Luk 6
6
Warim Kpman a Melnum pa kil ikghlen wang a arpm ekg yapm
1Ak wang wrij ur a tu arpm ekg yapm pa, Jisas nti tu disaipel alkilen pa ngkom hor wring wit kuin pa. Wa tu hpar wit ek pa rahin al itna wampel tolpa kai. 2Yatom tu tiur a tu Parasi pa tu ari pa, yatom tu roponten la tolpa, “Wa kipm kpor yangkipm titnongket a la tolpa, ake ntie ekg al mento ak kwap ak wang a arpm ekg yapm pa ekg nte?” 3Ari Jisas akalmpe tolpa, “Kipm ari pa kuina ur a pike Teipit nti tu alkil pa ntekg ak wang a tu nikgten pa. 4Kil kai kahor yipmingki wonen a wan yalming hapm a Maur Wailen pa, yatom kil wi nak tngklak a pike tu al wor uk Maur Wailen pa, yatom kil al, wa kil uk tiur kai tu melnum alkil pa al.#Wok Pris 24.5-9 Ti yangkipm titnongket ti pa la tolpa, hi tu melnum ipma krakgen tolti al nak tngklak a al wor uk Maur Wailen pake.” 5Wa Jisas wa la nasen la tolpa, “Warim Kpman a Melnum pa, atn hep ikghlen wang a arpm ekg yapm pa.”
Melnum ur a wam mowe tupmungkul kalpmel
6Wang ur ak wang a arpm ekg yapm pa, Jisas kil kahor wan a tu atning yangkipm a Maur Wailen atne pa, yatom kil ro tukgunakg lngkep a tu wrong kinkpman ekg yangkipm a Maur Wailen. Wa melnum ur a wam wien mowe tupmungkul kalpmel pa kil wa arpm kahor wan pa atning yangkipm pa arpm. 7Pake tu Parasi a tu melnum a arpmen yangkipm yiprokgen a Maur Wailen pa, tu kor ya akal tu wi Jisas pa hor ya a tolhai, ekg akal tu wiyel ye kai atn yangkipm pa, tolpa yatom tu ikgarpmel worwor akal tu ari a kil ntekg melnum numpet ur paln wor ak wang a arpm ekg yapm pa, aki kalpm e. 8Pake Jisas pa apm ari nikgwalpm kuina ur a tu akwonalmpen pa, yatom kil la nasi melnum a wam mowe tupmungkul kalpmel pa la tolpa, “Kitn wreitn itn kwa.”, yatom kil wreitn atn kwa pa. 9Yatom Jisas la nasen la tolpa, “Kupm akal ropontepm la tolpa, ti yangkipm titnongket alpmenen ti la naso tolhai, al mento katnun tolhai ak wang a arpm ekg yapm pa? Al mento ntekg wor ekg melnum ur aki, ntekg paitn ekg melnum ur e? Akal aklin melnum ekg kil arpm wor, aki ntekg kil paitn e?” 10Kil atn ari tu wrongwailet pa plaln, wa kil la nasi melnum pa la tolpa, “Hntra wam alkitnen pa!” Kil atning tolpa, kil hntra wam alkilen pa, yatom wam kil a mo pa apm paln wor ase. 11Pake nikgwalpm a tu Parasi a tu melnum a arpmen yangkipm yiprokgen a Maur Wailen pa wakget paitn ai, yatom nel kor la kai kuin a tu alntu pa la tolpa, al tu ntekg kuina ur kai Jisas pa.
Jisas kil akrkahan melnum yangkipm kuinen wampwam yikakwomwekg (12) ekg alkilen
12-13Ak wang wrij ur pa, Jisas kaino ropon Maur Wailen kaino wrik nimli ur pa, yatom ak mning wrij pa, kil ropon Maur Wailen tolpa arpm, wa kang pa, kil kwe tu disaipel alkilen pa kul. Yatom kil akrkahan wampwam yikakwomwekg (12), yatom kil kwewen la tolpa, tu melnum yangkipm kuinen alkilen. 14Saimon, Jisas kil alil nangkel tolpa Pita, wasok alkil Antru, Jems, Jon, Pilip, Partolomyu, 15Matyu, Tomas, Jems, warim kpman a Alpius, namponen Saimon, melnum ur a tu Selot.#6.15 Tu Selot pa pati, tu hret ekg tu Rom ikghlen tu Israel pa, tu akal tol wa eln melnum ur alntuen a tu alntu Juta ti atn hep ikghlenten. 16Jutas, warim kpman a Jems, wa Jutas Iskariot, melnum a hi wa eln Jisas kai wam a tu wrongmnto.
