San Mateo 3
3
Juan on tlakuatekijketl otemachtij ipan xalpatlajkan
(Mr. 1.1-8; Lc. 3.1-9,15-17; Jn. 1.19-28)
1Ipan on tonaltin, Juan on yejuan tlakuatekijketl, ouajlaj ipan ixalpatlajkan Judea, niman okinmachtij on tlakamej yejuan itech oualajkej. 2Ijkin kiminmachtiaya:
—Xkajkauakan ika nenkichiuaj on tlen xkuajli, pampa ye uajlau on tonaltin ijkuak Dios tlamandaros nikan ken tlamandaroua ne iluikak.
3On tiotlajtojketl Isaías otlajkuiloj itechkopa Juan ijkuak ijkin okijkuiloj:
Yakaj nemi ne kampa xalpatlajkan niman ijkin chikauak kijtoua:
“Xyektlalikan nemoyojlo pampa ye uajlau toTEKO.
Xmelauakan nemonemilis ijkon ken on tlakamej kuejkueltlaliaj,
niman kimejmelauaj se ojtli ijkuak uajlau sen tlakatl yejuan ueyixtikaj.”
4Juan notlakentiaya ikan tlakentli* yejuan tlachijchijtli ikan itsojmiyo camello, niman kitlaliaya ilpikatl tlachijchijtli ikan kuetlaxtli. Yejua kinkuaya on chapolimej, niman no koniya on kojnekutli. 5Uajlayaj kuajkakiyaj miyekej on chanejkej de on ueyikalpan Jerusalén, niman on yejuan chantiyaj nochiuiyan Judea, niman neka nisiu itech on río Jordán. 6Yejuamej noyolkuitiayaj de intlajtlakoluan, niman Juan kinkuatekiaya ipan on río Jordán.
7Pero ijkuak Juan okitak ika miyekej fariseos* niman saduceos uajlayaj para nokuatekiskej, okinmijlij:
—¡Tekoneuan intech kouamej*! ¿Akinon omechijlij ika uelis nenmomanauiskej de on castigo yejuan uajlau? 8Kuajli xmouikakan para kuajli nenkiteititiskej ika melauak yonenkajkajkej nenkichiuaj on tlen xkuajli. 9Niman maka xnemilikan tla xitlaj* uelis nochiuas nemotech san pampa nenteuejkakoneuan itech Abraham. Nejua nemechijlia ika hasta in temej Dios uelis kinkuepas teuejkakoneuan itech Abraham. 10Nemejuamej nenijkonmej ken on kojtin* yejuan xtlakij. Nochi kojtli* yejuan xtlakis kitsontekiskej niman kitlatiskej. Yejua ika, xmotakan sano nemejuamej, pampa on hacha ye onkaj listo para kintekis hasta ipan inneluayouan on kojtin* yejuan xtlakij.
11Melauak nejua nemechkuatekiya ikan atl para nenkiteititiaj ika yonenkajkajkej nenkichiuaj on tlen xkuajli, pero on yejuan nechajtoka kipiya más poder xken nejua, niman nejua xnechmelaua* nion achijtsin para nikakkixtis. Yejua tej, mechkuatekis ikan Espíritu Santo niman ikan tlitl. 12Yejua ye ipan ima kipiya on itlapipitsal para yejua ika kajkauis on trigo niman kixelos itech on itlajsojlo. Kejeuas on trigo ipan on kueskontli, pero on itlajsojlo kitlatis ipan on tlitl yejuan xkaman seuis.
Juan okikuatekij Jesús
(Mr. 1.9-11; Lc. 3.21-22)
13Ipan on tonaltin Jesús okis ne Galilea niman ouajlaj itech on río Jordán para Juan okuatekij. 14Pero Juan xkinekiya kuatekis Jesús, niman okijlij:
—Nejua nechtocaroua tinechkuatekis, ¿niman yej tejua otiuajlaj para ma nimitskuateki?
15Pero Jesús okijlij:
—Xkaua para aman ijki ma nochiua, pampa ijki noneki tikchiuaskej nochi tlen Dios tlanauatia.
Kemaj, Juan okikuatekij. 16Kemaj ijkuak Jesús yonokuatekij, okis itech on atl. Kemaj on, nimantsin on iluikak otlapou, niman yejua okitak iEspíritu Dios uajtemouaya ken itlaj paloma niman onotlalijtejkok ipan. 17Kemaj okakistik sen tlajtojli ne iluikak yejuan okijtoj:
—In yejua notlajsojkaKonetsin yejuan ipampa nipaktikaj.
موجودہ انتخاب:
San Mateo 3: nguNT
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 1987, 2012 Wycliffe Bible Translators, Inc. All rights reserved.
