Madiu 6
6
Yesu veluga koyokoyo agaidiya fa'ina gilukahihi.
1 #
Md 23:5
Tu wana'itave'avimi. Keke omi ve'anuwanuwalakamiyao kaliva matadiya wanatafatafalolo be higa badi hinahawaveyamumuyemi fa'ina. Ka'i hidede amine wanahuluva digo, keke ami laufata yamumuna Tamami lobameya ginavelemi. 2#Md 25:37-40Au ka'i koyokoyo wananuwakabubuyedi amine, keke kabu'avane kaliva matadiya wanavelugadi. Badi meyadi luhei koyokoyo hivelugadi againe, hiulega hiyuvena be kaliva moya'aidi tomatawabuwabu hinavaga'auta. Manuwa-abavehawala ana egana sinagogi agaidiya o ka'i melaleya hinavaga'auta be meyadi luhei yadi nuwakabubu hina'itana, adi egana hinakilakahina. Keke badi'iyao amine omi wanahuluva fa'ina gagahemi velemo'ena, badi meyadi luhei adi laufata ahe hinuhagana, higa kaliva hihawaveyamumuyedi. 3Tu ka'i omi'iyao ma koyokoyo wananuwakabubuyedi amine, tobohiyamiyao keke-mo'a wanavenuwa'atadi. 4#Kl 3:23-24E, keke kaliva matadiya yami nuwakabubu wanaseyemauneni, au Tamami anakaibe matane wananuwakabubuyedi be Bana'e ami laufata aimo ginavelemi.
Yesu ve'o'ola fa'ina gilukahihi.
Luke 11:2-4
5 #
Lu 18:10-14
Kadu'e, ka'i Yaubada againe wanave'o'ola amine, keke badi meyadi luhei amine wanahuluva. Badi'iyao ma nuwanuwadi lakahina manuwa-tafalolo agaidiya o ka'i didigeya hinamidi hinave'o'ola be kaliva moya'aidi hina'itadi. Gagahe velemo'ena adi laufata ahe hinuhagana, higa kaliva adi egana hikilakahina. 6Tu omi'iyao ma Yaubada againe wanave'o'ola amine, yami manuwa vetawana againe amikaibe wanaluku, wana wanafalina be Tamami veuveuna againe wanave'o'ola, ada Tamami ase'asemi gi'ita'itana-ma ami laufata aimo ginavelemi.
7Kadu'e wanave'o'ola againe, keke ve'o'ola-fa'ila aimo luhifufu-kawowo wanayakahini, badi yo'o tulidiyao kalivai-dina nuwadi keke mahamahalina ma hiyakahina amine. Badi hinuwanuwa vaita yadi ve'o'ola-fa'ila fa'ina Yaubada ginavenogaledi. 8#Md 6:32Au keke badi yadi dewa amine omi wanahuluva, fa'ina Tamami gavadi againe wakali'uho-ma ahe gihalamanena. Aimo keke wadave'o'ola tu Bana'e yami nuwanuwa ahe gihalamanena.
9Auwe wanave'o'ola againe, hidede amine wanagahe wanagayo,
Tamama lobameya umimiyami,
a egana mahamahalina anave'amohimohinena.
10Ya abavehimeya ana tova gidalakayemu ase'asemeya.
Ya vehimeya lobameya hi'ita'itave'avina amine,
meda ime babiya ada'ita'itave'avina.
11Aiyeta sa'eyana sa'eyana amaga udavelevelema.
12 #
Md 18:21-22
Ime nagona tobohiyameyao yadi koyona
avenuwauluyena amine,
meda yama koyona kadu O udavenuwauluyena.
13 #
Lu 22:40; Yo 17:15; 2Te 3:3 Keke aba'aladibidibi againe unahawahegema tu
kaliva koyona Setani againe unalugolegolema.
Au hidede amine wanave'o'ola. 14Ka'i omi tobohiyamiyao yadi koyona omi agaimiya hifaisewana-ma wanavenuwauluyena, au kadu Tamami lobameya yami koyona ginavenuwauluyena. 15#Mk 11:25-26Tu ka'i omi tobohiyamiyao yadi koyona omi agaimiya hifaisewana-ma keke wanavenuwauluyeni, au kadu Tamami lobameya yami koyona keke ginavenuwauluyeni.
Yesu labewaviyo ve'o'ola fa'ina gilukahihiyena.
16 #
Ais 58:5-9
Kadu'e, omi ve'o'ola fa'ina wanalabelabewaviyo againe, keke badi meyadi luhei amine magigimi wana'ivebwanebwaneneni. Badi adi bela hikivekoyona be moya'aidi hinahalamanena higa hilabelabewaviyo. Gagahe velemo'ena badi'iyao ma adi laufata ahe hinuhagana, higa kaliva hihawaveyamumuyedi. 17-18Tu ka'i omi ve'o'ola fa'ina wanalabelabewaviyo amine, magigimi wanakolana ada wowomi wanabunamina be walabelabewaviyo ma kaliva keke hinahalamaneni fa'ina. Bana Tamami anakaibe ginahalamanena, Bana veuveuna amanadi, ada Tamami ase'asemi ana nuwanuwa gi'ita'itana-ma ami laufata ginavelemi.
