Fingec fingec 1
1
Anutungo wiac sasawa meficgedarec
1 #
Myeg 33:6; 102:26; Yes 45:18; Yer 32:17; Yoh 1:1, 3; Kol 1:16; Heb 11:3 Hanac hanaheaungoc Anutungo bangec nga kurumenga kurumenga meficyunuec. 2#Dser 32:11; Myeg 104:30Anu bangec kisic anu wiac mong imohai mi feec. Nga kundungngo doku keme kemea hedzickema feec. Anu Anutuac Asungo doku witiau sawau yerecgema nangkefec.
Uameme 1, Kperagi nga kundung mendzicyuruec
3 #
Myeg 33:6; 2Kor 4:6 Anu Anutungo yofi deec, “Kperagi fingeru.” Ifi deu kperagi fingerec. 4Fingeru kperagi henu ngereu kperagi nga kundung mendzicyuruec. 5Mendzicyuruma kperagiac kpara hadzing kparec nga kundunggac kpara tofocnac kparec. Anu ama toforema wereckenu uameme mocgu anec.
Uameme 2, Hoeng wi doku emu
6 #
2Pe 3:5
Anu Anutungo yofi deec, “Doku botuhau oda mong fingeru imocngo doku hendzicyuruu tembuc tembuc febesera.” 7#Yop 38:8-11; Myeg 104:3; 148:4Ye ifi dema odatoa mong meu imocngo doku hendzicyuruu oda bageau yengena feec nga oda witiau yengena feec. Ye deu ifi fingerec. 8Fingeru oda imocac kpara sawa deec. Anu ama toforema wereckenu uameme yohockang anec.
Uameme 3, Bangec, kondung nga ichasa
9 #
Myeg 33:7; 104:6-9; Yer 5:22; 2Pe 3:5 Anu Anutungo yofi deec, “Sawa bageau doku mocgungoc kpedzucnebisia anu bangec gbanggebeso.” Deu ifi fingerec. 10Ifi fingeru ye gbangge gbanggea imocac kpara bangec kparec anu doku kpedzucnegec tembuha feu kpara kondung kparec. Ifi meficgema henu naric anec.
11Anu yofi deec, “Bangecfunac wiac kekehagoc hania hania erebeso. Bangecfu dzaring nga kpindzing komohanginagoc siricngina arenga arenga fingecdacbeso nga ic forakomohanginagoc siricngina arenga arenga, ifi fingeru.” Ifi deu wiac imoc fingecdarec. 12Bangecfunac wiac kekehagoc hania hania ereec. Dzaring nga kpidzing siricngina arenga arenga komohanginagoc fingecgec nga ic siricngina arenga arenga forakomohanginagoc fingecgec. Ifi fingecdaru henu ngereec. 13Anu ama toforema wereckenu uameme harebec anec.
Uameme 4, Wenac, afo nga asomeng
14 #
Myeg 74:16; 104:19; Yer 31:16-17, 35 Anu Anutungo yofi deec, “Sawau kperagi fingeru. Fingecma yeneng hadzing toforec mendzicyuruma kpete yabung nga uameme amma kifanaso deficgema febisia. 15Anu kperagi imocngo sawau fingecma bangec kperagia mibisia.” Deu ifi fingecgec. 16#Myeg 136:7; 147:4; Yes 40:26Ifi negemma kperagitoa yohockang meficyuruec, kperagi kuneng imoc hadzing garenggeudeac faiec nga kapia imoc tofocnac garenggeudeac faiec. Amma asomeng momoc meficyunuec. 17Yeni bangec kperagi migecdeac sawau faiyunuu 18yeneng ama wereckenude nga toforeude imoc garenggegecdeac faiyunuec amma kperagi nga kundung mendzicyurugecdeac faiyunuec. Ye ifi fingeru henu ngereec. 19Anu ama toforema wereckenu uameme 4 anec.
