KEYUM KERO 11
11
Babilon Lokke Ponyuk Ekume
1Kerape tani amoso, agom atelpe pobosula gomuge akam dungai. 2Edílo ami kídíde sanggodanlo magoola yégoodungem bulu Babilon amolo yiibeko mapaala delo dungato. 3Delo bulu pobosuto, “Kaju ngolu itangem edíídope romla ilaju.” Dekepe ila bulu itang píla delokke dekedem gagbomnape mutkyon kato. 4Depe ipala bulu manbosuto, “Kaju ngolu doolung luuneko ilenla, taleng telokai píídope ponyuk ekumko molaju; depe imílo ngoluke amíne kayé delokke ngolu tani amoso yépit-yéyit bosumayé.” 5Delo Ruutum bí doolung luune demlang ponyuk ekumdem kaape tokto. 6Delo Ruutum bí poto, “Arope ami kídísi atelpe idung delokke bulu takam agom atelpe pobosudung. Bulu sikepemin iyén; buluke ipe míínamdem ingkuekom itum lamayé. 7Kaju, ngolu tokla buluke agom aradelo aní-aní gomugem sobí-soyél sulíkla, bulum tatkén bosu yimadope ilaju.” 8Depeila Ruutum bí bulum tani among sokke rego kéényulo mapit-mayit bosudope ipansumola, bulu doolung luune dem momato. 9Depeila delok amínem Babilon emla mínto, kapeila delo Ruutum bí ami tabungke teyolo aní-aní gomugem sobí-soyélsuto delokke tani among sokke rego kéényulo mapit-mayit bosudope bulume ito.
Shemke Odonge
10Shemke odong kídíe si: puumu gíronge taknyinape idoem, Shemke dítak língkolo dugríge píídoem, bí Arpakhshadme oto. 11Arpakhshadme orongem Shembí dítak língko pilngoko yéla ome-uem ayoko oto.
12Edílo Arpakhshad takying angum kolang takngoko yétodí delo bí Shelahme oto. 13Shelahme orongem Arpakhshad dítak língko appi kolang tagumko yéto. Bí abíd ome-ue kom kato.
14Edílo Shelahbí takying angumko yétodí, delo bí Eberme oto. 15Eberme orongem Shelahbí dítak língko appi kolang takying angumko yéto, delokke abíd ome-uete kato.
16Edílo Eberbí takying angum kolang takpi píítodí, delo bí Pelegme oto. 17Pelegme orongem Eberbí dítak língko appi kolang takying angumko yéto. Bí abíd ome-ue kom kato.
18Edílo Pelegbí takying angumko yétodí, delo bí Reume oto. 19Reume orongem Pelegbí dítak língko annyi kolang dítak konangko yéto. Bí abíd ome-ue kom kato.
20Edílo Reubí takying angum kolang taknyiko yétodí, delo bí Serugme oto. 21Serugme orongem Reubí dítak língko annyi kolang dítak kínídko yéto. Bí abíd ome-ue kom kato.
22Edílo Serugbí takying angumko yétodí delo bí Nahorme oto. 23Nahorme orongem Serugbí dítak língko annyiko yéto. Bí abíd ome-ue kom kato.
24Edílo Nahorbí takying annyi kolang konangko yétodí, delo bí Terahme oto. 25Terahme orongem Nahorbí dítak língko kolang takying kolang konangko yéto. Bí abíd ome-ue kom kato.
26Edílo Terah bí dítak íying kínídko yétodí, delo bí Abram, Nahor, delokke Haranme oto.
Terahke Odonge
27Terahke odonge sipe idung: Terahbí Abram, Nahor delokke Haranke abue delokke Haranbí Lotke abue. 28Haranbí bím olenko Saldian among lokke Ur doolunglo, abu turdung adape sikai.
29Abram lang Nahor bínyi mime bomto. Abramke mime amíne Sarai delokke Nahorke mime amíne Milkah. Milkah bí Haranke ome, delokke Haranbí Iska keeteng abue. 30Saraibí negenpe ila ome-oo kamato. 31Terahbí bík oo Abram melang bík oten, Haranke oo Lotme delokke Abramke mimepe inam bíkke nyameng Saraime Babilon among lokke Ur delok gílenbola Kanaan amope gíboto. Bulu Haran moole lope gíríla dungato. 32Delo Terah bí dítak língko annyi kolang takngoko turpala sikai.
موجودہ انتخاب:
KEYUM KERO 11: adiBSI
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Adi (Re-edited) Bible - Deena Baibél
Copyright © Bible Society of India, 2012.
Used by permission. All rights reserved worldwide.