Lükɛ̀n 18

Ɛngrɔn-hi mán ɛmrɛ̀n-ci-wrɔn nyandrɛn mɛ̀n ankà-dɔ̀

1Zhezü kɛ dɔ́ yɔ nyandrɛn ndɔ lɔ mɛ̀n ankà, ô kè yé yɔ le, ke ji le yɛ sɛ́n Ɔwɔ, edùyiemɛ̀n ɛnvra lɔ fɛn, ô edù ke bɩ́ ká yɔ mrìmrì. 2“Ɛmrɛ̀n-ci-wrɔn tɔ̀n, dú anmàn tɔ̀n, nɛ́n sɩ́ sú Ɔwɔ kɩ nɛ́n sɩ́ wá ɔwrɔn zriɛmɛ́n. 3Ɛngrɔn-hi tɔ̀n mán dú anmàn zri lɔ kɩ kɛ vá cɔ́ nɛ̀n ɛnvra zri zri, ô nɛ̀n ci ɛmrɛ̀n nɛ̀n tán yi: kɩ nɛ dɔ̀ le: ‘È ci mɛ̀n mán m'egbri-wrɔn mɛhi ɛmrɛ̀n.’ 4Ɛnvra sheshe mɛ̀n de ɛmrɛ̀n-ci-wrɔn lɔ ke sɩ́ shriɛ kɩ zɛtɛn nɛ dɔ́ n'edomɛ̀n le: ‘Ankàẅì, mɛ̀n sɩ̀ ẅɛ̀n Ɔwɔ sù kɩ mɛ́n sɩ́ wá ɔwrɔn zriɛmɛ́n; 5Tɛ́n ɔmuhi, ɛngrɔn-hi ndɔ lɔ ke di mɛ̀n ejüe nɔn, mɛ lɛ hán ye nyri n'ɛkɔrɛ̀-levri-ci, ke sɩ̀ dù ɔmu lɔ hô, nɛ lɛ vá ɛnvra lɔ fɛn nɛ̀n wá mɛ̀n ɛmɛ̀nhyì vri.’ ” 6Zɛtɛn Ɛẅɛnwrɔn kɛ dɔ̀ le: “Nyɛ́n die nukùɛ, ankà léyi ɛmrɛ̀n-ci-wrɔn gbangbàn lɔ kɛ dɔ̀ nɔn! 7Kɩ Ɔwɔ tɛ́n, ke sɩ̀ ci ɛmrɛ̀n anvrɛnvrɛn kɛ tán n'anwrɔn hɔ̀n léyi ɛnnyran mán ɛcɛ̀n ke di bobo bi nɛ̀n nɛ́n? Kɛ lɛ mɔɛ̀n yakɛ nɛ lɛ wá yɔ ɛkɔrɛa? 8Mɛ dɔ́ nyɛ̀n le: Ɔwɔ ke le ci ɛmrɛ̀n anvrɛnvrɛn kpràkprà kɛ lɛ tán yɔ. Tɛ́n, ɛnvra léyi ɔwrɔnẅì Ẅì kɛ lɛ và nɔn, nɛ lɛ cɔ́ ankàẅì-bùtan ɛnhi lɔ wúɛ?”

