teb tas, “Tsi tau! Yog leejtwg tua Ka-ees, tug ntawd yuav raug txim pauj xyaa npaug ntxiv.” Yogle ntawd, tug TSWV txhaj nas cim rua Ka-ees, kuas leejtwg pum los tsi xob muab nwg tua. 16Tes Ka-ees txhaj tsiv ntawm tug TSWV lub xubndlag hab moog nyob rua ib lub tebchaws hu ua Nauj#4:16: Nauj: txhais has tas ncig moog ncig lug. kws yog nyob saab nubtuaj ntawm lub Vaaj Edees.
Ka-ees Cov Xeebntxwv
17Ka-ees hab nwg tug quaspuj yug tau ib tug tub hab muab tis npe hu ua Enauj. Ka-ees rhawv tau ib lub nroog hab nwg muab lub nroog ntawd tis npe hu ua Enauj lawvle nwg tug tub lub npe. 18Enauj muaj ib tug tub hu ua Ilaj, nwg yog Mehuya-ees txiv; Mehuya-ees muaj ib tug tub npe hu ua Methusa-ees, hab Methusa-ees muaj ib tug tub hu ua Lamej. 19Lamej yuav ob tug quaspuj, ib tug hu ua Adas hab ib tug hu ua Xilas. 20Adas yug tau ib tug tub hu ua Yanpas, kws yog cov tuabneeg kws yug tsajtxhu hab nyob tsevntaub tug yawmkoob. 21Yanpas muaj ib tug kwv hu ua Yunpas, kws yog cov tuabneeg kws txawj ntaus nkauj nogncaas hab tshuab raaj tug yawmkoob. 22Xilas yug tau ib tug tub hu ua Tunpas Ka-ees, nwg txawj ntaus txhua yaam cuabyeej#4:22: nwg txawj ntaus txhua yaam cuabyeej; ib phoo ntawv qub-qub thaus u txhais has tas nwg yog cov tuabneeg kws txawj ntaus tooj ntaus hlau tug yawmkoob. kws yog muab tooj muab hlau ntaus. Tunpas Ka-ees tug muam hu ua Na-amas.
23Lamej has rua nwg ob tug quaspuj tas,
“Adas hab Xilas, meb cale noog kuv has:
Kuv tua ib tug tub hluas tuag lawm vim nwg ntaus kuv.
24Yog leejtwg tua Ka-ees es nwg tub raug txim xyaa npaug,
yog leejtwg tua kuv, tug ntawd yuav raug txim xyaacaum-xyaa npaug.”
Xej Hab Enauj
25Adaas rov nrug nwg tug quaspuj pw, tes Evas txhaj rov yug tau ib tug tub hu ua Xej.#4:25: Xej: Lub npe nuav has muaj ntsiv thooj le lulug Henplais kws has tas “tau muab pub.” Evas has tas, “Vaajtswv pub kuv muaj dlua ib tug tub lug sawv Anpees chaw, tug kws Ka-ees muab tua lawm.” 26Xej muaj ib tug tub, hab nwg muab tis npe hu ua Enauj. Txij thaus ntawd lug tuabneeg txawm pib tuav tug TSWV lub npe kws dlawbhuv thaus puab pehawm Nwg.
موجودہ انتخاب:
Chivkeeb 4: HNJ2022
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2022 United Bible Societies. All rights reserved.