Uameme 5, Yang nga neng
20Imocac ngadeau Anutungo yofi deec, “Wiac kekehagoc hania hania yeni kondunnu fingecma gurugoctoa kengha ambisia. Anu neng yeni fingecma sawau kpututuckema kengha ambisia.” 21Ye ifi dema kondunggac yangtoa toa meficyunuec. Amma kondunggac wiac hania hania gurugoc kengha amma kecandae yeni siricngina arenga arenga ifi meficyunudarec. Amma ye neng kpegangnginagoc hania hania sasawa siricngina arenga arenga ifingoc meficyunuec. Ifi meficyunudacma henu ngereedarec. 22Henu ngereu yofi dema kenecyunuec, “Ngeni fingecsahe amma seregurutoa amma doku nga kondung wakedacbisia amma neng yeni bangec witiau seregurutoa ambisia.” 23Anu ama toforema wereckenu uameme 5 anec.
Uameme 6, Kekec hania hania
24Imocac ngadeau Anutungo yofi deec, “Bangecfunac wiac kekehagoc hania hania siricngina arenga arenga fingeru, imoc amaac yang nga bangecac kateyang amma wiac kekecnginagoc bangecgoc wegenac kengha amma kecgecde hania hania sasawa siricngina arenga arenga fingeru.” Ye deu ifi fingecdacgec. 25Ye bangecac kateyang hania hania siricngina arenga arenga amma ramaburumaka siricngina arenga arenga amma wiac sasawa kekecnginagoc bangecgoc wegenac kengha amma kecandae imoc ifingoc siricngina arenga arenga meficyunudacma henu ngereedarec.
Uameme 6, ngicngac yengena siric isoc
26 #
Myeg 8:7-9; 1Kor 11:7; Heb 2:6-7 Anu Anutungo yofi deec, “Nerang#1:26 Nerang Imoc Anutu nga Medaha ifi negendimbe nga areng mong Anutugoc kefec me kpac imoc ine mi negendimbe. Hebiraioyoafusing yohockanggac yoac mong mi fede. Imoc mocgusac me homac ande imocsac edenunuude. siric isocngoc ngicngac mede nerang siric isoc ambisia. Amma yeneng kondunggac yang nga sawaac neng amma bangectoa bangecfu amaac yang nga bangecfu kateyang sasawa amma wiac sasawa kekecnginagoc bangecgoc wegenac kengha amma kecandae yeneac garengngina amma kecbisia.” 27#Fing 2:7, 21-22; Mat 19:4; Mrk 10:6; 1Kor 11:7; Efs 4:24 #Fing 5:1-2Ifi dema ye ngicngac yengena siric isoc meficyuruec. Ye ngic nga ngac meficyuruu yengena siric anoc.
Dederecgeyoac
28Meficyuruma kenecyuruma yofi dema edeyuruec, “Ngeri fingecsahe amma seregurutoa amma kemma bangec sokoma kecma bangec mema henggareng amma kecbisia#1:28 henggareng amma kecbisia Ngicngac yeni wiac sasawa bangecfunac ereande nga bangecfu nga kondunnu amma sawau kenghaandae imoc sasawa henggareng amma kecgecdeac deec. amma kondunggac yang nga sawaac neng amma yang amma wiac sasawa kekecnginagoc bangecfu kengha amma kecandae yeni garengyunubisia.”
29Ifi dema torokpema yofi edeyuruec, “Ni bangecfu ic nga kpindzing hania hania sasawa forakomohanginagoc faingemmeduae imocngo yakangina ambeso. 30Anu bangecfu yang sasawa kecdacdae nga sawaac neng sasawa amma yang nga wiac sasawa kekecnginagoc bangecgoc wegenac kengha amma kecdae yeneac yaka imoc dzaring nga kpindzing sasawa faiduae.” Anu ye deec, ifi isoc fingecdarec. 31Fingecdaru ye wiac sasawa meficgeec imoc henu gombunga yombong andarec. Anu ama monggoc toforema wereckenu uameme siks anec.
موجودہ انتخاب:
Fingec fingec 1: Ded
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© (Active), Wycliffe Bible Translators, Inc. All rights reserved.