Ɔwɔ-nyanmàn-sùva-wá-wrɔn mán anmàn-wɔɛ̀n-yrɛ-wrɔn nyandrɛn mɛ̀n ankà-dɔ̀

9Zhezü kɛ dɔ́ nyandrɛn ndɔ lɔ mɛ̀n ankà tán yɔ léyi yɔ bú y'edomɛ̀n yɔ hán anwrɔn anvrɛnvrɛn Ɔwɔ zìwú, kɩ yɔ gbri yɔ nyran hɔ̀n nɔn: 10“Anwrɔn anhyrɛ̀ hɔ́n Ɔwɔ-sɛ́n-wɔn mɛ̀n, Ɔwɔ-sɛ́n-yri; ɔtɔ̀n dú ɔwɔ-nyanmàn-sùva-wá-wrɔn, kɩ ndɔ lɔ, anmàn-wɔɛ̀n-yrɛ-wrɔn. 11Ɔwɔ-nyanmàn-sùva-wá-wrɔn lɔ nyɔn ɔhɔnán, kɩ kɛ sɛ́n Ɔwɔ kɛ dɔ̀ le: ‘Ô Ɔwɔ, mɛ tán mɛ́n ɔkuɛ̀n, ɔmuhi mɛ̀n sɩ̀ dù kɛ̀ hàn anwrɔn ndɔ hɔ̀n léyi dú ɛci-yerɛ-bɔ̀, ɛci-gbangbàn-hán-bɔ̀ mán wúcɔ̀-hi-bi-bɔ̀; mɛ tán mɛ́n ɔkuɛ̀n, ɔmuhi mɛ̀n sɩ̀ dù kɛ̀ hàn anmàn-wɔɛ̀n-yrɛ-wrɔn ndɔ lɔ nɔn. 12Me bɩ́ kiske, ɛbi anhyrɛ̀ ɛnbifɔn kru zri granmɛ̀n, kɩ mɛ tán m'ɛvamɛ̀n cice.’ 13Anmàn-wɔɛ̀n-yrɛ-wrɔn tɛ́n nyɔn ɔhɔnán, kɩ nɛ́n sɩ́ sɩ́ anvɛ̀ ɛwú rɔ́a, tɛ́n, ne gorɛ ɛkɔrɛ̀ angbà, nɛ dɔ̀ le: ‘Ô Ɔwɔ, è nyri mɛ̀n ɛnhyɔ̀bɔ̀, mɛ̀n léyi mɛ̀n dú ɛgbàn-hán-wrɔn nɔn.’ ” 14Zhezü mrɛ́n ɔmùan le: “Mɛ dɔ́ nyɛ̀n le, ɔwrɔn ndɔ lɔ krɔn kpekɛ́n Ɔwɔ zìwú, ɛnvra léyi nɛ̀n vru ɛmɛẅi nɛ̀n hɔ́n ɛbemɛ̀n nɔn; tɛ́n Ɔwɔ-nyanmàn-sùva-wá-wrɔn lɔ kè sɩ̀ cɔ̀ ɛgbàn-bɩ̀-ce. Ɔmuhi, ɔwrɔn totɔtɔ̀n léyi ke le sɩ́ n'edomɛ̀n ɛwú nɔn, ye le sɩ̀ nɛ̀n ɛnhi, kɩ ɔwrɔn léyi ke sɩ́ n'edomɛ̀n ɛnhi nɔn, ye le sɩ́ nɛ̀n ɛwú.”

Zhezü ke fú ɛẅì hɔ̀n kpòkpò ɛnshi

(Nyɛ́n nyan Matie 19:13-15; mán Markɛ̀n 10:13-16 wrú lɔ mɛ̀n)

15Anwrɔn bɩ́ ɛẅì hɔ̀n kpokpò mán, kɛ hɔ́n sɩ́ Zhezü, ô nɛ̀n ku yɔ ankɔrɛ̀ ɛwú. Zhezü sɛnkɛn-bɔ̀ lɔ kán yɔ, kɩ kɛ gbá anvɛ̀ wá yɔ. 16Tɛ́n, Zhezü hán ɛẅì hɔ̀n lɔ vá nɛ̀n ɛtɛsɛ̀n kɩ nɛ dɔ̀ le: “Nyɛ́n teze ɛẅì hɔ̀n kɛ̀ vá mɛ̀n ɛtɛsɛ̀n! Nyɛ́n bɩ́ kɛ́n yɔ nyɛ́n hɛ́n hán, ɔmuhi, Anhobɩ́ Nɛ̀ncüì-dúyri lɔ dú yɔ hɔ̀n léyi ndù cá yɔ nɔn tɛn. 17Mɛ dɔ́ nyɛ̀n, dú annànwɔrɛ le: ɔwrɔn léyi ke sɩ̀ shrí Anhobɩ́ Nɛ̀ncüì-dúyri kè bɩ kɛ̀ hán ɛnẅì cɛ hɔ́ nɔn, nɛ́n sɩ̀ bru nanvrɛn lɔ mrìmrì.”