Yesu lobama ana lokoloko fa'ina gilukahihi.
Luke 12:33-34, 11:34-36, 16:13
19 #
Ye 5:1-6; 1Ti 6:9-10 Kadu'e, keke lokoloko moya'aina hide'i babiya wanavagakokoni, fa'ina tumotumo hinakivekoyona o ka'i lokoloko ginabugaga o ka'i tokai'afu adifaiweya hinaluku hinaki'afuna. 20#Lu 18:22; Kl 3:1-2Au lokoloko hagihagina lobameya wanavagakokona, fa'ina wesede againe tumotumo o ka'i bugaga keke ginakivekoyoni, kadu tokai'afu keke adifaiweya hinaluku hinavai-kawowowoni. 21Ada au ha'againe yami lokolokofou ginadauda, au medede againe nuwami ginanunauyena tova moya'aina.
22Kadu'e, matami vaita nuwami ana lamufa amine. Ka'i matami ita'ita'eyana, au nuwami matatabuna mahamahalina. 23Tu ka'i matami ita'italugana, au nuwami matatabuna uyu'uyuyuna, nuwanuwaluga againe wamimiyami. Ada ka'i yami nuwahinage vaita uyuyu amine, au nuwami gi'uyuyu-mo'a.
24Keke tamo hakwadi anafaiweya taubada luhei fa'idiya ginafaisewa. Ka'i adi'iselu fa'idiya ginafaisewa digo, sa'eyana againe ginanuwanuwakoyo tu sa'eyana againe ginanuwanuwa hagihagina. Kadu sa'eyana againe ginamiyave'avina, tu sa'eyana gina'itatagona. Au keke amifaiweya wananuwanuwaluga. Ka'i nuwanuwami Yaubada digo, Yaubada ana nuwanuwa'eya. Ka'i mani digo, mani ana nuwanuwa'eya.
Yesu gigahe vaita Tamada yana itave'avina
kanavetumaganena.
Luke 12:22-31
25 #
Fl 4:6; Hi 13:5; 1Fi 5:7 Hidema fa'ina gagahemi, yami miyami fa'ina keke wanavenuwanauna vaita gavadi wana'u'ani, o ka'i gava bwai wanayuyuni. Kadu kaleko fa'ina keke wanavenuwanauna vaita gavadi againe wanavelifi. Gavadi wai ginagona-ma wananuwenuweni. Ka'i yawaimi o ka'i a'a? Kadu ka'i wowomi o ka'i kaleko? Au yawaimi wai ginagona tu a'a wai gimulina, kadu wowomi wai ginagona tu kaleko wai gimulina. 26#Lu 12:6-7Manuga hiyaveyavega-ma wana'itadi. Keke hidafahafaha, keke hidayauyaudi kadu keke kweda hidayogoyogoni-yo a'a hidasewasewadi, tu au ai'adi Tamami lobameya adiga giveleveledi. Ada Tamami yana itave'avina omi agaimiya yana itave'avina manuga agaidiya gitubuhegena. 27Kadu hakwadi agaimiya unavenuwanauna-yo afaiweya yawaini ana etowava babiya unakivetubugini? Keke-mo'a afaiweya.
28Ada gavadi-yo ami aikeva fa'ina wanavenuwanauna? Falafalawasi wala'aiya hikabukabu-ma wananuwenuwedi. Keke hidafifaisewa, keke doki hida'alulauga. 29#1Kin 10:23Tu gagahemi, bana tokaiwabu ana egana Solomoni ana vaigau kikaiwabu-mo'ena tu hida falafalawasi adi vaigau bana ana vaigau hitubuhegena. 30E, Yaubada isisi'u givevigauna, medema tova adamoya wala'aiya gikabu tu bogiyadi hinatuna be gina'alahina. Yaubada isisi'u givevigauna tu medema gaitoma kabi'ona. Tu omi'iyao ma gaitoma lakahi-mo'ena fa'ina gina'itave'avi-mo'emi, ami vaigau ginavelemi. Wona velemona yami vetumagana kabi'ona. 31Au keke wanavenuwanauna wanagayo, Gavadi kana'ani? o, Gavadi kanayuni? o ka'i, Gavadi againe kanavelifi? 32Au badi yo'o tulidiyao kalivai-dina Yaubada keke hidahalamaneni-ma hida gaitoma fa'ina hivenuwanauna, kadu tova moya'aina hilelelena. Tu omi'iyao ma nuwanuwami hida gaitoma yami miya hagihagina fa'ina Tamami lobameya a gihalamanena. 33#Sam 37:4,25; Lu 18:29-30Yaubada yana abavehimeya ana gaitoma againe wanamidihawahegemi kadu yana nuwanuwa tunutunugina wanamidilelena, ada au Bana'e gina'ita'itave'avimi be amiga ami bwai ami vaigau ginavelevelemi, au wanamiyami hagihagina. 34Ada au keke bogiyadi fa'ina wanavenuwanauna vaita gava vita ginalakayemu. Tova adamoya ana vita au amifata. Keke tova adamoya ana vita bogiyadi ana vita wanave'atutamo'aini.
موجودہ انتخاب:
Madiu 6: viv
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2003, Wycliffe Bible Translators, Inc. All rights reserved.