Jisas kil ro tukgunakg lngkep a tu wrong kinkpman, wa ntekg hi numpet a tu pa paln wor
17Jisas nti tu melnum yangkipm kuinen alkilen pa nel hakaino nimli pa nar atn wrik hpok pa, wa tu disaipel wrongwailet paitn alkilen pa tu apm ark ase, wa namponen tu wrong kinkpman wailet a ha wail Jerusalem, wa hor ha knokg Jutia, wa namponen ha knokg a ark hunokg yampingken ha wail Tair wa ha wail Saiton. 18Tu kul ekg akal atning yangkipm alkilen pa, ekg kil ntekg numpet a tu pa paln wor. Tu melnum tiur a maur paitn arpmen pa, Jisas kwan tukuleinjen, yatom tu paln wor. 19Wa tu wrong kinkpman pa akal eln wam helel, ekg nte, titnongket a kil pa ntie ekg ntekg tu wrongwailet pa paln wor.
Utopen a rein
20Jisas ari tu disaipel alkilen atn pa om kil la tolpa, “Kipm melnum a ark warkip pa, kipm pa wor pake, kipm utopen om! Kingdom a Maur Wailen pa apm akipm pake. 21Kipm melnum a nikgtepm ak wang ti pa, kipm pa wor pake, kipm utopen om! Kipm hi arpm ntie. Wa kipm melnum a hakg ak wang ti pa, kipm pa wor pake, kipm utopen om! Kipm hi utopen paitn. 22Tu akal ntekgepm paitn pa, pa kipm irpm utopen tolti. Kipm melnum a tu arpm ekg paitnjepm, kwantepm, akepm nokg, wa ukwepm nang paitn, ekg nte, kipm pa melnum a katnun Warim Kpman a Melnum pa, kipm pa wor pake, ti kipm utopen om! 23Kipm utopen ak wang pa, wa kipm tpra tpra utopen paitn tolti, ekg nte, kweiur kweiur wailet worwor pa Maur Wailen elntepm atn kai ha wor alkilen ai. Tu mamikgmamin manjan alntuen apm pike ntekg paitnel tu melnum ek wripm a Maur Wailen pa tolpa yat pake.”
24“Pake rein, kipm melnum a arpm ntie ak wang ti kipm hi wa wi paitn. Ekg nte, kweiur kweiur worwor a kipm akal wi pa, apm kipm wi ase. 25Wa rein kipm melnum a ark wor al nikgwor ak wang ti, pa kipm hi nikgtepm. Wa rein ekg kipm melnum a arpm utopen utop ak hino ak wang ti, pa kipm hi hakg rein paitn. 26Rein kipm melnum a tu kat nang alkipmen pa, pa kipm hi wi paitn, ekg nte, tu yantin maminen wror wror alkipmen pa, apm pike kat nang a tu melnum ek wripm a akplain tolpa yat pake.”
Kipm pa wakrongen tu wrongmnto alkipmen
27Jisas kil wa la tolpa, “Pake kupm la nasi kipm melnum a atning yangkipm a kupm la pa, kipm al wakrongen tu wrongmnto alkipmen pa. Kipm al ntekg wor kai ekg tu a ipma paitn ekg kipm pa. 28Kipm ropon Maur Wailen ekg kil ukwor aklin tu melnum a ropon Maur Wailen ekg kil ntekg paitn ekg kipm pa. Wa ropon Maur Wailen tolpa kil aklin tu melnum a arpm ekg paitnjepm pa yat. 29Tol melnum ur ereitn kai tangkokg wompel pa, wa pleln tangkokg wompel pa ekg wa kil ereitn. Aki tol melnum ur nir hapm wakget a kitn nowe ekg kupuk pa, wa kitn wa nir hapm ur a kitn nowe ti wa ukwel, ampur wa lawen. 30Tol mla ur ak ek la roponteitn ekg kitn ukwel kweiur kweiur pa, kitn ukwel tolti. Wa mla ur wi kweiur kweiur akitn ti ye kai pa, ampur wa kai ekg wa wi ye kul, yaper. 31Kipm wakrongen akal tu mla ur aktepm tolhai pa, pa kipm ti akten tolpa hep. 32Tol kipm wakrongen tu mla ur a wakrongentepm tolti pa, pa al Maur Wailen kporntepm yangkipm tolhai? Ti tu melnum a ntekg paitnpaitn pa apm wa wakrongen tu melnum a wakrongenten tolpa yat pake. 33Wa tol kipm ntekg wor ekg mla ur a ntekg wor ekg kipm pa, pa al Maur Wailen kporntepm yangkipm tolhai? Ti tu a ntekg paitnpaitn pa, apm wa ak tolpa yat pake. 34Wa tol kipm uk kweiur kweiur alkipmen pa kai mla ur akipm akwonalmpen tolpa hi wa tu akalmpentepm pa, pa al Maur Wailen kporntepm yangkipm tolhai? Ti tu melnum a ntekg paitnpaitn pa apm wa ak tolpa yat pake. Tu uk kloken mla ur a tu ari tolpa hi wa tu akalmpenten kiti kiti tolpake. 35Pake kipm al wakrongen tu wrongmnto alkipm pa, wa ntekgen wor, wa ukwen kweiur kweiur pa tolti, ampur wa kipm kwe. Ekg hi wa kipm wi kweiur kweiur wailet worwor, wa kipm plan kipm alkipm tol kipm warim a Maur Wailen a atn hep hangken kweiur kweiur wrongwailet. Ekg nte, kil pa melnum a ukpma wor tu melnum a ake ukwel wor, wa tu a ntekg paitnpaitn. 36Kipm rein tu wrongwailet tol Maur Wailen, Yan alkipmen, rein kipm wrongwailet pa.”