Ɔwrɔn léyi di ɛnnɛ̀ncüì nɔn

(Nyɛ́n nyan Matie 19:16-30; mán Markɛ̀n 10:17-31 wrú lɔ mɛ̀n)

18Zhüifɛ̀n-wrɔn cüìcüì tɔ́n ke yrɛ Zhezü le: “Ankà-yé-wrɔn anvrɛnvrɛn, ecitan de ke ji le mɛ̀n hán, ô mɛ̀n cɔ́ ɛwúvà léyi ke sɩ́ trɔa nɛ́n?” 19Zhezü kɛ dɔ́ nɛ̀n le: “Cɛci krukú kɛ e bi mɛ̀n ɔwrɔn anvrɛnvrɛn hán? Ɔwrɔnẅì zrìɛmɛ́n kè sɩ̀ zrɔà, ke dú kɛ kè sɩ̀ dù Ɔwɔ zri kɩ. 20È nyri ɛnyanmàn hɔ̀n lɔ: ‘E bɩ́ bi ɛncɔnwrɔn-hi; e bɩ́ wri ɔwrɔn; e bɩ́ yerɛ ɛci; e bɩ́ ẅɛn ɛyɔ̀n e ku ɔwrɔn ɛwú; ɛ wá e zi mán ɔmuan.’ ” 21Ɔwrɔn lɔ mrɛ́n ɔmùan le: “Ɛcɛmɛ̀n hán hɛ́n mɛ̀n ẅɛn ɛnyanmàn ndɔ lɔ fɛn mɛ̀n hɛ́n.” 22Ɛnvra léyi Zhezü yá n'ankà lɔ nɔn, nɛ dɔ́ yi le: “Vru wɔrɔ mɛ́n eci zri. Ɛ̀ hɛ́ ɛci lɔ fɛn léyi ɛ ẅɛ̀n nɔn, ô è bɩ́ ɔkùa lɔ fɛn è ce ɛmian-bɔ̀; zɛtɛn ɛ lɛ cɔ́ anhobɩ́ nɛ́ncüì-di-ci ô zɛtɛn, ɛ̀ và, ô ɛ̀ kɛ́n mɛ̀n ɛsɛ̀n.” 23Tɛ́n ɛnvra léyi ɔwrɔn lɔ yá ankà ndɔ lɔ nɔn, ɛnhyɔ̀bɔ̀ cɔ́ nɛ̀n, ɔmuhi, nɛ́n di ɛnnɛ̀ncüì vri nɔn. 24Zhezü kán ɔmu le ɛnhyɔ̀bɔ̀ cɔ́ nɛ̀n, kɩ nɛ dɔ̀ le: “Nsɔ tán ɛnnɛ̀ncüì hɔ̀n kè bru Anhobɩ́ Nɛ̀ncüì-dúyri! 25Nsɔ tán frimu ke ci frɛnfrɛn levri, tɛ́n vru sɔ tán ɔwrɔn léyi di ɛnnɛ̀ncüì nɔn, kè bru Anhobɩ́ Nɛ̀ncüì-dúyri.” 26Anwrɔn hɔ̀n léyi ke die nɛ̀n nukùɛ nɔn, kɛ dɔ̀ le: “Tɛ́n, antɔn de kɛ lɛ cɔ́ ebɩ̀die nɛ́n?” 27Zhezü mrɛ́n ɔmuan kɛ dɔ̀ le: “Eci léyi anwrɔnẅì ke sɩ̀ hán rɔ́a nɔn, Ɔwɔ tɛ́n kɛ lɛ hán tɛ̀.” 28Zɛtɛn Piɛrɛ̀n kɛ dɔ̀ le: “Die nukùɛ, bɔ́ tecüe eci lɔ fɛn, bɔ̀ kɛ́n mɛ́n ɛsɛ̀n.” 29Zhezü kɛ dɔ́ yɔ le: “Mɛ dɔ́ nyɛ̀n annànwɔrɛ mɛ̀n le: ke dú kɛ Anhobɩ́ Nɛ̀ncüì-dúyri kruhú, ɔwrɔn tɔ̀n ke teze n'ɔwɔn, nɛ́n hi, nɛ́n muan-ẅì hɔ̀n, n'ɛmɛ̀n-bɔ̀, n'ɛẅì hɔ̀n hô, 30nɛ lɛ cɔ́ bobrebe ɛnvra ndɔ léyi bɔ̀ dú ɛmɛ̀n nɔn, kɩ nɛ lɛ cɔ́ ɛwúvà léyi ke sɩ́ trɔa nɔn, ɛnvra léyi vru dú ezì kɛ lɛ và nɔn mɛ̀n.”

