Tutui Makasososak 3
3
Hatahori dae-bafok ta nau nenene neu Manetualain
1Numa basa bandar fo MANETUALAIN nakadadadi nalak kara nai dae-bafok ia ena, mengge ndia mana malela pepeko-lelekok sudi selik kana. Laꞌe esa, hambu mengge natane neu inak naa nae, “Tebe, do? Manetualain kaꞌi nae, ‘Ei ta bole miꞌa ai boak numa ai huuk kara marai osi ia dale mai, hetu?’ ”
2-3Inak naa bala nae, “Taa! Ai bole miꞌa! Tehuu hambu kada ai huuk esa nai osi taladan, ndia Manetualain kaꞌi fo ai ta bole miꞌan. Ana nae ai ta bole miꞌa, ma ta bole mafaroe boan, huu neu ko ai mate.”
4Tehuu mengge naa naselu nae, “Wee, naa ta ndaa! Ei ta mate! 5Manetualain memak kaꞌi talo naa, nahuu Ana bubuluk ena mete ma ei miꞌa ai boak naa, ei dadi malelak sama leo Ndia. Ndia, bubuluk bee ndia neulauk, ma bee ndia manggarauk.”
6Basa boe ma inak naa mete neu te ai huuk naa lolen seli, ma boan nok bali ladan seli. De ana duduꞌa nae, “Mete ma au uꞌa ai boak ia, neu ko au dadi malelak.” Boe ma ana ketu nala ai boak naa, de naꞌa. Basa de ana ketu neni fee saon, de saon naꞌa. 7Ara raꞌa basa, dei de ara bubuluk rae sira dua sara makaholak kara. Huu naa de ara nato ai dook kara fo ara mbambalu neu sira makaholan.
8Ledo bobon naa, ara ramanene MANETUALAIN laꞌo-laꞌo numa osi naa dale. Boe ma ara keke reu ai huuk boboan seri, mita fo MANETUALAIN ta mete-nita sara. 9Tehuu MANETUALAIN nanggou touk naa nae, “Adam, aa! O nai bee?”
10Touk naa naselu nae, “Au amanene Manetualain haran nai ia. Tehuu au mae, huu au makaholak. Huu naa de au alai mai keke.”
11Boe ma MANETUALAIN nae, “See ndia nafada nae o makaholak? Talo bee? O muꞌa ai boak fo Au kaꞌi ei boso miꞌak naa, hetu?”
12Ana naselu nae, “Inak ia fo Manetualain feen mai fo nanonoo no au naa, ana ndia fee au ai boak naa, de au uꞌa!”
13Basa boe ma MANETUALAIN kokolak no inak naa nae, “Tao hata de o tao talo naa?”
Boe ma inak naa naselu nae, “Te mengge kedi-ira nala au na! Huu naa de au uꞌa ai boak naa, leo maa.”
Manetualain nakatoo sara
14Basa boe ma MANETUALAIN nakatoo mengge naa nae,
“Huu o tataon ia, de Au huku-doki o. Numa basa banda laen mai, kada o mesa ngga hambu neketook talo ia. Mulai numa hatematak ia neu losa o mate, o roso munik kada o poꞌon, ma o muꞌa nai kada daer. 15Au tao o mua inak ia, esa musu no esa seku neu. Ma ei dua ngga tititi-nonosim mara oo talo naa boe. O tititi-nonosim neu ko kiki nala hatahori ei tinggan. Tehuu ndia tititi-nonosin esa, neu ko tutu nakalulutu o langgam.”
16Basa de Manetualain nafada inak naa nae,
“Neu ko Au tamba o susa-sonam neu faik fo o mairu, ma tamba nembetak neu faik fo o bonggi. Leo mae talo naa, tehuu o dalem oo bei hii nalan seli neu o saom boe. Ma ana ndia koladu o.”
17Boe ma Manetualain nafada touk naa nae,
“O ta tungga au parendang, tehuu tungga o saom hihiin, losa o muꞌa ai boak fo Au kaꞌik naa ena. Huu naa de o hambu huku-dokik boe. Ma dae oo hambu huku-dokik boe. Mulai numa hatematak ia neu losa o mate, o muste maue-osa fafandek lima-eim doꞌi dae, fo o bisa hambu nanaꞌak. No o maue-osa talo naa, dei fo o bisa masoda. 18Leo mae o sele-tande mata-matak kara, tehuu dae nakamomorik kada dilak ma nggauk. 19De o muste maue-osa fafandek lima-eim, dei fo dae fee o nanaꞌak. O muste maue-osa mbusem titi talo naa losa mate. Au adu ala o numa dae mai. De mete ma o mate, na, o fali muu dadi dae bali.”
20Basa boe ma Adam foi saon, nade ‘Hawa’ (fo sosoa-ndandaan nae ‘mana masodak’), huu ndia naa, basa hatahori mana masodak inan.#3:20:Nai dedeꞌa Ibrani, ‘adam’ sosoa-ndandaan nae ‘hatahori dae-bafok’.
21Boe ma MANETUALAIN tao bua-loꞌa numa banda roun mai, fo fee dua sara pake.
Manetualain husi kalua heni Adam no Hawa
22Basa boe ma MANETUALAIN kokolak nae, “Hatematak ia, hatahori iar bubuluk ena bee ndia neulauk, ma bee ndia manggarauk, sama leo Ita. Boso losak ara oo raꞌa ai boak numa ai huuk mana fee sara rasoda seku neu boe.” 23De Ana husi kalua heni sara numa osi manai Eden naa mai, fo ara reni mamanak laen reu, de ara leo-laꞌo no ue daek, fo rasoda numa dae buna-boan mai. 24Manetualain husi basa sara, boe ma Ana nadenu Ndia ata kalidan nara ruma nusa tetuk do inggu temak mai,#3:24:Dedea Ibrani surak nae, Manetualain ata kalidan numa nusa tetuk do inggu temak mai naa, ‘kerubim’. fo reu ranea numa osi naa boboan dulu. Ara toꞌu tafar lombe sara reu-mai, rasaꞌa sama leo aꞌi. Manetualain nadenu sara kena dalak mana maso dale neu, huu Ana ta nau hatahorir ketu rala ai boak mana fee sara rasoda seku neu naa.
موجودہ انتخاب:
Tutui Makasososak 3: txqNTPO
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2016, Wycliffe Bible Translators, Inc. in cooperation with (UBB) Unit Bahasa dan Budaya