Ampur ari klon melnum ur
37Wa Jisas kil wa la tolpa, “Ampur kipm ari klon melnum ur, pa hi wa Maur Wailen kil ari klon kipm pa yat. Ampur eln wam itna melnum ur kil ntekg paitn pa, pa hi wa Maur Wailen wa eln wam itna kipm ti yat. Wa kipm pa kwan paitnpaitn a mla ur ekg hi wa Maur Wailen wa kwan paitnpaitn alkipmen ti yat. 38Kipm uk pa, kipm wi. Hi wa kipm wi nmong wail, wutnampen klin notuln waiwai hmpei aken. Kipm alupm nmong tolhai ukwel pa, hi wa Maur Wailen akalmpentepm nmong tolpake.”
39Wa Jisas kil wa la yangkipm kla ur tolpa, “Ntie melnum ikg paitnen ur plan ya melnum ikg paitnen ur pake? Pa ake ntie, tuwekg yaten ngko eln kinar yilkgim pa. 40Melnum a wi arie pa ake atn hangken melnum alkil a rowel tukgunakg lngkep pa. Kil wi arie pa plaln pa, kil hi paln tukol melnum alkil a rowel tukgunakg lngkep pa.
41Ntekg tolhai yatom kitn ari yipik waitketn a hel kai ikg a wasok aki wailen ur alkitnen pa, pake ake wa kitn ari yo wompel wail a hel kai ikg alkitnen ti? 42Ntekg tolhai yatom kitn kai la nasi kil pa tolpa, ‘Wailen, itn ekg kupm kipieitn yipik ur pa tukuleinjeitn ikg pa ri’. Pake ake kitn ari yo wompel wail a hel kai ikg alkitnen ti? Kitn melnum a akplainel plan ak num henen ti tolti. Kitn wi yo wompel wail a hel kai ikg alkitnen pa hep, yatom ikg akitn pa wor, ekg al kitn ak ari yipik a hel kai ikg a wailen alkitnen pa kipiel tukuleinjel.”
Yo, a ek alkilen
43Wa Jisas kil la tolpa, “Yo wor pa ake al ngko ek paitn pa, wa yo paitn pa ake al ngko ek wor pa. 44Yo wrij wrij pa apm ari kai yo ek alkil a ngko pake. Mento ake al nel yo fik ek pa kai yo hngkem, aki nel hmpei wain ek wor pa kai hmpei weipmun pa. 45Apm tolpake, melnum a kil alupm nikgwalpm arie worwor pa, ekla a kil pa paln kulhor kai wor. Wa melnum a kil alupm nikgwalpm arie paitn pa, ekla a kil pa paln kai paitn. Ekla ur a paln kai ek a melnum pa, pa apm plan tukol nikgwalpm alkilen pa apm tolpake.”
Melnum wekg a ntekg wan
46Jisas kil wa la tolpa, “Ntekg tolhai yatom, kipm kweopm tolpa, ‘Wailen, Wailen’, pake ake kipm ntekg komkiti kuina ur a kupm la nasepm pa? 47Pa kupm plantepm, melnum a kul katnun kupm ti, yatom atning katnun komkiti yangkipm akupm pa, kil pa melnum tolhai. 48Kil pa tol melnum a ntekg wan. Kil ak yilkgim pa watin, yatom uwen hong pa atn wrik weijet. Kop pa u nar ak nel wan pa, ari ake wa or, ekg nte, wan pa pike kil ntekg ariworwor. 49Pake melnum a kil atning yangkipm akupm pa, ari ake wa kil katnun komkiti pa, kil pa tol melnum a ntekg wan, yatom ak yilkgim warkip, uwen hong prpar paitn. Kop u nar ak nel wan pa, apm or kai parpm ha paitn ase.”
موجودہ انتخاب:
Luk 6: uriK
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2016, Wycliffe Bible Translators, Inc. All rights reserved.