Zhezü kɛ dɔ́ andɛ̀n-anhɔnmɛ̀n n'owù mán n'owúemɛ̀n-dù-frɔ́ ankà

(Nyɛ́n nyan Matie 20:17-29; mán Markɛ̀n 10:32-34 wrú lɔ mɛ̀n)

31Zhezü bɩ́ n'ɛsɛnkɛn-bɔ̀ ɛvà-anhyrɛ̀ lɔ kɩ kɛ dɔ́ yɔ le: “Nyɛ́n die nukùɛ, bɔ́ hɔ́n Zherüzalɛmɛ̀n anmàn, nanvrɛn de ankà hɔ̀n léyi Ɔwɔ-muanwú-ankà-dɔ́ bɔ̀ merɛ́n dɔ́ ɔwrɔnẅì Ẅì wú nɔn, kɛ lɛ sá nmù. 32Ye le bɩ́ nɛ̀n yɛ tán anwrɔn hɔ̀n léyi kɛ vá nyri Ɔwɔ ankà, kɩ yɔ lɛ wora nɛ̀n, yɔ lɛ fɛ́ nɛ̀n andà. 33Yɔ lɛ gorɛ́ nɛ̀n ngbele mɛ̀n kɩ yɔ lɛ wri nɛ̀n. Kɩ ɛbi-anhɔnmɛ̀n-bì lɔ, nɛ lɛ wɔrɛ̀-vá ɔkɔrɛ-bɔ̀ mɛ̀n.” 34Tɛ́n Zhezü sɛnkɛn-bɔ̀ lɔ ke sɩ́ yá ankà léyi nɛ dɔ̀ nɔn hɩ mɛ̀n; ankà-dɔ̀ ndɔ hɔ̀n lɔ fɛn dú cá ankà-bán-ankà, kɩ yɔ sɩ́ cɔ́ nyri ankà léyi Zhezü kɛ dɔ̀ nɔn.

Zhezü kɔrɛ anvɛ̀-bɔyɛ-wrɔn tɔ̀n

(Nyɛ́n nyan Matie 20:29-34; mán Markɛ̀n 10:46-52 wrú lɔ mɛ̀n)

35Zhezü kɛ sɔnba Zhériko tɛsɛ̀n. Tɛ́n anvɛ̀-boyɛ-wrɔn tɔ̀n yɛ́ ɛnlevri mùan kɩ kɛ sán ɛci. 36Nɛ̀n yá fɛcüè ɔmùan kɛ nán esù nvà kɩ ne yrɛ yɔ eci léyi kɛ hán nɔn. 37Yɛ dɔ́ nɛ̀n le, Nazarɛtɛ̀n wrɔn Zhezü de ke ci nanvrɛn lɔ nɔn. 38Zɛtɛn ne di bobo nɛ dɔ̀ le: “Zhezü, Davidɛ̀n Ẅì, è nyri mɛ̀n ɛnhyɔ̀bɔ̀!” 39Anwrɔn hɔ̀n léyi dú nɛ̀n ezì nɔn, kɛ gbà anvɛ̀ wá nɛ̀n kɩ kɛ dɔ́ nɛ̀n nɛ̀n kɛ́n ɔmùan nɛ̀n hɛ́n, tɛ́n ne vru ne dí bobo ecüìemɛ̀n: “Davidɛ̀n Ẅì, è nyrí mɛ̀n ɛnhyɔ̀bɔ̀!” 40Zhezü sannyɔn kɩ kɛ dɔ́ yɔ ye bɩ́ nɛ̀n yɛ và sɩ́ nɛ̀n. Ɛnvra léyi anvɛ̀-boyɛ-wrɔn lɔ cɔ́ nɛ̀n ɛtɛsɛ̀n nɔn, Zhezü ke yrɛ nɛ̀n le: 41“Ecitan de e jí le mɛ̀n hán mɛ̀n tán mɛ́n nɛ́n?” Anvɛ̀-boyɛ-wrɔn lɔ mrɛ́n ɔmùan le: “Ankà-yé-wrɔn ɛ̀ hán mɛ̀n vru mɛ̀n kán ɛyri.” 42Kɩ Zhezü kɛ dɔ́ nɛ̀n le: “Kàn ɛyrí! V'ankàẅì-bùtan lɔ kɔrɛ mɛ́n.” 43Ɛnvra zri lɔ nɛ kán ɛyri, kɩ nɛ̀n kɛ́n Zhezü ɛsɛ̀n, Ɔwɔ mrɛ́n dú nɛ̀n anmùan mɛ̀n. Fɛcüè lɔ fɛn kán eci lɔ, kɩ fɛcüè mán kɛ mrɛ́n Ɔwɔ.

موجودہ انتخاب:

Lükɛ̀n 18: ƐAA03

سرخی

شئیر

کاپی