Matiusi 4

Saminseni weanggari Yesusi we sawa

(Markusi 1:12-13; Lukasi 4:1-13)

1Mayeai Allai Nuaninufoi wiwiaing Yesusi to katai wekamamiei minano feai, we ambori Saminseni weanggariri. 2Yesusi niayai na nanai rahida piarua, wepuasa, wiro dampi kahai, ampafe wewisi paria. 3Na nanai mano Weanggari foi da ma weanggariri, medu wei deyo, “Taraie, Allai ne Kaisung di wau mani, bemi kamamieiwa wefiang we bang.” 4Manamo Yesusi yoa wei aha deyo, “Na Sempaisi ne Kaiwofo dotu tonina:

‘Inontarai eminohi etarang fo, na fiangfo titou kaha,

mae na ohong kariri Seng Allai ne Kaiwo kiai ne kontai.’#Ulangan 8:3”

5Mayeai Saminseni kia Yesusi to bendari mirarebanaio Yerusalemia, na wanai dohoni minohi na Sempaisi ne Munufoi kuruinafo. 6Mayeai medu wei deyo, “Taraie Seng Allai ne Kaisung di wau mani, tawing wau tawai na ninai aweu, ambori wewaifosa esoru wau wori, tau aweu, mureha kaha. Weo Sempaisi ne Kaiwone rabuang bei dotu kariri wau tonina:

‘Allai ambori demi ne wewaifosa etamang we wau,’

tuti,

‘Etamang we wau na ewaramifo,

ampafe tau kofafea kaha.’#Masmuri 91:11-12”

7Wape Yesusi yoa wei aha deyo, “Na Sengnei ne Kaiwone medurai kontai tonina:

‘Wiro meweanggari mene Mananu Seng Allai fanai.’#Ulangan 6:16”

8Mayeai Saminseni kia Yesusi to uai dedai bei nuwowongfo aha, tuti na nanai deinawi katai mananufo ewemananu naya fo kiai na nunei sentenang tuti ne mahikai fuba niai nai foi sentenang wei. 9Tuti medu wei deyo, “Tuang aweu womi we yaua mani, katai fuba botioi tuti ne fianggeng finanai kiai, yohoni kiai we wau.” 10Yesusi yoa wei aha deyo, “Saminseni, ro weru yau. Weo na Sempaisi ne Kaiwone dotu tonina:

‘Mesomi terai we Allai mene Sengfoi

tuti metohong kariri ne Kaiwofo terai.’#Ulangan 6:13”

11Ainanaya Saminsenifo pisuhirai weru Yesusi tuti wewai rabuangfoi da ma fiatari na fi dohong wea fo toyari fi we dang fo tonanai.

Na nu Galilea foi Yesusi yufi reantenang nai

(Markusi 1:14-15; Lukasi 4:14-15)

12Rabuang bo Yesusi taraoai we Yohanesi mano webaptisi kaiwasa foi, etafuria wiatai na munu aitamu rorong fo nanai, daraberahi to nu Galilea foia. 13Da weru ne munue Nazareti, awa niayai na bendari Kapernaumi na ruru Galilea foi dereungfo, amani na kataio weriria na Zebuloni tuti Naftali uru ma foi. 14Finanai kariri kaiwo nabi Yesayai medura fo, amani 15deyo,

“Zebuloni ne kataifoi tuti Naftali ne kataifoi,

na rang bia to rurufoi arau fo,

na waya Yardeni dereungfo na nu Galilea foi,

amani kataio Yahudi kaha fosa bitoya enai naya fo.

16Kaiwasa enayai na mamantiti rorong fo

ewati sambewarai fiebai bei ampa,

mano mamantitifoi tebungsa fosa,

Sambewarafoi dansaisa ampa.”#Yesayai 9:1-2

17Na rahida nanaifa aino Yesusi fioai borong medu deyo, “Metarabera mea weru mene sasariwa, weo Allai da ma we weMananu fe kikeu ampa.”

Yesusi sahu manggaerang mana erariati

(Markusi 1:16-20; Markusi 5:1-11)

18Rahida bo Yesusi da na nafareng na ruru Galilea foi nani, detio manggaerang mandu, mambetahatui suruine, amani Simoni mano ahui kontai we Petrusi foi tuti ne tahatuio Andareasi. Umung erang na rurufoi. 19Medu we suru deyo, “Mura ma, muraria yau, ambori mutafu diang ahang kaha mae yeunau muru we mutafu inontarai we yau.” 20Na tatofang kutu nanai kontaio uwaramipa erangfo watai mae urariati.

21Yesusi da paria aha mani, deti mambetahatui mandu kontai aha, amani Zebediusi ne arikang suruine, uwonomi fino Yakobusi tuti Yohanesi. Ukontai une wawafoi itoria itone erangfoi na itone wafoi. 22Yesusi sahu suru, tuti uru kontaio urutang riwanai ahang kaha mae, utubapa utamamifoi tuti wa itomungfi nai foi, uraria Yesusi.

Yesusi deunau tuti niari kaiwasa emaninang bitoya ebeng

(Lukasi 6:17-19)

23Yesusi da wari nu Galilea foi tuti deunau na munu agama Yahudi fo. Deiriri Kaiwo Mahikai fo kariri todoni Allai ambori weMananu ki. Kontai niari kaiwasa emaninang fosa ebeng weru maninang bodoni konta foi. 24Kaiwo kariri Yesusi fo dafai wariai na nu Siria foi sentenang, ampafe kaiwasa bitoya era ruhiai ma, eha inontarai fuba emaninang fosa tuti mano maninangfo wedaya esodai dadira fosa we Yesusi ma. Kaiwasa nuaninu karira dohonsa fosa, mano euremi marareha arora fosa, mano efaya fosa, kaiwasa fuba nani kiai Yesusi niarisa ebeng. 25Kaiwasa bitoya paria era ria Yesusi na rabuang bonani. Manea era na Galilea ma, manea na Dekapolisi, manea na Yerusalemi, manea na Yudea tuti manea kontai na waya Yardeni dereung do murang foi.

موجودہ انتخاب:

Matiusi 4: amk

سرخی

شئیر

کاپی